اليوم الاخير تيرانا
كان عندي حجز في سبا فندق Xheko Imperial hotel الصراحه السبا حقهم ولا غلطه فخم + خصوصيه يدخلونك المسبح لحالك و السونا و الجاكوزي و حمام تركي لحالك شي فاخر من الاخر مريح للنفسيه ( ماذكر سعره بس رخيص جدا على الخدمه)






المعذره على ردائه الصور لانها سكرين شت من فيديو اذا ماخنتني الذاكره ان هذا كله 3 ساعات لك لحالك 60 يورو
طلعت من عندهم و بقي لي اصعب مهمه اروح ادور مواصلات توديني بكره للجبل الاسود(منتينقرو) موظف الاستقبال قالي محطه كازا ايطاليا اسمها كذا اطلب من التكسي يوديك لها و هناك احجز و كتب لي اسمها على شان ماغلط فيها

قالي وري سواق التكسي هذي و مالك شغل.
وصلت موقف حافلات و فيه مكاتب كثيره كانت وجهتي بكره مدينه اولسيني او كما ينطقونها اولشيني في الجبل الاسود لقيت مكتب و قالي موجود يوميا الساعه 3 العصر مو لازم تحجز تعال على الموعد و اركب بس ولاكن الحافله توقف في مدينه شكودرا الالبانيه لدقائق توكلت على الله و قلت خلاص الوعد بكره الظهر اكون عندكم .
توكلت على الله الي ساحه سكاندربج وسط تيرانا قلت اصلي بالمسجد الي في طرف الساحه خصوصا انه يوم عاشورا و الناس صايمه اشوف المظاهر الاسلاميه و اتعرف على مسلمين البلد الي كله مسلمين لاكن للاسم ماشفت مظاهر للاسلام فيه😭

للاسف في يوم عاشورا مالقيت في المسجد الي5 رجال من فرحتهم فيني عطوني اكتب ذكريات يوم عرفو اني سعودي اذن بعدها مباشره الاقامه مابينهم وقت.
طلعت من المسجد اتجهت يمين فيه مول طخم يقال انه 4 اكبر مول في اوروبا و الله اعلم تسكعت شوي بالمول و سبق لي رحت مول بوابه تيرانا اصغر من هذا شوي المهم اشتريت من المول اغراض من اديداس اسعارهم اقل من السعوديه ب50٪ ليس فقط اديداس جميع الماركات ارخص من السعوديه( الي جاي لا يشتري من السعوديه)
انتهيت من المول حولين الساحه كثير مطاعم و شارع ابراهيم رجوفا مليان قهاوي فيه مقهي ايطالي فاخر اذا ماخانتني الذاكره اسمه ايطالين كفي

هذي صورته ماذكر اسمه بس سويتاتهم جباره.
و في الليل كنت في للونج نفس فندق السبا الي كنت فيه الصباح Imperial hotel للونج بالسطوح فيه مطعم سوشي للي يحبه و جلسه مطله على اكثر شارع حيوي في البانيا شارع ابراهيم رجوفا

البانيا
المميزات و العيوب
المميزات
الميزه الوحيده بالنسبه لي الرخص فقط ولاكن عندهم طبيعه جميله في مدينه اشكودرا هي بديل رخيص للنمسا و سويسرا طبعا انا( اكره الطبيعه ولا تستهويني) انا من عشاق البحر و العواصم
السلبيات
الشعب اقشر مع اني لم اتصادم معهم نهائيا ولاكن احس لو تصادمت ممكن انذبح لانهم جلوف ولاكن مو اقشر شعب واجهته في رحلتي في اقشر منهم.
ولاكن الشعب الالباني يبدولي والله اعلم انه يفوز بالمركز الاول في العالم بالغباء😂 كنت اتصور ان الاتراك اغبي الشعوب بس اتضح لي هذولا اغبي منهم شوي.
امثله حصلت معي تاكد لي غباء الشعب
1/ في المطاعم و الكفيهات و الاماكن العامه و سواقين التكاسي يتكلم معك بللغته و انت مو فاهمه و يرجع يعيد الكلام مره ثانيه و يسترسل بالحديث هذي عندهم و عند الاتراك لاحظتها باقي الشعوب اذا حسك مو فاهمه يتحول للغه الاشاره😂.
2/ مره دخلت مطعم و شفت طاوله بعيده عني فيها 4 اشخاص منزلين صحن مشاوي كبير يحبه قلبكم😂 اشتهيته الصراحه😂 تكلمت مع الجرسون بصوت منخفض قلت له شايف هذاك الصحن ابي زييه بس صغير راح اخذ الصحن من طاوله الناس و هم ياكلون و جابه عندي😂 و يبربر بللغته مادري وش يقول😂 و الناس اصحاب الصحن تشوفني😡 انحرجت منهم ماعرف وش اسوي اتاسف منهم او حتا هم يطلعون دبش مثله😂 جلست العب بجوالي😂
3\ في دورس المدينه الساحليه طلبت بيبسي مع ثلج جاب الثلج لحاله و البيبسي بعد ربع ساعه بعد ماتحول الثلج الي ماء.
4/ اللونجات و القهاوي في شارع ابراهيم جرفا امر من قدامها50٪ من الطاولات فاضيه مايدخلك لازم حجز طيب فاضي قدامي و الوقت متاخر الي ماجاء للان ماراح يجي يرفض(على قوله المصرين حافض مش فاهم) طيب ابي حجز لبكره يقول عن طريق الانستقرام طيب ليش انستقرام انا بشحمي و دمي قدامك الان لا
5\ مره سالت جرسون كم يبي له الطلب قالي اذا خلص اجيبه( يعني انثبر و اسكت)

مظاهر الاسلام
للاسف 0٪ في عاصمه دوله اسلاميه ماشفت الي مسجدين و واحد منهم جيت اصلي فيه مسكر الثاني الي صليت فيه ماكملنا نص صف لانه مسجد تاريخي و سياحي تدخل ناس تتصور و تطلع شفت الكنايس اكثر من المساجد الحجاب شبه معدوم مابالغ لو قلت ماشفت الي حرمتين محجبات شفت المحجباب في للندن و باريس اكثر من تيرانا في اكثر من مطعم مريت عليه يقدم للحم الخنزير اكرمكم الله

صحيت تسكع بساحه الاسكندر و جلسه بالكفيهات و غداء سريع و التوجه للموقف الحافلات وصلت نفس المكتب الي امس تذكره من تيرانا الي اولسيني ب25 يورو و طمنتني الموظفه انه ماراح يوقف في مدينه اشكودرا لانه اصلا مافي ركاب على هل مدينه ولا في ركاب على اولسيني غيرك فيه كم راكب رايحين مدينه بودفا في الحبل الاسود و الطريق غصب بيمر على شكودرا و اولسيني انت انزل في اولسيني من حسن الحظ انه مافي ركاب يعني ماراح يطلون لنا باصup/uploads/arabtrvl16679613372183.jpeg[/IMG] بيطلعونا في فان مرسيدس😍 قلت نعمه احسن من الباص نفس هذا

الفان بطل بصراحه مريح و اسرع من الباص عددنا ماوصل8 اشخاص الاشهب الوحيد انا البقيه كلهم اوروبين😂
لمن قربنا من اشكودرا بانت الطبيعه و تغير الجو و بداء المطر ( طبعا لا تسهويني الطبيعه) ولاكن لعشاقها اشكودرا خيار ممتاز و رخيص بديل للنمساء و سويسرا خصوصا انها مليانه اكواخ نفس الموجوده في منطقه الالب










طبعا وصلنا للحدود بساعه و نص تقريبا السيارات الصغيره تدخل للكاونتر الباصات توقف على جنب و ينزلون الركاب طبعا سحبو جوازاتنا في المكتب قبل تحرك السياره من تيرانا وقفنا على جنب و نزل سواقنا معه جوازات المجموعه كامله يدخلها للمكتب طبعا الاشهب ابن الصحراء لازم يخنبق😂 لقيت بجيبي عمله البانيه باقيه معي قلت حرام اخليها اروح للبقاله اخذ اقل شي شبسات اخليها معي😂 رحت اخذت و رجعت لقيت العسكري حق الجبل الاسود معصب على انا😡 يقول وينك قلت له ابي حمام و رحت😂 طيب والكيس الي معك😂 قالي ممنوع التصوير منطقه حدوديه امسح الصور قلت ماصورت اصلا😂 طبعا رجع الجوازات كل واحد و جوازه الي انا باقي حوازي معه في يده قالي معك فيزا للجبل الاسود؟( السعودين يدخلون الجبل الاسود بدون فيزا) ماحبيت اقوله انه ماحتاح فيزا خفت يشخصن الامور قلت له معي شنقل قالي لا فيزا للحبل الاسود اعد عليه الكلام معي شنقل عاد كلامه للمره الثالثه معك فيزا للحبل الاسود؟ هنا خلاص لابد التصادم و الي يصير يصير قلت له انا سعودي و ماحتاج فيزا لدخول الجبل الاسود و فوق هذا معي شنقل😡 طالع فيني نظره غريبه و قالي لا تتحرك خليك واقف ( طبعا المجموعه كلهم بالسياره يستنوني) انا ماخرهم و معصب السواق على😂 دخل ماخذ دقيقتين طلع و عينه مكسوره مد لي الحواز اخذته بدون ماقول شكرا😂( عز يالسعوديه) ركبت تاسفت من المجموعه و دخلنا،
هنا حصلت اول نكبه😡
بحكم ان سفري دايم لحالي و بدون تخطيط ولا ترتيب اكتشفت طريقه فعاله لحجز الفنادق ولاكن ماتنجح الي اذا كان شخص واحد اني اوصل للمدينه الي ابيها و ابدا بحث فندق فيها يعني في نص اليوم ابحث عن حجز في نفس اليوم و اتوجهه له مباشره تطلع لك عروض خاصه كثير يوم دخلت الجبل الاسود قلت بسم الله الان ابحث عن فندق الشريحه الي اشتريتها من مطار تيرانا الي قالو لي تستغل في دول البلقان كامله طفت نصب ماتشتغل الي في البانيا فقط مافي نت السريحه السعوديه ماشتغلت بعد 😡 الامور سهلات خفيف لحالي ماشيل هم نفسي قلت الان ينزلني بالموقف و القي الف قهوه اجلس و اطلب قهوه و اشبك على نتهم و احجز سهله😂 بعد اقل من نص ساعه وقف السواق في برحه فاضيه و التفت لي قالي انزل😳 ليش وش سويت 😳 قال هذي اولسيني 😳 يابو الشباب هذي برحه فاضيه وين الموقف و الباصات قال فيما معناه انزل ولا يكثر هذي ديرتك خذ تكسى ورانا خط الي بودفا

نزلت مع عفشي بالبرحه اسحب الشنطه و صلت دوار كيف اقطعه ولاكن مشت الامور😂

مشيت مسافه كيلو طبعا قطعت شارع و دوار و حاله لقيت قهوه حجزت فندق الحمد لله فتحت اوبر ابي تكسي اوبر باشتغل عندهم😭 طلبت من العامل يتصل على تكسي قال ماعندنا هذا النظام قال رح له انت بالموقف يبعد كيلو اوكيه رايح بس خلي الشنطه عندك احيبه اجي اخذها و نروح رحت دورته لقيته اخذته رجعني للقهوه و بعدها اعطبته عنوان الفندق قال ماعرفه ماقدر اوديك😭 اخذ5 يورو و نزلني لازم ارحع للموقف من جديد😂 اخذت تكسي ثاني و ارجع للفندق الصدمه الثانيه الفندق مايقبل الي كاش و اصلا الفندق ماعجبني قلت لكم تقيم البلقان تعبان شوي بالفنادق غيرت الفندق اخذت فندق مكتب انه يبعد800 متر عن البحر ولاكن لاتنسون البلد اسمه الجبل الاسود يعني دوله كامله جبل مافيها شارع متساوي اما طلوع او نزول 800 عن البحر يعني كل شوي تقطع شارع و تنزل درج شارع درج شارع درج تحتاج لياقه😂 الميزه الوحيده في البلد الي زي هذا ان البلد كلها على البحر مافي غرفه بالبلد مو مطله


بعد ماريحت شوي جات النكبه الكبري😭
انا معتمد على بطاقه السفر من البنك السعودي للاستثمار جيت ابي اشحنها ماقدرت😡 جوالي السعودي مو راضي يفتح محتاج رمز التفعيل على شان اشحن😡 حاولت بجوالي بدلت الشبكات يدوي مافي فايده 😡تواصلت مع موبايلي عن طريق خدمه العملاء بالوتساب و التويتر برضه مافي فايده يصرفني يقول بدل شبكات يدوي لين تلقح معك شبكه ولاوحده اشتغلت اقتنعت انه ماينفعون هذولا كلمت اخوي قلت له انقز اقرب فرع موبايلي شف وش سالفه رقمي مو راضي يشتغل و انا مفعل خدمه التجوال ماقصر رح لهم قالم اخوي متورط في الحبل الاسود مامعه فلوس البنك يرسل كود على رقمه. بعد شوي جاء الرد الصادم لمن راح قالو له مو اول واحد يجي تصير معه موبايلي تشتغل في اسرائيل لها شركاء بس في كوسوفو و الجبل الاسود ماعندنا شركاء قاله الحل ان اخوك يسوي لك وكاله تروح تحول رقمه الي stc و ترسل له الشريحه قلت ارجع اغيرها بنفسي اسهل😂
اذا بتروح البلقان حول جوالك علىstcلا تاخذ موبايلي

ما شاء الله .. مغامرات يا أبو فهد
في السفر لابد من وجود أكثر من بطاقة للصرف لتفادي الوقوع في مواقف غير متوقعة
خصوصاً عندما يكون السفر لدول جديدة أو غير معروفة على الخارطة السياحية

بسردك الشيق حمستنا للمتابعة لمعرفة باقي الأحداث فنحن أمام 60 يوماً من المتعة

اولسيني او اولشيني كما يسمونها اهلها مدينه صغيره على جبل و بحر مبانيها و شوارعها ذكرتني في بلودان الله يردها بس هذي على بحر و مدينه صاخبه جدا جدا في الليل و النهار كانها بتايا بالصخب الي فيها الي مايحب البحر و العوائل ماتنفع لهم مع ان اهلها مسلمين اصولهم البان و منتشر فيها المساجد كل 200 متر مسجد و تسمع الاذان فيها حتا صلاه الفجر ولاكن تسمع الاذان مع الاغاني بوقت واحد😂 صليت جمعه عندهم صلاتهم غريبه الصراحه مافهمتها الخطيب يقراء قران بعدين يوقف و بعدها الخطبه الاولي و يوقف وقت طويل حسبت خلاص بعدها الخطبه الثانيه نص المصلين لابسين شورتات في الدور الثاني للمسجد رجال و حريم مع بعض لاصقين في بعض رجال يصلي و الي جنبه حرمه😳












مدينه عدد الشواطئ الي فيها مخصصه للسباحه اكثر من عدد الناس في مكان صغير اكثر من 40 شاطئ كلها نطيفه و مستغله و جميله لعشاق البحر فيها مدينه قديمه و قلعه و شوي بازارات .
الشارع الرئيسي في وسط المدينه في الليل يمنع دخول السيارات و يتحول الي ممشي و القهاوي الي فيه تطلع الطاولات برا