بودفا المدينه الاجمل و الاكثر فعاليات و سياح في جمهوريه الجبل الاسود.
الطريق من كوتور الي بودفا قصير ولاكنه ممتع جبل + بحر كله جزر كل جزيره جايه على شكل جبل في البحر على رغم وعورته و انه رايح جاي ولاكن المناطر ودك انه 1000 كيلو .



يحكي ان هذه الجزيره الموصوله بجسر كانت في يوم من الايام سجن و من شروط السجان انه مايعرف يسبح ولاكن مع الزمن فتحت للسباح و وصلت بجسر
بودفا مدينه صغيره بس اكبر من كوتور جميله بشواطيها و مدينتها القديمه و مطاعمها و قهويها المنتشره على الشاطئ يكفيك الجلوس في قهوه ماتشتهي تقوم و تتحرك منه ابد الي المساء و تتجول في المدينه القديمه و ترحع تجلس بالليل في قهاوي المدينه القديمه .

















طبعا اذا مشيت على شاطيهم الجميل تلقي مكاتب السياحه تقدر تحجز من عندهم اي فعاليه تبيها دباب بحر او براشوت او غوص او جوله بحريه اسعارهم تختلف عن بعض طبعا انا حجزت رحله اليوم الكامل رحله في خليج كوتور مع الكهف الازرق كهف جميل داخل البحر 60 يورو يوم كامل الابحار يكون من كوتور و المارينا لتقون واقف فيها التكسي البحري تتفق معه زي ماتبي اي حزيره ولاكن تقدر تروح الجبل الي بالنص الكبير يسمونه شاطئ ميامي رايح جاي 5 يورو و الجزيره مليانه شواطئ تقدر تستاجر كرسي و فيها مطعم و كشكات يبيعون مشاريب عموما بودفا اغلا بشوي من اولسيني

في يوم اخترت اني اروح رحله للكهف الازرق اذا ماخانتني الذاكره 60 يورو قيمتها التجمع 9 الصباح و نطلع باصات الي كوتور و جوله في المدينه القديمه في كوتور و الابحار من مرسي كوتور نشوف الخليج الي يعد من اجمل خلجان العالم و الوقوف بجزيره صغيره مره نفس الشي قالو كانت سجن ولاكن حاليا مافيها غير كنيسه و كشك تذكارات للكنيسه بعدها نمشي بالخليج الي ان تبان لنا جبال كرواتيا بعدها ننزل الي قوارب صغيره لان قاربنا مايدخل للكهف كبير و نرجع للقارب و نوقف في مدينه مدري وش اسمها صعب للغداء و السباحه في شاطيها و بعدها نرجع للباص و على بودفا.
طبعا مايحتاج اقولكم اني اخرتهم و عصبو على الركاب و المنظمين حتا السواق😂 العدد جدا كبير كنا 3 باصات كبيره
اخذو مننا كل واحد يورو يقلون حق ضريبه مدينه كوتور و اعطونا خريطه ورقيه لمدينه كوتور( مدري من يستخدمها الي الان)



نزلنا و قفنا قدام سور المدينه القديمه و وزعو الخرايط و حددو موعد الرجعه انه نتجمع في نفس المكان و قالت بالمايك بصوت عالي ان الرحله البحريه ماراح تتاخر على شان شخصين بس🤣( طبعا معرف تقصد مين) اياك اعني و اسمعي ياجاره.
في كوتور جلست في قهوه الان جايها و عارفها طبعا لو ماجيتها هذي الرحله تغني عن روحه كوتور.
تجمعنا بالموعد توجهنا للقارب كان 3 ادوار فيه مطعم خايس في الدور الارضي كانت المرشده ماسكه المايك و تشرح عن كل جبل طبعا شي مزعج مابي اعرف الجبال ابي استمتع بجمال الخليج الدورين الي فوق للتشميس .








جلسنا في جزيره الكنيسه تقريبا ساعه و بعدها كملنا الي وصلنا منطقه لازم ننزل على قوارب صغيره على شان ندخل للكهف الازرق بقوارب صغيره و ننسدح وقت الدخول لانه مره ضيق لاكن من جوا وسيع و الشمس تدخل مع الفتحه الصغيره و انعكسها بالماء يطلع منها اضائه زرقه خرافيه.






سبحنا حدود الساعه داخل الكهف كانت تجربه جميله طبعا رحت لكهف ثاني زيه في كرواتيا بس حق كرواتيا ممنوع السباحه فيه
بعدها ودونا مدينه اسمها صعب و طويل الي يبي يتغداء و الي يبي يسبح تغدينا و سبحنا و رجعنا الي كوتور في نفس الخليج الجميل.



بعد المدينه هذي رجعنا الي مارينا كوتور طبعا طول ماحنا ماشين بالخليج نشطف كروزات نسلم عليهم و يسلمون علينا حسيت شعور عيال المدارس الاهليه و عيال المدارس الحكوميه😂
و هذا يستقبلنا في المارينا يعزف لنا😍


و على الباص على بودفا رحله ماذكر 60 يورو على الشخص او الشخصين ولاكن اقرب انها للشخص الواحد اهم شي فيها60😂 عموما رحله تستاهل مناظر خرافيه
بودفا
مدينه جميله من اجمل المدن الي مريتها في حياتي( كنت افكر استقر بعد التقاعد في ماربيا ولاكن حاليا بودفا مرشحه بقوه لتكون مدينه الاستقرار بعد التقاعد) تنفع لجميع فئات المحتمع عوائل شباب حريم لحالهم شيبان ……. الخ ترضي الجميع و بكذا انتهت 10 ايام جميله في بودفا و انتهت رحله الجبل الاسود

الأسعار مقبولة جداً للفعاليات
لو حركوا وتركوك ما تأخر مرة ثانية هههههه
الخلجان أجمل من الجبال بالطبع
لكن واضح البنية التحتية عندهم تحتاج لتحديث

ما شاء الله يا أبو بدر ... تجارب و فعاليات شيقة
و بصراحة مثل هالرحلات ما تنفع إلا لشخص لحاله أو شخصين (مثل زوجين)
مو كبار في السن بس يكونون بدون أرتباطات و يستمتعون بمثل هالرحلات

أهنئيك على هالأختيار الموفق للسياحة .. و أشكرك على منحنا الفرصة للتعرف
على دول غير معروفة سياحياً خصوصاً للسياح العرب

واصل فما زلنا مستمتعين بالرحلة ...

في اخر ايامي في بودفا جاني صاحبي جلس معي كم يوم و كنا متفقين بعد بودفا تكون المحطه مدينه دوبرفينيك الكرواتيه🇭🇷 فيه باصات بشكل يومي من بودفا الي دوبرفينيك يوميا ب25 يورو من شركه فلكس باص اشهر شركه نقل باصات في اوروبا بس انا وصاحبي لقينا مكتب تاجير سيارات اتفقنا معه ناخذ سياره فل تامين و تسليم في دوبرفينيك ب80 يورو اتفقنا معهم و دفعنا للمكتب عربون 10 يورو على اساس تجي السياره الساعه9 الصباح للفندق و نسوي العقد باللوبي و ندفع باقي المبلغ و نتوكل على الله نمسك الخط الي دوبرفينيك.
طبعا مايحتاج اقولكم انه كبرنا المخده و نمنا و صاحب السياره يتصل و مانرد عليه الين راح و صحينا 11 رحعنا اتصلنا عليه قال السياره المتفق عليها مارديتو و جاء زبون اخذها بس عطوني ساعه ابي ادبر لكم نفسها قلنا تم و فعلا بعد ساعه جاء نزلنا و سلمنا الفندق و حملنا عفشنا بالسياره و طلع العقد و قعته و انتهيت ورحت اوصل السواق للمكتب حقه ننزله و نمشي قبل ينزل بثانيه طلبت منه يرسل لي للوكيشن المكتب في دوبرفينك الي راح نسلم السياره فيه قالي مافي مكتب😳 كيف متفقين التسليم في دوبرفينيك قال مستحيل هذي دوله و ذيك دوله تروح و ترجع في شرق اوروبا مافي هذا النظام نفس غرب اوروبا مستحيل الكلام الي تقولون عنه احد يسويه لكم في شرق اوروبا وقنا للحظه اشوف صاحبي و اتفاهم معه صاحبي اقترح نمدد العقد و نروح دوبرفينيك و نرجع( مو صاحي) نروح و نرجع و بعدين نرجع مره ثانيه بالباص مستحيل نجلس يوم زياده و نطلع بالباص مره وحده و صاحبي ملزم و انا رافض اروح و ارجع جالس احاول فيه و هو يحاول فيني ( خطته ولا بريال)نروح و نرجع مباشره فتحت الخريطه و جلست اتفرج وش فيه شي قريب طبعا الخريطه و خريطه السناب مشيت عليها كثير في هل سفره المهم و انا اقلب بالخريطه عيني طاحت على سرايفو😍تبعد 280 كياو ماكانت بالخطه عرضت على صاحبي رفض رفض شديد طيب وش الحل قال نجلس يوم زياده في بودفا و بكره نطلع باص الي دوبر فينيك انا رفضت نجلس يوم خلاص سكرنا عفشنا و سلمنا فندقنا و جالس اقنع فيه في هذه اللحظه كانه السواق فهم كلامنا او فهم سرايفو فقط صار يتكلم بصوت عالي قال تروحون البوسنه قلنا ممكن ليش لا نتشاور الي الان ماقررنا و سفهته عصب و صار يتكلم بصوت عالي يقول السياره هذي فيها جهاز تتبع و جهاز تحكم عن بعد اقدر اطفيها عليكم لو رحتو فيها غير كرواتيا😡 عطينه نظره ازدراء و قلت له و بعدين طفيتها مثلا وش بتسوي بعدها؟ انا ابي ارمي الفتاح في اقرب زباله و اطلع اقرب مطار انت الي تبي تتعب تجي تدورها😂 عصب و طلب تامين 500 يورو كاش قال اعطوني 500 خلوها معي اذا رجعتو ارجعها 😡 شفت اسلوبه وقح قلت هات العقد الي معك ابي اشوف وش مكتوب فيه اعطاني العقد اخذته شقيته😂(جاين برحله مفتوحه ماندري وين روح) مو انت الي تحدد مساري يوم شقيت الورقه قالي انزل😂 طيب رجعني للفندق معنا شناط😂 عيا نزلنا بالشارع مع شناطنا😂 اخذنا تكسي للفندق و حطينا العفش عندهم باللوبي 😭طلعنا ندور مكاتب تاجير سيارات طحنا بشارع كله مكاتب بس مالقينا ولا سياره بسبب انه كان يوم جمعه طبعا حتا ماعندهم سيارات سالت عن موضوع التسليم في دوبر فينيك كلهم اتفقو ان شرق اوروبا ماعنده الخدمه هذي و خصوصا انها مكاتب فرديه مو شركات عالميه مشينا اكثر من 7 مكاتب كلهم ماعندهم الين لقيت مكتب عنده قالي سياره ديهاتسو و تطلع للبوسنه و كرواتيا ولاكن لابد ترجعها هنا مافي تسليم هناك قلت تم خلاص قالي سياره جيب ديهاتسو قير عادي ب37 يورو تامين شامل انا بصراحه مادري وشو الديهاتسو بس مافي غيره سالته عن الموديل هو بنفسه مايعرف قالي مادري قلت هاته موافق وقعت العقد و دفعت الفلوس و انا ماشفته يوم شفته اطلقت عليه اسم( قرنبعانو)

ركبنا قرنبعانو انا و صاحبي و حركنا الي الان مو متفقين نروح سرايفو او دوبرفينيك اقتنع صاحبي انه نروح سرايفو كم يوم و نرجع لان لابد من تسليم السياره بعدها نروح دوبرفينيك بالباص اخيرا قدرت اقنعه و افوز عليه😍 توجهنا للفندق اخذنا عفشنا بسرعه و حملنها بقرنبعانو و حركنا كانت الساعه 3 العصر بالظبط طبعا الطريق280 كيلو يعني بسيطه وادعنا بودفا الخط دخلنا كوتور مره ثالثه نجي كوتور عصب عننا كان الطريق جميل الين اختفا البحر و ماشين وار النفقيشن وصلنا لمنظر بنورامي جميل الناس تصور عنده حنا فوق جبل و قدامنا بحيره كبيره نصها بالجبل الاسود نصها بالبوسنه😍


تصورنا عندها و عينا بانزين و كملنا الطريق الين طبينا بزحمه الطريق واقف و الناس تزل تمشي على رجولها شيكت بالخريطه الخط واقف9 كيلو و نهايه الزحمه هذي الحدود😡 زحمه مو طبيعيه الخط واقف نزلت مشيت مع الناس للمنفذ قلت دوله مسلمه اكيد القي بالمنفذ مسجد و دوره مياه الله يكرمكم و سبوبر ماركت و قهوه بعد مامشيت 9 كيلو مالقيت شي فقط كشكات الجوازات دخلت عليهم مشي😂 قلت وين دوره المياه قالي في الغابه😂 جلسنا في المنفذ 3 ساعات و نص اوسخ منفذ مريته في حياتي تذكرت طفولتي في منفذ حاله عمار و منفذ ضباء في ذيك الايام ارقي من هذا المنفذ😡





وصلنا الدور بعد اكثر من 3 ساعات مانزلنا من السياره موظف الجبل الاسود و موظف البوسنه في نفس الكشك مابينهم مسافه يخلص جوازك واحد يمده للثاني من شباب مافي تفتيش ولا شي سهلات ( يبدو لي ان المشكله من البوسنين ) موظف الحبل الاسود بشوش و يقابلك ببساشه و موظف البوسنه كانه عاض لليمونه ختو لنا و دخلنا اخيرا

دخلنا البوسنه بعد عطله اكثر من 3 ساعات لليل و ظلمه و خط عفن جدا رايح جاي و مكسر و منعطفات قويه بعضها كانها يوتير تخيل منعطف زي اليوتير و طلعه و قرنبعانو قير عادي😡 اتصور اسوا خطوط شفتها بالبوسنه ماشين لليل لقينا حصان وسط الخط واقف بعدها لقينا كلب الله يكرمكم تمر كم كيلو بدون ازفلت يعني لازم تكون نشيط و حنا المنفذ اكل جهدنا و جوعانين مرينا قوي كثيره نلقي مطعن نوقف تستاذنهم بالاول اننا نحمل يورو تعطونا شي ناكله تقبلونه رفضو كم واحد اخر شي قلتا سرايفو و ربك يحلها كملنا الطريق وصلنا فندقنا الساعه 1 بالليل يعني10 ساعات قطعنا فيها280 كيلو لان السرعه في البوسنه ماتجاوزنا 60 كيلو بسبب الطريق المكسر الي نصه مافيه ازفلت.
فندقنا كان في وسط المدينه جميل الصراحه حتا مرقعه جميل توفقنا فيه نمنا و صحيت اتمشي وسط المدينه عند سبيل سرايفو طبعا لابد من القهوه و الكباب البوسني




طبعا الجلسه وسط البلد حلوه عند السبيل تتفرج على الرايح و الجاي بس( بزارين الجماعه كثير&#128514 و انا من زمان ماشفتهم😂 كلها مطاعم و قهاوي و محلات تذكارات الجو حلو و ممطر فيه منتزه البوسه الوطني الدخول اذا مو غلطان 2 مارك عباره عن حديقه كبيره فيها نهر و بحيرات و قهوه تشبه للهايد بارك مالينها الجماعه ماشفت فيها غيرهم ماشفت بوسني الي الي يشتغلون😂


/up/uploads/arabtrvl166864957154753.jpeg[/IMG]
com/up/uploads/arabtrvl166864957168334.jpeg[/IMG]


من معالم سرايفو نفق الحريه بيت تحته نفق طويل كان يهرب منه السلاح ايام الحرب


فيه منتجع او ملاهي مدري وش يسمونها اسمها صني لاند فيها زحليقه نفس حقت زلامسي و مطعم فيه بوفيه مفتوحه الجلسه فيه حلوه تتقهوي على منظر طبيعي مادري عن الاكل ( ماشفت بوسني فيه)

فيه شلال لقيته بالخريطه قريب الطريق له وعر ولاكن جميل اذا وصلت لازم تمشي 3 كيلو بعدها تطلع جبل يكفي تروح تتفرج على الطريق و ترجع مايسوا الصراحه بقر كثير بالطريق و تطلع على الخط









فيه مول حديث وسط سرايفو كله ماركات و مطاعم و محلات صرافه الماركات ارخص مننا
و هذي سرايفو طبيعه+ رخص بديل رخيص للنمساء و سويسراء لابد يكون معك سياره على شان توصل الاماكن البعيده لابد تكون نشيط بالسواقه لازم شاب الي يسوق مو شايب لان السواقه صعبه الشعب البوسني اقشر شعب واجهته في حياتي الكل يهاوش ليش مادري حق مواقف السيارات يهاوش ماتدري ليش حق الفندق يهاوش مادري ليش تعودنا على الهواش

هذي مغامرة

مو راحه واستجمام هالسفره

مستمتعه بقراءة التقرير

طريقة السرد تخليني اضحك

بس حسافه الصور قليله

مستمتعين على هالتقرير الجميل يابوبدر ..

و فعلا انا جلست في هالمنفذ حدود ٣ ساعات .. على ان المنفذ في طريق زراعي .. الا انه زحمه .. و طبعا طرق البوسنه دمار ..

بالنسبة لي اخذت السياره من تيرانا و سلمتها في سراييفو