السلام عليكم ورحمه والله وبركاته

احب اشكر اعضاء العرب المسافرون بكل ماقدموه ولازالوا مستمرين في العطاء في هذا الصرح العظيم الي عرفته منذ سنه 2009 ميلادية يعني حوالي 13 سنه ومالي غنى عنه في ترتيب رحلاتي وسفراتي واختياراتي لكل شيء.

ان شاء الله في الصيف الجاي بسافر تايلند والخطه هي بوكيت وشنغماي وبانكوك

بكون انا وزوجتي وولدي طفل عمره 5 سنوات, ومع ترتيب الرحله والتخطيط لها والتنسيق تفاجئت من زوجتي تقولي ان صديقتها توها رجعت من هناك ومعاها اطفالها وان البلد لاتصلح للعوايل والاطفال وان في مناظر خادشه كثيره خصوصا في شوارع العرب والسواحل وان في مظاهر عري كثيره من الاجانب وانا للامانه اول مره بسافر تايلند بس البلد صارلي 13 سنه تابعتها عن بعد وسالت كثير من الاصحاب والاهل الي راحو, ولا مره طرو لي انهم شافو هالاشياء او بمعنى اصح هي موجوده في اماكن معينه واقات معينه واذا ابتعدت عن بعض المناطق او الاماكن او السواحل مابتشوف الى الي يسرك وانا مقتنع ان كل بلد فيه الجانب الجميل والجانب المظلم السيء يعني حتى لو غيرت الوجهه لاندوونيسيا مثلا اكيد في اماكن بها جانب سيء وجانب جميل.

ارجوا من اللي سافروا مع عوايلهم واطفالهم ينصحوني ويرشدوني ان كان في اشياء اتجنبها او اماكن او سواحل ابتعد عنها

وشكرا جزيلا لكم

جزاك الله خير اخوي الردادي على الرد والنصيحه وفعلا مثل ماتفضلت اصبحت هذه المظاهر منتشرة بكل مكان والواحد هو بنفسه يصنع له جدول لتجنب هالمناظر . ان شاء الله برتب وبخطط الرحله انها تكون بعيده عن هالاماكن وان شاء الله ما اواجه مشاكل . شكرا جزيلا لك اخي الفاضل.

السلام عليكم ورحمه الله وبركاته

اتفق مع الاخ alradadi ، للاسف بعض المناظر والمظاهر ماتناسبنا والواحد يحاول يتجنب بعض الاماكن قدر الامكان ( مثل البحر والجزر وبعض المناطق الحيويه خصوصا في فتره المساء ).


لكن بشكل عام تايلاند بلدها وشعبها لطيفين وتستحق الزياره.
وبالنسبه للسفر مع اطفال من وجهه نظري فيها وايد اماكن تنفع للعائلات وخصوصا الاطفال ( من واقع تجربتي بالسفر اليها مع طفلي ) وتايلند كبلد مهتم جدا بالاطفال من ناحيه الاماكن الترفيهيه او حتى بالمطاعم.


لكن من ناحيه اخرى، بعض الانشطه راح تكون صعبه مع وجود اطفال ( الا في حال التناوب على امساك الطفل ) وايضا زياره الجزر شوي صعبه الا اذا اقتصر الامر على جزيره واحده وعن طريق باخرة.


وبالتوفيق

سلام عليكم

بصرف النظر عما ستشاهده في السفر . فجميع بلدان العالم سترى المألوف وغير المألوف وهذا شي طبيعي .
ومالنا غير غض البصر . والابتعاد قدر الامكان عن الأماكن المشبوهة والتي فيها العري لبسهم المفضل .

نجي للكتكوت الصغير الله يحفظه .
أينما كانت وجهتكم . فبطبيعة الحال هو حيكون مبسوط برفقتكم . وعمره 5 سنوات أي شي ممكن يرضيه ويخليه ينبسط .

فكونوا مبسوطين بوجوده الله يحفظه .

ولتجعلوا سعادته جزء من سعادتكم وليس العكس ؟

رحلة سعيدة موفقة يارب . وبحكم تجربتي لأندونيسيا وتايلند . فأنصحك بتايلند وخاصة بوكيت .

وحتى أكون منصف ووجهة نظري الشخصية

بونشاك إندونيسيا لها عشق خاااااااص عندي . ولكن حقت روقان وجو واسترخاااااء وأكل ونوم .

مافيها فعاليات تذكر للأطفال . سوى سفاري فقط .

حياك الله شارع العرب
في النهار جميل جدا واول الليل بعدها لايصلح للعوائل
فيه اماكن جميله لايوجد بها خدش للحياء بعيد عن شواطئ بوكيت وغيرها
في بانكوك تحديدا الذهاب الى سفاري او حدائق او تمشيه في مولات
ام بي كي او سيام تاورز و الاوكاروم الي فيه واشياء جدا مناسبة للعوائل