رِحلَة كُوريَا الجَنوبيَّة - ( سِيئُول + جيجُو ) - يُوليُو 2022 - الصفحة 2

Boarding Pass · 31-01-2023, 04:12 AM

صباح الخيـر .. و نكمل لكم الحدّوتـَة

17 يوليو :
Manjanggul Cave
Seongsan Llchulbong
Kayak
Eco Land Theme Park

قبل حجز رحلتنا لجيجو جلست أشوف وضع التاكسي هناك و طلع فعلاً مو دائماً متوفر و صعب الواحد يحصله نفس سيئول و تواصلت مع الفندق و سألتهم عن أسعار السيارات الخاصة و طلع السعر مرتفع جداً خاصة إننا نحتاج سيارتين من سياراتهم ! و سألت أشخاص في سيئول عن توفر التاكسي هناك في حال كانت معلوماتي غير صحيحة ، و طلع فعلاً صعب !

قررت أدور شركة مناسبة ، لقيت في Tripadvisor أشخاص يعملون لحسابهم الخاص و مسوّين جدول ليوم واحد فقط و بنضطر نتواصل مع كذا واحد عشان باقي المناطق ، فما ارتحت نفسياً لهاذي الطريقة و حسيتها تضيع وقت ! و مالقيت إلا شركة واحدة فقط و اللي كانوا واضحين تماماً ، اتفقت معهم على سائق يتحدث الإنجليزية و سيارة كبيرة للجميع طوال فترة تواجدنا في جيجو ، من المطار إلى المطار يعني .. يومياً لمدة 8 ساعات .. و كان المبلغ 3300 ريال " أشوفه جداً مناسب .. سيارة فان كبيرة + 8 ساعات يومياً " .
أرسلوا لي جدول من عندهم و لكنّـي فضّلت أحذف و أضيف من عندي و أرسلت لهم الأماكن اللي أبيها و رتبوها لي بحيث تكون الأماكن قريبة من بعض ، و ما يضيع علينا وقت ، لأن جيجو كبيرة جداً جداً جداً ، أكبر من سيئول بثلاث مرّات !
و ما كان متوفر سائق يتحدث الإنجليزية ! فأرسلوا لي مرشد سياحي يتحدث الإنجليزية " بدون مقابل " و الصدق كان الموضوع ما يستاهل تواجد المرشد نهائياً ، بس حليل ، ما عم يشكي من شي !

نجي ليوم السفرة .. طيارتنا كانت الساعة 7 صباحاً ، صحينا الساعة 3:30 الفجر ، ضبطنا الأغراض اللي بناخذها معنا ، و خلينا باقي الشنط في الفندق ، وصل السائق الساعة 5 الفجر ، وصلنا المطار بعد ساعة تقريباً ، و كل الأمور متيسرة الحمدلله

شحنّا الشنط ، و دخلنا للصالات ننتظر الطيارة ، و أخذنا قهوة ، و حلى كان لذيذ جداً جداً و من لذته قرصني قلبي و قلت أرجع أتأكد إذا حلال أو لا ؟ و طلع بخط صغير جداً عند عفطة البلاستيك إنه يحتوي على جميع ما حرّم الله !

للي ودّه يشتغل أو يستكن

الشيء اللذيذ الحرام أستغفر الله !

كانت مدة الرحلة من سيئول إلى جيجو ساعة و عشر دقائق ، و الحمدلله كانت سريعة و لطيفة .

وصلنا و استقبلنا المرشد في جيجو بلوحة ترحيبية .. قبل السفرة سألوني الشركة وش حابّين نكتب في لوحة الاستقبال ! خليتهم يكتبون اسم خواتي الصغار !

الفندق حقنا كان بعيد شوي فقررنا حفاظاً على الوقت إننا نزور كم منطقة سياحية .. خاصة إننا شبعانين نوم ، و مصحصحين .. طبعاً أغلب الفنادق و المنتجعات بعيدة شوي عن المدينة ، خاصة إذا فضّلت تكون الإطلالة على مناظر طبيعة .

المشوار الأول كان إلى Manjanggul Cave ، واحد من أطول كهوف الحمم البركانيّة العشرة في العالم ، عُيّن من قبل اليونسكو كموقعٍ للتراث الطبيعي في جزيرة جيجو ، سعر تذكرة الدخول للكبار 4 آلاف وون ( 12 ريال ) وَ في أغلب الأماكن السياحية في جيجو أختي الصغيرة سعر تذكرتها أرخص ( عمرها 17 سنة ) ، تذكرة المراهقين نصف سعر الكبار ! قالنا هالمعلومة المرشد السياحي .. فصورة من الجواز مهمة في حال العمر تحت الـ 18 سنة ، و كذلك للي أعمارهم تحت 21 لهم سعر أقل من الكبار .

المشوار الثاني كان Seongsan Llchulbong ، عبارة عن مخروط من التوليفات البدائية يتكون من ثورات بركانية مائية على قاع البحر الضحل منذ حوالي 5 آلاف سنة .. التذكرة كانت للشخص البالغ 2000 وون ( 7 ريال ) ، تحتاج لياقة بدنية مرة ، تفرقنا حنّا و كل واحد وصل لمسافة مختلفة ، يوم عجزنا نكمله كله ، دحدرنا و رحنا أخذنا آيسكريم بالمندرين و نرجّع السعرات اللي حرقناهن !

محل Souvenirs

صورة تسبب راحة نفسية

بعدها قلنا للمرشد نبغى مطعم شعبي تقليدي و يقدم أطباق خاصة بجيجو ، و الحمدالله كان مأكولات بحرية ، و بلغهم إننا مسلمين و كثير أشياء ما نآكلها ، و ضبطونا .. طلبنا كان ( سمك سبار مشوي كامل وَ غالتشي جوريم اللي هو سمك مطهو ببطء مع صوص حار على الطريقة الكورية ) ، طبعاً بهالرحلة كل مارحنا مكان قدموا لنا نفس الأطباق لأنها أطباقهم التقليدية و الصدق ما غيرنا عشان ما نبلش بطعم شيء غريب ، اعتدنا هالطلب !

و انطلقنا للمشوار الثالث و كان للـ Kayak ، سعر التجديف أذكر نصف ساعة بأقل من 40 ريال ، بس فعلياً ما كنت مركزة لأني خفت على أهلي و هم راكبينها و بلشت أراقبهم بس أذكر كانت رخيصة جداً جداً .

طبعاً فيه أماكن كثييييييييرة بجيجو للتجديف ، و لكن اخترنا هذا بالذات لأن القوارب شفافة + المسافة تبع تدرج الموية من القليل للعميق كبير جداً يعني الموية العميقة بعييييدة ، فصعب خواتي الصغار يوصلون للمنطقة العميقة ، لأنهم ممكن يلعبون و يستهبلون و يقلبون عشان كذا ارتحنا لهذا المكان .. أما أخوي فوصل للمكان البعيد بس أخذ وقت طويل جداً .

أما المشوار الأخير قبل الفندق كان Eco Land Theme Park ، يالله يالله يالله على جمال هالمكان ، رايق رايق رايق رايق ، فعلياً أحسه مظلوم حتى الصور الموجودة عنه غير عن الحقيقة ! المكان فيه فندق وَ فيه golf club وَ المكان اللي زرناه هو الـ theme park .. المكان كبير جداً و فيه 5 محطات كبيرة ، تنتقل لها عن طريق القطار البريطاني القديم ، تآخذ وقتك تماماً في كل محطة ، مافيه وقت محدد !
سعر الدخول للكبار كان 14000 وون ( 43 ريال ) ، و من الـ 13 سنة حتى الـ 18 سنة 12000 وون ( 37 ريال ) ، و من 3 سنوات حتـى 12 سنـة 10000 وون ( 31 ريال ) .

دورة المياه و أنتم بكرامة !

و هذا اللي أخذوه خواتي من محلات الـهدايا التذكارية لليوم الأول

خلصنا و قررنا نروح للفندق و مع كل هالمشاوير لسّى النهار ما خلص !
وصلنا الفندق و فعلياً بعيد جداً لأنه بغابة ، بس كان جمييييل .. إجراءات الدخول سريعة الحمدلله .. بلغونا إنه فيه سيارة بساعات معينة تروح للسوبر ماركت في لازم نبلغهم قبلها وقت طويل ، لأن السيارة صغيرة جداً ! كذلك عندهم جدول لدخول الغابة مع مرشد و خطر يدخل أحد لحاله .. كان حلوووووووووووو مرة ، فعلياً كل مازانت السالفة دخلناها مع المرشد ، كان شعور حلو تدخل غابة حقيقية .. كذلك فيه في اللوبي ميني بار فيه آيسكريم و سناك و قهوة ، و لكن يسكر بدري !

الفندق :
3 ليال ( من 17 يوليو - 20 يوليو / جيجو )
5 نجوم - WE HOTEL JEJU
تم الحجز عن طريق موقع بوكينق .
الغرف :
غرفة سوبيريور توأم مع إطلالة على البحر .
غرفة سوبيريور توأم مع إطلالة على البحر لـ3 أشخاص .
السعر :
4542 ريال .
أسكن فيه مرة ثانية ؟
مليووووون بالمية ، يطل على غابة و بحر و جبل ، و بمنطقة مرتفعة و ضباب صبح و ليل

و فنجان قهوة تركي قبل نرتب الأغراض و ننام

namareq, AL Tunaiji, توبليرون و 3 آخرون معجبون بهذا.

Boarding Pass · 31-01-2023, 04:24 AM

اقتباس : المشاركة الأصلية كتبت بواسطة آخـــرفـــرصـــة

ما شاء الله عليك
ابداع في عرض التقرير بأسلوب جذاب
رغم أنك تقولين هذا أول تقرير لي

كسبناك كاتبة تقارير في طريقها للاحتراف
بس عاد شوفي كم مبلغ العقد
يمكن الاستعانة بـ رونالدو

تقريرك جاء في وقته
لأن أخوي مسافر 27 فبراير لكوريا
ويحتاج معلومات حديثة

المشكلة الرئيسية في اللغة
ولا الأكل الواحد يدبر نفسه لو من السوبرماركت

اختيار موفق للفندق
ومتابعين معاكم تفاصيل الرحلة المشوقة

شكراً جزيلاً

أكتب بس تقارير مالية و لكن نعيد النظر و نكتب تقارير سفر في حال وجود مدخول مادّي من تقارير السفر

بالعكس إذا تخطّى فقرة الأكل ، معناها انتهت المشكلة ، اللغة سهالات يتابع كم دراما كورية و يمشّي وضعه

حياك الله

آخـــرفـــرصـــة, توبليرون و عبدالرحمن الصلال معجبون بهذا.

Boarding Pass · 31-01-2023, 05:20 AM

18 يوليو :
Cheonjiyeon Waterfall
Jeongbang water Falls
Alive Museum & Alive kart
Jusangjeolli Cliff

قمنا وقت صلاة الفجر ، شبعانين نوم ، تقهوينا ، و نزلنا نتمشى حول الفندق ، و رجعنا نتجهز لمَّا يجي السواق الساعة 11 ..

كنّا مخططين نروح مقهى و يبيع مخبوزات خاصة فيه و لما وصلنا طلع مسكر كان بجنبه مطعم بيتزا ، توهم فاتحين و فيه موظف واحد فقط ، دخلنا طلبنا .. اللي أخذ الطلب انحاس وزاد الطلب ! و طلبنا يكنسلها .. قال بيكلم المدير يجي لأن رمز الكود حق الحذف معه ! و يبيله وقت عشان يوصل ! قلنا له خلاص لا تكنسلها ، ما نبي نضيع الوقت .. تغدينا وكان لذيييذ و رخيص كالعادة و أخذنا الباقي معنا .

انطلقنا لأول مشوار اللي هو Cheonjiyeon Waterfall ، سعر الدخول 2000 وون للشخص ( 6 ريال ) ، أعجبني الطريق للشلال أكثر من الشلال نفسـه ، أخذنا فيه ساعة و نصف ، هو يخلص بسرعة الصدق ، بس جلسنا عند الشلال نصور و نتمشى حوله .. كذلك المكان يزلّق شوي و أختي الصغيرة زلقت و جلسنا ننظف الوحل اللي في لبسها ! و طلعنا و أخذنا قهوة تهضّم وليمة الصبح و البنات كذلك أخذوا souvenir .

لما طلعنا لقينا أجوما تبيع مندرين أو يوسفي أو يوسف أفندي عاد كلّن يختار الاسم اللي يجوز له أكلناها في السيارة حنّا و المرشد و السواق

و حركنا للمشوار الثاني اللي هو Jeongbang water Falls ، سعر الدخول كذلك 2000 وون للشخص ( 6 ريال ) ، طبعاً الواحد يستعد للسلالم اللي بينزلها و يرقاها ، و يأخذ حذره لأنها تزلّق بعد و طوييييلة .. الشلال اللي هنا أقوى و أحلى صراحة من الأول ، بس حبيت مكان التمشـي حق Cheonjiyeon Waterfall

المشوار الثالث كان Alive Museum & Alive kart ، دخلنا و قصينا تذكرة لهم كلهم .. و كان دخول المتحف بـ 12000 وون للشخص ( 35 ريال ) ، أما سيارات السباق أرخص بس نسيت كم !

رحنا للسيارات قبل المتحف عشان ما تمطر و تتأجل .. دخلونا لحالنا ، لأنهم يدخلون كل 6 لحال .. قالوا لا تتسابقون عشان خطر تصدمون بعض بس تسابقنا بأدب و هم ما يدرون و لكل شخص 8 لفَّات و المكان وسييع ( آخر مرة ركبتها في الرياض 6 لفات بـ 150 ريال ) الجو عليل جداً

و مرينا على محل الـ Souvenirs .

خلصنا و انتقلنا للمتحف ، المتحف مرة حلـو و غريب و ممتع عبارة عن متحف فيه مجسمات و لوح ثلاثية الأبعاد و خدع بصرية ، ذكرني بـ The Ripley's Believe It Or Not Museum مختلف عنه بس ذكرني فيه ! انبسطنا فيه بشكل مو طبيعي .. و يتجهز الواحد إنه بيجلس يصور لوقت طويل ، و الحلو إنه محددين للشخص وين يوقف عند اللوحة أو المجسم و محددين للي يلتقط الصورة وين يوقف عشان تكون الصورة 3D و واضحة .. مرة حلو فكرة إنك تكون جزء من اللوحة ضابطـة مرة ، و أتوقع جلسنا في المتحف 3 ساعات ، لأن كل أحد يبي يصور و يالله نضبط الصورة ، فأخذنا وقت !

و أخذنا مشروبات من EDIYA COFFEE و حرّكنا للمشوار اللي بعده .. أحس إني نوعاً ما ظلمت المكان بهالصور ! بسبب إن الصور ماراح تكون واضحة إلا لمّا يكون فيها أشخاص ، و بعد بعض اللوح صعبة تنحط ، تعتبر صور خادشة .. عشان كذا صورت صور بسيطة لتوضيح الفكرة فقط و إلا فعلاً المكان من أفضل 3 أماكن في جيجو .. ممتع

للمشوار الرابع اللي هو Jusangjeolli Cliff ، أعتبرها من أجمل و أرهب المناظر اللي شافتها عيني ! خطير خطير ! تمنيت كل العالم يشوفونه صدق ! مختلف عن المناظر الطبيعية في العادة ! المكان كبير و يأخذ وقت .. و أساساً اللي بيجلس يتفرج على المنظر ما راح يحس بالوقت أبداً ! كل ما أرجع أشوف الصور و أتذكر المكان أنبسط .. المنظر كان غير مألوف للعين ! شيء مو طبيعي أبداً أبداً أبداً ! و الدخول لها بـ 2000 وون للشخص الواحد ( 6 ريال ) ، و أختي الصغيرة 1000 وون ( 3 ريال ) .
طبعاً فيه فيديو يوضح جمال المكان ، و لكن أتعلم أرفعه و أجيكم

و خلصنا مشاوير اليوم الثاني في جيجو و قلنا للسواق يمر على السوبر ماركت نأخذ مخبوزات و حلويات و موية ، و بعدها توجهنا للفندق ، و اتفقنا معه على الوقت اللي يجينا فيه باليوم الثاني

سبحان الله النهار عندهم طويل جداً ! نطوّل حنّا في المكان اللي نزوره و ناخذ راحتنا و على شوي شوي .. و نصور و نسولف و نتقهوى .. يعني نحلل المكان مرة ! و مع ذلك نرجع للفندق و النهار ما قضى ! و أحيناً نصير ما خلصنا الـ 8 ساعات مع السواق ! بس نصير تعبنا و قررنا نرجع ! فيه بركة في الوقت ، و النهار طويل !

AL Tunaiji, آخـــرفـــرصـــة, توبليرون و 3 آخرون معجبون بهذا.

Boarding Pass · 31-01-2023, 07:27 AM

19 يوليو :
hallim park
spirited garden
Osulloc tea museum

وصل السواق و المرشد و قلنا لهم نبغى نروح لقهوة قبل المشاوير حقت اليوم ، لقينا مقهى في الطريق ، عبارة عن مقهى و مشتل .. صاحبه كولمبي ، المقهى بسيط جداً ، بس جميل جلسنا و تقهوينا .

المشوار الأول كان حديقة hallim park .. ورود و أشجار و نخيل و طيور و زواحف و قرية كورية قديمة ، كبيرة جداً جداً و تحتاج الخريطة معك ، حلوووووووة .. تذكرة الدخول للكبار 11400 وون ( 30 ريال ) وَ الصغار بـ 6650 وون ( 18 ريال ) .

لما يشوفوننا المزارعين اللي هناك ، ينادوننا و هم متحمسين و يودوننا عند النخلة و يقولون هاذي جبناها من عندكم ! و يلزمُون نصور معها يحسون إننا اكسسوارات تكمل المعلَم

خلصنا و أخذنا آيسكريم من المقهى اللي عندهم ، و طلعنا للمشوار اللي بعده .

المشوار الثاني كان spirited garden .. في سنة 2020 كانت هالحديقة اختيار المسافرين في Tripadvisor كأجمل حديقة في العالم ، و فعلاً شيء جبار ، الدخول لها بـ 12000 وون ( 35 ريال ) .

موفرين أكل للسمك ، تشتريه بنفسك و توكّلهم ! إنت و أمانتك

بعد ما تمشينا فيها ، قررنا نتغدى في المطعم الموجود هناك .. غداء بحري تقليدي على طريقة أهل جيجو اللي صميناها صم الحمدلله على النعمة .. نفس اللي أكلناه أول مرة ( سمك سبار مشوي كامل وَ غالتشي جوريم اللي هو سمك مطهو ببطء مع صوص حار على الطريقة الكورية ) ، تغدينا و بعدها انطلقنا للمشوار اللي بعدوووو

المشوار الثالث كان إلى متحف الشاي الأخضر Osulloc tea museum .. يعتبر من أفضل 10 متاحف شاي في العالم ، الدخول مجاناً ، جلسنا فيه .. تقهوينا و حلّينـا ، و أخذنا هدايا للي في الرياض ! كل منتجاته فيها شاي أخضر ، التشوكليت و الكيك و القهوة و منتجات البشرة .. خلصنا و قررنا نرجع الفندق !

وقلنا للسواق يمر ماكدونالدز نأخذ منه ساندوتش سمك ، و مع الأسف طلع ما فيه غير ساندوتش جمبري ، أخذناه ، وتعشينا في الفندق ، كان غريب طعمه بس نعمه الحمدلله ! سويت لنا قهوة أنا و أمي عشان نروّق على الضباب

جهزنا أغراضنا عشان رحلتنا لسيئول بكرة الصباح .. واعدنا السواق بالوقت اللي نطلع فيه ، لأن طيارتنا بدري جداً ، و المطار بعيد

و نكمل إن شاء الله رحلتنا في وقت آخر عشان ما نتأخر على البصمة !

um Muataz, AL Tunaiji, آخـــرفـــرصـــة و 5 آخرون معجبون بهذا.

Abu Muataz · 31-01-2023, 07:48 AM

ما شاء الله .. لا قوة إلا بالله
بالفعل أبدعتي في ذكر التفاصيل التى تهم السائح الراغب في زيارة كوريا
هذه هي نوعية التقارير المفيدة .. "ترتيب و تنسيق يستحق الأشادة"
واصلي نثر الأبداع فنحن مستمتعون بما نشاهد و نقرأ

um Muataz, آخـــرفـــرصـــة, توبليرون و 2 آخرون معجبون بهذا.

um Muataz · 31-01-2023, 11:47 AM

الله الله عليك وعلى هالاماكن صدقاً ابدعتي ف التصوير وجهتي العدسه ف الاماكن الصحيحه ماشاءالله دخلت معك جو وخاصه انو هذي هي الاجواء الي احب اسافر لها تكون مريحه وشامله وعائلية ايضاً ..
كنت سبق قرأت عنها
ولكن انتي يا RAYYANAH الان عيشتيني معك ماشاءالله التقرير خيال ويسعد القلب فيه تفاصيل مهمه وضحت لي عن هذه الجمهورية.

اكملي ونحن معكِ متابعين ومستفيدين 📖✍ 💓

Abu Muataz, آخـــرفـــرصـــة, توبليرون و 2 آخرون معجبون بهذا.

AL Tunaiji · 31-01-2023, 04:08 PM

تقرير مفيد ومعلومات قيمة نحن بانتظارها

كوريا الجنوبية الوجهة القادمة لي ولكن ما زلت أبحث عن بعض التفاصيل

برامج القيادة والخرائط kakao map و naver map ، هل يمكن إستخدامها وإضافة الإحداثيات بها

هل لديكم خلفية عن برامج القيادة الأخرى مثل Sygic و Garmin هل تعمل بشكل جيد هناك

أخطط لجولة في ربوع كوريا الجنوبية أزور فيها معظم المقاطعات

حاليا تم تخفيف بعض الإشتراطات وإلغاء فحص PCR

آخـــرفـــرصـــة, توبليرون, Boarding Pass و 1 آخرون معجبون بهذا.

Boarding Pass · 01-02-2023, 12:17 AM

العــودة إلى سيئـول

20 يوليو :
Shinsegae Premium Outlets Paju

قمنا و الشمس لسّى ما طلعت و الجو يجنن .. ضباب ! سوينا التشيك آوت ، و لقينا سيارة ثانية مختلفة عن اللي دائماً و سواق مختلف ، جلس يسولف معنا .. يقول كنت اشتغل في السعودية من زمان في بناء و حفر الطُرق مع أحد الشركات ، و جلس يسولف ، حليل مرة

وصلنا المطار و كان كل شيء سهل و ميسر الحمدلله .. و هالمرة نمنا كلنا في الطيارة و لا حسينا بشيء ! وصلنا و توجهنا للفندق ، كان المطار الداخلي بعيد ، فكملنا نوم في السيارة !

وصلنا الفندق و كان وقت التشيك إن كان الساعة 3 العصر ، و قبل كذا تدفع مبلغ قيمته 300 ريال للدخول للغرف قبل الوقت ، قلنا بنزّل الشنط و نخلص الإجراءات يصير بس يبقى الدخول !
حجزنا عبارة عن حجزين منفصلين بس كلهم بإسمي .. ثلاث غرف ، بس الحجز الأول غرفتين ، و الحجز الثاني غرفة .. فتلخبطت الموظفة مرة ! و مع سوء اللغة اللي عندهم ما قدرت تستوعب و أخذنا وقت نناظر بعض بصمت و هي مو مستوعبة اللفة ! عطيناها رقم الحجز و ما مشى الوضع ، الزبدة يالله يالله فهمت ! و اعتذرت لنا و انحرجت ، و كاعتذار منها عن الحوسة اللي صارت دخلتنا الغرف على طول

الفندق :
8 ليال ( من 20 يوليو - 28 يوليو / سيئول )
LOTTE City Hotel Myeongdong
4 نجوم - LOTTE City Hotel Myeongdong
تم الحجز عن طريق موقع بوكينق .
الغرف :
2 غرفة سوبيريور توأم .
1 غرفة سوبيريور توأم عائلية .
السعر :
8994 ريال .
أسكن فيه مرة ثانية ؟
أحس لا ، الغرف كئيبه شوي و ضيقة و مستهلكة ، لما أروح عند أمي أصلي فوق السرير من صغر المساحة الغرفة مستطيلة .. بس الحق ينقال موقعه كان حلو ، بس مو أحلى من موقع الأول أبداً ، و لو بنروح إن شاء الله مرة ثانية راح نجرب فنادق جديدة .. و بالنسبة لي أهم شيء تكون في منطقة ميونق دونق .

فيه مدخلين للفندق ، واحد على حارة و الثاني على الشارع .

رحنا و ارتحنا شوي بس كنا جوعانين و ما فيه طاقة نطلع و النوم حالف ما يتركنا هاليوم ، قالت أختي الصغيرة إنها شافت مطعم في اللوبي حلال .. اسمه زعفران ، غير عن زعفراننا طبعاً ، بس قررنا نتغدى فيه ، حلو الحمدلله .
و حنّا في جيجو كلمتني موظفة من الشركة اللي نظموا رحلتنا في جيجو ، اسمها الكوري صعب و اسمها اللي تتواصل فيه مع العرب مديحة و قالت ودّي أستقبلكم في الفندق أنا و باقي الموظفين إذا ممكن ! و فعلاً جو و سلمنا عليهم السلام و كان سلام نظر بحكم إن الكوريين ما يصافحون بعض أو يحضنون بعض ! ما دريت إلا قالت لي " لا يا حبيبتي هذا مو سلام ! تعااالي " و الوضع قلب خمخمة ! جو 3 موظفات و 3 موظفين ، يجننوووووووون و لطيفين جداً و كانوا متحمسين و هم يسولفون ! و كلهم لهم أسماء عربية .. أشوف اللي سووه شيء جميل جداً ، و تسويق للشركة .. و كلمة حق لما اتفقت معهم عشان جيجو دخلوني قروب فيه 4 موظفين ( مديحة وحدة منهم ) عشان لو بغيت شيء و أنا في جيجو أو عندي ملاحظات على السواق ، لكن حتى في سيئول لما نحتاج نسأل عن أي شيء كانوا يتجاوبون بسرعة و ساعدوني كذا مرة والله .. بدون مقابل و بنفس حلوة ! حتى يتطمنون علينا بين فترة و فترة ! صدقاً حتى وصولنا للرياض ! .. عيبهم ارتفاع سعرهم نوعاً ما !

بعدها راح أخوي و خواتي يتمشون و يجيبون الشنط اللي في الفندق الأول ، و مرّوا على مقهى HOLLYS ..

و أمي راحت للآوت لت .. تقريباً يبعد ساعة .. طلبنا لها آوبر و أخذت شنطة كبيرة عشان ما تبلَش بالعفش .. قلت لها صوري لي المكان و كذا ، قالت أبشري و صورت لي صورة وحدة جزاها الله خير للآوت لت .. و صورة لشنطة السيارة حقت آوبر معلق فيها سمكة ( يعتقد إنها تحميه ) ، و نشبنا لها تآكل شيء عشان ما تتعب و صورت لنا عشان نصدقها و صورت لنا الأشياء اللي أخذتها لنا من المخبز

في سيئول كثييير أسواق آوت لت و لكن من التجربة الأولى لنا في 2018 ما استفدنا إلا من هذا فقط فقررت إنها تروح له هو فقط

و أنا نزلت أتعرف على المكان الجديد و الدواعيس الحلوة و اكتشفت إنه فيه ممشى يخترقه نهر قريب جداً من عندنا ، رحت أخذت من باسكن روبنز و رجعت أقعد فيه

رجعوا متأخر كلهم و سهرنا و كلّمنا أخواني اللي في الرياض و جلسوا يسولفون لنا عن الصلخ و الحرارة اللي عندهم و بعدها تعشينا و رتبنا أغراضنا و نمنا .

21 يوليو :
namdaemun market
Starfield Coex Mall

راحت أمي و أختي الصغيرة لـ namdaemun market و أنا و الباقين رحنا لأكثر محل مشهور عندهم يبيع البينغ سو عنده فروع كثيرة و مبدعيـن فيه مرة ! مليون شكل ! أخذنا اللي بالتيراميسو ( الكمية اللي يقدمونها المطاعم و المقاهي كبيرة مرة مرة ، و يستغربون إننا نآكل مع بعض ، و أحياناً يبقى و يجون يسألون إذا الطبق فيه مشكلة أو لا ) .

و بعدها رجعنا للفندق و أمي كذلك لأننا بنروح لـ Starfield Coex Mall .. طلبنا سيارتين آوبر و حركنا للمول ، بعيد طبعاً ! لما وصلنا تفرقنا في هالمول عشان كل أحد يتقضى براحته و لأن كل شخص يحب شيء معين .. بالإضافة التقضّي مع أمي مُهلك مُبكي غير مُحتمل ! لما تشوف أي قطعة أحسها تجلس تتناقش معها و تشوف إذا حبتها أو لا ! و تقلبها يمين و يسار ، من بعيد و من قريب ! وقتها أنصهر و أصيح من جوّا بس لا أستطيع أن أنطق ببنت شفه لأنها أمي ! فـمن زمااان متفقين أنا و هي اتفاق تتفرج وتنقّي و تصور اللي تبيه و تأخذ راحتها تماماً و أنا أنتظرها في أي مقهى و لما تخلص أروح أجمعهم و أحاسب ! و أختي الصغيرة لا تهون بس تخلص بسرعة أما أختي الثانية و أنا نحب نتمشى و نتقهوى و نتفرج على الرايح و الجاي و نتطمش على الخلق و نتعرف على العالم و نفصفص المكان فصفصة و إذا أحد كلمنا نروح له في حال بيأخذ رأينا بشيء و إذا شفنا شيء حلو بالطريق أخذناه .. مبسوطين أنا و هي ! أما أخوي مسكين يتنقل بين الجميع و معاه شنطة للأغراض !

قهوة بين الأشواط

و أنا و أختي نتمشى لقينا P. F. Chang's ، قلنا نشوف المنيو في حال متوفرة أطباق seafood ؛ عشان نكلم أهلي نتعشى فيه .. دخلنا شيكنا على المنيو و انتبهت أختي إن اللحوم تبعهم مستوردة من أمريكا ، سألناهم و جاء المدير و أكد على هالشيء ! لمّا خلصوا أهلي رجعنا كلنا و تعشينا غداعشاء ، طلبنا كان 2 داينميت شريمب و 2 منغوليان بيف و 1 نودلز خضار و الأسعار نصف أسعارنا والله ! طبعاً الصورة الفقيرة من تصوير أمي حياتي ( الصورة فيها كل شيء إلا العشاء )

طلبنا آوبر و رجعنا للفندق و جلسنا نتفرج على الأغراض و طلعت أمي شارية فستان مرتين واحد أنا حاسبت عنه و الثاني أخوي حاسب عنه ، فقررت أمي إننا نطقم لا رجعنا للرياض

توبليرون, AL Tunaiji, ملاك و 4 آخرون معجبون بهذا.

Boarding Pass · 01-02-2023, 02:37 AM

22 يوليو :
Namsan Seoul Tower
Myeong Dong Market

قمنا الصباح و جلسنا نتقهوى أنا و أمي قهوة تركي و حقيقةً هالفقرة من أمتع الأشياء لنا الصباح .. أما الباقيين نزلوا يتقهوون برَّا قالوا لنا فيه محل ظريف ننزل نفطر فيه ، فطور خفيف .. نزلنا أنا و أمي له و كان يبيع خبز bagel بخمس أو ستة نكهات ، و يومياً عندهم نكهة مختلفة جديدة ، اسمه 4B .. يسوونها لك ساندوتش في حال تبيها ساندوتش أو بتاخذها سادة .. و فيه ثلاجة فيها كريمة تشيز حالية بنكهات مختلفة إذا تبي تدهنها مع bagel .. المخبز مُقابل الكوفي ..
طلبنا كابتشينو لأنهم موفرين حليب " لاكتوز فري " ، كانت القهوة لذيييذاة والـ bagel ألذ .. أمي خافت ما يعجبها و ذاقته معي و طلبت واحد لها .. و أخواني أخذوا آيس دريب و قالوا لذيذة ..

قررنا نروح لبرج نامسان ، و لكن هالمرة قررنا نروح له بالتلفريك لأن المؤمن لا يلدغ من جحر مرتين !
السفرة اللي قبل قلت لأخواني خلّونا نرقى للبرج مشي جو حلو و خضرة و وجه حسن وَ راح نستمتع و اقتنعوا ! صراحةً ما كنت أدري عن المسافة و ما كنت أدري إنها طَلعـة مرتفعة جداً جداً ! أحسب الموضوع ظريف فأخذنا تقريباً ساعة و نصف و حنّا نرقى هالدحديرة ! و ما أسمع غير هواش من أخواني و صراحة معهم حق لأني قايلة لهم ازهلوها بهالمشوار ، لا تبحثون عن شيء ، كله علي .. الدحديرة توجع الظهر مرة و الحمدلله أمي ما راحت معنا و إلا كان تعذّبت نفسياً .. و العالم اللي تمشي فيه رياضين فقط ! و ما فيه و لا سائح مَـر ! و لما خلصنا من الزيارة للبرج ، بلشنا بالرجعة لأنها من نفس المكان ! و ما قلت لهم إن طريق الرجعة نفسه خليتها مفاجأة لهم .. الصدق كانت سريعة و طيران ! و اليوم اللي بعده ما قدرنا نتحرك أبد و جابت لنا أمي كريمات للعضلات ! عشان كذا قررنا هالمرة تلفريك .

كانت محطة التلفريك تبعد عن الفندق ثلاثين دقيقة ، قريبة جداً لفندقنا القديم ، أقل من 10 دقايق .
و حنا ماشيـن لها لقينا محل قهوة تبيه أختي ، دخلت هي و أخوي له ، و بياخذون المشروب تيك آواي .. قلنا نسبقهم ، و الطريق كان يقطع ميونق دونق ماركت ، و نمشي و نمشي و نمشي و الوضع طبيعي ، إلين قابلتنا دحديرة ! مبخوتين بالدحديرات ! كانت محطة التلفريك في الأحياء بين بيوتهم ، بس هي مرة مرتفعة ، الدحديرة كل مالها و تصير تقصف الظهر بس المدة كانت قليلة في الدحديرة ، أبو 10 دقايق بس .. خفت على ظهر أمي و سألتها إذا تعبت و تبي آوبر بس عيّت و الحمدالله الوضع مشى لأننا جلسنا نتفرج على بيوتهم و نصورها و ندخل المحلات اللي في الحارة .. بس يوم شفت الدحديرة كلمت أخوي و أختي و قلت لهم يآخذون آوبر لأن أخوي عنده مشاكل في الركبة و خفت توجعه زيادة ..

وصلنا .. وصلنا

لما وصلنا أخذنا التذكرة للشخص رايح جاي بـ 13000 وون ( 36 ريال ) ، و فيه تذكرة للروحة فقط بـ 11000 وون ( 30 ريال ) .. و كذلك فيه طريقة للدخول عن طريق الـ shuttle bus بـ 2000 وون ( 7 ريال ) ..

ركبنا التلفريك و هذا المدخل اللي خليتهم يرقونه أول مرة و مدري وين نهايته

شرينا أقفال عشان كلن يكتب اللي يبي بـ 9000 وون ( 25 ريال ) وَ يجي معها قلم عريض للكتابة ، و دوّرنا أقفالنا القديمة و ما لقيناها ! أخذنا قهوة و آيسكريم ، و بعدها جلسنا نتمشى و نصور و نتفرج على سيئول من البرج ، الجو كان مش طبيعي ! وبعدها قررنا نتغدى ، أخذنا شريمب و سمك و بطاطا نوعين ، الكمية كانت راهية جداً جداً ! و بقى منّـه كثير ! و الحساب كان رخيص بالنسبة للكمية .

شبكة العنكبوت منتشرة على الأقفال القديمة

صورة من داخل البرج

جلسنا ننتظر الغروب ، و يوم ظلمت الدنيا نزلنا مرة ثانية بالتلفريك ، و رجعنا مشي للفندق ، و مرينا من Myeong Dong Market و قعدنا نتمشى و نتقضى و تقريباً نمرّه بشكل يومي هالمكان ..

كرسي كيوت لقيته بالحارة

و رجعنا للفندق بعد ما سكروا العالم و تعشيت أنا و أمي حلا و آيسكريم و الباقين ماكدونالدز .

23 يوليو :

قررنا هاليوم إن كل شخص يروح للي يبي و يجيب اللي يبي ما يأجله لآخر الأيام عشان ما يصير ضغط بترتيب الشنط ، و كذلك الوالدة تبغى تجيب هدايا لباقي الأسرة
فـانطلقت أختي الصغيرة و أمي في طريج و أنا و أختي و أخوي في طريج ! راحوا لهوانداي مول .. و السوق الشعبي نامدايمون يبون لبس كوري تقليدي للحفيدة الجديدة .. بس قبلها مروا على 4B تبع البيقل .

حركنا حنا و أختي كانت تبغى محل آيسكريم بينغ سو قبل نتقضى لقينا طلبها اللي تبيه في رابع فرع لهالمحل ! دائماً sold out ، و بعدها رحنا blue bottle ، نبغى حبوب قهوة لأخواني و عائلاتهم الصغيرة

هذا الفرع اللي لقينا فيه اللي تبيه ، و كان أساساً على الطريق

بعدها توجهنا Myeong Dong Market لأن أختي تبي محل Fila هناك و تبغى تشتري من عندهم ، و لا أحكيلكم عن فرق السعر المرعب في جميع الماركات ، أرخص من عندنا بمليون مرة الغالي عندهم فقط ماركاتهم الكورية ، و لا أعتبرها غالية و لكن بالنسبة للماركات العالمية تعتبر غالية ! .. و كذلك أختي تبي تتقضى للجامعة مرة وحدة ، ميونق دونق ماركت كلها محلات ميكب و منتجات بشرة ( طبية و غير طبية ) ، و محلات زي ZARA و H&M و ماركاتهم الكورية العالمية بس الرخيصة .
مرينا ماكدونالدز أخذنا المعتاد للجميع و رجعنا للفندق ، و جلسنا نتفرج على الأغراض اللي كلن جايبها ، تعشينا و نمنا .

AL Tunaiji, توبليرون, ملاك و 5 آخرون معجبون بهذا.

Boarding Pass · 01-02-2023, 05:21 AM

24 يوليو :
Common Ground

اليوم قررنا نروح لمجموعة محلات اسمها Common Ground .. قمنا زي العادة تقهوينا أنا و أمي في الفندق و الباقيين راحوا يفطرون برّا .. بعد ما خلصنا طلبنا آوبر ، و حطينا اللوكيشن و أول مرة أنا اللي أتقدعن و أعطي أهلي الوكيشن ! و كانت آخر مرة ! طلع في اللوكيشن إنه يبعد 45 دقيقة .. لما وصلنا نزلنا في حي فيه بيوت ! و محلات بسيطة على الشارع ، نفس اللي بالدراما ! دخل أخوي محل و سألهم ، و ورّاهم المكان و طلع منطقة مختلفة تماماً .. في الضفة الأخرى من العالم ! و طلع فقط يبعد عن فندقنا ربع ساعة بالسيارة ! و لعل الأجوما اللي بالمحل بلشت فينا مرة .. و تحاول تفهمنا إن المكان خطأ و فهمناها إننا فهمنا ، و رجعت لنا مرة ثانية و قالت أطلب لكم تاكسي ؟! .. تشكرنا و قلنا طالبين .. و راحت و رجعت و كتبت لنا اسم المكان في ورقة عشان نعطيها السواق في حال ما فهم ! قالت أمي خوذوا رقمها و كلموها بشروها إذا وصلنا و كلمناها و الله بعد ما جلسنا ساعة نحفظ الجملة اللي نقولها لها بالكوري ، و انبسطت يا قلبي هي !
المهم وصلنا و كانت المنطقة في الحقيقة كبر عيني ! بالأنترنت طالعة كبيرااااااااااه ! طلع فيها محلات بسيطة و أغلبها رياضية ، و أكشاك في الوسط ، و فود ترك ، و مطاعم ، المنطقة حلوووووة و مهم الواحد يشوفها ، صغيرة بس مختلفة ، و غريب إن المحلات على شكل حاويات ! تنفع الواحد يسوي فيها جلسة تصوير الصدق ..

فيها مخبز من ألذ ماذقت في حياتي ! بعد ما تقهوينا فيه ، أخذنا كيك برتقال و فستق من عندهم ، نتقهوى عليها في الصباحات القادمة

جلسنا ندور في المكان ، و نحلل المرمطة اللي تمرمطناها عشان نوصله .. و بعدها قررنا نتغدى و صار فيه انقسام كالعادة ! أنا أبي قهوة ، وأختي تبي بيتزا من الفود ترك ، و أخوي و أختي الصغيرة يبون مطعم إيطالي كان موجود في الدور الثاني .. أما الأم في عالم آخر ، عالم التسوق ! و قالت لأخوي يجيبون لها تيك آواي .
صح كان فيه مطعم بالدور الثاني لعائلة فلبينية مسلمة ، المطعم حلال بس كلّن مقرر وش يبي
وَ صح بعد ترى أغلب المطاعم الإيطالية في الأماكن السياحية المعروفة اللي متعودين على المسلمين لمّا نطلب منهم يقولون لنا راح يتأخر الطلب شوي لأننا سالقين المكرونة مسبقاً بمرق دجاج ، فراح نسوي لكم جديدة بماء عادي ، هالموقف تكرر علينا بمطعم في الآوت لت بـ 2018 ، و في فرايديز في سوق لوتّي مول كذلك بـ 2018 ، و هالمرة بعد

رجعنا للفندق ، و نزلنا نتمشى ، لأن المكان اللي حول الفندق كله أماكن حلوة و ماغطيناه كله و كل شوي نكتشف شيء جديد

25 يوليو :
Petite France ( ما رحنا لها هالمرّة ، فقط بـ 2018 ، أضفتها عشان يكون عندكم خلفية عنها لأنها بنفس المقاطعة )
The Garden Of Morning Calm
nami island

قمنا الصباح و رحنا كلنا لمحل 4B حق البـ bagel و أفطرنا ، و لما جاء وقت الانطلاق لوجهتنا لهاليوم أخذنا من عندهم قهوة و مرينا ماركت بجانب الفندق و أخذنا منه تشوكليت و حركنا لحديقة الصباح الهادئ و جزيرة نامي .. الحديقة تبعد عن سيئول بساعة و نصف وَ الجزيرة تبعد عن الحديقة بنصف ساعة .. كلهم موجودين في نفس المقاطعة ، مقاطعة غيونج جي

أخذنا تاكسي كبير لمدة 9 ساعات في هالمشوارين من نفس الشركة اللي أخذناها في جيجو بـ 1200 ريال ! غالية شوي صح .. صح ! و لكن المشوار رايح جاي قرابة الأربع ساعات ( في حال كان الطريق فاضي ) ، و صعبة نحصّل تاكسي في المنطقة هناك عند الحديقة عشان يودينا لجزيرة نامي ! أما عند الجزيرة ممكن فيه مواصلات و لكن الحديقة لا ! و كذا كذا مو بعيد عن سعر سيارتين من آوبر لما حسبتها و كذلك الآوبر ما راح ينتظرنا لما نخلص ، فاشتريت راحتنا !
و اللي يبي يروح إن شاء الله يضيف القرية الفرنسية للخطة و بنفس السعر بتكون ، أهم شيء الإتفاق على الساعات ..

أول شيء وصلنا الحديقة و ما قدر زرناها قبل ، و سعر التذكرة للكبار 11000 وون ( 30 ريال ) وَ الصغار بـ 7500 وون ( 21 ريال ) و كذلك الشباب لهم سعر أقل من الكبار .. وَ كانت من أجمل الأشياء الطبيعية اللي زرتها في سيئول و الصدق أحلى من hallim park اللي بجيجو تحتوي الحديقة على 5000 نوع من النبات .. اسُتخدِمت هذه الحديقة كموقع لتصوير عددٍ من المسلسلات التلفزيونيّة الكوريّة .. ذكرتني جداً بسويسرا .. جميلة جميلة جميلة ! و تأخذ وقت صراحة كبيرة كبيرة ! بس فتنة والله ! فعلاً خلاّبــة ما شاء الله !

بعد ما خلصنا خواتي قالوا إنهم جوعانين و ما كان فيه غير كشك يبيع كورن دوق ! يكون النصف العلوي جبنة و النصف الآخر هوت دوق .. أكلوا اللي فوق و خلّوا اللي تحت ، و أكلوا آيسكريم و شبعوا الحمدلله

بعدها توجهنا لجزيرة نامي و بالطريق شفت فندق غريب ، جازلي والله ، الخطة القادمة لازم نسكن فيه إن شاء الله ..

المهم وصلنا و رحنا بنحجز الـ Zip-wire، و قالوا لنا أقرب وقت الساعة 4 ، يعني انتظار ساعة !
تذكرة الـ Zip-wire كانت بـ 1500 ريال للجميع و شاملة دخول الجزيرة .. و تذكرة الدخول للجزيرة عن طريق العبارة رايح جاي بـ 16000 وون ( 45 ريال ) وَ تذاكر الصغار و الشباب أرخص بعد ..
رحنا للمقهى اللي جنبه لما يجي وقت دخولنا .. أخذت كرواسون حالي و أمي آيسكريم ، و الباقين قهوة و تمشينا في الشوارع اللي قريبة للجزيرة ، و فيه بالمنطقة مطاعم كورية حلال ، جربناها بـ 2018 بس ما استسغنى الأكل الحمدلله .. و كذلك داخل جزيرة نامي فيه تقريباً 3 مطاعم حلال ..
لما جاء الوقت ، رجعنا .. طبعاً ممنوع منعاً باتاً التصوير في الـ Zip-wire .. ( الوزن المسموح فيه من 35 كيلو - 120 كيلو / الطول السموح فيه من 140 سم - 200 سم )

أول مرة جينا بـ 2018 كان فيه كاميرا تحت تلتقط لك صورة و تأخذها في حال كنت تبغاها ، هالسنة ماكووو ! انتظرنا بعد ما نزلنا كلا و رحنا تمشينا، و كانت السناجب الدعنونة ملياااااانة ، لطيفة لطيييفة !

استأجرنا سكوتر كهربائي و سيكل عادي لمدة ساعة لخواتي بـ 5000 وون ( 14 ريال ) و لازم بطاقة الأحوال و تستلمونها بعد ما ترجعونهم .. أما أمي و أخوي أخذوا سيكل ثنائي معلق في السماء سيكل مرتفع يمشي على سكة حديد ، مرعب في البداية يقولون و لكن مجرد ما مشوا انبسطوا و عبارة عن دورة واحدة فقط ، و طويلة لأن السكة طويلة .. و التذكرة كانت بـ 8000 وون ( 22 ريال ) .

خلصنا و رحنا صلينا في المصلى اللي حاطينه .. مرتب مرة .. و دورات المياه فيها شطّاف .. الصدق ما تأزمنا حنّا لأننا ماخذين 3 شطّافات من السنيدي

كنت مخططة على المطعم الإيطالي ، و لكن مع الأسف كل المطاعم مسكرة ، ما أعرف ليش ! طبعاً فيه مطعم حلال ، و مطاعم كثيرة ، و مقاهي كثيرة ، و لكن مغلقة كلها !
و بعد ما خلصنا قررنا نطلع و توجهنا للعبّارة .. في طريق الخروج لقيت أجوما تبيع خبز قرع مطبوخ على البخار و محشي فاصوليا حمراء بـ 1000 وون ( 3 ريال ) ، مدري ليش نفسي سوّلت لي آخذه ! لا آكل فاصوليا حمراء و لا هو وقت القرع صراحـة ! حاولت ألزّم على اللي معي يذوقونه بس ماش عجزوا ! أكلت الأطراف ، و لقيت سنجوب صغير و عطيته إياه و كان له نصيب الأسد من هالخبزة قلبي السنجاب والله أحسه كان يجاملني يوم كمّلها !

فيه كثير أنشطة في الجزيرة غير الـ Zip-wire وَ الـدراجات و القطار .. فيه Motorboat وَ Motorboat وَ Water sports & pedal وَ أشياء أخرى ، و كلها أرخص من الـ Zip-wire .

رجعنا و قررنا نخلي السواق ينزلنا في مطعم أردني حلال اسمه البيداء .. من أكثر المطاعم المعروفة هناك و أقدمهم ، طلبنا مشروبات و الأكل كان مسخن و كباب الظاهر و الصدق نسيت وش طلبنا ! بس السعر رخيص بالنسبة لمطعم عربي حلال .. حول الـ 300 ريال .. تعشينا و رجعنا ، و يالله يالله حصلنا آوبر ، لأن المنطقة بعييييدة و غير سياحية ..
الآوبر حقنا بني آدم طبيعي .. حق أخوي شكله كان مقرقع شوي ! وقف بمكان خطأ و لما راح له انهار السواق و بدأ يصرخ و يقول " التاكسي الكوري ما ينتظر ! طلّع أخوي الجوال و بدأ يترجم له إنك إنت يا متخلف غلطان و واقف بمكان خطأ ! قام هذاك يلج لج و هو يسوق و قام يصبّخ ! و كذلك أخوي قام يلج عليه و يصبخ ( قابل الصراخ بالصراخ تسلم ) و فعلاً توحّش السواق و هجد ! اتصل أخوي على الشرطة من خلال تطبيق آوبر و حط سبيكر عشان يسمع السواق .. و قالوا له ما نقدر نتدخل إلا إذا كان فيه اعتداء بس راح نحرك الدوريات داير مدارك .. خاف السواق ! و بدأ يغني فجأة ، و يسأله من وين أنت و هو مبتسم ! و أخوي ما يرد عليه و مكمل مع الشرطة في جهة ، و يهاوشه في جهة ثانية ! و تواصل أخوي بوقتها مع إدارة آوبر ، و رجعوا له قيمة المشوار و حطوا له مبلغ زيادة في حسابه نفس قيمة المشوار وَ شالوا السواق من البرنامج وَ الشرطة حررت للسواق مخالفة لترهيب السيّاح و مدري وش سوو فيه بعد ! و اعتذروا الشرطة من أخوي لتصرف السواق .. رجع أخوي و سوّاله قهوة دريب و قطرها على روقان و روّق ، و قالنا السالفة من بكرة عشان أمي ما تنهبل ..
قلنا لأخوي المفروض نزلت و خلاص ! قال قهرني ، و بنقهر لو ما أخذت حقي ! يقول لو معي وحدة منكم كان نزلت من السيارة و اشتكيت عادي و انتهى الموضوع و طلبت سيارة ثانية !
حنّا سكتنا و ما ناقشناه ، لأن أخوي هادي جداً و ما شاء الله تبارك الله عليه طولة بال تقتلنا حنّا ! فعارفين إذا رد هالمرة أكيد إنه السواق منرفزه و متعدّي حدوده و قاهره ! فـيستاهل السواق .. و يصير يأدبـه لباقي السيّاح مستقبلاً .

و اللحين بنزل صور للقرية الفرنسية بشكل سريع و مبسط .. بدايةً القرية أفتتحت عام 2008 ، عبارة عن قرية فرنسية و الشخصية الكرتونية للقرية هي شخصية الأمير الصغير (‏ هي رواية صغيرة للكاتب الفرنسي أنطوان دو سانت إكزوبيري ) .. فيها فندق ، و كذلك فيه عروض حيّة على المسرح .. رسوم الدخول للأطفال 9900 وون كوري ( 38 ريال ) و الكبار 18900 (71 ريال ) .

و الله يا كميّة صور حطيتها لكم ربي يعيينكم بس تحسفتبهم و حطيت لكم منهن شوي
و شكل ما باقي لنا إلا شـوي من غير شر

AL Tunaiji, توبليرون, ملاك و 5 آخرون معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
ام حسين في باريس 2022	توبليرون	بوابة فرنسا	234	17-09-2022 01:02 AM
إسطنبول Jul 2022	احمد ال مقبل	بوابة تركيا	72	23-07-2022 04:08 PM
عدد من الأسئلة السريعة -USA May 2022	Fahad2021	بوابة امريكا	16	12-04-2022 01:05 AM