رِحلَة كُوريَا الجَنوبيَّة - ( سِيئُول + جيجُو ) - يُوليُو 2022

Boarding Pass · 04-02-2023, 09:47 PM

وَ بسم الله .. نكمّل الرحلة الحلوة

بس أبغى أسأل قبل ، هل الصور تطلع لكم كلها طبيعي !؟ لأنها فعلياً كثيرة
لأني لمّا أفتح على الموضوع من الكمبيوتر ما تطلع لي كاملة ، يطلع بدالها فراغ كبير ، بس في الجوال تطلع كاملة .. نعتذر على الأسئلة بس جديدين في الصَنعَة !

26 يوليو :
Han River

قرروا أخواني يتغدون بمطعم هندي حلال و بعدها يروحون لنهر الهان و يركبون القارب ، لأن أختي بـ 2018 كانت دايخة و خافت تركب ، هالمرة قالت بجربه غصب .. و في الويكند المنتزه اللي عند النهر يصير مليان حياة ، و فيه فود ترك و فيه آكتيفيتيز و حركات .. و بعدها قالوا بيروحون يجربون مقاهي جديدة و يشوفون إذا ناقصهم شيء !

و أنا و أمي قررنا نضف العفش ( طبعاً الوالدة ضيفة شرف في هالمهمة .. تتفرج و تقيّم و تتطمن إن أغراضها مافغصتها لها و عفطتها و تعزز لي و أنا أرتب .. و تقهويني جزاها الله خير عشان أروّق ) .. و نشوف إذا أصلاً الشنط تكفي أو لا ! و إذا ما تكفي نروح نجيب شنط .. عشان ما يصير فيه مفاجأة مال أمها داعي في آخر يوم !
أختي الصغيرة حليلة مسوية شنطتها لأنها تخاف على أغراضها .. و الباقيين يحوسون الشنط أكثر من إنهم يرتبونها و يضيعون وقت و يضيعون مكان في الشنطة ، فقررنا نسويها من البداية عشان ما يجون في اللحظة الأخيرة يطلبون مساعدة !

أمي سوّت لي قهوة رَشـوة

أخذنا بريك غداء أنا و أمي و رحنا مطعم جبار اكتشفناه في اللحظة الأخيرة .. مطعم ياباني يبيع رز و كاري بالشريمب " كاتسو بالشريمب " ، ما أعرف اسم المطعم مع الأسف و لكنه قريب جداً للفندق ، تغدينا و كان من ألذ الأكلات اللي أكلتها في كوريا ، مسبّـــك .. تمشينا شوي و اشتهيت فجأة كب كيك حق الـ k-pop ، أخذته و أخذت قبل ما أشوفه قهوة من الماركت و رجعنا نكمل ضف الشنط .. صلينا العشاء و خلصنا ! و طلعنا نحتاج 3 شنط زيادة !

27 يوليو :

رحنا أنا و أمي و أخوي Myeong Dong Market و جبنا الشنط و تمشينا فيه لآخر لحظة من غير شر .. و بطريق الرجعة لقينا فرايديز و قررت أتغدى منه و أخذت باستا بدون أي شيء ، و أمي و أخوي راحوا لدومينوز بيتزا .

خواتي طبعاً مقررات يروحون مشوار مقرف ! كانت أمي رافضته بـأول زيارة لنا لكوريا ، و لكن هالسنة ما قدرت ترفض رحمتهم و الصدق إنهم نشبوا لها لمّا وافقت و قالت لهم خلوه آخر يوم ، كانت على أمل إنهم يبطلون و ربّكم واحد صاملين ريّا و سكينة على هالمشوار .. يبون مقهى الكلاب عزّكم الله !
يبعد عن الفندق نصف ساعة .. طلبوا آوبر و راحوا ، لما وصلوا كان مسكر ! راحوا مطعم بيتزا و تغدوا و لما خلصوا رجعوا للمقهى ، و كان مفتوح

خافوا أول ما دخلوا لأن الكلاب لما يدخل شخص جديد ينبحون قوة ! بس لزّموا عليهم حقين المحل يكملون ، دفعوا حق الدخول و شامل كوب قهوة و كان بـ 14000 وون كوري ( 45 ريال ) ، بس ما قدروا يشربون القهوة .. تقرفوا ! انبسطوا و طولوا في المكان .. قالوا انبسطنا مرة بس ما نعيدها ! رجعوا و هم قرفانين مرررررررة و حايمة أكبادهم ، بس انبسطوا بالتجربة مرة !

بعد ما خلصنا و رتبنا العفش و ارتحنا ، راح أخوي يجيب لنا من نفس المطعم الياباني اللي يبيع الكاري .. تعشينا و نمنا عشان نصحى بدري و نروح للمطار

28 يوليو :

الرحلة كانت الساعة 17:50 دقيقة .. قمنا و شحنّا جوالاتنا ، و صرفنا باقي الوون لدولار ، و أفطرنا ، و نزّلنا الشنط .. و وحدة من الشنط قررت تسوّي مفاجئة و انفجرت مع إنها مو مليانة ، جبنا لزق و لزقناها هي و أختها اللي من نفس الماركة ، و صار شكلهم سيء بس كيفهم ! أهم شيء ما يفاجئوننا بعدين !
وقت التشيك آوت طلعنا من الفندق بس خلينا الشنط عندهم

كلمتني مديحة ( الموظفة في الشركة اللي أخذناها لجيجو ) قبل ليلة و قالت ودّي أجي أودعكم يوم رجعتكم
.. رحبنا فيها جداً و انبسطنا .. و قالت بنتظركم الساعة 12:30 في اللوبي ، و فعلاً لقيناها .. تجنن تجنن تجنن ! جلسنا نسولف و نتناقش في بعض الأمور لمّا اتصل السواق .. أعطتنا هدية تذكارية ودّعنا مديحة المليحة على قولتها و نزلنا للتاكسي !

وصلنا المطار و كنّا أول الطابور و ما فيه زحمة في المطار أبداً .. بعد ما خلصنا و دخلنا الشنط راح أخوي لأجهزة التاكس فري ، و أخذ ورقة عليها المبلغ المسترجع بس نرجعه بعد ما نختم على الجوازات و ندخل الصالات ..
و قبل ندخل جتنا موظفة عشان التقييم ، تقييم السياحة كاملة لكوريا ( موفرين كل اللغات ، حتى عربي ) ، كان طويييييل مرة و حنّا كنا فاضين ، و قلنا نقيّم صدق لأنهم مآخذين الموضوع على محمل الجد فعلاً .. لمّا خلصنا و تشكرنا منهم و تشكرت مننا ، أعطتنا كذلك هدايا تذكارية !

خلصت الإجراءات بسرعة الحمدالله و كان باقي وقت .. أخواني راحوا لــ Matina Lounge ، و أنا و أمي تمشينا في المطار بما إنه فاضي جداً وَ أخذنا قهوة و رحنا جلسنا عند البوابة و جلسنا نتفرج على صورنا بهالسفرة .

و دخلنا الطيارة و نمنا نومة تحبّها قلوبكم ، مرهقين مرة ! لأننا قايمين من الصباح .

وصلنا أبو ظبي و كان أكثر فوضى من المرة الأولى ! والله زَملَة لسفرتنا القادمة إن شاء الله لأنها على نفس الطيران طيران الإتحاد مرة حلووو بس المطار متعب جداً ! و التنظيم سيء بس الحمدلله عدّى الموضوع !
جاء وقت صعود الطيارة و كان فيه تأخير بعد ، و الحمدلله عدّى كل شي على خير ، و كملنا نومتنا لمّا وصلنا للرياض الحبيبة .. وصلنا الساعة 5 الفجر تقريباً ، أخذنا الشنط .. و استقبلونا أخواني و السواق لأن الشنط كثيرة رجعنا للبيت و مرينا محل كبدة و أطلق لحم حلال فيكي يا منطئـة .

سفرتنا هاذي كانت الأولى بعد كورونا لخارج المملكة ،، فكانت استجمام و روقان و تمشي على الهون ، بدون ركض ، و تم تكرار الأماكن اللي فعلاً تتجدد كل فترة ، و الأماكن اللي انبسطنا فيها جداً أول مرة ، زرناها كذلك .. و كنّا حابين نتمشى رجلية كثير عشان نتفرج على أدعس الدواعيس و نجرب و نشوف كل شيء ، لأن هالفقرة ممتعة و الشوارع تجنن ، كأنها صورة ، يعني تمشّي بدون هدف في الوقت الضايع !

طيب .. فيه أماكن و مدن مهمة ما ذكرتها هالسفرة ، لأننا رحنا لها بـ 2018 ، و حسينا ما ودّنا نكررها ! بس راح أذكرها لكم ، و مهم جداً جداً جداً تزورونها لمرة واحدة على الأقل ..

1- Gyeongbokgung
قصر غيونغبوك هو القصر الملكي الأساسي في عهد سلالة جوسون في كوريا .. فيه عروض غنائية و رقصات قديمة ،، يآخذ وقت .. رحنا قبلها لخيّاطة تسوّي الهانبوك بشكل جميل و اخترنا اللي نبيهم عندها و ضبطتهم على مقاساتنا و استلمناهم اليوم الثاني ،، ودتنا لها صديقتي الكورية ، موجودة في Bukchon Hanok Village ( حارات كورية قديمة، التصوير فيها مع اللبس يجنن ، و محلات كثيرة يبيعون و يأجرون الهانبوك ) ، كان غالي بس جميييييييييل و معاه أكسسوارات للشعر و للبس ، فيه أرخص بسوق نامدايمون بس القماش أقل جودة .. و لبسته أختي الصغيرة في القصر .. و ترى فيه أماكن تراثية كثير في سيئول ، كلّن يشوف اللي يعجبه .. و تذكرة الدخول للكبار 3000 وون كوري ( 10 ريال ) ، و 18 و تحت بـ 1500 وون كوري ( 5 ريال ) .

2 - عرض الـCookin' Nanta
عرض مسرحي باللغة الكورية و لكن القصة تكون مفهومة ما يحتاج ترجمة .. هالعرض منتشر جداً عندهم ، ممكن أكثر من 5 عروض في اليوم بأماكن مختلفة و توصل لأكثر من عشرين عرض في سيئول بس ، حتى في جيجو موجود .. و الأسعار حسب المقاعد .. VIP بـ 66000 وون كوري ( 203 ريال ) ، وَ الـ S بـ 55000 وون كوري ( 169 ريال ) ، وَ الـ A بـ 44000 وون كوري ( 135 ريال ) ..
حنّا أخذنا الـ VIP و أخذناه بمنطقة ميونق دونق ، و ترى ممنوع التصوير ..

3 - South Korea Demilitarized
منطقة كورية منزوعة السلاح من كوريا الجنوبية ، يعلموننا فيها عن الحرب بين الكوريتين ، فيها تلفريك عشان تشوف المنطقة ، و فيها آكتيفيتيز ، مثل الطلق بالسلاح ، و تعليم أنواع السلاح ، و شرح أشياء عسكرية كثير ، سعر التذكرة كان 70000 وون كوريا ( 210 ريال ) .

4 - Gapyeong Bridge Zipline
أطول zipline في كوريا ، فيه 8 مسارات و طوله 2418 متر ، يقع في جبل ( كال بونغ ) في مقاطعة ( Gyeonggi ) و يبعد ساعتين عن سيئول ، هو بمكان كأنه غابة ، فيه نهر و سفن و قطار و حركات في نفس منطقة جزيرة نامي و حديقة الصباح الهادئ و القرية الفرنسية ..التذكرة للشخص الواحد 55000 وون كوري ( 166 ريال ) .

5 - Dongdaemun Design Plaza
رحنا له على أساس مول ، طلع شوي مول و الباقي معرض ! حتى أحس المحلات مفتوحة بالغلط ! كأنه معرض للرسومات أكثر من إنه مول .. فيه حديقة مضيئة ، حلو في الليل بس كان ماله داعي ! و حولها ممشى و حديقة .

6 - Pocheon Art Valley
وادي جمييييل ، فيه نهر ، كثير صوروا فيه دراما كورية ، مصدر لأحجار الجرانيت اللي يستخدمونها في بناء القصر الملكي والبيت الأزرق والمباني الوطنية .. عشان نوصل للنادي نركب قطار معلق ظريف ، و كذلك في حديقة ، وَ سعر التذكرة للكبار كان 5000 وون ( 15 ريال ) ، و الشباب 3000 وون كوري ( 3 ريال ) ، و الصغار 1500 وون كوري ( 5 ريال ) .. و كان قريب منه Herb Island ( حديقة بوتشون للأضواء ) بس ما تحمسنا نروح له أبداً .. كلهم يبعدون ساعة و نصف - ساعتين عن سيئول ، و كذلك قريبين من جزيرة نامي .

7 - The Han River
منتزه على نهر الهان ، فيه رحلات بحرية مُدتها حول الساعة .. و فيه ممشى و حديقة ، و فيه تأجير دراجات .. الوقت الحلو لزيارته في الويكند و قبل الغروب عشان تلحقون على غروب الشمس .. سعر القارب للشخص تقريباً 8000 وون كوري ( 25 ريال ) .

نجــي للشوارع المهمة جداً جداً جداً جداً جداً ، هالشوارع نزورها بشكل يومي رجليّة ، أو أحيناً لا رجعنا من مكان بعيد و ارتحنا في الفندق نرجع نطلع لها .. كلها فيها محلات و مطاعم و مقاهي ، و بعضهم عندهم أسواق بعد ..
فعلياً إذا ما شفتوها ما شفتوا سيئول أبداً

1 - منطقة Itaewon
فيها مطاعم عربية كثيرة كثيرة كثيرة كثيرة ، و العرب مليانين هناك ، أذكر جربنا مطعم مشاوي مصري بـ 2018 ، هالمنطقة أقل شيء مريناها .

2 - منطقة Insadong
هالشارع ثاني أقل شارع نمره ، منطقة مطاعم شعبية ، و مطاعم حلال ، و فود ترك ، و محلات كثيييرة ، السيّاح مليانين فيه .

3 - منطقة Gangnam وَ شارع تشونغ دام ( كثير نكون فيه ، بس صعبة نروح له مشي من الفندق ، بعيد عن منطقة ميونق دونق ، سكنّا بـ 2018 فيه هالمنطقة بس الحياة فيها مُقيّدة نوعاً ما ! )
منطقة راقية جداً ، و غالية جداً ، و المحلات اللي فيها ماركات عالمية ثقيلة جداً جداً .. فيها مقاهي ، و مطاعم تحتاج حجز مسبق .. إذا بغينا نتعشى في أحد المطاعم هناك نبلغ الفندق يتواصل مع المطعم اللي اخترناه و يحجز لنا فيه .. و قريبة لسوق coex mall .

4 - منطقة Hongdae
هالمنطقة عاد عز الطلب للي يحبون الـ k-pop وَ الأنمي ، من العصر يجتمعون العالم هناك ، و يأدون رقصات و يغنون و يتنافسون ، و يلبسون نفس المغنيين و الأنمي ! خواتي ساكنين هناك بما إنهم يتابعون الـ k-pop ..
و كأي شارع كوري مليئ بالمقاهي و المطاعم و المحلات ، و محلات أنمي كذلك ، فيه محل رسمي لأنمي ون بيس .

5 - منطقة Myeong-dong
هالمنطقة تعتبر رقم واحد هي و ganganam ، مختلفتين تماماً عن بعض .. و بالنسبة لنا أهم أهم أهم شارع ، وسيع صدر ، و متفرع ، و يربط المناطق في بعض ، كله محلات و مقاهي و مطاعم و عروض و حياة ، و حرام فعلاً الشخص يسكن في منطقة غيرها ، لازم السكن كم يوم في ganganam و لكن مدة بسيطة ، لأن كل الحياة هناك .

مدن مهم جداً زيارتها :

1 - بوسان ( تستحق 3 - 4 أيام ) .. الذهاب لها بالسيارة أو القطار أو الطائرة .. تبعد عن سيئول بالقطار 3 ساعات ، و التذكرة تقريباً تكلفتها 200 ريال .

2 - غانغ-وون ( تستحق من 2 - 3 أيام ) .. الذهاب لها بالسيارة تقريباً 3 ساعات ..

3 - جيجو ( تستحق أسبوع ) عشان الروقان فعلاً .. و التذكرة تقريباً بـ 400 ريال ، و يوجد أقل .

مهم جداً :

1 - أول ما ندخل أي فندق قبل أي شيء نآخذ للجميع بطاقة لإسم الفندق مع العنوان و أرقام الهواتف ، لنا كلنا .

2 - أي مكان نطلع له ، نمر على الريسبشن في الفندق و نخليهم يكتبون لنا المنطقة أو المكان اللي نبي نروح له باللغة بالكورية .. المرة الوحيدة اللي ما سويناها درنا سيئول كلها !

3 - التأكد من توفر سيارات آوبر تغطي المنطقة اللي تروحون لها ، لأن بعض التكاسي ما يوقفون للسياح ( أغلب التكاسي كبار سن ، و لسّى يخافون من صعوبة التواصل مع السياح ، ما يبغون يبلشون فيهم ! ) .

4 - الأسهل كتابة جميع الممنوعات في الأكل و الشرب باللغة الكورية ، أسهل للتواصل مع أصحاب المطاعم و المقاهي .

5 - خوذوا لكم مؤونة بسيطة لأول كم يوم حتى تحصلون أكل مناسب .

وَ حالياً فقط مطلوب لدخول كوريا الجنوبية تصريح السفر الإلكتروني K-ETA ..

و لله الحمد و المنّة خلصت سفرتنا بسلام وَ انبساطة وَ وساعة صدر .. ربي يتممها على الجميع
أي سؤال أو استفسار الآن أو مستقبلاً حنّا بالخدمة ..

namareq, AL Tunaiji, توبليرون و 4 آخرون معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
ام حسين في باريس 2022	توبليرون	بوابة فرنسا	234	17-09-2022 01:02 AM
إسطنبول Jul 2022	احمد ال مقبل	بوابة تركيا	72	23-07-2022 04:08 PM
عدد من الأسئلة السريعة -USA May 2022	Fahad2021	بوابة امريكا	16	12-04-2022 01:05 AM