رِحلَة كُوريَا الجَنوبيَّة - ( سِيئُول + جيجُو ) - يُوليُو 2022

Boarding Pass · 30-01-2023, 06:04 AM

أهلاً وَ سهلاً
قررت أنزل هالرحلة البسيطة لكوريا ، كان ودي أنزلها أول مارجعنا بس دوام دوام دوام و انشغلت
صدقاً أول مرة أنزل تقرير فما أدري وش الخطّة ! بس نقول إن شاء الله إنّي في السليم
أما بالنسبة للصور فهي لطيفة و بسيطة و حليلة ( و ما أدري وراها راهية ، عجزت أصغرها ) ، مو احترافيّة أبداً ، و لكن نتعلم للمرات القادمة إن شاء الله

بدايـةً :
كنّا مخططين نسافر الصيف القادم ، لوجود مخاوف من كورونا و إجراءات الدخول للدول و الحوسة اللي تصير .. و لكن وجب تغيير الخطة لسببين ! الأول لأن الصيف الجاي إن شاء الله بيكون وقت تقديم أختي الصغيرة للجامعة ، الله يحيينا حياة طيبة ! و الثاني عندنا نقاط لتذاكر السفر و بتخلص ! فقررنا نسافر و حنّا خايفين و ربي بييسر !
اخترنا الدول اللي نبيهم ، و الطيران اللي اخترناه كان طيران الإتحاد .

ليش طيران الإتحاد ؟
هذا يا طويلين العمر ، أول ما بدأ الوباء ، قرروا طيران الإتحاد إنهم يسوون عرض رهيب جداً ، يحاولون يتفادون الخسائر اللي صارت و بتصير بسبب كورونا ، خاصة مع توقف الرحلات تماماً .
العرض كان عبارة عن شراء نقاط و تتدبّل لك ، يعني تدفع 15000 ريال ، يرجع لك رصيد عندهم 30000 ريال وَ هكذا ، و لكن تنتهي مدة استخدامها خلال سنتين فقط من تاريخ الشراء !
فقررنا وقتها السفر لأوروبا ، و لكن الفيز منتهية .. و راح ينتهي وقت الاستفادة من تذاكر السفر ، قبل ما تطلع الفيز الجديدة .
حوّلنا إلى لندن بما إنها تعتبر وجهه جديدة بالنسبة لنا و التأشيرة صارت سهلة ، لمّا حجزنا التذاكر طلع باقي فائض لسفرة ثانية ، و سألنا أهل البيت عن دولة يختارونها و ما تحتاج فيزا فقرروا البنات كوريا مرة أخرى !
و فعلاً حجزنا لكوريا و دفعنا زيادة 3000 ريال على النقاط اللي كانت عندنا ، و تقرر موعد الرحلة بتاريخ 12 يوليو2022 .

الوجهة :
جمهورية كوريا الجنوبية
( سيئول + جيجو ) .

العملة :
وون كوري .
1 ريال = 371 وون كوري .

عدد المسافريـن :
5 مسافريـن .

التذاكر :
سعر التذكرة للشخص ، و شامل كذلك ( الضريبة + خيار إمكانية التعديل على الرحلة + اختيار مقعد لجميع الرحلات ) :
7015 ريال سعودي ( من الرياض ، إلى سيئول ) .
421 ريال سعودي ( من سيئول ، إلى جيجو ) وَ فيه أرخص بس اخترت اللي ناسبنا.

الطيران :
الرحـلات الدوليـة ( طيران الإتحاد ) :
رحلة الذهاب ( بتوقيت كل دولة ) :
تاريخ 12 يوليو .
الإقلاع : مطار الملك خالد الدولي في الرياض ( الساعة 17:10 ) .
الوصول : مطار أبو ظبي الدولي ( الساعة 19:55 ) .
( ترانزيت ساعتين تقريباً ) .
الإقلاع : مطار أبو ظبي الدولي ( الساعة 22:15 ) .
الوصول : مطار إنتشون الدولي في سيئول ( الساعة 11:40 ) .
مدة الرحلة من أبو ظبي إلى سيئول 8 ساعات تقريباً .
رحلة العودة ( بتوقيت كل دولة ) :
تاريخ 28 يوليو .
الإقلاع : مطار إنتشون الدولي في سيئول ( الساعة 17:50 ) .
الوصول : مطار أبو ظبي الدولي ( الساعة 23:05 ) .
( ترانزيت ساعتين تقريباً ) .
الإقلاع : مطار أبو ظبي الدولي ( الساعة 2:20 ) .
الوصول : مطار الملك خالد الدولي في الرياض ( الساعة 3:15 ) .
الرحـلات الداخلية ( خطوط t'way ) :
رحلة الذهاب :
تاريخ 17 يوليو :
الإقلاع : مطار غيمبو الدولي في سيئول ( الساعة 7:00 ) .
الهبوط : مطار جيجو الدولي ( الساعة 8:10 ) .
رحلة العودة :
تاريخ 20 يوليو :
الإقلاع : مطار جيجو الدولي ( الساعة 8:25 ) .
الهبوط : مطار غيمبو الدولي في سيئول ( الساعة 9:40 ) .

متطلبات الدخول إلى جمهورية كوريا الجنوبية ( المتطلبات في وقت سفرنا ) :
1- K-eta ، تأشيرة دخول لأراضي كوريا الجنوبية .
2- PCR و تحميل النتيجة على موقع Q-code ( قبل 48 ساعة من الإقلاع ) ، و تحميل البرنامج .
3- عند الوصول فحص آخر لكورونا ( يتم الفحص خلال أول 3 أيام من الوصول ، أو يغرم المسافر و يواجه مشاكل في رحلة العودة للوطن ) .
وَ الأفضل طباعة جميع ما سبق ، عن الدنيا و أحواله !

شرائح الجوال و الشبكة :
- جوالين اشتركنا فيهم بشريحة كورية eSIM انترنت لا محدود لمدة 15 يوم وَ مكالمات ، بـ 150 ريال تقريباً ، سويناها و حنّا ننتظر طيارتنا تقلع من الرياض ، لأنه مطلوب فيها الكود اللي في الـ Q-code .
- 3 جوالات مفعلين خدمة تجوال STC ، و ما وصلت الرسائل و المكالمات إلا لمّا شبكنا على شبكة SK Telecom 4G .

برامج مهمة جداً جداً لتسهيل الرحلة في كوريا :
1- برنامج المترو kakao metro في حال استعملتوا المترو ، حنا ما استعملناه كثير لأن سعر 5 أشخاص نفس سعر الأوبر ، هو حلو إذا شخصيـن .. بالإضافـة كثير نروح للمشاوير رجليّة .
2- برنامج التوصيل kakao T برنامج تاكسي ، يحتاج رقم كوري .
3- برنامج خرائط kakao map .
4- برنامج خرائط naver map .
5- برنامج التوصيل uber يشتغل هناك عادي جداً و الميزة فيه ما يحتاج شريحة رقم كوريّة .
6- برنامج الترجمة Papago ، حلو لما أسجل اللي أبيه و يترجمه على طول ، كثير أحتاجه مع سواقين آوبر، و كذلك إذا بتأكد من أي منتج إذا فيه خنزير أو كحول فقط آخذ له صورة و يترجم .. عشان كذا ما كنّا متأزمين من اللغة هناك .
7- برنامج klook أغلب التذاكر منه ، رخيصة ، و دائماً معها عروض .
8- برنامج visit korea في حال توّهقت بالجدول و بلشت بعمرك ، ادخل البرنامج و يعطيك أماكن سياحية .
9- برنامج line أغلب التكاسي و السواقين يتواصلون فيه ، أغلبهم ما عندهم واتساب !

بِسم اللّه نَبدَأ

12 يوليو ( يوم الوصول إلى سيئول ) :
سمعنا إن المطار كان زحمة جداً ، فقررنا نروح بدري ! و طلع المطار فعلياً ما فيه إلا حنّا .. خلصنا أمور الدخول إلى صالة المغادرة بسرعة رهيبة ، طبعاً طلبوا مننا الفحص و التأشيرة قبل ما يأخذون الشنط .
أخذنا مشروبات باردة من ستاربكس لأن الحر في المطار مش طبيعي و جلسنا ننتظر تقريباً ساعتين و نصف لوقت الدخول إلى الطائرة ، نادوا على الرحلة ، و كذلك كان الدخول سريع سريع .
أول ما أقلعت الطيارة قدموا لنا وجبة خفيفة ، ساندوتش جبنة وَ تشوكليت كيك .

لمّا هبطت الطيارة لمطار أبو ظبي ، كان زحمة جداً جداً على المسارات تبع الترانزيت ، المسار عشوائي ، غير منظم نهائياً ! و هاذي كانت أول زيارة لنا لمطار أبو ظبي ، و صدقاً أول مرة أشوف مطار بهالزحمة !
رحنا و انتظرنا عند بوّابتنا لمّا جاء وقت الدخول ، كان الدخول سلِس جداً ، و كانت كوريا كلها أبوها في هالطيّارة !
وصلنا لمقاعدنا و كان فيها مخدة ، بلانكيت ، سماعة ، محفظة دعنونة فيها كمامة و مناديل و جل معقم ، كيسة قُماشية فيها غطاء عين للنوم و سدادة أذن و فرشاة و معجون .

أول ما أقلعت الطيارة قدموا لنا وجبة العشاء و كانت الخيارات ريد باستا ، بَلقوقي ( طبق كوري ) ، لحم و رز ، و كل طبق معه خبز ، زبدة ، حمص و تبولة ، كريمة بالروز و الكنافة .

و طلبت قهوة عشان أقدر أنام زيـن !

إيه صح فيه موقف لطيف مرّة المقاعد عبارة عن 3 في كل جهة ، و مقاعدنا كل شخصين مع بعض ، و كنّا ورى بعض ، كان في المقعد الثالث عند أختي و أمي شاب كوري ، وقت النوم ربّط يدّه في الحزام عشان يخلّي مساحة لأختي تتحرك براحتها !
( العضو الخامس " المحرَم " جاء في اليوم الثالث من وصولنا ) .

أمّا أنا و أختي كانت معنا صبيّة ، مسكت خط سوالف مع أختي و لعلَّها تحمست و ارتاحت لنا بزيادة ، فقررت تقيّل على كتف أختي !

وجاء وقت الوجبة الثانية ، على أساس فطور بس كان ثقيل نوعاً ما باستا ، رز بالدجاج .

قبل الهبوط بنصف ساعة أعطونا أوراق كثيرة جداً بالعادة بطاقة واحدة لكل شخص ، و واحدة للعائلة ، هالمرة لكل شخص 4 أوراق ، و 3 للعائلة كاملة ، حنّا 4 أشخاص فكنت جالسة أعبي 15 ورقة ، الله يأخذ كورونا !
المعلومات المطلوبة في الأوراق مكررة ، بس حق التعب ، من ضمن المعلومات اللي عبيتها ، الفندق و العنوان و رقم هاتف الفندق ، كذلك معلومات الجواز ، الوظيفـة ، و معلومات طبية .
وصلنا بالسلامة إلى الأراضي الكورية ، الإجراءات كانت طويلة نوعاً ما عشان وضع كورونا و لكن سلِسة ، و احتجت بعض الأوراق اللي طابعتها ، لأن النت ما شبك على طول .
و كالعادة آخر من يصل لمنطقة استلام الشنط .

بعد ما استلمنا الشنط ، و توجهنا لبوابة الخروج ، طلبوا باقي الأوراق اللي عبيناها في الطيارة ، فالأفضل الاحتفاظ بجميع الأوراق ، حتى رحلة العودة .
طلعنا من المطار و بالعادة نروح من المترو لأقرب محطة قريبة للفندق و نمشي للفندق بس لمَّـا وصلنا كانت تمطر، و ما جبنا مظلات ، و الشنط كبيرة ، و المَحرم لسَّـى مو معنا يساعدنا ، فقررنا نطلب تاكسي كبير ، أسرع و أريح !

توجهنا للفندق ، الطريق إلى سيئول تقريباً ساعة و ربع من المطار ، الطريق طويل بس كان الجو حلووو ، أمطار ، مشى الوقت .

السَّكن الأول :
4 ليال ( من 13 يوليو - 17 يوليو / سيئول )
4 نجوم - L7 MYEONGDONG HOTEL BY LOTTE
تم الحجز عن طريق موقع بوكينق .
الغرف :
قياسية توأم ( لشخصين بالغين كحد أقصى / بدون إفطار ) .
قياسية عائلية توأم ( لثلاثة أشخاص بالغين كحد أقصى / بدون إفطار ) .
الفطور بما إننا جربناه في الرحلة الأولى لكوريا لكل الفنادق اللي جربناها ، كان غير مناسب ، و أغلب الأكل مو حلال و اللي حلال يكون رز و نودلز ، يعتبر ثقيل نوعاً لبداية اليوم ! بالإضافة نادراً ما نفطر أساساً، و اللي معي يحبّون يجربون أماكن جديدة للفطور في حال قرروا يفطرون .
السعر :
3215 ريال .
( النظافة : جيد جداً ) .
( الموقع : ممتاز ممتاز ممتاز ) .
( السعر : مناسب جداً ).

أسكن فيه مرة ثانية ؟
لا .. مع إنه أفضل موقع سكنّا فيه للحين ، و لكن الغرفة القياسية التوأم المغسلة حقتها في نصف الغرفة ، خارج دورة المياه و أنتم بكرامة ، أحس سبّب رطوبة ، و الماء يملّـي الدنيا ، و الدنيا تطرطش صدموا عيشتي ! و قالت لي الموظفة أغلب الغرف اللي لشخصين كذا !

و لكن شيئين لطيفات عندهم يغفرون لفقرة المغسلة الأول يقدمون وجبة صحية يومياً مجاناً من الساعة 6 صباحاً و حتى الساعة العاشرة صباحاً ، عبارة عن حليب شوفان و فاكهة و خبز بيقل ( غير عن وجبة الإفطار ) ، أخذناها مرة واحدة فقط ، يوم الوصول ، و استحرمنا نأخذها و ما ناكلها .

الشيء الثاني عندهم في كل دور جهاز يجمع الآيس ميكر وَ ماء بارد وَ ماء حار وَ ماء فاتر ، تخدم جداً .

و كذلك عندهم ثلاجة في اللوبي فيها سناك ، حلوة إذا الواحد ماله خلق يطلع يجيب شيء .

وصلنا الفندق و كان حجزي عن طريق بوكينق ، و الدفع عند الوصول ، لما جيت أدفع عن طريق بطاقة السفر ( البنك السعودي للاستثمار) استهبلت البطاقة و رفضت تشتغل مع إني أضفت عملة الوون الكوري ، فقلت للموظفة طيب نخلي الدفع بالدولار و رفض ، عيّت تشتغل مرة ، مع إني بجميع السفرات و حتى كوريا سابقاً ما أستعمل غيرها ! بس ربي كتب إنها تستهبل علي .. المهم قلت لها بدفع كاش و معي فقط دولار و أنا عارفة إنهم ما يقبلون الدولار كاش في أغلب الفنادق في كوريا بس قلت بجرب حظي ، فقالت فقط نقبل وون كوري !
قالت عندك حل إنك تبدلين عملة ، و عندهم جهاز لتبديل العملات ولكن الفرق مرعب وَ ما يعطيك الكسور ، رفضت ! دخلت على موقع بوكينق قلت يمكن أقدر أدفع و أخلص بس ما ضبط ! قلت مابدّهاش بدفع بالبطاقة الائتمانية أحسن ( الفرق أقل من الجهاز حق العملات ) ، ما ودّي اللي معي يتعبون و يضيع اليوم ندور محلات صرافة ، و خفت يتوترون ! و الحمدالله تم الدفع و دخلنا الغرف !
و قبل ندخل الغرف سألتنا عن الفحص متى تطلع نتيجته ! و قلت لها بسويه مرة وحدة لما يجي أخوي ، قالت أهم شي تسوونه خلال الثلاث أيام الأولى من الوصول ، و طبعاً ما فيه حجر .
دخلنا الغرف و صلينا و قررنا نرتاح شوي ، لما يخف المطر ، و إذا بالمطر يقف و قت إغلاق المحلات و مع ذلك نزلنا تمشينا بالمنطقة ( قبل ننزل مرينا على الريسبشن و أخذنا منهم بطاقة الفندق و عليها العنوان في حال أحد ضاع لا سمح الله وَ الإنجليزي تبع الشعب مو ذاك الزود ) ، و راحت أختي تشوف وين محلات الصرافة عشان نصرف الصباح ، ولقت مصارف كثير جداً على أفَـا من يشيل و رحنا لـ7-eleven أخذنا لنا تشوكليت و اللّزِي منّو و سوينا لنا آيس كوفي عندهم و رجعنا للفندق ، و كذا عدّى اليوم الأول بسلام .

14 يوليو :
The Hyundai Seoul
صحينا و سويت لي أنا و أُمـي فنجان قهوة تركية و نزلوا البنات يتقهوون بـرَّا .. قررنا نروح لهيونداي مول و طلبنا آوبر ، يعتبر من أجدد الأسواق في كوريا و أجملها .. تم افتتاح المول وقت الوباء ، صراحة شيء جبار .. المكان كله أشجار و زرع و نوافير السوق عبارة عن 8 أدوار متقاطعة و متداخلين في بعض .. تصميمه يجنن ! و السوق عشان يحلله الواحد يحتاج يوم كامل .

الدور الأرضي كله ماركات عالمية مثل Dior وَChanel وَ Gucci، و الأدوار الباقية ماركاتهم الخاصة ( أسعارها توصل للماركات العالمية و أحيناً أغلى ، و عندهم اعتزاز بصناعتهم بشكل مو طبيعي ، لازم يقولون لنا إنها صناعة كورية و يشرحون عنها شرح كامل ) و فيه بعد ماركات مثل Lacoste وَ U.S. Polo ، و كل دور يكون مخصص لشيء معين ، شنط ، ملابس نسائية ، أدوات مائدة ، و هكذا !
و أعلى دور هو أهم دور بالنسبة لي الصدق " غابة الأصوات " منطقة استراحة داخلية ، كأنك بحديقة أو غابة ، أصوات عصافير و شلال و موسيقى هاديـة جداً المكان زجاج ، أشعة الشمس موجودة في كل حتّة .. و فيها جلسات ، و أماكن للتصوير .. و هي المنطقة اللي فيها المقهى اللي متحمسة له blue bottle ! لما جينا نطلب كان فيه طابور طويل ، بس محد يطلب إلا معه رقم ، سجلنا و قالوا لنا بعد 20 دقيقة تعالوا عشان تطلبون ! رحنا جلسنا في مكان لما جاء وقت الطلب .. طلبنا كان 2 آيس دريب وَ 1 آيس أمريكانو ، و القهوة كانت فعلاً لذيذة بشكل ! و جلسنا بهالمكان بالساعات والله ، نتفرج على الرايح و الجاي !

بعد ما تمشينا و تسوقنا و قبل نطلع جعنا و رحنا لأتحَت دور كان الـFood Hall ، فيه خيارات كثيرة ، و كلها مطاعم محلية .. أخذوا خواتي من فود ترك تمبورا و دكبوكي و كلاماري مقلي يوم شفت مجسّات الأخطبوط كنسلت فكرة الأكل معهم و شاركت أمي الخبز و الجبن اللي من مؤونتها !

قبل نرجع أخذنا لنا ماكرون ، عشان نتقهوى عليه في الليل النكهات كانت غريبة و لذيذة فعلاً ، المحل تابع لشركة كيري ، كان لذييذ !

طلعنا و كان فيه حديقة و جلسنا نتمشى لأن الجو منعش و نأخذ راحتنا بالتمشي لأن وقت رجعتنا كانت وقت الذروة فكان صعب نلقى آوبر أو تاكسي ، و لسى ما سوينا بطاقات الباص ، لمّا خفت الزحمة طلبت الآوبر و رجعنا ، و الدنيا بدأت تظلم ، طوّلنا في السوق و ما حسينا بالوقت ، يستاهل كل دقيقة الصدق ..

رجعنا للفندق ، ارتحنا شوي ، و نزلنا نتمشى في منطقة ميونق دونق .. خواتي قرروا يتعشون في الماركت ، نودلز و كيمباب ، و جابوا لي معهم ، و ليتهم استخاروا !

و يوم صار نصف الليل جبنا قهوة و أكلنا الماكرون و نمنا .

15 يوليو :
namdaemun market
Seoullo7017
قررنا نروح مكان قريب لأن اليوم بيوصل أخوي و يمدي نرجع للفندق لما يوصل وصوله كان الساعة 11:40 صباحاً ، فكان المكان القريب اللي اخترناه سوق شعبي namdaemun market ، سوق تقليدي ، يبيع كل شيء ، ملابس و أكل و شنط و ألعاب و أوادم ، أي شيء يمر على البال يبيعونه هناك .. كبير جداً ، يبعد عن الفندق مشي 15 دقيقة ، فقرّرَت أمي و أختي الصغيرة يروحون له ..

هذا الكوفي تقول أختي إن قهوته تمام ، و أتوقع جازلها عشان الثلج على شكل وردة

شويّة مُحرمّات !

أما أنا و أختي ما نفضل الأماكن الشعبية ، لجَّـة ، و فوضى فقررنا نروح لمقهى holy's ، من المقاهي المحلية المعروفة جداً و المنتشرة هناك ، نحب بينغ سو تبعهم ( البينغ سو آيسكريم رقائق مبشورة من الثلج بالحليب ) .. كل فترة ينزلون شكل جديد و لذيذ .. كان قريب للفندق ، و عموماً جميع مقاهي كوريا تبيع البينغ سو .

وصل أخوي و انتظرنا أمي و أختي يرجعون عشان نروح نفحص كلنا PCR ، رجعوا و كنا جوعانين ، لقينا مطعم قريب و كذلك منتشـر جداً عندهم اسمـه No Brand Burger و أخذنا منه بطاطس مقلي و كالاماري مقلي .

بعدها حركنا للمركز بسرعة لأنه يغلق بدري جداً و يبعد 8 دقائق مشي عن الفندق ، و كلف الفحص للجميع 1500 ريال و النتائج اليوم الثاني تطلع .

رجعنا للفندق أنا و أمي .. أمي قررت تأخذ غفوة شوي لأن namdaemun market كان إزعاج و الباقيين كملوا تمشّـي ، و راحوا مناطق بعيدة شوي ، و أنا كنت أحس إني جوعانة لسى ، رحت للماركت و جبت لي وجبة ظريفة

لُقمة حرقان

و لعَل غفوة أمي طولت و قامت الليل ، قلنا نروح لـ Seoullo7017 بما إنه ما يسكر أصلاً ، عبارة عن متنزه مرتفع وخطّي في سيول ، تم بناؤه فوق جسر سابق على الطريق السريع ، رحنا لها مشي من الفندق ، يبعد تقريباً نصف ساعة ، بس فعلاً لما نمشي ما نحس ، لأن الجو يجنننن و هواء حلووو و بارد ، و الشوارع حلوووووة ، و دخوله كان مجاني .

تمشينا فيه و فعلاً كبير كبير و متشعب ، قبل ما نروح له أخذنا قهوة من 7-Eleven لأن المقاهي مقفله و كذلك مرافق المكان تغلق الساعة 9 في الليل ، و أخذنا ماكرون من مخبز كان مفتوح ، و فيه جلسات متفرقة على طول الجسر ، تقهوينا هناك ، و تمشينا ، و رجعنا متأخر .

كثير جداً الأشخاص اللي كانوا يمارسون رياضة المشي و الهرولة هناك ، لأن المكان مفتوح و مساحته كبيرة جداً .. و الحلو فيـه إنه دائماً مفتوح إذا الواحد طفش في الليل ، أو خلصت فقراته اللي مخططها لليوم ، يصير يروح يمشي و يغير جو

16 يوليو :
Lotte World
بهاليوم قررنا نروح للوتي تاور، بما إننا شايفينه قبل ، و ما راح نطول فيه ، و عشان نرجع نرتب أغراضنا قبل رحلة جيجو .
طلبنا سيارتين من آوبر و بما إنه ويكند فالطريق كان زحمة جداً و هو أساساً بعيد ، و حجزنا تذكرة دخول للملاهي لأختي الصغيرة أخذنا التذكرة من klook بمبلغ زهيد جداً بس نسيت كم ! وصلنا و قبل أي شيء قررنا نتغدى من دومينوز و الطلب كان بيتزا كبيرة جبن و بيتزا وسط seafood .

دخلت أختي للملاهي و جلست تصور لنا ، لعلّها طفشت من التصوير و ماكملت !

و أمي راحت تتمشى في السوق و أنا و الباقين نتقهوى

لمَا خلص الجميع طلعنا و جلسنا نتمشى برّا لأن الجو كان لطيف و توّها ممطرة ، و فيه حدائق و مناظر حلوة .. طلبنا آوبر ، و لما وصلنا بعض منا قرر يكمل يتمشى تحت ، و البعض الآخر قرر يريح .

و جعنا في الليل و رحنا نجيب ماكدونالدز و أخذنا فيش فيليه و ماكدونالدز كان الراعي الرسمي لجوع آخر الليل و طبعاً الكاتشاب طلع فيه كحول

و نكمّل إن شاء الله بكرة ورانا دوامات و الموضوع طلع يآخذ وقت !

AL Tunaiji, Abu Muataz, توبليرون و 8 آخرون معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
ام حسين في باريس 2022	توبليرون	بوابة فرنسا	234	17-09-2022 01:02 AM
إسطنبول Jul 2022	احمد ال مقبل	بوابة تركيا	72	23-07-2022 04:08 PM
عدد من الأسئلة السريعة -USA May 2022	Fahad2021	بوابة امريكا	16	12-04-2022 01:05 AM