تكملة روما :
ادري متأخر مرة بس عاد الشكوى لله
استمتع بالكتابة هنا واذا احد قرأ او رد ممتاز جدا واذا احد استفاد افضل وافضل
لكن لو ماحصل عادي اكتب لنفسي
المطاعم في روما تسكر وقت العصر تقريبا من نهاية الظهر ووصولنا روما كان تقريبا نهاية الظهر دخلنا الفندق وحطينا اغراضنا وصلينا وطلعنا .
الفندق جمب السلالم الاسبانية من فوق ونزلنا لتحت وتمشينا في المنطقه وكنا جايعين وقفنا في مقهى
وعادة نشوف تقييمات جوجل قبل ندخل الا هالمرة سبحان الله
اخذنا قهوة وقطع كيك كان متواضع جدا والسعر فوق 80 يورو او تسعين وش دعوى ؟؟
يوم سالناها قالت هناك الاسعار كانت مكتوبه بخط غير واضح وزائد اذا بتجلس على طاولتهم كل شي يتدبل قطعه الكيك اربعه لكن تصير ثمانية وهكذا . غلطتنا ماسالنا عن اسعار ولا شفنا تقييم يوم قرينا التقييم واحد وكل الناس يشتكون من الغش في الاسعار يالله الحمدلله الامر سهل .
كملنا تمشي في الشوارع المجاورة وفرق مرة الجو يساعد سبق الزيارة في سبتمبر كان حار هالمرة الجو بارد منعش

العشاء حجزنا في مطعم الفريدو ويقول انه الاصلي كان عشا لذيذ وحركات شو (ان شاءالله بجيب فديو له )
وانتهى يومنا .
لاحظت خلال وقتنا (يناير) الزوار قليل مرة ساحة السلالم فاضية والنافورة اقل من زيارتنا السابقة .
اليوم الثاني راح الاولاد يشوفون الكولسيوم المسرح الروماني وعدد من الاشياء السياحية لان ماكانوا معنا قبل وانا والبنات رحنا مول كبير اسمه مكسيمم حلو وفيه سوبرماركت وحبيب الشعب بريمارك كنا نحتاجه

قالو لنا الشباب انهم لقوا مطعم شاورما اكسبريس ولذيذ مرة مع ان غالبيتنا مانفضل مطاعم عربيه في السفر بس قالوا هذا غير فخذنا تاكسي ورحنا له هو قريب من النافورة وصدق يستحق جميل جدا واللي يبيعون فيه من سوريا ولطيفين جدا ومحترمين .

كانت رحلة روما اغلبها تمشي بدون تخطيط في الساحات والشوارع الصغيره شراء اي شي يصادف من تذكارات وملابس ايطالية محلية جميله .
ورجعنا انا وبعض الاولاد والباقين راحوا لندن بيوصلون اخوهم بياخذ دورة هناك .
مطار روما جميل جدا والطيران الحمدلله ماصادفنا مشاكل حتى في شحن الشنط كل شي تمام الحمدلله ورجعنا في وقتها .
وصلى الله على نبينا محمد وعلى اله وصحبه وسلم

عودا حميدا للعودة للتقرير
سؤال هل جميع مطاعم ايطاليا تسكر العصر وكم ساعه ؟

الكافيهات ما تسكر دام انج قلتي انكم تقهويتو وشريتو كيك؟
حلو كل مجموعة تروح صوب واللي يعجبهم
حلو ان مكانكم قريب من الاماكن السياحية
بريماك لابد منه
ربي يوفق اللي يدرس بلندن ويوفق ويحفظ جميع العيال
استمتعنا بالتقرير وان شاءالله سفرات ممتعه اكثر واكثر

ايه عندهم فترة قبلوله قليل تلقين مطعم صاحي يبدون عقب ست تقريبا العشا وممكن مقاهي بس اذا جوعانين نبي اكل سنع
شكرا لمرورك وردك الله يعافيك