وعليكم السلام
بخصوص جدول رحلتك ممتاز جدا , بس نصيحتي اذا عند وقت تمدد الايام مرة يفضل لانه امريكا مليان اماكن وعدد ايامك محدود , يفضل انك ما تضغط نفسك عشان اذا فيه يوم تريح فيه . سان فرانسيسكو ما تحتاج سيارة فيها لانها مدينة نوعا ما صغيرة ووسائل النقل العام متوفرة بكثرة واصلا مدينة تقدر تتمشى برجولك , الافضل تستاجر وانت رايح على لوس انجلوس . بخصوص الطريق الساحلي من سان فرانسيسكو الى لوس انجلوس , فيه مدينة مونتري مرررة تجنن والمناظر الطبيعية فيها حلوة ومنطقة Big Sur وفيه مدينة سانتا باربرا مررة حلوة , عادي اختار الي يناسبك فيهم لانهم مدن الاجواء فيها مختلفة , من مونتري وانت طالع شمال لسان فرانسيسكو الاجواء باردة حلوة اوروبية , من سانتا باربرا وانت نازل اجواء ادفى مناخ البحر المتوسط . أنا افضل انك تحجز بدري موقع بوكينغ او موقع Hotel.com عشان تحصل اسعار وحجوزات مناسبة .
التوقيت حقك شهر سبتمبر مررة حلو لانه شهر خارج الموسم السياحي وبيكونو الناس بداو دراسة فتلاقي الاسعار ارخص من شهور الصيف . بس الجو تلاقيه مائل للحرارة لانه فعليا لسة فصل الصيف يكون عندهم . نيويورك الصيف حر ورطوبة بس بعد الظهر معتدل نوعا ما , كاليفورنيا الشمس فيها قوية , لااازم واقي شمس وتحمي نفسك منها ..... بما انك لوحدك مرة ما انصح انك تسافر خط سيارة من اورلاندو او ميامي لكاليفورنيا لانك لوحدك وبتطفش , لو معاك احد اصحابك او اهلك بتكون حلوة التمشية بين الولايات بس صراحة متعبة

بخصوص التأشيرة ما له داعي تكتب مخططك كامل , اكتب وجهة الوصول فقط الي هيا نيويورك . ولو سالوك في المقابلة وجهة الوصول والاقامة قلهم نيويورك , في السفارة ما يهمهم كثير فين حتروح وفين حتقعد , اهم شيء يركزو فيه حسابك البنكي وراتبك (تعريف راتب من جهة العمل) وسبب الزيارة طبعا سياحة .

و عليكم السلام و رحمة الله و بركاته
أولاً 1000 مبرووووك الفيزا الله ييسر لك رحلة سعيدة أن شاء الله

بالنسبة للتخطيط المبكر فهو أساس و صلب نجاح أي رحلة
و بالنسبة لك في البداية تحتاج إلى القراءة و الأطلاع السياحة
في أمريكا من خلال البحث في المواقع العربية و الأجنبية

رأيي في المخطط اللى وضعته أشوف أنه يحتاج أعادة ترتيب
فليس من المعقول أن تصل للشرق ثم تطير إلى الغرب ثم تعود
مره أخرى جنوب شرق أمريكا ..
من رأيي أما أن تبدأ بالغرب كاليفورنيا- سان فرانسيسكو و ما جاورها ثم بالجنوب فلوريدا و مدنها و من ثم تتجهة شرقاً إلى نيويورك و تختم رحلتك هناك و تعود و بكذا تكون ما أضطريت
تكرر مسارك لما فيه من ضياع للوقت و الجهد

بالنسبة للأجواء سبتمبر أفضل بالتأكيد

فيما يخص حجز تذاكر الطيران و الفنادق ما يزال التوقيت مبكر جداً و حتى تخطيط الأيام و الأفضل تبدأ قبل الرحلة بـ 4-6 أشهر
و تذاكر الطيران كلما أبحرت في الحجز كان أفضل 4 شهور مناسب

حجز الكروز طبعاً فيه بعض الشركات تلاقي كروزاتها محجوزة طوال العام و أبحث عن رحلة الكروز اللى تناسب و شوف توفر الحجوزات المهم تتأكد من تواريخ رحلتك لأن بعد شركات الكروز
لا تقبل الألغاء أو أسترداد المبالغ المدفوعة …


أن شاء الله سيكون هنا تحديثات لما يستجد لديك من أستفسارات
و ستجد الجميع جاهز للرد على أي أستفسار أو أستيضاح

بالتوفيق