رِحلَة لَندَن - مَارِس 2023 - الصفحة 3

Boarding Pass · 03-05-2023, 05:35 AM

نعتذر عن الإنقطاعة و لكن للحين نومي ملخبط

8 مارس
The making of harry potter

WELCOME TO HOGWARTS

هذا اليوم عاد يوم البوتر هيدز ، أنا و أمي و أختي ثلاث أرباع جيّتنا للندن عشان هاري بوتر ، فعلياً أهم مشوار لنا !

لما تأكدت رحلتنا و حجزت لكل شيء ، جيت أحجز تذاكر لأستديو هاري بوتر ، لقيتها مخلصة ! تواصلت معهم عن طريق الإيميل ، و قالوا لي أحجز عن طريق Golden Tours ، و إنها شركة سياحية مضمونة .. دخلت و حجزت و اخترت مع الحجز مواصلات ، رايح جاي !

طبعاً فيه كذا خيار ، تبي باص أو سيارة خاصة ! و الفرق بسيط جداً ، جيت بآخذ السيارة و لكن التاريخ الوحيد اللي متاح كان 9 مارس ، و 9 مارس كان وقت التشيك آوت من الفندق ، قلت خلاص باص .. و الحمدلله خيرة ، كان يجنننننن ! الباص من برّا كله عن هاري بوتر ، ملصقات و كلمات و رسومات ، حلوووو ! و كذلك يعرضون فيلم هاري بوتر للي حاب يتابعه قبل يوصل ، و كذلك فيه شاشات صغيرة على الكراسي للي بيلعب أو يتفرج على شيء ، بكذا لغة .. و الباص نظييف نظيييف نظيييف .. و أخذنا الباص حق الساعة 8:30 الصباح .. و بالنسبة لمكان الإنطلاق ، يا فكتوريا ستيشن ، أو بيكر ستريت .. حنا بفكتوريا ستيشن و كانت محطة الباص تبعد فقط 4 دقايق مشي من الفندق .

قمنا الصباح و كان فيه ثلج يجنننننن ! و الجو جو أفلام هاري بوتر صدق ، ثلجججج بسيط و برد لطيف ، و عشان يكمل الوضع أخذنا لنا هوت تشوكليت من Notes coffee roasters ! طبعاً ما أشتهيه بس حسيت المشهد لازم يكمل ! و حركنا للباص .. لما جينا بنروح للمحطة عشان نطلع من الجهة الثانية لقينا محل يبيع فطائر أتوقع ! الزيدة إختي قالت إنها تبي منه ، و تحسّفت مرة ، تقول طعمه كرم الله النعمة تعيس !

المهم وصلنا للمواقف تبع الباص ، و لما دخلنا أعطونا أساور و عليها وقت الرجعة ، و قالوا عادي حتى لو ما خلصتوا خوذوا الباص اللي بعده أو أي باص يكون موجود .

طبعاً أختي الصغيرة رافضة تماماً تجي ، تقول لو ملاهي أجي عادي ، بس ما يهمني كيف صنعوا الفيلم .. جلست و جلس أبوي معها .. و كان عندها كلاس رسم مؤجل لأنه كان بيوم سفرتنا للندن ، فقالت لها الأستاذة بيكون آون لاين ، و طلبت من أستاذتها يكون بهاليوم عشانها قاعدة في الفندق .

و صلنا و كنا منهارين صدق ، من يوم وصلنا و هم مهتمين بأدق التفاصيل ، الجدار تبع المواقف كان عليه ملصقات ، و الممر اللي نمشي منه كان فيه العصا السحرية تبع الشخصيات ، و في المدخل كانوا حاطين لعبة الشطرنج الموجودة في أول جزء ، كبيرااااااة ! لمّا دخلنا و كانوا مشغلين الموسيقى و الشخصيات الرئيسية موجودة في الجدران انهرت أنا و أختي و أمي كانت ودّها تنهار بس تقول استحيت من الله ! بس الصدق كانت مشاعرنا متدغدغة ! كنت أحسبني غريبة أطوار ، إلين شفت العالم منهارين مثلي ! الصدق أحس هالمكان ما يجيه إلا اللي يحب سلسلة الأفلام ، اللي بيجي و هو مو مهتم بيطفش ! لأنه مو مهم بالنسبة له كيف صنعوا الفيلم !

و هذا المقى تصميمه نفس تصميم علبة تشوكليت موجودة في الفيلم تقهوينا بعد ما خلصنا

الكوفي مسوينه على شكل هالحلاوة

يوم شفته غرفته اللي تحت الدرج تقطع قلبي

مرة أعجبني كيف عيّشونا بعض المشاهد المهمة ، بجميع التأثيرات ، إن كان أصوات أو ألعاب نارية أو إضاءة ! فعلاً كان ممتع ممتع ممتع ممتع ! و حلو لما نشوف ملابسهم اللي فعلاً كانوا لابسينها في المشاهد ، و كيف يسوون لهم الميكب .. و حلو حركة الجواز اللي حاطينها ، بعد ما تخلص من أي مكان تختم الجواز .

قبل هاللقطة كان ممنوع التصوير ، لأنهم مسوين حركات سحرية و ما يبون الناس يشوفونها ، فماراح أقولكم عنها ، عشان اللي يبي يزورها يتفاجأ و ما تخرب عليه المفاجأة

و هنا المكان الخاص بجريفندور !

عاد هذا بيت هاجريد

مانيب قايلة لكم هذولا مين ! عشان ما تتقطع قلوبكم

كذلك ورونا كيف صنعوا بعض المشاهد و إنها حقيقية مو مونتاج ! زي إنهم استعملوا أكثر من 5000 رسالة في الجزء الأول ، و جابوها لها جهاز يدفعها من فتحة البريد في الباب ! و كيف هاري بوتر يختفي لما يلبس العباية عن طريق الخلفية الخضراء ! و أغلب السيارات و الدراجات اللي استعملوها حقيقة و موجودة في حال أحد يبي يصورها !

البنك

سيارة و بيت محزم هاري المليان عائلة ويزلي

في الجزء الثاني لما أولاد ويزلي هرّبوا هاري من بيت خالته ، و جابوه لبيتهم و دخل للبيت ، انصدم منه و إن كل شيء يسوّي نفسه ! في الإستديو صنعوا نفس المكان و يخلّون الزوار يضغطون الأزرار و تتحرك الأشياء نفس الفيلم !

و هنا مكتب دمبلدور للي مُش عارف هذا مدير كبير

كان كل شيء حلو ، و التجارب اللي يسوونها لك تجنن ! و طبعاً و أهم شيء جربنا البتر بير ، لذييييييييييييذ لذيييييييذ !

كان فيه منطقة خارجية ، فيها أهم الأماكن اللي في الفيلم .. و فيها أهم مكان البيت اللي ساكن فيه هاري بوتر

ياربّي يا القفا تعذب إلين قال بس

دآيقووووووون آلــــي

و هنا إبداع الفنانين اللي فانز لهاري بوتر

و هنا محطة القطار دائماً كنت ودي أروح لهوجورتس فيها

كل كبينة في القطار كانت مشهد من كل جزء صوروه في القطار ، الحركككة تموووووووووووت

المشهد الأول من الجزء الأول ..

و المشهد الأخير من الجزء الأخير ..

والله لو أقعد أسولف من اليوم إلى بكرة ماراح أخلص ، و أنتم بتطفشون !

بعد ما خلصنا أخذنا اللي نبي من المحلات و جربت كل الحلويات اللي طلعت في كل الأجزاء ، و طلعنا نتقهوى في المقهى الموجود .. مرة كان ودي في الآفتر نون تي تبعهم ، بس محجوووووز لآخر وقت ! خلصنا و رجعنا و وصلنا تقريباً الساعة 6 الليل ، لأن الثلوج و الأمطار كثرت .

يالله كل واحد يآخذ له عصا !

و هنا يحفرون الإسم على الدفتر للي يبي ..

صح نسيت أقولكم الأسعار ، سعر التذكرة العادية من Warner Bros كانت بـ 52 باوند ( 237 ريال ) للشخص و فيه أنواع و أشكال تذاكر .. و نفسها من Golden Tours بـ 113 باوند ( 515 ريال ) للشخص بس مع مشوار الروحة و الرجعة .. طبعاً فرق بس أستاهل لأني ما حجزت بدري !

آخـــرفـــرصـــة, توبليرون, AL Tunaiji و 2 آخرون معجبون بهذا.

كتكاته · 03-05-2023, 02:24 PM

تقرير ممتع و جميل يعطيك العافية يارب

Boarding Pass, آخـــرفـــرصـــة, توبليرون و 1 آخرون معجبون بهذا.

Boarding Pass · 03-05-2023, 09:52 PM

اقتباس : المشاركة الأصلية كتبت بواسطة كتكاته

تقرير ممتع و جميل يعطيك العافية يارب

الله يعافييييك يا قلبي

آخـــرفـــرصـــة, توبليرون و الايمان معجبون بهذا.

Boarding Pass · 04-05-2023, 12:36 AM

9 مارس
The Regent’s Park

يوم التشيك آوت من الفندق الأول ، و التشيك إن للفندق الثاني ، عطونا وقت إلى الساعة 1 الظهر ، نزلنا أغراضنا عشان نرتاح و خليناها عندهم ، لأني واعدت السواق يجي 2 .. طلعنا و قررنا نجرب محل دونات بعد كان تقييمه عالي وَ مقهى مختص كذلك ، و يبعدون عن بعض حول 10 دقايق ، وهذا كان فطورنا ..

جاء السواق و هو نفسه السواق اللي أخذنا من المطار ، و لكن اتفقنا أنا و هو على سعر آوبر و وافق .
و صلنا للفندق الثاني و كان التشيك إن لسى ما جاء وقته ، نزلنا أغراضنا و قلنا نروح للريجنت بارك ، قريبة .
الفندق بجنبه على طول بلازا ، مرة حلو و فيه جلسات و روقان جداً ، فيها مطاعم و مقاهي و ماركت تبع مارك آند سبينسر ، و البلازا فيها قناة مائية ، قناة Paddington Basin ، إلى هنا الوضع جميل جداً ، إلى إن قررت أمد الخطى شوي و نروح للحديقة ، يوم طلعنا من البلازا تفاجأت إني بشارع العرب ! يالله كيف انصدمت ! ما توقعته نهائياً بهالقرب ! إذا بنروح لباركر ستريت ما نحتاج نمر منه أبداً و كذلك ريجنت بارك ، و لكن أي شيء ثاني لازم نمر ، مرة ضاق صدري ! كنت أشوفه و أنا في الباص و أقول أمبيه شنو هذا ! لعلّي صرت في وسط الأمبيه شنو هذا ! غلطة الشاطر بعشر ! لا أحد يزعل و لكن دائماً ضد السكن في شارع العرب في أي مكان ، حتى المرور فيه يكون سريع سريع و أحياناً ما نمر حتى !

المهم رحنا للحديقة و الجو ضبااااااب يجننن ، تمشينا كثيييييييير

و تقهوينا بالمقهى الموجود هناك ، و بدأت تمطر بقوة ، و رجعنا عشان التشيك إن ..

هذا قاعد كأنه حارس وترنا

كان الوقت معدّي مرة ، بس قلنا نخلص و نآخذ راحتنا و نتمشى و نرجع .. و حنا راجعين وقفنا في فايف قايز اللي ببيكر ستريت ، و أكلنا هناك ، و بعدها رجعنا للفندق ..

و صلنا للفندق و بعد كل هالوقت الغرف ما جهزت ! و انتظرنا ربع ساعة عشان يستوعبون أول استعياب ، و بعدها ما عرفوا يطلعون الحجز حق الثلاث غرف ! و بعدها ما استوعبوا إني طالبة غرفتين بسرير مفصولين ، و واحد بسرير كينق ! و كنت أوريهم الحجز ببوكنق و يرجعون لي بحجز عائلة ثانية ! أخذ الموضوع ساعة ! و أقولهم عطوني اللحين غرفة عشان الوالد أبيه يرتاح ، و كانوا متلخبطين جداً ! قلت لأمي و أبوي يطلعون يتمشون لما أكلمهم .. لأن أبوي شخص بارد جداً و عادي مرة يصبر لليوم الثاني ، و أمي ما تحب أحد يآخذ حقها ، عشان كذا خفت يتوترون و قلت لهم يروحون للسوبر ماركت يجيبون موية و تشوكليت إلين يحلّها الله .. و رجعت للموظفين ، لما جهزوا الغرف قالوا يالله ادفعي ! وقتها صرخت عليهم و طلعت حرة إني بشارع العرب فيهم ! قلت هل متعودين تحاولون تسرقون اللي يجونكم عشانهم عرب و أكثرهم ما يناقشون !؟ حجزي مدفوع كامل و أي استهبال أنا أكلم الشرطة و أكلم سفارتي ! جاء المدير و كان من جنسية هندية ، قال معليش بس فيه مشكلة مع حجوزات بوكينق و مو ظاهر لنا جميع المعلومات ! قلت هاذي مو مشكلتي أبداً و كذلك كلامك غير صحيح ، ما فيه شيء اسمه المعلومات ما تطلع كاملة ! المبلغ واضح مدفوع ، كيف تقولي ادفعي مرة ثانية !؟ و تأخرت بالدخول و برجع أطالبكم بالساعات اللي ضيعتوها لي ، بس اصبروا علي أرتاح و أفضى لكم .. اعتذر و قالي الموظفة جديدة و مدري إيش ! الموظفة كانت أفغانية ! و وقتها هي جالسة تدور و تفتح الجهاز و تحوس ! صرخت عليها و بعدّتها عن وجهي ، بس تدور ! رحنا للكمبيوتر و المدير معي و جاء موظف ثاني هندي ( مافيه ريسبشن ، الأجهزة موزعة على طاولات في اللوبي ) ، طلعت لهم حجزي في كمبيوترهم ، و وريتهم إنه واضح مدفوع ، كيف تبون تسرقوني !؟ حطوها في الموظفة الأفغانية و إنها دلخة ! قلت اللحين برقى للغرف و بشوف وش أسوي في الموقف اللي سويتوه ! المهم أخذنا المدير للغرف ، الغرفة حقت الوالد وضعها تمام .. دخلت أمي و أختي الصغيرة غرفتهم و جت أختي بترمي المناديل في الزبالة و أنتم بكرامة ، لعلّ الزبالة ما انشالت بعد الناس اللي قبلنا ! جلست أناظر المدير قرفانة منهم و هو دايخ من الفشلة ! طلع جواله و صور و أرسل الصورة و لعن جدف حقين التنظيف ! و صورتها أنا قدّامه ، و قلت له هذا كله بيطلع ببوكينق و تريب أدفايزر و إيميل للفندق ! قال آسفين و قعد يهربد واااااااااجد ، المهم قلت يالله الغرفة الثالثة ، رحنا و طلعت الغرفة كينق بيد ، و قال اللحين نفصلها ! لعلّي استقعدت لهم أنا و خواتي ! الغرف تجي معها ضيافة مجانية و لك حق تعبئتها يومياً ( 3 موية – حليب – تشيبس – تشوكليت – قهوة – شاي – و مكسرات ) ، طبعاً ما عندنا و لاشيء ! و فتحت الثلاجة قدامه بوريه إنه مليون بالمية الغرفة ما تنظفت لأن الضيافة مارجعوا يعبونها ، و يقولي إلا تنظفت بس نسوا يحطون الضيافة ! و فتحت الثلاجة بشوف قلت يمكن حطوا الموية و أتطمن إنه صدق تنظفت بس تأخروا يحطون الضيافة ، لقيييت الحليب مفتوح و مشروب منه ! صورته قدامه و عطيته الحليب ، و قلت له معك ساعة ، تجهز لنا غرف نظيفة ، بدور واحد ، و ضيافة كاملة ، و دور عالي ، قالي خلاص و جلس يعتذر و تقطع اعتذار ! و حنا نتكلم جت وحدة تفصل السراير و ريحتها كانت سيئة جداً جداً ، و قلت خلها تطلع لأني ماراح أقعد بالغرفة .. طلعت و قلت له إذا هاذي نظافة موظفينكم ، كيف تبي تصير نظافة الغرف ! و قال بيتأكد مرة ثانية من نظافة الموظفين ! و قزرها طول اليوم اعتذار .. طبعاً صار معنا مواقف في الفندق ، و كلها مسجلتها عليهم ، و كتبت ردي في تريب أدفايزر و بوكينق .. و ليومكم يتواصلون معي في الـ SMS وَ الواتساب و الإيميل و يتصلون ! يبوني أشيل التقييم و يرجعون لي 10% من المبلغ ، و راح أعرض رسائلهم كاملة لكم ، و بكتب جميع المواقف الخايسة اللي صارت ، وقت ما أحط لكم صور الرسايل و المكالمات !

أنا أعرف إن الغرف في الفنادق ما يغيرون فرشها و لا ينظفون الغرف تنظيف هائل ، مشّي حالك ، بس على الأقل مو يصيرون بهالشكل و بهالوضوح ! حنا ما نستعمل مفارش أي فندق ، نطلبهم يجون يآخذونها و نطلع مفارشنا ، و نرميها بعد ما نخلص ، كذلك نرفض إن الغرف تتنظف من قبلهم ! حنا ندخل و ننظفها بديتول و مناديل معقمة و حتى دورات المياه ، نخليهم بس يشيلون الزبايل و أنتم بكرامة يومياً ! و حتى أي جهاز لهم يجون يآخذونه ، لأننا نحط غلايتنا حنا و جهاز قهوتنا ، و نصير مرتاحين ! بس هالمرة قذراة بهالوضوح ما قدرت أسكت .. و الصدق أنا أنغبن إذا حسيت إنه انلعب علي ! الوالد يقول حرام ، اعذريهم ، مضغوطين ! جلست أناقشه كل هذاك اليوم إنه خطأ تعذرهم ، و إنت دافع و أخذوا من وقتك وَ وَ وَ ، و ليومكم ما اقتنع ، و يقول حرام تقطعين رزق الناس ! لأني في التعليق ذكرت أسماء الموظفين اللي طول فترة إقامتنا ناشبين لنا يبون أقيمهم زين في البرامج و أذكر أسماءهم ، بجيحين !

دخلنا غرفنا بعد هواش مو طبيعي مع إدارة الفندق ، و أمي و أبوي ماشافونا و حنا نتناقر حنا و إياهم عشان ما تضيق صدورهم ! و سوولي أهلي قهوة عشان أرضى .. كنا بننزل نتمشى و لكن البرد و الهواء مرعب ، فجلسنا في الفندق و عزمونا أمي و أختي على غرفتهم ، و تعشيت مخلل و بيبسي ، حسيت أحتاج أغث نفسي شوي زيادة .. و انتهى أطول يوم و أكثرهم إزعاج على خير !

الفندق الثاني :
wilde aparthotels by staycity london paddington - نجوم 4
6 ليال ( 9 مارس – 15 مارس )
تم الحجز عن طريق موقع بوكينق .
الغرف :
2 استديو وايلد توأم / الكنب الموجود في الغرف ، يصير سرير لشخص.
1 استوديو وايلد / الكنب الموجود في الغرف ، يصير سرير لشخص.
( النظافة : ضعيف و مخيس قبل الهوشة / جيد و قد يوصل إلى جيد جداً بعد الهوشة ، بس قرفانة منهم خلاص ) .
( الموقع : ممتاز للي يحب شارع العرب / جيد للي ما يحب شارع العرب ) .
( السعر : مناسب بالنسبة لعدد الغرف و حجم الغرفة كبير جداً بالنسبة لفنادق لندن ، و كذلك دائماً فنادق أوروبا تعتبر أسعارها مرتفعة ) .
السعر الإجمالي :
17,650 ريال .
و التواصل معهم و أنتم بالفندق يكون من خلال الواتساب .

10 مارس
bicester village outlet

كنا مقررين من الليلة اللي قبل إننا نروح للآوت لت ، بس قلت لأهلي ننام و نشبع نوم و بعدها نطلع نتقهوى و اللي يبي يفطر يفطر ، و بعدها أقص تذكرة قطار للآوت لت ، رحنا أفطرنا في مطعم على القناة ، جلسنا برا بس كان بررررد و قلنا بندخل نجلس داخل ، كنا حاجزين من برنامج آوبن تيبل ، اسم المطعم كان Bondi green.. عندهم فرع طبيعي و فرع على القارب ، الصدق القارب شكله يوتر شوي و يدوّخ ، قاعد يتحرك ، أحس حومة كبد .. طلبنا و أفطرنا ، أهلي يقولون حليل الأكل بس ما يرجعون له ، بس أنا طلبت حلى كان يمِـي والله ، بادينغتون كيك بالتراميسو ، الكريمة اللي داخل الكيك لذيذة ! أما الوالد قال بيروح يفطر فطور عربي من الشارع اللي مايتسمّاش !

لما خلصنا دخلت برنامج OMIO بحجز تذاكر للآوت لت ، فيه من محطة بادينغتون و المحطة تقريباً 4 دقايق مشي عننا و فيها تبديل قطارات ، و فيه من محطة ماريلبون دايركت ، و تبعد تقريباً ثلث ساعة مشي .

أخذت مارليبون ، قلت أريح نروح لمحطة مارليبون مرة وحدة بدون تبديل ، و نتمشى شوي بعد .
كان سعرها في البرنامج أرخص من إذا بشتريها من المحطة بفارق بسييييييييط ، كان المجموع للجميع رايح جاي لخمسة أشخاص بـ 110 باوند ( 500 ريال ) .

وصلنا و كان القطار زحمة جداً ، و قعد كل شخصين لحال ، و أبوي لحال .

وحنا في الطريق جاء شخص وزّع علينا منديل و معها رسالة ، بدايتها كنت أحسبه يعتذر مقدماً عن إزعاج أطفاله ، لعلّه طلع مُحتاج .

و صلنا للآوت لت و ضحكني يوم أعلنوا عن المحطة باللغة العربية ، و كل اللوح اللي في المحطة تعلّمك وين الآوت لت !

جلسنا فيه قُرابة الست ساعات ، و مآخذين شنط عشان نعبيهم و ما نشيل أكياس ، و طبعاً كل العالم معهم نفس شنط .

أخذوا خواتي هوت تشوكليت و كريب و أنا قهوة و أهلي راحوا بريت .

بعد ما خلصنا رجعنا بالقطار اللي قبل موعد قطارنا ، و كان فاضي ..

نزلنا لمحطتنا و مرينا ماكدونالدز أخذوا أهلي غداءعشاء و أنا و أختي مرينا على الماركت و أخذنا مانجو عشان نآكله مع بهارات الـ tajin ، و لقيت تشوكليت على شكلة بومة هاري بوتر .. المهم المانجو مع البهارات غريب طعمه بس لا بآس ، ينوكل .. دائماً أشوف فيديو ناس في المكسيك يآكلونه ! الزبدة الحمدلله تعشينا و نمنا نومة فزييييييييعة .

آخـــرفـــرصـــة, توبليرون, AL Tunaiji و 3 آخرون معجبون بهذا.

Boarding Pass · 05-05-2023, 03:47 AM

11 مارس
LIBERTY LONDON
COVENT GARDEN
WELLINGTON ARCH
HYDE PARK
KENSINGTON GARDENS
MARBLE ARCH

جلست مع أهلي هالصباح و سألتهم سؤال ! قلت هل أنتم تبون نركب سيارة بس ما تبون تقولون لي و تجاملوننا أنا وخواتي لأننا نحب المشي ؟ قالوا لا والله ، مبسوطين و متعودين نمشي مو شيء جديد ! مدري ليش خفت إن أمي و أبوي يجاملوننا ، لأننا نمشي كثير بالعادة ماشاء الله أنا و خواتي ، سواء كنّا مسافرين أو في الرياض ، و حتى هم يمشون تقريباً نفسنا ، بس مدري بديت أهوجس شوي ! قالت أمي أساساً المشي اللي نمشيه مو متواصل ، نمشي و نجلس نتقهوى أو نفطر أو نتفرج على شيء ، ما فيه مشي كثير متواصل و الديرة زينتها الواحد يمشي فيها .. عاد حلّفتهم إذا تعبوا يقولون لي .. عشان ما أقعد أفكر كثير !

المهم طلعنا من الفندق على شارع العرب لأننا بنروح لـ LIBERTY ، وصلنا و كان المكان يجننننننننن ! يالله كأني بفيلم ، المبنى فعلاً يأسر أكثر من اللي الأشياء اللي يبيعها ! صوت الخشب و أنا أمشي ! تصميم المكان ، حبيته مرة .. و كالعادة أمي و أختي الصغيرة جلسوا يقررون وش يآخذون لهم و وش يآخذون هدايا ! و أنا وأختي الثانية منهارين على المكان ! و الوالد كان بيننا و بينهم ! الزبدة أذكر طولّنا مرررررررة .. طلعوا أهلي بغنائم هائلة ، و خفت الصدق من كثر الأكياس شوي إن حرامي ينتبه أو شيء ! قال أبوي بروح أودي الأكياس عشان نرتاح منها و ما تتوترون من أحد ، و بجيكم لكوفنت جاردن .. طلب آوبر و راح ، و جانا بعدها في كوفنت جاردن !

خواتي أخذوا آيسكريم قبل نروح لكوفنت جاردن من ben and jerry's و أمي أخذت جيلاتو من Amorino

بعدها قررنا نروح للمكان اللي نبي نتقهوى فيه و كلهم قريبين لكوفنت جاردن .. و يعتبرون تريند في لندن ، الطوابير هائلة عليهم ! بس قبل رحنا لكوفنت جاردن ! قسم بالله لوهلة تنسى إنك في لندن ! يالله كميّة خلايقَــــة مُش طبيعية ! غريب الوضع ! مدري ليش نتصدد عن بعض ! المكان حلووووووو .

و لقينا محل حلويات فيه أشياء غريبة شوي و مقرفة كثير !

خلصنا و رحنا للأماكن اللي نبيها ، الأول كان مخبز اسمه Buns from home ، ما بقى سائح في العالم مازاره في لندن ، أخذنا منه سينامون رولز و أشياء أخرى ما أعرف اسمها لأن خواتي اللي صفّوا و طلبوه ، و جابوا لنا قهوة معها .. و الثاني كان محل دونات اسمه donutelier ، و كان فاضي و أنا و أمي و أبوي رحنا له و كان قريب للمحل الأول ، خلصنا كلنا بنفس الوقت و اجتمعنا في مكان و جلسنا نتقهوى وبدينا بمخبوزات الأول ! طبعاً المحل الأول كان أكثر شهرة من الثاني ، لمّا ذقناه جانا إحباط ، و الصدق كان حالي مرة مرة مرة ، قلنا نخلي الدونات نآكلها إذا رجعنا ، لأن الشيء اللي بالتشوكليت كان حااااالي هو والتشيز كيك ، دخنا ! المخبز فعلياً أقل مستوى من أي مخبز جربته في لندن ! بس سبحان الله كيف الهبّة تصير هبّة !

الأول ..

الثاني ..

لعلّنا قررنا نسوي معادلة و نآكل مالح ، لقينا مطعم بيتزا و دخلناه اسمه bella italia ، و بدون أي تفلسف أخذنا بيتزا مارغريتا و كفى المؤمنون شر القتال ! و كذلك شفت فروع كثير لهالمحل .

المَاءُ الزُّلاَل أمي جازلها الڤيــو !

يوم عادلنا المالح و الحالي قلنا نروح لـ WELLINGTON ARCH ، يعني هي ما تعتبر مشوار أحس ، بس هي في الطريق للـ HYDE PARK وَ MARBLE ARCH وَ KENSINGTON GARDENS.. أغلبهم شفناهم في تور الباص و راح أحط لكم صور من التور لأن الصور كلها طالعين فيها والله ، المهم قلنا بما إننا قريبين لهم نشوفهم من قريب .. مدري ليش في الهايد بارك مسورين المربعات الخضراء بشبك أخضر ! صايرة كأني أمشي في متاهة ! بالنسبة لي الريجنت بارك أوسع صدر بدون مقارنة ، و كذلك حديقة قرين بارك اللي عند قصر باكنغهام أملح و فيها معالم كثيرة ! هالحديقة حللناها ، أغلب مشاورينا و حنا بالفندق الأول لازم نمر من عندها .

حاطّيـن كود على رجول البطّات ! يخافون عليهن !

تأخر الوقت و حنا في KENSINGTON GARDENS ، و قلنا نرجع خلاص ، و قالت أمي نرجع بآوبر ، حجزنا سيارة و رجعنا للفندق .. سألتهم تبون تتعشون ؟ قالت أمي لا ، يوم التشيك إن لما رحتت للسوبر ماركت جبت توست و زبدة و مربى ! و قالت بسوي قهوة و نتعشى أنا و أبوك منها .. و أنا و خواتي قلنا أجل نآخذ من الدونات و نشرب معكم قهوة .. لعلّنا يوم جربناها قلنا لأمي تسوي لنا معهم زبدة و مربى ، كرم الله النعمة مش و لا بُد ! كان عشاء مليان سككككر !

آخـــرفـــرصـــة, توبليرون و q8ya metnaqla معجبون بهذا.

Boarding Pass · 05-05-2023, 05:34 AM

12 مارس
harrods
Shepherd's Bush Market
WESTFIELD

لما صحينا الصباح قالوا خواتي ودنا نروح لهارودز بس نبغى لفة في الباص السياحي لأن الجو جبّار .. حجزنا و رحنا لأقرب موقف للباص و أخذنا من بريت كرواسون تشوكليت و قهوة ، و قعد الباص يلُووووب إلين وصلنا لهارودز ، بعد لفّة طويلة و مريحة في الباص ..

تمشينا في الهارودز و انهدينا ! أخذنا ماكرون و كيك و قلنا بنآكلهم و حنا نتمشى و أخذنا تشوكليت نقنقة في الباص .. لقيت مقهى هارودز خارجي و لكن اللآين أطول من تقريري ! و لقيت لهم ترك بس مقفل ! قلنا مو كود قهوة ، و حنّا نلف لقينا مقهى EL & N و عندهم جلسات خارجية ، رحنا طلبنا و قلنا لهم نبغى نقعد برّا ، و بلغناهم إننا معنا كيك من هارودز في حال كانوا يمنعون ، و قالوا لا عادي دامكم طلبتوا قهوة من عندنا .. تقهوينا و عيّنا من الله خير عشان نتجهز للمشوار اللي بعدووو !

قالت لي أمي و حنا في الرياض إنها تبغى محلات قماش كشخة و فخمة و تصلح هدايا لجداتي .. المهم اشترت لهم قبل من LIBERTY ، بس تبي زيادة ! لما بحثت لقيت إن كثير أكشاك و محلات قماش في Shepherd's Bush Market بس ما أدري إذا نفس اللي تبي أمي أو لا ! رحنا و لقينا أكثر القماشات كيوت بس تصلح استعمال يومي فقط ، و كان فيه محلات حلوة بس أمي ما حبّت المكان ، و إذا ما حبته ما راح تلقى فيه شيء حلو حتى لو إنه فيه ! أخذنا منهم كم قطعة عن قولة إننا جينا للماركت ..
طبعاً مليان عرب و محجبات ، تعبت من كثر ما أعيد التصوير ، يالله رقعت هذولي ، قزرتها تصوير محلات السيفونير ، مليان و رخيصات الصدق !

بعدها رحنا لـ WESTFIELD .. ما شفت منه غير البوابة الصدق و تغديت فيه من مطعم فيتنامي ! كان عندي شغل و لازم أسلمه ، قلت لأهلي تمشوا و إذا خلصت قبل تخلصون ، أتمشى معكم ! لعلّه أمسى الليل و أنا ما قضيت .. المول كبير و عشان الواحد يخلصه أحس يبيله يروح مرتين ، بس أهلي قالوا ما نبي خلاص ، أتوقع طفشوا الحمدلله من الدوران .

أخذنا أوبر و حطيت اللوكيشن للبيكادللي ، كان فيه حوله محلات حلويات كثير غريبة ، قلنا نجرب اللي نحسه حلو وإذا تمام أخذنا معنا للرياض ، و بأحد الدواعيس لقيت محل لهاري بوتر بعد .. أخذنا التشوكليت للفندق و سوينا لنا قهوة و تقهوينا عليهم .

آخـــرفـــرصـــة, توبليرون, AL Tunaiji و 1 آخرون معجبون بهذا.

um Muataz · 06-05-2023, 06:13 PM

هذي الفقرة يتخللها رغبات كل واحد من افرد العائلة ف السفر اعطاء الحرية وهذا ضروري من اختيار لاكل او طلعات شي جميل وخاصة اذا الرحلة فيها مختلف الأعمار .

بس ابدعتي ف اظهار بعض الاشياء الي جعلتكم تستمتعون ماشاءالله . اما الهبات تكفين 😎 خليني ساكته صارت لي مره قبل السفر وكانت بعد الى لندن بس انا اقرأ واشوف التعليقات عن الهبة قبل 🤓 الحمدالله اذا وصلت اكون مقتنعة وما اطبق الا الي يعجبني 👌

آخـــرفـــرصـــة, توبليرون, Boarding Pass و 1 آخرون معجبون بهذا.

Boarding Pass · 07-05-2023, 12:16 AM

اقتباس : المشاركة الأصلية كتبت بواسطة um Muataz

هذي الفقرة يتخللها رغبات كل واحد من افرد العائلة ف السفر اعطاء الحرية وهذا ضروري من اختيار لاكل او طلعات شي جميل وخاصة اذا الرحلة فيها مختلف الأعمار .

بس ابدعتي ف اظهار بعض الاشياء الي جعلتكم تستمتعون ماشاءالله . اما الهبات تكفين 😎 خليني ساكته صارت لي مره قبل السفر وكانت بعد الى لندن بس انا اقرأ واشوف التعليقات عن الهبة قبل 🤓 الحمدالله اذا وصلت اكون مقتنعة وما اطبق الا الي يعجبني 👌

والله يا أم مُعتز إنها أملح فقرة إذا قعدوا يطلبون أشياء و يتناقشون و يقنعون بعض بالمكان ، حنا نخليهم يختارون اللي يبون بما إنهم الصغار

ياربيـــه يالهبّات والله لو مو البنات الصغار قايلين لي عليهن و حنا في الرياض كان مارحت
بس الحمدلله هنا ما يبون شيء يكرهون الزحمممممة ! عشان كذا أنبسط إذا طلبوا شيئ معين و حنا مسافرين

آخـــرفـــرصـــة و توبليرون معجبون بهذا.

آخـــرفـــرصـــة · 06-05-2023, 07:57 PM

أجزاء جميلة
أما هوشة الفندق مدري وش ورطكم فيه !!!
موظفة افغانية وستاف هندي عنوان للجودة

شارع العرب صعب السكن جنبه أو حتى المرور منه
الواحد ما يحس أنه سافر اذا مر على الشارع

يا سلام على متجر ليبرتي
أحب ادخل واتفرج بس ما اشتري

الكوفنت قاردن من الأماكن المفضلة عندي
فيه محل شاي اطلالته روعة على الساحة
والكشكات الصغيرة اللي فيه متعة التسوق فيها

مستمتعين ومتابعين

توبليرون, Boarding Pass, um Muataz و 2 آخرون معجبون بهذا.

Boarding Pass · 07-05-2023, 12:33 AM

اقتباس : المشاركة الأصلية كتبت بواسطة آخـــرفـــرصـــة

أجزاء جميلة
أما هوشة الفندق مدري وش ورطكم فيه !!!
موظفة افغانية وستاف هندي عنوان للجودة

شارع العرب صعب السكن جنبه أو حتى المرور منه
الواحد ما يحس أنه سافر اذا مر على الشارع

يا سلام على متجر ليبرتي
أحب ادخل واتفرج بس ما اشتري

الكوفنت قاردن من الأماكن المفضلة عندي
فيه محل شاي اطلالته روعة على الساحة
والكشكات الصغيرة اللي فيه متعة التسوق فيها

مستمتعين ومتابعين

اللي ورطنا فيه إن الموظفين حقين الفندق يطلبون من العالم يمدحونهم و يطلبون تقييم عالي و حنّا أكلناها ، المشكلة مو بس المدح عليه في بوكينج ! حتى تريب أدفايز
بس بإذن الله في صدد إني آخذ حقي منهم قريباً قريباً

أول مرة نشوف ليبرتي ، كان لابد من التّبضع !

حيّاك الله

آخـــرفـــرصـــة و توبليرون معجبون بهذا.

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
الانتقال إلى العرض العادي العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رِحلَة كُوريَا الجَنوبيَّة - ( سِيئُول + جيجُو ) - يُوليُو 2022	Boarding Pass	بوابة كوريا الجنوبية	69	اليوم 01:02 AM
جولاي 2023	Reham2013	بوابة سويسرا	7	18-05-2023 06:02 PM
اوربا في صيف 2023	Rema	بوابة سويسرا	3	23-01-2023 01:41 PM
رحلة الى أوروبا 2023	Noorbash	بوابة الدول الاخرى	4	16-08-2022 10:42 AM