شكراً جزيلاً .. ارجع تحمّس لها ، تراها فعلاً جميلة و وسيعة صدر جداً و حلوة ، بس اللي زادها حلاوة إن الجو كان بارد

أتوقع إنك نفس وضعنا .. نوعاً ما بعد ما شفنا صور الدول في الأنترنت و رحلات الناس و تقاريرهم و الفلوق اللي يسوونه في قنوات اليوتيوب ، صرنا ننشد لدول شرق آسيا .. فيها تجدد و اختلاف مو طبيعي ، و تلقى كل سنة تقرير مختلف عن السنة اللي قبلها و بإضافات جديدة لنفس الدولة و كأنها دولة أخرى تماماً ! رحلتنا لكوريا فعلياً قليل اللي كررناه ، و الوقت ما كفى ! و اللحين جالسة أتفرج عليها و اكتشفت مسويين أشياء جديدة بعد .. شرق آسيا شابّة فعلاً ..

و دول أوروبا الأحب إلى قلبي ، كتاريخ و مباني قديمة ، كلّها مُحببة لنفسي ، و زيارتها لابُد منها .. بس المتعة أكيد و الإنبهار بيكون من نصيب شرق آسيا ..

بالنسبة للتقارير و طريقة الكتابة ، فـمليون بالمية مُشابهة لهم ، لأني ما قريت تقارير إلا لهم ! لمّا كنت صغيرة ، كان أخوي الكبير يقرأ تقارير من هنا قبل السفر و حتى لو مافيه سفر ، يحب يتفرج ، و أقرأ معه و نسجل بعض الأماكن و نبحث عنها ، وكنت أنبهر كيف ممكن يخلونك كأنك مسافر معهم الله يجزاهم خير ، حتى الموية يكتبون لك سعرها ، أحس عيب ما تعرف ميزانيتك و إنت مسافر و شايف تقراريهم !
دائماً كان ودّي أنزّل سفراتنا ، عشان فعلاً الناس تستفيد ، و لكن كنت ما أقدر كيف ممكن أجمع الصور و أرتبها ، صعب شوي .. و كذلك مع الدراسة ماراح أفضى أرتب شيء ! و نسيت السالفة !

عاد لما دخلت أسأل عن بريطانيا قريب ، و كانت قبل سفرتنا لكوريا ، قررت وقتها إني راح أنزل التقرير ، خاصة إن اللي معي كلهم يحبون التصوير ، قلت لهم ياويلكم ما تصورون كل شيء تسوونه ! و لندن من نفسهم صوروا لي بدون أي ضغط منّي !

بإذن الله

حيّاك الله