رِحلَة لَندَن - مَارِس 2023

Boarding Pass · 01-05-2023, 10:05 AM

أهلاً وَ سهلاً
فكرت كثير قبل أنزل التقرير ، بما إنه ماشاء الله تقارير لندن كثيرة جداً ، و مغطية أغلب الأماكن ! و لكن قلت معليش معليش .. هه ممكن أحد يستفيد من هنا أو هنا ، مكان جديد ، أو تجربة جديدة ، أو حتى أماكن الإقامة .. و أنا كذلك أستفيد لما أكتبها ، في حال إن شاء الله حصلّي سفرة ثانية لها ، أرجع أشوف أفكاري .. و إن شاء الله تنبسطووووون !

الوجهة :
المملكة المتحدة
( لندن )

العملة :
1 باوند = 4,55 ريال ( سعر الصرف في البنك السعودي للاستثمار " بطاقة السفر " ) .

عدد المسافرين :
5 أشخاص .

التذاكر :
سعر التذكرة للشخص ، ذهاب و إياب ، و شامل كذلك ( الضريبة + خيار إمكانية التعديل على الرحلة + اختيار مقعد لجميع الرحلات ) :
3858 ريال سعودي .

الطيران :
طيران الاتحاد .
رحلة الذهاب ( بتوقيت كل دولة ) :
تاريخ 3 مارس .
الإقلاع : مطار الملك خالد الدولي في الرياض ( الساعة 4:30 ) .
الوصول : مطار أبو ظبي الدولي ( الساعة 7:10 ) .
( ترانزيت ساعة و عشر دقائق ) .
الإقلاع : مطار أبو ظبي الدولي ( الساعة 8:20 ) .
الوصول : مطار Heathrow في لندن ( الساعة 12:00 ) .
رحلة العودة ( بتوقيت كل دولة ) :
تاريخ 15 مارس .
الإقلاع : مطار Heathrow في لندن ( الساعة 9:00 صباحاً ) .
الوصول : مطار أبو ظبي الدولي ( الساعة 19:45 مساءًا ) .
( ترانزيت ساعة و خمسة دقائق ) .
الإقلاع : مطار أبو ظبي الدولي ( الساعة 20:55 ) .
الوصول : مطار الملك خالد الدولي في الرياض ( الساعة 22:00 ) .

متطلبات الدخول إلى المملكة المتحدة :
1- إعفاء إلكتروني من التأشيرة البريطانية ، و قيمتها 30 باوند ( 137 ريال ) .
2- اللقاح ضد كوفيد 19 غير مطلوب .

شرائح الجوال و الشبكة :
3 أشخاص تجوال ، شريحة جوّي من STC ، بـ 350 ريال ، لمدة شهر كامل وَ 30 جيجا ، و شابكين على شبكة Everything Everywhere و المعروفة بـ EE .
شخصين أخذنا لهم شريحة أنترنت و مكالمات لمدة شهر تقريباً بـ 20 باوند ( 91 ريال ) من Vodafone ، و الصدق كان عند الفندق و جربت أشبك على شبكتهم و كانت تمام ، فأخذنا لهم منها ، و كانت قوية جداً و مناسبة .

برامج استفدت منها جداً في لندن :
1 – برنامج المواصلات uber .
2 – برنامج المواصلات bolt و هو الأرخص .
3 – برنامج خرائط google map .
4 – برنامج للحجز المطاعم open table .
5 – برنامج big bus tours ، لمعرفة الخطوط و الطرق للباص السياحي .
6 – برنامج visit London في حال توهقتوا في المخطط .
7 – برنامج four square لرؤية تقييمات المقاهي و المطاعم و الأماكن االسياحية قبل التجربة .
8 – برنامج omio لحجز تذاكر القطار .
9 – برنامج london undergound .

بِسم اللّه نَبدَأ

3 مارس ( الوصول إلى لندن ) :
طبعاً و كالعادة نحسب المطار زحمة ، لأنه كان أول أيام الإجازة ، و الرياض فعلياً كانت راح تِنبَط ، و الزحمة بادية من قبل الإجازة ، و أخواني قالوا لازم تطلعون بدري ، فقررنا نروح قبل الإقلاع بستة ساعات !
و لعلّنا وصلنا بنصف ساعة للمطار !
و كالعادة انتظرنا ، و أول مرة نجي قبل ما يفتح الكاونتر !
أهلي راحوا لصالات الانتظار اللي تحت ، و أنا و العفش و أختي الصغيرة جلسنا ننتظر الكاونتر يفتح !
من 10:30 و حنا ننتظر حتى 1:20 !

فتح الكاونتر و جو أهلي ، و بدأت فقرة التوتر و الخوف من وجود خطأ في الإعفاء الإلكتروني ، و طول الوقت و أنا ألطم ليش ما خليت مكتب يسويها و أفتك ! و أهلي يقولون عادي يا بنت الحلال حتى لو فيه خطأ خيرة و ربي رادنا عن شر ، لأن هالرحلة تأجلت ثلاث مرات ، و مع ذلك صاملين نروح !

و يوم شفت الكل قاعد يعدّي و الوضع تمام ارتحت ، إلين جاء دور العائلة اللي قدامنا ! و جلست الموظفة تدقق و وضعهم تمام ، إلين وصلت لآخر بنت في العائلة ! كان حرف الـ S تبع اسم الجد small في الإعفاء ، و الجواز كان capital ، قالوا ما تطلع البنت للرحلة ! انهارت البنت ، و انهاروا أهلها ، و انهرت أنا !
و كلموا المكتب اللي سوّاها لهم ، و كان أبوهم يطالب المكتب إنه يتحمل تكاليف رحلة البنت بعد 48 ساعة و يسوي لها التصريح الجديد ، و مدري وش صار عليهم و على المكتب ! و يوم شفتهم كذا بدأ الشيطان يلعب في عبّي !
و جاء دورنا ، و أنا خلاص ناشف دمي ! مو أول مرة أفيّز أو أسوي شيء ، بس يدققون على الفاصلة و على الحرف ، و على كلام العالم إن الموضوع معقد ! و صار لي كم سالفة قبل السفرة بخصوص الإعفاء ، عشان كذا توترت ، و الموقف اللي صار قدامي بعد ! كمّل الناقص !

جاء دورنا ، كان كأنه امتحان .. يوم يكرم المرء أو يهان ! و طلبت الموظفة الإعفاء ، أنا طابعتهم ، و معي في الجوال ، قالت الورقي أفضل و أوضح ! و بدأت تدقق ، و خليتها تبدأ بحق أبوي و بعدها حق أختي الصغيرة ، لأن الإشكال كان عليهم ! يوم خلصت قالت خلاص كلها تمام ! قلت لها تمام تمام ؟ قالت تمام تمام ! قلت ممكن أحد يرجعنا بأبو ظبي أو لندن ؟ قالت أبداً إن شاء الله ! و الحمدلله مشى الموضوع على خير ، و كنت توي أبدأ أتحمس للسفرة !

بالمناسبة أنا مو شخص آوفر و خواف و لكن ! الفنادق مدفوعة ، و تذاكر دخول أغلب الأشياء مدفوعة ، و كلها غير مستردة ، يعني في حال وجود أخطاء لا سمح الله ، كانت بتكون خسارة فادحة جداً !
عدينا الجوازات و رحنا لللآونج تبع سمايلز على أساس نآخذ لنا غفوة ، يوم دخلنا طلعوا كل العالم فيه ! الموظف يقولّي ترى زحمة و ما فيه كراسي و ما فيه إلا مشروبات حالياً ، و أحسبه يبالغ ! طلع صادق ! لقينا مكان لأبوي و قلنا له ينام و وقت البوردينق قلنا له بنبلغك !

نزلنا تحت و فعلاً ما كان فيه أحد ، كلهم باللآونج .. تمشينا شوي ، أخذنا لنا قهوة ، و جلسنا و نمنا ، و لعل البوردينق تأخر إلى 5 الصباح !

و حنا في الطيارة جلست أهوجس ليش ما رجعنا للبيت يوم وصلنا بدري للمطار ! إلى يومكم مدري ليش انتظرنا في المطار كل هالساعات !

المهم وصلنا أبو ظبي و المفروض الترانزيت يكون ساعة ، و لكن وصلنا متأخر لأننا أقلعنا متأخر ! و صلنا و كان باقي شوي على وقت البوردينق ! لما دخلنا طلبوا الإعفاء و جلسوا يدققون مرة ثانية ، و دخلونا بسرعة الحمدلله للطيارة ، و نمت الرحلة كاااااااااملة !

خواتي يقولون إن فطورهم لطيف ، وحدة أخذت فرينش توست ، و الثانية بيض و هوت دوق ، و أنا نايمة و لا حسيت بأي شيء في الحياة !

و الوجبة الثانية كانت ساندوتش الإتحاد المعتادة ، ساندوتش بيتزا بدون جبنة !

و وصلنا لوندوووون .. أسرع مرة أطلع من مطار دولة ! ملحهم ظريفين و سريعين ! لعلّي تفاءلت ! و الحمدلله فعلاً كان أظرف و ألطف شعب يمر علي في أي سفرة .. مرة فريندلي !

كنت حاجزة سيارة من alpha airport cars بـ 176 باوند ( 801 ريال ) ، سيارة لـستة أشخاص + ستة شنط كبار ، و الدفع كاش لأن الكاش أرخص بـ 25 باوند ( 114 ريال ) ، أرسلوا الفاتورة عن طريق الإيميل ، و تواصلوا معي قبلها بيومين عن طريق الواتساب ، و كانوا معي أول بأول إلين وصلت المطار ، و جاء استقبلنا السائق ، و كان من أبدع ما يكون .

وصلنا الفندق و كان موعد التشيك إن من زماااان .. ديكور الفندق غريب أطوار شوي ، و حتى ألوانه غريبه و عليه علامات استفهام واجد ، بس الصدق أرجع أسكنه مرة ثانية عادي ، لأن الموقع رهيب رهيب رهيب رهيب ..

الصدق قبل السفرة سألت شخص في تويتر مشهور ، ساكن بلندن إلا شوي ماشاء الله ، و يرد على الاستفسارات برحابة صدر الله يجزاه خير .. سألته عن المنطقة اللي فيها الفندق ، لأني حجزت فندق و باقي ثاني و كنت بشوف إذا تمام أو لا ! و قالّي " ما أحبها " ،و ما قالّي ليش ما يحبها ! و لكن من فصفصتي للندن ، حابة أقوله إنّي فعلاً ما حبيت غير هالمنطقة !

دخلنا و أخذنا وقتنا تماماً و صلينا و ريّحنا شوي ، و بعدها طلعنا نستكشف المنطقة و الدنيا بدأت تظلم و أغلب المحلات بدأت تقفل .. الوالد كان تعبان شوي ، فقرر يآخذ له غفوة .

راحوا خواتي لـمطعم wasabi ، و أنا و أمي رحنا نتقهوى في pret ، قلت يمكن نشوف أم حسين !

و حنا جالسين في أمان الله دخل هومليس ، و زرف كم ساندوتش من الثلاجة و هج ! و كانت أول مرة أشوف جذي ! توحشنا شوي ! ما استوعبنا الموقف ، و بعدها صرنا نشوف هالموقف بشكل يومي و الوضع عادي و سهالات !

مشينا لمحطة فكتوريا نشوفها ، و تمشينا حولها ، و تمشينا في المكان ، و شفنا وش حولنا ، و كنت مطلعة كم مقهى و كم مخبز نجربه من four square للأيام الجاية .. ظلمت الدنيا و رجعنا ننام ، و الصباح رباح !

صح كل الفنادق اللي سكنّاهم الساعة 10 في الليل يسكرون أبوابهم ، و ما يفتح الباب إلا ببطاقة الغرف تبع الفندق .

الفندق الأول :
- citizenM London Victoria Station4 نجوم
6 ليال ( 3 مارس – 9 مارس )
تم الحجز عن طريق موقع بوكينق .
الغرف :
3 غرفة كينغ ( سرير مزدوج كبير جداً – بدون إفطار ) .
( النظافة : جيد جداً ) .
( الموقع : ممتاز ممتاز ممتاز ) .
( السعر : مناسب جداً بالنسبة لعدد الغرف ، و كذلك دائماً فنادق أوروبا تعتبر أسعارها مرتفعة ) .
السعر الإجمالي :
14,188 ريال .

اللوبي

و الأصنصير مليان أشخاص غريبين

و الغرف كانت كلها نفس بعض ، بس حق ترى حجمها صغير ، يعني إذا بصلّي لازم أختي تقعد ما تتحرك ..

4 مارس
LONDON EYE
PALACE OF WESTMINSTER
BIG BEN
WESTMINSTER APPEY
THE SHERLOCK HOLMES MUSEUM
MADAME TUSSAUDS

قمنا الصباح و كنت حاجزة مسبقاً في مطعم Bill's ، قريب جداً عندنا و تقييمه حلو كمطعم يقدم فطور إنجليزي تقليدي .. وصلنا و طلبنا و الطلب اللي يبونه خواتي كان أغلبه خنزير ، قالوا إنه فيه مثله نباتي ، قلنا لهم تمام ، بس البيض طلبناه بيض حقيقي ، جربوه البنات و قالوا إنه لذيذ مرة .. أفطرنا و قررنا نروح لمشوارنا الثاني .

صورته من برّا و أنا مارّة عليه أحد الأيام في الليل !

كنت أبحث مسبقاً عن التذاكر للأماكن السياحية ، قريت تغريدة في تويتر لسائح فرنسي ، يقول أوفر شيء إنك تروح تحجز من أجهزة التذاكر الذاتية اللي موجودة عند عين لندن ! تقدر تصمم البكج اللي يعجبك ! رحت شيكت على أسعارها في الموقع ، و عرفتها .. و بما إن عين لندن تبعد دقائق قليلة عن الفندق تبعنا ، قلت أروح أشيك قبل أحجزها من النت ، و طلعت فعلاً أرخص في حال كنت بتأخذ كذا تذكرة .. أخذت لكل شخص تذكرتين باص ليومين ، و تذكرة للعين ، و تذكرة لمتحف الشمع ، و كلهم بـ 75 باوند ( 342 ريال ) .. بما إن سعر الباص ليوم واحد 37 باوند ( 168 ريال ) و اليومين 54 باوند ( 246 ريال ) ، و عين لندن كانت بـ 33 باوند ( 151 ريال ) ، و نفس السعر للمتحف تقريباً ، بيطلع المجموع كذا 468 ريال في حال أخذنا الباص مرة وحدة ، و 546 ريال في حال أخذنا الباص يومين .. طلع كلامه صحيح ، و التذاكر كلهم تستفيد منهم خلال 90 يوم ، إلا تذكرة عين لندن لازم بوقتها اللي حجزت فيها .

قصينا التذاكر و دخلنا العين .

و بعدها رحنا نشوف بيج بين و قصر ويستمنستر .. بالنسبة لي مهم القصر لأنه تم تصوير فيه أحد مشاهد فيلم هاري بوتر .. و الصدق إنها تجننننن بالحقيقة ، ألوانها ساااااااطعة ، عشان كذا صورتها لكم من كل جهة ! ما يحتاج تزورونها بعد كذا !

و بعدها مرينا على كاتدرائية ويستمنستر ، و حصلنا اسكتلندي يعزف ..

و لمّا خلصنا ركبنا الباص ، و قررنا نتمشى و نشوف المعالم من فوق الباص ، لأنه ويكند و عاااااالم ، و قلنا ننزل لبيكر ستريت ، و نتمشى هناك بعد ما نأخذ لفة في الباص .

قاصة التذاكر تبع متحف شارلوك هولمز من النت ، و بدلوها لي و أعطوني إياها ورقي ، تهبببببببببببل التذاكر الورقية ، سعر التذكرة 16 باوند ( 73 ريال ) .. المكان يحتاج فقط نصف ساعة أو أقل .. اللي مو مهتم نهائياً ما يصلح يدخل ! يمر عليه كفاية و يدخل محل التذكارات !
خواتي مو مرة كانوا مهتمين بس مسؤولات عن التصوير ! أنا و أمي و أبوي نسمع القصص و السواليف ، و هم يصورون !

المواعيـن تهبّل أول شيء قبل يتكلمون عن شارلوك هولمز ، يعطونا تنبيه عشان ننتبه للأغراض و في حال حسنا الأثاث أو الأطباق راح يدفعوننا إياها ! و على كلامهم تكلفتها عالية جداً !

أنييييق !

لو هذا مكتبي و بنفس الإطلالة ، ماراح آخذ إجازات و لا أغيب حتى .

بعدها دخلنا محل الهدايا و شرينا كم شغلة .

أما التمثال فكان قريب لمتحف الشمع

لما طلعنا من متحف شارلوك هولمز كان قدامنا محل سوفونير ، حليل !

و مشينا بعدها لمتحف الشمع ، و كان سبق لنا زيارته في هونج كونج ، و بدأوا أهلي يقارنون ، مع إنه مافيه أي مجااااااال للمقارنة ، مختلف تماماً ، و طبعاً بالنسبة لهم راح يفوز فرع هونج كونج بدون نقاش !
أنا و أوروبا ضد أمي و خواتي و شرق آسيا !

الجو كان برد برد برد برد ، فطيس ، لابسين ثقيل و لا بسين ثيرمال طبقات ، بس ما أدري ليش كذا ! و جعنا من البرد ، و قررنا نتغدى .. أنا و أمي و أبوي رحنا محل Pizza Express ، أخذنا لنا نوعين بيتزا و بطاطس .. و خواتي راحوا Taco bell ، و كلهم موجودين في بيكر ستريت .

خواتي أخذوا تاكو و ناتشوز

السماء انشقت و امتلينا مطر ، و فيه هواء قوي جداً ، ركبنا الباص ، و أخذنا معنا قهوة من caffe Nero، و كملنا دوارة و نتفرج و حنا في الباص .. و آخر باص الحمدلله كان في منطقتنا ، آخر باص الساعة 5:45 ليلاً .. مشكلة الأماكن في لندن في الويكند يفتحون متأخر و يسكرون بدري ، يخلص اليوم بسرعة !

عبدالرحمن الصلال, آخـــرفـــرصـــة, توبليرون و 6 آخرون معجبون بهذا.

Boarding Pass · 01-05-2023, 10:09 AM

5 مارس
WESTMINSTER CATHEDAL
BUCKINGHAM PALACE
TRAFALGAR SQUARE
CAMDEN MARKET

قمنا الصباح و قالت أختي فيه مقهى مختص ، عنده فقط قهوة كولمبية ، جلسنا ندوره و ندوره ، طلع موجود في دواعييييييييس ، يبعد حول 4 دقايق فقط ، بس يالله لقيناه بداعوس ، تحت الأنقاض !
قهوته كانت لذيييييذة و من أفضل القهاوي اللي ذقتهم في لندن فعلياً !

رحنا مرينا الكاتدرائية ، ملاصقة للفندق ..

و بعدها حركنا لقصر باكنغهام عشان نشوفه و نشوف عرض الحراس !

صورة له وحنّا راجعين من نفس الطريق ..

و بالروحة و بالرجعة نمر على حديقة غرين بارك ..

و بعدها حرّكنا على ميدان ترفلجار .

و بعدها الماركت .. شاورت أهلي تبون نمشي أو نأخذ سيارة لـ Camden market ، قالوا تونا قايمين ، و فينا طاقة ، خلينا نمشي و إذا تعبنا طلبنا أوبر ، كامدن ماركت يبعد ساعة و ثلث .. و صلنا لشارع warren ( ما أعرف إذا هو معروف باسم ثاني أو لا ! أو حتى أصلاً يعتبر معروف ) و وقفنا في مطعم برجر عشان أمي و أبوي يتغدون ، اسمه Honest Burgers ، فروعه كثيرة جداً .. يقولون البرجر عادية و ما يكروونها !

و حنا دخلنا الماركت تبع ماكس آند سبينسر نآخذ لنا تشوكليت ، و أخذنا من جهاز قهوة كوستا ، هوت تشوكليت بالكراميل ، حلوووووة في البرد .

وصلنا و كان شكل المكان جمييييل و الرسمات اللي على الجدران و المجسمات كانت تهبّل ، و لكن البضائع الموجودة مُش و لا بُد ! أغلبه هدايا تذكارية أو تقليد ماركات .. قلنا نتغدى أول و بعدها نكمل تمشّي ، الصدق خيارات الأكل كثيييييرة و كلّها تشوّق مرة و شكلها يَمي .. يروح له الواحد و هو جوعاااان ، الأكل اللي فيه أحلى و أكثر من بورو ماركت ..

هذا المحل ظريف للبنوتات ، تختارون لون شنطة أو كفر جوال ، و بعدها تختارون أشياء و مجسمات و خرز و ألوان و خرابيط كثيرة عشان يلزقها عليها ! مرة مرة مرة كيوووووت كهديّة ..

أخذت من فود ترك فيش آند تشيبس ، كانت لذيذاااااااة ، و أختي أخذت وافل من محل دعنون ، كان لذيذ ..

و لما جينا نرجع كان وقت الذروة ، و مافيه سيارات تقبل توصل ، و كانت الباصات زحمة موووووت و العالم مخلصين دواماتهم و يحترون الباص ، قلنا ما بدّهاش ! نرجع مشي أو نبعد شوي عن المنطقة و نطلب سيارة .. لعل الجو كان يجنن ، و وصلنا شارع warren مرة ثانية و بدينا نتسوق لأن الشارع و سيع صدر مرة ، و لقينا بريمارك ، قلنا نشيّك عليه مرة وحدة ..

و قلنا نرجع نكمل مشي و بدأت تمطر .. و رحنا مرة ثانية مرينا على الكاتدرائية عشان نشوفها في الليل !

وصلنا و نزّلنا أغراضنا في الفندق و طلبنا أوبر لأن عندنا حجز في مطعم Harry's Bar ، مطعم إيطالي ، الأكل كان لذيييييييييذ جداً ، بس كنا متحمسين للحلى تبعهم اللي على شكل الماشروم ، و كل الطاولات المحيطة طالبنها ، بس طلعت عادية جداً ، و التيراميسو لذييييذ ..

ترافل باستا تجي بصحن تقديم ( قِدر ) و بعدها يحركونها و يقدمونها لكم بصحن ثاني !

فيه كثيير فروع له ، و مختلفات بس مدري وش الفرق صراحة ! أتوقع المنيو فيه أطباق موجودة بفرع و فرع ثاني لا !

6 مارس
Oxford Street
Bond street
Selfridge
Carnaby Street
Regent Street
Piccadilly Circus
M&M'S WORLD STORE
Leicester Square
China town

قمنا الصباح مرة مرة بدري ، و العالم مسكرة إلا مقهى كنا مخططين عليه من أمس و يفتح بدري ، قهوته بالدماغ ، قريب كذلك مننا .. اسمه Notes coffee roasters مقهى و محمصة ، صدق كانت قهوته لذيذة و طلبوا أهلي معه أشياء أخرى ، يقولون لذيذة بس شكلها ما يشهّي الحمدلله ! .. الوالد تعب عقب البرد حق اليوم اللي قبل ، و قال بيرجع الفندق و بيريّح و يطلع يتمشى إذا يقدر ! قلنا أجل نستعمل بطاقات الباص السياحي اللي معنا ، و نكمل تمشّي في الأماكن المفتوحة اللي ممكن تتعبه عشان ما نروح لها معه و يتعب .. و بما إننا قايمين بدري مرة ، قلنا نتمشى في الميادين و الشوارع المعروفة ، و قبل تزدحم ، و أفضل شيء إنهم على خط واحد تقريباً !

تمشينا و تفرجنا و كلن أخذ اللي يبيه ، الفُرجة و التمشي لحالها في الشوارع وساعة صدر مو طبيعية ..

دخلنا السيلفريدج و كانت الأجواء اللي عند الباب مزعجة نوعاً ما ! أغاني عربية و رقص و تجمعات ، و هومليس كثير ، و يغصبونك تركب العربات و تشتري ورد ، كان الوضع مزعج ! دخلنا بسرعة و طلعنا و حرّكنا لـمحل m&m's ، و جلسنا فيه وقت طويل مررررة عشان أختي الصغيرة تحب شخصياتهم مرّة .

طلعنا بعدها للساحة المقابلة .. عشان تمثال هاري بوتر موجود هناك ! و لقينا تمثال لمستر بن وَ وليام شكسبير .. الصدق ماكنت أعرف إن مستر بن وَ شكسبير موجودين ، لأن المهم بالنسبة لي و أختي هاري بوتر ، بس أمي تحسبني جايبتها خص نص لتمثال شكسبير ! و مشيتها إني قاصدة !

حي هالعين !

و محل ليقو كبييييييييير ، و الطابور عليه أكثر من إم آند إمز !

و حنا ندور بالدهاليز اللي حول m&m's لقيت الحي الصيني ، كله أكل صيني و شرق آسيوي بشكل عام ، و حتى مزينينه بزينة صينية .. ما أعرف هل اسمه فعلاً فقط الحي الصيني مثل ما بلغني أحد الموظفين أو له اسم ثاني ! يكاد يكون أزحم مكان حول هالمنطقة ! و أكيد خواتي قرروا يآكلون منه !

تأخر الوقت و قررنا نرجع للفندق ، ننزل الأغراض ، و بعدها تعشينا من wagamama اللي حول الفندق ..

7 مارس
The O2 Arena

كنت مبلغة أهلي قبل بليلة يقومون بدري عشان اللي يبي يتقهوى و اللي يبي يفطر لأننا بنروح لـ The O2 Arena ( قبّة الألفية ) .. رحنا لمخبز Gail's Bakery ، حبيت مخبوزاته و الساندوتش كذلك ، رجعنا له كثير ، فروعه بعد كثيرة .. تقهوينا و عيّنا من الله خير ، و طلبنا آوبر من هناك .

كنت حاجزة تذاكر لخواتي لـتسلق القبّة (UP AT THE 02 ) و أنا في الرياض ، و سعر التذكرة 160 ريال للشخص ، و تقدر تختار الوقت اللي يناسبك ، و طبعاً وقت الغروب يعتبر أغلى وقت ، التصوير مسموح ، بس خواتي ما صوروا المكان لحاله ، داخلين في كل الصور و الفيديو راح أحط صور من موقعهم حتى تشوفون المكان اللي يتسلقونه ( 3 صور ) ..

المكان يبعد عن الفندق بالسيارة حول ساعة ، و موجودة في شبه جزيرة غرينتش في جنوب شرق لندن . عبارة عن مجمع تجاري ترفيهي ، و يعتبر آوت لت كذلك ، بس الماركات اللي فيه بسيطة و أغلبها رياضية ، تيد بيكر و أديداس و كذا ، فيه سينما ، و الظاهر الظاهر لمحت فيه ملاهي أو بولينغ .. كذلك المسرح تبعه من أشهر المسارح اللي بلندن .

خواتي يقولون التجربة حلوة جداً جداً جداً ، و مختلفة !

و كذلك بالنسبة لي كنت أبغى أجرب مطعم الشيف رامزي حق البرجر و فيه فروع كثيرة له كذلك ، اسمه Gordon ramsay street burger ، و كان موجود في المجمع و تقدر تآخذه عرض مع تذكرة التسلق و تقدر تختار مطعم ثاني ! أنا و أمي تغدينا فيه ، و أبوي كان مع خواتي ، و بعد ما خلصوا هم تغدوا في Wagamama .

تمشينا في المكان وحللناه بما إنه بعيييد ، و دخلوا أهلي فيلم ، و أنا جلست أسوي شغلي اللي طالبينه الدوام ، عشان كذا ماكان عندي وقت أدخل معهم و دخل أبوي مكاني .. خلصنا و طلبنا آوبر ، و رجعنا للفندق ..

بعد ما ريّحنا طلبوا خواتي أوديهم لمحل يسوي بوبا ، تقييمه عالي في فورسكوير ، كُشك كشخة ، اسمه Hefaure ، يبعد عننا تقريباً 5 دقايق ، و بجنبه محل القهوة Notes coffee roasters .. يقولون البوبا لذيذة مرة مرة ، و الكشك اللي بجنبه بعد يعتبر من محلات الدونات الأعلى تقييم ، اسمه crosstown ، جربناه أحد المرات ، فعلاً كان لذيذ ..

المجمع اللي فيه هالمطاعم و المقاهي يجنن و ونيس مرة ، و حتى داير مداره مليان محلات و مطاعم و مقاهي و فاااضي ، حتى اللي أفطرنا فيه أول يوم بنفس المجمع و كان أحلى فرع جربناه ، المكان إذا أنا أفهم اسمه the nova building أو nova development Victoria ، الزبدة إنه عند الفندق .. المهم تمشينا و مرينا ماكدونالدز و أخذنا عشاء لأهلي ، و تعشينا و نمنا .

Abu Muataz, um Muataz, عبدالرحمن الصلال و 6 آخرون معجبون بهذا.

المسافر2020 · 01-05-2023, 11:36 AM

ما شاء الله تقرير لندني جميل جدًا
أسلوب عرضك ممتع وشرحك وواضح
تابعت لك سابقًا مقتطفات من تقريرك الكوري
سؤالي هل المشاوير عن طريق أوبر مكلفة ؟
مثلًا ذكرتي مشوار الطريق إلى قبة الألفية كان ساعة كم كلفكم ؟

عبدالرحمن الصلال, آخـــرفـــرصـــة, توبليرون و 2 آخرون معجبون بهذا.

Boarding Pass · 01-05-2023, 11:57 AM

اقتباس : المشاركة الأصلية كتبت بواسطة المسافر2020

ما شاء الله تقرير لندني جميل جدًا
أسلوب عرضك ممتع وشرحك وواضح
تابعت لك سابقًا مقتطفات من تقريرك الكوري
سؤالي هل المشاوير عن طريق أوبر مكلفة ؟
مثلًا ذكرتي مشوار الطريق إلى قبة الألفية كان ساعة كم كلفكم ؟

شكراً جزيلاً

أكيييييييييييييد مكلفة جداً جداً جداً ، و الأندرقراوند أرخص بمليون مرة ، و سهل جداً جداً جداً ، و لكن رحلتنا كلها تقريباً 11 يوم ، إذا أهلي ما ودهّم يمشون أو المشاوير بعيدة ؛ أحَب لي أطلب لهم آوبر أو بولت .. عشان أسرع بدال ما نبدل محطات أو نركب باصات .. بس جربناهم يجننون و يوسعون الصدر ، و تعلمنا عليهم من شرح في اليوتيوب ، المسارات تبعهم واضحة جداً ، و قوقل ماب ما يقصر ، يمشيك خطوة بخطوة ، حتى كيف تنتقل بالأندرقراوند .

أخذت آوبر و كان تقريباً المجموع رايح جاي ، بـ 83 باوند ( 380 ريال ) ، بس عشان السيارة كبيرة .. الأصغر أرخص كثير ، و بولت أرخص من أوبر مرررررررررررررة ..

حيّاك الله

المسافر2020, عبدالرحمن الصلال, آخـــرفـــرصـــة و 2 آخرون معجبون بهذا.

Abu Muataz · 01-05-2023, 12:27 PM

أستمتعنا بتقرير رِحلَة كُوريَا الجَنوبيَّة و الآن من مقدمة التقرير نحن موعودين
بتقرير من تقارير النخبة تقرير لندني فاخر
"لي عودة لأكمال التفاصيل الشيقة"

عبدالرحمن الصلال, آخـــرفـــرصـــة, توبليرون و 1 آخرون معجبون بهذا.

um Muataz · 01-05-2023, 01:06 PM

اهلاً اهلاً RAYYANAH بعد تقرير كوريا الجنوبية شوقتني لتقارير اخرى لكِ طريقة السرد تعجبني الان عدتي بتقرير جميل وملفت من البداية وخاصة يتخلله شي احبه متاحف وهي ما يحكي قصة المدينة . متابعه معك عزيزتي

عبدالرحمن الصلال, آخـــرفـــرصـــة, Abu Muataz و 2 آخرون معجبون بهذا.

عبدالرحمن الصلال · 01-05-2023, 10:43 PM

الاخت RAYYANAH
سردك للمواضيع جميل جدا
وغني بالمعلومات المفصله

عودتينا على الرقي في مواضيعك خصوصا اول
موضوعك عن كوريا الجنوبية شكرا لك

لي عوده لإكمال قرائتها كلها

شكرا كثيرا

آخـــرفـــرصـــة, توبليرون و Boarding Pass معجبون بهذا.

آخـــرفـــرصـــة · 02-05-2023, 11:13 AM

ما شاء الله عليك مبدعة
في العرض والتصوير والاختيارات

أم حسين تقول كانت في بريت فرع البيكاديللي

تعجبني منطقة عين لندن
حيوية جداً
سكنت فيها أكثر من مرة

شوقتينا للندن
كل شيء فيها يجنن
تمشيات تسوق أكل

متابعين معاك

Abu Muataz, توبليرون, Boarding Pass و 1 آخرون معجبون بهذا.

توبليرون · 02-05-2023, 03:32 PM

ماشاءالله التقرير ممتاز وشي يجر شي
لو مقطعه لنا الاجزاء وتخلينا نعلق بينهم افضل
جذيه ننسى شنو بنعلق
وصلت يوم 5 / 3

قلت اعلق وبعدين اكمل
ياريت كنت ببريت واشوفكم
بريت افتحوه عندنا كم فرع حياكم بالكويت ونتواعد فيه هههه

حلو حجزكم للاماكن السياحيه الجميله
روعه كل مكان والباص السياحي ممتاز
مستمتعين معاكم
الباص السياحي اخذتوه يومين بس اشوفكم بس يوم واحد جربتوه

مستمتعة بكل التفاصيل والصور الجميله
وانا معاج واوربا ضد الاسيوين هههه بس تصويرهم حلو البنات
بتابع واعلق عقب ما اخلص كم جزء

آخـــرفـــرصـــة, Boarding Pass, الايمان و 1 آخرون معجبون بهذا.

توبليرون · 02-05-2023, 05:20 PM

قريت اخر يومين روعه
طلعتي تحبين هاري بوتر
ان شاءالله رحتي لمكانهم بس
كامدن تاون حلوة واغلبها سوفينرات والمطاعم
البيكادللي حلوة وتمشياتكم جميله فيها
اكيد معروف بالسوق الصيني تشاينا تاون
عليهم بالعافيه الاكل الاسيوي دامهم يحبونه
وعليكم بالعافية انتو باجي المطاعم
قبة الألفية سامعه عنها وبس ما ادري ان فيها تسلق شي حلوو
والسوق وايد حلو لمحبين الرياضة
والدوام وراج وراج الله المستعان

معروف بولت ارخص واحد
والمترو حلو وسهاله بس المشي يتعب لحد ما توصلين للرصيف والطلعه الدواعيس اللي تحت الارض وايد
مستمتعين جداا وبانتظار البقية

آخـــرفـــرصـــة, Boarding Pass, الايمان و 1 آخرون معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رِحلَة كُوريَا الجَنوبيَّة - ( سِيئُول + جيجُو ) - يُوليُو 2022	Boarding Pass	بوابة كوريا الجنوبية	66	10-03-2024 12:46 AM
جولاي 2023	Reham2013	بوابة سويسرا	7	18-05-2023 06:02 PM
اوربا في صيف 2023	Rema	بوابة سويسرا	3	23-01-2023 01:41 PM
رحلة الى أوروبا 2023	Noorbash	بوابة الدول الاخرى	4	16-08-2022 10:42 AM