بسم الله الرحمن الرحيم
السلام عليكم ورحمه الله وبركاته

رجعت لكم بتقرير يديد و دولة يديده علي بعد رحلة كولومبيا و الاكوادور نتجة الى اقصى غرب اوروبا و تحديدا الى:

شبه الجـــزيـــرة الايبيـــريـــة ( البـــرتغــــال )..





اكثر من سنتين وانا افكر فيها و اضبط امورها وكل مره ما تضبط الرحلة .. هالمره قلت ترا بروح البرتغال في عطلة عيد الفطر واسبانيا منو يبي يروح ..؟؟

اختي قالت انا معاج وامي قالت انا بعد .. قلت ترا الرحلة فيها تنقلات و طويلة مو تقولون ملينا وتعبنا ..
قالوا معاج ان شاء الله ..
قلت تمام خلوني اول اشوف الحجوزات و اعطيكم خبر..

هنــــــــا البــــرتغـــال



بديت بالاستعدادت اللازمة قبل السفر

الرحلة مستواها : متــوسط ( اللياقة البدنية ) لكن البرتغال عموما بحاجه الى عصي الهايك .. لكن لحالة امي الله يحفظها يبيلها لياقه اعلى وتعتبرعليها متعبة لان الارض مو متساوية فيها مرتفعات وتنقلات ..



اولا : الفــــــــــيزا



الفيزا شنغن .. انا مطلعتها من السفارة الهولندية سنة 2019 لمدة 5 سنوات .. و امي واختي طلعوها الصيف اللي طاف من السفارة الاسبانية لمدة 5 سنوات..

ثـانيـا : العمــــلات

عملة البرتغال يورو euro





1 دينار كويتي = 3.02 يورو = 3.26 دولار

ثـالثـا : الطـيــــــــران



تم الحجز عن طريق الموقع الالكتروني للخطوط الجوية الكويتية في شهر يناير 2023



الموقع الالكتروني
https://www.kuwaitairways.com/ar

طيران دولي : كويت - مدريد - كويت بسعر 120 د.ك للشخص ..
و على طيران اير يوروبا aireuropa



الموقع الالكتروني
https://www.aireuropa.com/ot/en/home

مدريد - لشبونه بسعر 40 د.ك للشخص = 120 يورو

وعلى طيران الازوريس



الموقع الالكتروني
https://www.azoresairlines.pt/en

لشبونه - بونتا ديلغادا (عاصمة الازوريس ) ponta delgada - لشبونه بسعر 44 د.ك للشخص = 133يورو

هذا الحجز تم كله تقريبا في يناير 2023..

رابــعــــــا : الفنــــادق



حجزت ليلة في مدريد قريب من المطار عشان امي تريح خصوصا عقب رمضان..
فندق مدريد ماريوت اوديتيريم madrid marriott auditorium hotel and conference center

سعر الليلة لغرفة 3 اشخاص 41 د.ك = 125 يورو

خـامســا : الصحـــــــة و التطعيمـــــــات



قبل السفر بفترة كافية عليكم التأكد من الوجهة اللي رايحين لها اذا تحتاج الى اي تطعيمات ..

- لازم مراجعة عيادة المسافرين في دولتكم او الصحه الوقائية .
- تلقي التطعيمات اللازمة قبل شهر من السفر على الاقل ليتمكن الجسم من تكوين المناعة .
-اصحاب الامراض المزمنة مراجعة دكتورهم عشان يعرفون لو في تطعيمات تتعارض مع ادويتهم ..

التطعيمات العـالميــــة :

- الحمى الصفراء ( ينصح عند السفر لهذه البلدان : وسط وغرب افريقيا - وسط و جنوب امريكا )
- الحمى الشوكية ( ينصح عند السفر لهذه البلدان : جنوب الصحراء الكبرى الافريقية )
- الالتهاب الكبدي (أ) ( ينصح عند السفر لهذه البلدان : امريكا الجنوبية و بعض الاجزاء من افريقيا و اسيا و شرق اوروبا )
- الالتهاب الكبدي (ب) ( ينصح عند السفر لهذه البلدان : امريكا الجنوبية و بعض الاجزاء من افريقيا و اسيا و شرق اوروبا )
- التهاب الدماغ الياباني
- التهاب الدماغ المنقولة عبر القراد
- التيفود (ينصح عند السفر لهذه البلدان : بعض جنوب شرق اسيا - امريكا الجنوبية و الوسطى - وبعض افريقيا )
- داء الكلب
- الملاريا ( ينصح عند السفر لهذه البلدان : المناطق الواسعة بأفريقيا و غرب افريقيا جنوب شرق اسيا - شرق اوروبا - الباسفيك - وسط وجنوب امريكا - الشرق الاوسط - امريكا اللاتينية )

الخط الساخن لسكان الكويت

ألو صحة 151

والحمدلله البرتغال ما نحتاج اي تطعيم.

و طبعا احتياط معاكم كمام ومعقم



بما ان زيارتنا الى البرتغال وزيارة جزر بنكون بين الزرع و الغابات والجبال محتاجين ندهن جسمنا بسبري وكريم الوقاية من الحشرات و اي كائنات تنقل الامراض
هذا النوع ممتاز كان معاي ..



يفضل تشترون من صيدلياتهم ..

ســادســاً : الطقـــس



في وقتنا كان الجو وايد حلو ومعتدل مو برد وايد ولا حاار وكان فيه اشويه امطار خفيفه في بعض المناطق واشوية برد وضباب في الجزيرة..

ســابعــاً : القـــــروب



مكون من : محدثتكم "كويتية متنقله" - حلوة اللبن امي الله يحفظها و اختي الغالية..

ثـامنــاً : الأمـــان



على الاماكن اللي زرناها ما حسينا في شي انخاف منه ..الشعب وايد محترم و طيب و غير هذا ياخذ ويعطي بسرعة..

تـــاسعــــاً : التأمين



التأمين صار من الضروريات من عقب كورونا للسفر لاتهملونه قبل كورونا ما كنا نهتم له وايد لكن الحين لا يفضل يكون معاكم لاسمح الله لاي طارئ..

والحين عقب ما خلصنا الاشياء المهمة نبدي العد التنازلي للاستعدادت

تم دفع رسوم الطيران اول شي

مع الاجزاء اليايه اتكلم عن المناطق و الفنادق و اسعارهم.

ونقول بسم الله على بركة الله نتوكل على الله

الرحلة من تاريخ 21/4/2023 الى 14/5/2023

قبل جم اسبوع من السفره سألت ايمان اذا تشوف لي البزنس اقدر اسوي ابقريد وللاسف كانت فل ..

قلت نروح المطار ونشوف حظنا لو كرسي واحد حق امي ..

ووصلنا يوم الاقلاع
جيكنا على امورنا و اغراضنا والحمدلله كل شي موجود..

اليوم اليمعه 21/4/2023 اول يوم عيد الفطر
الساعه 5 الفير بالمطار ..

موعد الاقلاع الساعه 7 ص مدة الرحله دايركت 7 ساعات و 20 دقيقه الى مدريد ..

وصلنا تيرمنال 4 الخاص بالخطوط الجوية الكويتية ..



المطار عجيييب ماافي احد وفااضي على كيفنا



اهني مكان البزنس رحت اسألهم اذا في مجال اسوي ابقريد وللاسف فل كان البزنس ..



انا نوعي بالحجز احجز الكراسي اونلاين واختار يكون كرسي الوسط فاضي عشان محد يقعد يمنا وناخذ راحتنا ..





ونتمشى بسوق الحره













مثل ما انتوا شايفين المطار وقتها كان فاضي ومافي زحمه





الى بوابتنا



وطيارتنا

واحلى ممر في الحياة ممر السعادة



نوع الطياره
airbus A320neo

البزنس الكراسي اثنين بأثنين و السياحية ثلاثه بثلاثه..





والحمدلله على حظنا الطيارة فيها كراسي فاضية و اختياري للكراسي وخطتي مشت صح محد قعد يمي ولا بين امي واختي

ونقول دعاء السفر

الله أكبر الله أكبر الله أكبر، 〈سُبْحَانَ الَّذِي سَخَّرَ لَنَا هَذَا وَمَا كُنَّا لَهُ مُقْرِنِينَ وَإِنَّا إِلَى رَبِّنَا لَمُنقَلِبُونَ 〉 ".
اللّهمّ إنّا نسألُكَ في سَفَرِنَا هذَا البِرّ والتّقْوَى، ومِن العَمَلِ مَاتَرْضَى، اللّهمّ هَوِّنْ عَلَيْنَا سَفَرِنَا هذَا وَاطْوِ عَنَّا بُعْدَه، اللَّهُمَّ أَنْتَ الصَّاحِبُ فِي السَّفَرِ، وَالْخَلِيفَةُ فِي الأَهْلِ، اللَّهُمَّ إِنِّي أَعُوذُ بِكَ مِنْ وَعَثَاءِ السَّفَرِ وَكَآبَةِ الْمَنْظَر وَسُوءِ الْمُنْقَلَبِ فِي الْمَالِ وَالأَهْلِ"





وطرنا فوق سماء وطن النهار





رفيق الدرب هالمره هالكتاب انصح محبين القهوه يقرونه ..







ووصل الريوق



وهذي بينت مدريد







طبينا بالسلامة مدريد بالوقت المحدد الساعه 1:20 م..





مطار مدريد القادمون



الدور سريع عند الجمارك وما يطولون .. الصج كنت خايفة من فيزتي يسون لي سالفه لاني مطلعتها من الهولندية و مارحت فيها مكان بس ما قالوا شي ودخلوني من غير اي سؤال يذكر ..



طلعنا من غير اي سؤال لا جم يوم ولا وين بتروحون ولا وين حاجزين ..

خذينا الجناط ورحنا نحط خطوط تلفونات وانترنت مفتوح من شركة اورانج داخل المطار الخط لمدة شهر يشتغل في البرتغال واسبانيا بسعر 40 يورو ..





وشركات تأجير السيارات في المطار..





واهني محطة انتظار باص الفندق يوصلنا من المطار للفندق مجانا..

الجووو واايد حلوو



كل تقريبا نص ساعه يوصل واحد



ووصل الباص وتوكلنا على الله الى الفندق..

وهذا اسم فندقنا

madrid marriott auditorium hotel and conference center

وهذا اللوبي



سوينا جيك ان سريع وسهل ..



الى الغرفه











المبيت فيه ليلة وحده ..









عقب ما ريحنا .. نزلنا تعشينا في مطعم الفندق









السعر اعتقد 38 يورو ..

مميزات الفندق
-نظيف
-سعر
-فري شتل
-قربه من المطار

العيوب

-بعده عن السنتر اللي يبي السنتر
- الاثاث يبيله تجديد..

وانتهى اليوم الاول على خير القاكم في اليوم الثاني

ماشاءالله الحمدلله على السلامة بداية شيقه مرة
رحت لشبونه 2019 ومتشوقه اشوفها بعيونك وصفك يهبل ماشاءالله
لفتني سعر الخطوط ماشاءالله مع انه موسم العيد السعر جدا جميل شكلنا نصير نسافر من عندكم
متابعة معك .

واخيرااااااا نزل التقرير

متشوقه للتفاصيل

ايمان تعالي وزيدينا ابداع على ابداع ابرار

متابعه

نزل التقرير الاسباني البرتغالي
راح يكون بقمة الابداع من إيد ابرار

لي عودة ان شاءالله للتقرير
انا حاليا مسافره