اتفق معك
حي بوكاب من المزارات المهمة
والألوان بسبب أنها كانت ممنوعة عليهم
أثناء العبودية
المشكلة فقر ملحوظ بالحي وكثير حرامية هناك للأسف

الشاطئ روعة والجلسات على الكافيهات ممتعة
وبالفعل هي منطقة راقية

الرقصات التراثية والبرنامج بشكل عام ممتع
وان نغص عليكم بالبداية بسبب مكان الطاولة
لكن فيه مطعم ثاني اسمه " ماما افريكا "
نفس البرنامج تقريبًا

اليوم الخامس
يوم جديد وطاقة إيجابية…. نزلنا للفطور في فندقنا الرائع،















وبعد كذا قلنا نستكمل تفاصيل برنامجنا


اليوم كنا متفقين نزور "جزيرة روبن"، 👏 ونجرب "سفينة القراصنة"، بعد الاستيقاظ غير المبكر 🌝 رحنا للواجهة البحرية


















صورة ليلية للواجهة البحرية





لأن زيارة الجزيرة والسفينة تكون من منطقة الواجهة البحرية، وطبعا كنت أدري إن فيه رحلات في ساعات محددة للجزيرة لأني كنت جدا حريص أزروها وأشوف مكان سجن "نيلسون مانديلا"، بعد سنوات من قراءة مذكراته، مع إني ما كنت متوقع إن في يوم ممكن أزور سجنه، رغم إن كتابه كان من أروع السير الشخصية اللي سبق لي قراءتها، وكثير من تفاصيله عالقة في الذهن جراء قصة نجاح ولدت من رحم الكفاح لشخصية تاريخية من أبرز شخصيات وزعماء العصر الحديث وتحديدا القرن العشرين،، عموما لما وصلنا نبي نقص تذاكر قالت الموظفة ما فيه إلا بعد يومين، 😥 هنا جد تضايقت قلت أبي أروح للجزيرة لأن بكره اليوم الأخير لنا هنا، وأنا حريص أزور المكان حاولي كثر ما تقدرين، وحقيقة أنصح أي أحد يزور كيب تاون يتأكد من حجوزات بعض المزارات عشان ما يتورط، المهم قالت انتظروا بشوف، جلسنا ننتظر تقريبا ربع ساعة ثم جت وقالت معكم الجوازات قلت معنا الصور قالت تمام تعالوا معي، انبسطت كثير إنها قدرت تضبطنا بدون أي زيادة في سعر التذكرة، 😀😁🙂 المهم ركبنا مع الجماعة الحمر في العبارة، وما كان معنا ولا عائلة خليجية وتوجهنا لجزيرة "روبن" وكانت كراسينا بالوسط، وما يمدي تتفرج على البحر والمناظر الحلوة 🙄 بس قال واحد من المنظمين لو سمحتوا اللي على الدريشة في الرجعة يجلس بالوسط عشان نعطي فرصة للمساكين يشوفون، هنا انبسطنا لأن المكان بالوسط ما كان حلو، مع إن المسافة مو بعيدة يعني أذكر تقريبا الرحلة للجزيرة مدتها 40 دقيقة بس، لما وصلنا ركبونا باصات ورى بعض عشان العدد كان كبير، 🤟 توزعنا على ثلاث باصات، وكان معنا مرشدة تشرح عن تاريخ الجزيرة مع إنه كان في العبارة فلم يتكلم عن الجزيرة تاريخيا وتاريخ اعتمادها سجن للسياسيين والمرضى العقليين وغيرهم،



















عموما شفنا وإحنا بالباص السجون الانفرادية، كانت مرعبة ووحيشة وصغيرة وحتى تحس إن السقف حقها مو طويل، بس ما نزلنا لها نشوفها وإنا داخل بالباص، بعدين وقف الباص بعد لفة والأجواء شمس حارة مرة، ونزلونا على باب ساحة كبيرة واضح إن داخلها سجون وكنت استرجع ذكريات كتاب "مانديلا" في ذهني وأنا أشوف السجون والمنطقة، عموما لما وقفونا عند باب الساحة جاء واحد من اللي يشتغلون يتكلم عن الجزيرة والسجون، وعن الشخصيات التاريخية اللي كانت موجودة فيه، والناس قاعده تتسمع مع إن الجو كان ما يساعد أبد، الشمس كانت مرة حارة، وبعدين أتوقع إن كثر إعادة المعلومات مو حاجة كويسة لأن أصلا زيارة الجزيرة تأخذ أقل شيء أربع ساعات، وأكثر الزوار وخاصة إحنا العرب نحب نشوف الأشياء على الطبيعة وممكن يكون معها بعض الشرح، بس واحد قاعد يتكلم تقريبا ساعة مع أجواء ماكنت تساعد أبد ما أشوف أنه شيء كويس، 🫤

وكأن لسان حال هذه الطيور في جزيرة روبن يقول إن معنى الحرية يتجسد مع كل تحليق لها في عنان السماء











بعد أكثر من نص ساعة التفتت المدام علي وقالت هذا يهذر علينا من وصلنا وقلب رؤسنا ، 😄 وكل الموجودين ملوا إلا هو مستمتع، ورى ما يدخلنا ويتوكل بس، قلت والله ودي أقول له كنه زودها، نبي نشوف السجون وهو تأخر علينا، بس لما جاء القروب الثاني وكان معهم مرشد عجل، كن الحبيب هون وقال يالله تعالوا أدخلوا، 👏 لما وصلنا للساحة كان فيه صور قديمة لمانديلا في ساحة السجن، ونفس الساحة على وضعها ما تغير فيها شيء، ولما دخلنا سجونهم ما علمونا عن سجن مانديلا تحديدا وهنا الصدمة، 😡 قالوا كان مسجون هنا بغرف صغيرة مرة،





الغرفة على طول الفراش يعني أقل من مترين طول وعرض تقريبا، وتفرجنا على دورات المياه حقت نزلاء السجون أعزكم الله، بعد كذا توجهنا لمحل داخل الجزيرة، وشرينا تذكار ورحنا للعبارة وركبنا بمقاعد على الدريشة، وكان يستاهل لأن منظر الطيور اللي بالبحر بديع مرة، سبحان الله طيور مجموعات والله بدون مبالغة بالآلاف مع بعض أسراب ورى بعض تطير وتوقع بالبحر، 👍😜 وكانت الرحلة جميلة بس الشمس ما تساعد صراحة، بعد كذا لما رجعنا،


رحنا ننشد على رحلة "سفينة القراصنة"، ودلونا على مكان التذاكر بس لما وصلنا قالوا لنا رحلة السفينة يومين بالأسبوع "جمعة وسبت" بس، كيف طيب أنا وصولي كان السبت ورجعتي الجمعة وأبي أشوف القراصنة قالوا ما فيه، أكثر حاجة كنت أبي أحضرها فعالية "سفينة القراصنة"، أحب قصصهم، أفلامهم ومسلسلاتهم على "نتفليكس"، من أيام المسلسل الكرتوني "جزيرة الكنز"، قالوا خلاص ما فيه، لا حول من أكثر الفعاليات اللي أحبها وحضرتها كان عرض "الكابوي" بأفاموزا بماليزيا مع مرور السنوات ما نسيتهـ طيب أحب هالشغلات قراصنة وكابوي ، مافيه طريقة قالوا خلاص يابن الحلال رح بيتكم، بعد كذا رجعنا لمول فكتوريا لأنه بالمنطقة وضايق صدري فاتتني المغامرة، 😥😭🙄 والمدام تواسيني نعوضها وين نعوضها ما أحب أرجع لمكان سافرته، الوقت كان قريب نص العصر تقريبا وفيه مطعم تركي حلو تغدينا فيه وجلساته حلوة، بالواجهة البحرية، خلصنا ورجعنا نتمشى بالمنطقة وكان فيه مقهى يطل على البحر والمراكب على الغروب جلسنا فيه ساعة وكانت الجلسة جميلة لأن الأجواء بدت تكون باردة مرة وشغلوا الدفايات لأن المكان كان بارد مع إنه كان مو مكشوف، 💗 وبدينا نتكلم عن تفاصيل اليوم السادس والأخير واللي ما فيه إلا وجهة وحدة بس "أوت ليت"، والمفروض أسلم السيارة بكرة الساعة 10 الصباح، وقررنا بعد ما نخلص من شرب الكابتشينو نتوجه للمطار نسلم السيارة أحسن من الصباح، الشوارع أقل زحمة بكثير، وبعدين يمكن النومة تطول ويحسبون يوم جديد، وبعدين ما عندنا شيء خلاص، بكرة كله تسوق يعني نسلم السيارة ونرجع الفندق نستعد لليوم الأخير،


بس بصراحة صار موقف حلو لما جيت أرجع السيارة، 😂 لأني وقفت السيارة بنفس الرقم اللي خذيته ورحنا للمكتب نسلم المفتاح قالوا لازم تجيبها هنا نشيك عليها 😂👏✊😫 وأشر الحارس على موقف، قلت للمدام خلاص خلك داخل المكتب وأنا بجيب السيارة ومشى الحارس معي شوي قلت من وين كانت مواقفهم ملخبطه شوي، قال جبها من هنا ع الموقف قلت تمام، شغلت وجيت مع سيد قال الحارس تراك عاكس اطلع مع السيد الثاني وبتلف من ورى المكتب وجبها للموقف اللي كان يشر عليه قلت تمام، لما لفيت من ورى المكتب طلعني برى المواقف على الطريق الرئيسي ☹️😣 وأشوف المطار قدامي لاحول وشلون برجع وألحين قاعد أتشوف مدخل ما فيه،، بعد لفة طويلة لقيت مدخل على المواقف وأجي أبي أدخل ألقى بوابات دخول يعني برسوم هذا مو حقت شركات تأجير السيارات، 😔 قلت بدخل يمكن أشوف طريق، لما دخلت لفيت ما حصلت أحد والمدام تدق وترسل قلت يا بنت الحلال مدري وش سويت اقعدي لين أجيك اشغلتيني، 😫 المهم لما خلاص دريت ما فيه أحد، رحت أبي أطلع بس البوابة برسوم لازم ادفع عشان اطلع وماكينة الدفع مدري وينها، ضغطت على مساعدة وردت علي وحدة وقعدت أشرح لها ساعة بعدين قالت رح سدد بس وإلا بتجلس هنا، لاحول أعود أرجع وألقى أخيرااااا واحد من حراس الأمن وأعلمه قال ماكينة الدفع ورى قلت تعال علمني عنها ووصلني لمكاني وبعطيك فلوس لخبطت ما أدري عنه وتوترت عشان المدام، جاء معي الله يسعده وسددت وكان يمشي على رجليه وأنا بالسيارة يقول ممنوع أركب، بعد التسديد أبي أعود أسلم السيارة قلت أركب ما أبي أتأخر أنا بالسيارة وهو يمشي على رجليه، المهم بالأخير  اقتنع وركب ثم سدح المرتبة ما يبي أحد يشوفه 🤓😎 لين وصلنا عطيته الله يسعده حقه وراح ولما جيت بعد يمكن ٤٠ دقيقة من الضياع قال الحارس وين رحت إنت وأنا حاقد عليه 😡🥶 قلت مو شغلك خذ بس المفتاح شيك، والمدام ميتة ضحك، 😂😂😂 بعد تسليم السيارة طلبنا أوبر ورجعنا للفندق بس سهرنا بالجلسات الخارجية حقت فندقنا لأن بكره ما عندنا إلا تسوق ولو رحنا متأخرين عادي، والله أطول يوم سهرنا فيه مع الأجواء الطيبة وباشرت على الشباب الطيب حراس الأمن اللي على بوابة الفندق كوفي✌️☕️ يدفيهم من برودة الجو.  

التقيكم في اليوم السادس والأخير لنا في كيب تاون المذهلة❤️🌹

اليوم السادس
اليوم الأخير كنا متفقين يكون يوم للتسوق بس، ما يكون معه أي شيء ثاني، في اليوم هذا ما طلعنا من الفندق إلا قريب الظهر لأن رحلتنا بتكون الصباح بدري وقلنا ننوم فترة طويلة عشان لو ما نمنا إلا ساعات قصيرة على الأقل نكون معوضين قبلها،








































بعد الإفطار توجهنا للأوت ليت اللي بكيب تاون وكان مو كبير بس مصمم بطريقة حلوة يعني مربعين أذكر وعليها محلات بكل الاتجاهات، 😇 وكانت الخيارات كثيرة بالنسبة للجنسين وجميع الأعمار، وكانت ساعات التسوق طويلة إلى قبل العصر، وبعد كذا حبينا نرجع كل مشترياتنا للفندق ونروح لمول "كانال ووك"، بس وإحنا راجعين للفندق لفت نظرنا شارع كله محلات وكان مزحوم كثير فقلنا للسواق الشارع هذا وشسمه، وقالت المدام أبي أنزل هنا قلت نروح الفندق ونرجع لنفس الشارع طيب أفضل نكون أخف وننزل كل الأغراض اللي شريناها وبعدين نرجع، وبالفعل تم الاتفاق مع السواق نروح الفندق وبعدين يرجعنا لنفس الشارع اللي شدنا، المشكلة أنه كثير من الأسماء ما وثقتها واعتذر من القراء الكرام، لأن اسم الشارع ما حفظته نزلنا له وكان فيه كل شيء ممكن تشتريه خاصة النسائية وبأسعار مغرية جدا، 👏 وجلسنا بعد بالشارع هذا من ساعتين لثلاث تقريبا، يعني إلى قبل المغرب، وخذينا أكياسنا ورجعنا للفندق ثانية 🌝 وقبل نروح على مول "كانال ووك"، يعني لو بالخاطر شيء ونشوف شيء حلو ممكن نأخذه بالطريق ليش لا، بس قبل نطلع للمول قلنا بنريح شوي بالفندق بعد الجولة الطويلة حسينا بتعب،













































لما طلعنا مول "كانال ووك" كانت الساعة تقريبا 8 المساء وشفنا كثير محلات مغلقة على غير العادة لأنه يوميا تقريبا نروح لمول "فكتوريا"، أو لمول "كانال ووك"، جلسنا بالمول تقريبا ساعة وتعشينا فيه قبل رجعتنا للفندق وترتيب الشناط قبل النوم، وكنت خايف تروح علينا نومه لأن الرحلة كانت في وقت مبكر أذكر 8.30 تقريبا، فأول ما وصلت الفندق حرصت الاستقبال يدقون علينا وجهزت المنبه كم مرة مع إن المدام نومها جدا خفيف بس قلت احتياط، 😉😌 والغريب إن يوم سفرتنا كان فيه إضراب بكيب تاون لسواقين التكاسي وأوبر بدعوى من نقابات خاصة فيهم وما عندنا خبر عن الموضوع إلا من موظف الاستقبال وإحنا نازلين نسوي "تشيك أوت"، 😄😒 فقال لو تبي ممكن نحاول وركزوا نحاول نوفر لك سيارة، هنا قلت شكل "الإثيوبية" بتطير بدونا، سبق فاتتنا رحلتين عودة وحدة بدبي والثانية أثينا، وش ذا الحظ الحلو إضراب في يوم مغادرتي لديرتهم، ☹️🙁😞😒😏 قلت له لحظة بنجرب نطلب أوبر لعل الأمور تتيسر، وبالفعل من أول محاولة للمدام قبلوا طلبنا فشكرته وقلت فيه سواق بيجي يأخذنا للمطار، توجهنا للمطار استعدادا لرحلتنا اللي بنوقف فيها مرتين الأولى بمدينة جوهانسبيرغ ثلاث ساعات ونصف، والثانية بأديس أبابا ساعتين، كانت الإجراءات سهلة وسريعة مع إن الطابور كان وش طوله، قلت للمدام شناطنا بتروح الرياض مباشرة، وبطاقات صعود الطائرة معنا كلها، شرأيك إذا وصنا جوهانسبيرغ نطلع نشوف المدينة قالت لا شكلك ناوي تخلي الرحلة تفوتنا زي دبي، وأثينا، 🥺 قلت ما عليك بنشوف سواق نشمي يفر فينا ساعتين ونشوف ساحة نيلسون مانديلا ونرجع، وبعد محاولات قالت أوك بس نتأكد من السواق، أول ما وصلنا جوهانسبيرغ شفت واحد من السواقين وبديت في عملية المكاسرة معه، اتفقنا على 250 راند ساعتين بس قال ترى بشرط قلت وشو قال تغديني، 😩😫 قلت اغديك أخلص بس، لما طلعنا واضح أن المدام ما كانت مرتاحة وعلى أعصابها قلت يابنت الحلال ترى الانتظار طويل وإنا جاهزين نرجع على بوابة طيارتنا على طول نبي نشوف المدينة، بالفعل خذينا جولة يمكن ساعة والحلو كانت الشوارع ما فيها زحمة، بس كانت الطبيعة فيها جدا عادية ولا تقارن بمدينة كيب تاون، وهنا سألت السواق قلت ليش الطبيعة تختلف بين المدينتين، قال هنا ما فيه مطر بكيب تاون الأمطار كثيرة، 🌧️💧💦☂️☔️ يعني العشب عندهم أشهب ماله لون، بس في كيب تاون المدينة كانت خضراء، وأصلا المسافة بين المدينتين كانت بعيدة، جلسنا بالطيارة ساعتين عشان نوصل جوهانسبيرغ، المهم رحنا على ساحة مانديلا كانت متوسطة مو كبيرة بس مو صغيرة عليها محلات جلسنا في مقهى















وكانت الأجواء باردة في الظل كثير، قلت للمدام أبي أصور عند تمثال مانديلا، قالت شكلك جايبنا عشان تصور عند تمثاله 🤜🤛✊ ترى برى مطار جوهانسبيرغ فيه تمثال له كان صورت هناك وخليتنا بالمطار، بعد النقاش الرومانسي عطتني صورة حلوة وقلنا خلاص نبي نرجع للسواق اللي ينتظرنا برى شكله جاع ويبي يتغدا، أول ما ركبنا سألته وش تبي تأكل قال على ذوقك طيب ما تشرط، 😒 قلت طيب رح لأقرب مطعم لماك اشتري لك وجبة، وإنا معك لأن وجبات "الإثيوبية" مو حلوة، تغدينا ورجعنا للمطار وكان قدامنا تقريبا 40 دقيقة على الإقلاع مو فتح البوابة الإقلاع، وكان فيه سرا طويل هنا الزوجة الحبيبة بدت فقد الأعصاب وتطلق التهديد والوعيد لو فاتتنا الرحلة 😤🫥 وأنا كنت أضحك على شدة توترها، بس الحمدلله ما طولنا في الطابور وركبنا طيارتنا قبل دقايق بس من الإقلاع بالسلامة، بعد الإقلاع وإحنا بالجو التفت على المدام قلت ترى فيه ترانزيت مدته ساعتين في أديس أبابا وشرايك نطلع نشوفها ما بعد زرنا المدينة وكنت أدري إن فيه فيزا بس قلت أجس النبض، 🥶 وهنا كان الرد عنيف قلت ترى أمزح أصلا لازم فيزا، أول ما أقبلنا على أديس أبابا كانت الغيوم كثيفة وبعد وصولنا كانت الأرضية مبللة بالمطر، والغريب إن مطار أديس أبابا كان مزدحم جدا جدا بالطيارات بشكل غريب وذكرني بمطار دبي من كثرة الطيارات، وبعد وصولنا للمطار كان عدد الناس داخل المطار هائل، أعداد كبيرة بشكل حتى إني قلت شكل الرحلة بتفوتنا وشلون بيمشون كل الناس هذي بس في عشر دقايق خلصونا ودخلنا على السوق الحرة بالمطار وبواباتنا قدامنا، خذينا فيه لفة، المطار كان بسيط يعني مافيه مظاهر الحداثة والتطور، بس كان فيه ألفة غريبة وقالت المدام ياليت خذينا في أديس أبابا ليلتين قلت الجايات بإذن الله، وبعد فترة الانتظار ركبنا طيارتنا المتوجه للرياض الحبيبة، وبكذا انتهت رحلة الأيام الستة اللي حبيت أشاركم فيها…








وأتمنى أن تحوز حروفي على رضاكم، وأكون قدمت ولو حاجة بسيطة لكم، واعتذر إني ما وثقت أسماء بعض المطاعم والكوفيات والشوارع، لأني للأسف ما تعودت أكتب عن رحلاتي، ولكن حبيت أنقل لكم خلاصة سفرة سريعة لعل أحد يستفيد منها في يوم، مع كامل الامتنان لجميع من تابع ولو جزء يسير مما قدمته في هذه السطور🌹
 
مشاهدات
كيب تاون مدينة جميلة وتعتبر من المدن اللي تكلفتها المادية متوسطة مقارنة بغيرها، ومن وجهة نظري إن المدينة تستحق الزيارة.
مستوى الأمن في المدينة كان عالي بس في الليل كثير ينصحونا بعد التجول سيرا على الأقدام فالحرص واجب وتجنب الخروج أفضل.
فيه خيارات كثيرة بالنسبة للأكل تلقى المطاعم العربية والهندية والعالمية ومستوى جودة الأكل والنظافة جدا عالي.
اعتمدت في عملية الدفع على بطاقة المسافر لبنك الراجحي مع إني أفضل أتعامل ببطاقة البنك الأهلي.
كيب تاون مدينة تضيف للمسافر شيء جديد وهذي ميزة فيها والفعاليات بالمدينة كثيرة جدا بس من وجهة نظري 5-7 أيام كافية جدا إنك تشوف المدينة وتستمتع فيها.

جزاك الله خير، وبارك الله فيك وفي أهل بيتك
شكرا لك على مشاركتنا بهذا التقرير الجميل،
وإن شاء الله تكون لكم عودة قريبا لجنوب افريقيا
لزيارة مدن الجاردن روت.

تقرير جميل مثل صاحبه
والمدام معاها حق
تهور كبير منك الخروج لساحة مانديلا
والوقت ضيق جدًا
خاصة أن جوهانسبرج دايم زحمة بس عدت على خير

بالفعل كيب تاون تستاهل الزيارة بقوة
بس ترى جلسنا فيها 3 أشهر وما شبعنا منها
الى يومك هذا يطالبوني بالرجعة لها

سلمت وسلمت يداك
بداية جميلة مع تقرير جميل

روعه التقرير بسوالفكم الجميله
الاماكن والاسواق والجولات كلها ممتعه والحمدلله انكم استفدتوا بالجدول لستة ايام
استفدنا من المعلومات والصور حلوة وقياسها مناسب بعد التعديل
شكراا لذكر تجربتكم وان شاءالله ترجع تكتب لنا تقرير اخر لسفرة ثانيه