اليوم السادس
اليوم الأخير كنا متفقين يكون يوم للتسوق بس، ما يكون معه أي شيء ثاني، في اليوم هذا ما طلعنا من الفندق إلا قريب الظهر لأن رحلتنا بتكون الصباح بدري وقلنا ننوم فترة طويلة عشان لو ما نمنا إلا ساعات قصيرة على الأقل نكون معوضين قبلها،








































بعد الإفطار توجهنا للأوت ليت اللي بكيب تاون وكان مو كبير بس مصمم بطريقة حلوة يعني مربعين أذكر وعليها محلات بكل الاتجاهات، 😇 وكانت الخيارات كثيرة بالنسبة للجنسين وجميع الأعمار، وكانت ساعات التسوق طويلة إلى قبل العصر، وبعد كذا حبينا نرجع كل مشترياتنا للفندق ونروح لمول "كانال ووك"، بس وإحنا راجعين للفندق لفت نظرنا شارع كله محلات وكان مزحوم كثير فقلنا للسواق الشارع هذا وشسمه، وقالت المدام أبي أنزل هنا قلت نروح الفندق ونرجع لنفس الشارع طيب أفضل نكون أخف وننزل كل الأغراض اللي شريناها وبعدين نرجع، وبالفعل تم الاتفاق مع السواق نروح الفندق وبعدين يرجعنا لنفس الشارع اللي شدنا، المشكلة أنه كثير من الأسماء ما وثقتها واعتذر من القراء الكرام، لأن اسم الشارع ما حفظته نزلنا له وكان فيه كل شيء ممكن تشتريه خاصة النسائية وبأسعار مغرية جدا، 👏 وجلسنا بعد بالشارع هذا من ساعتين لثلاث تقريبا، يعني إلى قبل المغرب، وخذينا أكياسنا ورجعنا للفندق ثانية 🌝 وقبل نروح على مول "كانال ووك"، يعني لو بالخاطر شيء ونشوف شيء حلو ممكن نأخذه بالطريق ليش لا، بس قبل نطلع للمول قلنا بنريح شوي بالفندق بعد الجولة الطويلة حسينا بتعب،













































لما طلعنا مول "كانال ووك" كانت الساعة تقريبا 8 المساء وشفنا كثير محلات مغلقة على غير العادة لأنه يوميا تقريبا نروح لمول "فكتوريا"، أو لمول "كانال ووك"، جلسنا بالمول تقريبا ساعة وتعشينا فيه قبل رجعتنا للفندق وترتيب الشناط قبل النوم، وكنت خايف تروح علينا نومه لأن الرحلة كانت في وقت مبكر أذكر 8.30 تقريبا، فأول ما وصلت الفندق حرصت الاستقبال يدقون علينا وجهزت المنبه كم مرة مع إن المدام نومها جدا خفيف بس قلت احتياط، 😉😌 والغريب إن يوم سفرتنا كان فيه إضراب بكيب تاون لسواقين التكاسي وأوبر بدعوى من نقابات خاصة فيهم وما عندنا خبر عن الموضوع إلا من موظف الاستقبال وإحنا نازلين نسوي "تشيك أوت"، 😄😒 فقال لو تبي ممكن نحاول وركزوا نحاول نوفر لك سيارة، هنا قلت شكل "الإثيوبية" بتطير بدونا، سبق فاتتنا رحلتين عودة وحدة بدبي والثانية أثينا، وش ذا الحظ الحلو إضراب في يوم مغادرتي لديرتهم، ☹️🙁😞😒😏 قلت له لحظة بنجرب نطلب أوبر لعل الأمور تتيسر، وبالفعل من أول محاولة للمدام قبلوا طلبنا فشكرته وقلت فيه سواق بيجي يأخذنا للمطار، توجهنا للمطار استعدادا لرحلتنا اللي بنوقف فيها مرتين الأولى بمدينة جوهانسبيرغ ثلاث ساعات ونصف، والثانية بأديس أبابا ساعتين، كانت الإجراءات سهلة وسريعة مع إن الطابور كان وش طوله، قلت للمدام شناطنا بتروح الرياض مباشرة، وبطاقات صعود الطائرة معنا كلها، شرأيك إذا وصنا جوهانسبيرغ نطلع نشوف المدينة قالت لا شكلك ناوي تخلي الرحلة تفوتنا زي دبي، وأثينا، 🥺 قلت ما عليك بنشوف سواق نشمي يفر فينا ساعتين ونشوف ساحة نيلسون مانديلا ونرجع، وبعد محاولات قالت أوك بس نتأكد من السواق، أول ما وصلنا جوهانسبيرغ شفت واحد من السواقين وبديت في عملية المكاسرة معه، اتفقنا على 250 راند ساعتين بس قال ترى بشرط قلت وشو قال تغديني، 😩😫 قلت اغديك أخلص بس، لما طلعنا واضح أن المدام ما كانت مرتاحة وعلى أعصابها قلت يابنت الحلال ترى الانتظار طويل وإنا جاهزين نرجع على بوابة طيارتنا على طول نبي نشوف المدينة، بالفعل خذينا جولة يمكن ساعة والحلو كانت الشوارع ما فيها زحمة، بس كانت الطبيعة فيها جدا عادية ولا تقارن بمدينة كيب تاون، وهنا سألت السواق قلت ليش الطبيعة تختلف بين المدينتين، قال هنا ما فيه مطر بكيب تاون الأمطار كثيرة، 🌧️💧💦☂️☔️ يعني العشب عندهم أشهب ماله لون، بس في كيب تاون المدينة كانت خضراء، وأصلا المسافة بين المدينتين كانت بعيدة، جلسنا بالطيارة ساعتين عشان نوصل جوهانسبيرغ، المهم رحنا على ساحة مانديلا كانت متوسطة مو كبيرة بس مو صغيرة عليها محلات جلسنا في مقهى















وكانت الأجواء باردة في الظل كثير، قلت للمدام أبي أصور عند تمثال مانديلا، قالت شكلك جايبنا عشان تصور عند تمثاله 🤜🤛✊ ترى برى مطار جوهانسبيرغ فيه تمثال له كان صورت هناك وخليتنا بالمطار، بعد النقاش الرومانسي عطتني صورة حلوة وقلنا خلاص نبي نرجع للسواق اللي ينتظرنا برى شكله جاع ويبي يتغدا، أول ما ركبنا سألته وش تبي تأكل قال على ذوقك طيب ما تشرط، 😒 قلت طيب رح لأقرب مطعم لماك اشتري لك وجبة، وإنا معك لأن وجبات "الإثيوبية" مو حلوة، تغدينا ورجعنا للمطار وكان قدامنا تقريبا 40 دقيقة على الإقلاع مو فتح البوابة الإقلاع، وكان فيه سرا طويل هنا الزوجة الحبيبة بدت فقد الأعصاب وتطلق التهديد والوعيد لو فاتتنا الرحلة 😤🫥 وأنا كنت أضحك على شدة توترها، بس الحمدلله ما طولنا في الطابور وركبنا طيارتنا قبل دقايق بس من الإقلاع بالسلامة، بعد الإقلاع وإحنا بالجو التفت على المدام قلت ترى فيه ترانزيت مدته ساعتين في أديس أبابا وشرايك نطلع نشوفها ما بعد زرنا المدينة وكنت أدري إن فيه فيزا بس قلت أجس النبض، 🥶 وهنا كان الرد عنيف قلت ترى أمزح أصلا لازم فيزا، أول ما أقبلنا على أديس أبابا كانت الغيوم كثيفة وبعد وصولنا كانت الأرضية مبللة بالمطر، والغريب إن مطار أديس أبابا كان مزدحم جدا جدا بالطيارات بشكل غريب وذكرني بمطار دبي من كثرة الطيارات، وبعد وصولنا للمطار كان عدد الناس داخل المطار هائل، أعداد كبيرة بشكل حتى إني قلت شكل الرحلة بتفوتنا وشلون بيمشون كل الناس هذي بس في عشر دقايق خلصونا ودخلنا على السوق الحرة بالمطار وبواباتنا قدامنا، خذينا فيه لفة، المطار كان بسيط يعني مافيه مظاهر الحداثة والتطور، بس كان فيه ألفة غريبة وقالت المدام ياليت خذينا في أديس أبابا ليلتين قلت الجايات بإذن الله، وبعد فترة الانتظار ركبنا طيارتنا المتوجه للرياض الحبيبة، وبكذا انتهت رحلة الأيام الستة اللي حبيت أشاركم فيها…








وأتمنى أن تحوز حروفي على رضاكم، وأكون قدمت ولو حاجة بسيطة لكم، واعتذر إني ما وثقت أسماء بعض المطاعم والكوفيات والشوارع، لأني للأسف ما تعودت أكتب عن رحلاتي، ولكن حبيت أنقل لكم خلاصة سفرة سريعة لعل أحد يستفيد منها في يوم، مع كامل الامتنان لجميع من تابع ولو جزء يسير مما قدمته في هذه السطور🌹
 
مشاهدات
كيب تاون مدينة جميلة وتعتبر من المدن اللي تكلفتها المادية متوسطة مقارنة بغيرها، ومن وجهة نظري إن المدينة تستحق الزيارة.
مستوى الأمن في المدينة كان عالي بس في الليل كثير ينصحونا بعد التجول سيرا على الأقدام فالحرص واجب وتجنب الخروج أفضل.
فيه خيارات كثيرة بالنسبة للأكل تلقى المطاعم العربية والهندية والعالمية ومستوى جودة الأكل والنظافة جدا عالي.
اعتمدت في عملية الدفع على بطاقة المسافر لبنك الراجحي مع إني أفضل أتعامل ببطاقة البنك الأهلي.
كيب تاون مدينة تضيف للمسافر شيء جديد وهذي ميزة فيها والفعاليات بالمدينة كثيرة جدا بس من وجهة نظري 5-7 أيام كافية جدا إنك تشوف المدينة وتستمتع فيها.