بعد التحية والتقدير للأحبة أعضاء وزوار المنتدى الرائع..
أتشرف بكتابة تقريري الأول عن مدينة "كيب تاون" في منتدى المسافرون العرب، أو ممكن أقول يومياتي المتواضعة، لأنه لا يرقى أن يكون تقرير، مجموعة أيام فيها ذكريات عن أماكن، ومواقف، ومشاهدات حبت أنقلها لكم هنا، في المنتدى الرائع اللي يجمع نخبة مميزة من الأخوات والإخوة الكرام، اللي استفدنا منهم وخبرتهم في معظم رحلاتنا، فلهم منا كل الدعاء والشكر والتقدير..

كيب تاون
رحلة الأيام الستة من 29 يوليو حتى 4 أغسطس لجنوب إفريقيا، وتحديدا مدينة "كيب تاون" الفاتنة، الرحلة كانت مفاجئة، دون تخطيط مسبق، يعني كانت قبل الرحلة بعشرة أيام تقريبا، الحقيقة كنا محتاجين سفرة سريعة تغيير جو، والابتعاد عن الضغوطات، فكرنا في مدن ما سبق زرناها، خاصة المدن الساحلية مثل أنطاليا، شرم الشيخ، المالديف، بالأخير شفنا إن كيب تاون بتكون خيار جيد، وإضافة كونها بالقارة الإفريقية اللي ما سبق زرنا فيها إلا مصر الحبيبة بس، والأجواء باردة لأن عندهم فصول السنة مختلفة، صيفنا شتائهم، والعكس بالمثل، إضافة إلى أن جنوب إفريقيا بدون فيزا، وقارة غامضة بالنسبة لنا، وبعد التشاور مع المدام قررنا تكون الوجهة كيب تاون.

الاستعداد للسفر
بديت البحث عن الخطوط المناسبة للحجز وأقارن الأسعار، الحقيقة الخيارات ما كانت كثير، حصلت رحلات على "القطرية"، و"الاتحاد"، و"الإثيوبية"، وكانت الأسعار متقاربة بشكل كبير، و"السعودية" اعتقد تروح على جوهانسبرغ بس، والفرق كان في الترانزيت، كانت في خطوط الطيران الخليجية مدة الانتظار ساعات طويلة، بس في "الإثيوبية" ساعات انتظار أقل بكثير في "أديس أبابا"، في الذهاب كانت ساعة بس، والإياب ثلاث ساعات ونصف في جوهانسبرغ، ثم أديس أبابا ساعتين، توكلنا على الله، وتم الحجز على "الإثيوبية" بسعر 3.060 التذكرة الواحدة لشخصين لي والمدام، بخط سير ذهاب (الرياض، أديس أبابا، كيب تاون)، والإياب (كيب تاون، جوهانسبرغ، أديس أبابا، الرياض).

بعد الانتهاء من حجز تذاكر الطيران، بدينا رحلة البحث عن الفندق المناسب، ووقع الاختيار على فندق "حياة ريجنسي"، 6 ليالي، وكان إجمالي سعر التكلفة 2500 ريال تقريبا، والحجز كان من خلال موقع "بوكينغ"، والمبلغ يعتبر جدا معقول بالنسبة لفندق خمس نجوم، و6 ليالي، الفندق كان رائعا حقيقة بكل المقاييس، موقعه كان في وسط المدينة تقريبا، فخم، متوسط الحجم، خدمته كانت ممتازة، موظفينه بشوشين وخدومين جدا، خاصة موظف في الاستقبال كان اسمه أبو بكر الله يسعده من أول دقيقة وصلنا للفندق مبتسم جدا، ويعرض المساعدة في التعريف بالمدينة، وعمل الحجوزات لأي مزار أو جهة نبيها.

مع حجز الفندق بديت أبحث عن السيارة المناسبة، ووقع الاختيار على شركة "فيرست 1" من خلال موقع "بوكينغ" أيضا، حجزت السيارة مدة خمس أيام، حبيت أرجعها قبل رجعتي بيوم، بعدا عن أي تأخير أو تعقيد ممكن يقابلني، وبالفعل حجزت السيارة بسعر اعتبره ممتاز 666 ريال ل5 أيام، والاستلام والتسليم يكون من مطار كيب تاون.

ماشاءالله رحله سعيدة وان شاءالله تتكرر دايما
نشكر جهودك في ذكر تقرير عن سفرتكم
نصايح جميله ومعلومات مفيده

تقرير سريع وسفرة سريعة فيها كسرة روتين حلوه 👌🏽👌🏽

يا هلا ومرحبا فيك أبو وليد
بداية جميلة في كتابة التقارير السياحية

البلد ممتع وجميل
اختياركم للفندق رائع
ايجار السيارة رخيص جدا

اعتبرها بداية لاكتشاف البلد
لأن كيب تاون لوحدها تحتاج أسبوعين
للمرور على مزاراتها وتجربة الحياة فيها

أتوقع لكم عودة للبلد
ونشكرك على هذا التقرير الخفيف اللطيف

يوم السفر
فجر يوم السبت 29/7 كان موعد السفر، وموعد الإقلاع كان 3.25 صباحا، وصلنا للمطار قبل موعد الإقلاع بساعة ونصف، والحمد لله قدرنا نخلص، مطار الملك خالد في الرياض كان جدا مزحوم، أمر طبيعي في فصل الصيف، الحقيقة تأخير التوجه للمطار ملازمني في معظم سفراتي مدري ليش، مع إني سبق وفاتتني رحلات، ورجعت أحجز من جديد إلا إني مصر على التأخير، بعد وصولنا لكونتر الخطوط "الإثيوبية" كان استقبالهم جميل، وإجراءاتهم سريعة، ووصلنا على البوابة والناس معظمها داخل الطيارة، بعد جلوسنا في المقاعد المخصصة لفت انتباهي صغر حجم الطائرة، وفخامتها في نفس الوقت، تعامل المضيفات الراقي، الخدمة كانت جيدة، بس الوجبات ما كانت مناسبة، وسبق قريت عن الموضوع قبل السفر إن الوجبات اللي تقدمها "الإثيوبية" ممكن تكون غير مناسبة للبعض، فخذيت فطائر بيتزا من هرفي، لأن الرحلة من الرياض إلى أديس أبابا ثلاث ساعات، ومن أديس أبابا لكيب تاون تقريبا 6 ساعات، ويوم وصلنا أديس أبابا كانت الأجواء ساحرة ما توقعتها كذا أبدا، أمطار غزيرة،



سحاب مع نسمة هواء برادة، بصراحة تفاجأنا، ويبدوا إن وصولنا كان متأخر لأن بمجرد وصولنا للمطار خذونا في باص ورحنا للصالة، ثم نادى الموظفين على رحلتنا المتوجهة كيب تاون، ويستعجلون علينا لأن الرحلة تأخرت من الرياض 30 دقيقة، وكانت طيارة "الإثيوبية" المتوجهة لكيب تاون من نوع "إيرباص"، كبيرة جدا، وفخمة، وما كان عليها بالنسبة لي أي ملاحظ سلبية.
الوصول
وصلنا مطار كيب تاون الساعة 1 ظهرا تقريبا،



وأذكر إني طالع من الرياض ودرجة الحرارة نهاية الثلاثين وإنا بالفجر، لما وصلت كيب تاون كانت درجة الحرارة أقل من 11 درجة، أمطار جميلة والجو سحاب، والإجراءات حقت الدخول كانت سريعة، واستلام الأمتعة كان سلس، بدينا نسأل عن شرائح الجوال، وطلعنا شريحتين "فودفون"، بشكل سريع، ثم توجهنا لمكان استلام السيارة، وبلغوني إن الشركة مكانها في المواقف الخارجية، كنت لابس جاكيت ومدفي نفسي، بس المشكلة المدام ما كانت محتاطة باللبس الثقيل، دلوني موظفين المطار على مكان الشركة، ورحنا لمكانهم ومعي عربية الشناط، والمدام معي بردانة مع درجات الحرارة المنخفضة، لكن أجواءهم الساحرة، ونسمات الهواء الجميلة تركت انطباع أولي رائع، وكثير اهتم بالانطباع الأولي لأي دولة أسافر لها، كنت مستأجر سيارة جيب صغير "هاتشباك"، بس لما جيت استلمها قالت الموظفة إن السيارة مو متوفرة، وبنغير لك نوع السيارة، والمتوفر الحين سيارة صغيرة "سوزوكي"، الحقيقة تضايقت لكن لعل في الأمر خيرة، قالت بنفس السعر ترى، قلت هاتيها ما يخالف، خذيت مفتاح السيارة وشيكت عليها، وصورت الملاحظات اللي بالسيارة عشان إذا جيت أسلمها ما يحسبون شيء علي ما لي أي علاقة فيه،



المشكلة كانت في إن الدركسون عكسنا، ومعه الإشارات ومراية السيارة الداخلية، يعني كل شيء عكس، حتى شوارعهم عكسنا، أول يوم كان جدا متعب في السواقة، أبي ألف يمين أدق إشارة يسار، وأبي أروح يسار أدق إشارة يمين، لكن مشت الأمور الحمد لله تساهيل، هي حقيقة عاد ما مشت مرة في اليوم الأول، يعني ضربت العمود اللي في الباركينغ حق الفندق أول يوم "كتف قانوني خفيف"، صراحة أتوقع إنه غير قانوني للمراية من جهة اليسار لأني مو متعود، وما بعد ضبطت الوزنية.
اليوم الأول
كلمتكم عن أهمية "الانطباع الأول" بالنسبة لي، وطبعا هي مجموعة تفاصيل، ممكن تكون ابتسامة موظف، كلمة طيبة، سهولة إجراءات، تنظيم كويس للدخول والخروج، نظافة الشوارع، الطبيعة الساحرة، ويعني أشياء ثانية، أول ما وصلنا كيب تاون كان الجو سحاب، السماء بيضاء، والأمطار غزيرة،








بعد ما توجهنا للفندق لفت انتباهنا طبيعة المدينة الخضراء، سبحان الله كني بدولة أوروبية، خاصة الدول الخضراء اللي سبق زرتها "سويسرا، النرويج"، فيه تشابه في طبيعتها، طبعا مع أفضلية للنرويج وسويسرا بحكم البحيرات والشلالات والأنهار اللي بكل مكان، بس حقيقة طبيعة المدينة كانت جميلة جدا،

وصلنا لفندقنا "حياة ريجنسي" بمساعدة "قوقل ماب"،



كان الفندق يبعد مسافة نصف ساعة تقريبا من المطار، الميزة إن مواقف الفندق كانت في البدروم ومجانية،



بعد الوصول تم إنهاء إجراءات الدخول مع الموظف "أبو بكر" الله يسعده، أول ما وصلنا صلينا، وريحنا ساعة في الغرفة بعد تعب الرحلة من الساعة 3.25 الفجر، حتى وصولنا الفندق كانت الساعة فوق 2 الظهر، الغرفة كانت جميلة، إطلالتها على حي "بو كاب"، حي المسلمين في كيب تاون، ومطلة بعد على جبل أخضر، فيها شرفة صغيرة مرة بس نسمات الهواء الحلوة مع المطر حسسنا إن الشرفة الصغيرة فلة، بعد كذا كلمت الريسبشن أسأل عن القبلة قال الموظف أبو بكر اتجاه القبلة موجود في الغرفة، وبالفعل كان موجود بس ما خذينا بالنا منه، بعد دقيقة اللي هو جاي على الباب الله يسعده يتأكد إذ عرفت الاتجاه، وكانت أول ملاحظة لي على الفندق سرعة الخدمة، ابتسامة الموظفين، التعاون مع النزيل، محاولة مساعدته في الحجوزات أو أي شيء ممكن يحتاجه، ودورة المياه أعزكم الله فيها شطاف، والمدام تقولي أتوقع إن مالك الفندق مسلم لأنها حاط اتجاه الغرفة، والشطاف بالحمام الله يعزكم، وبحي المسلمين قلت ممكن ما أدري، ويمكن يكون تأثير وكثيرة العوائل الخليجية اللي تزور المدينة وتسكن الفندق خلاهم يوفرون كل الشغلات هذي، يعني يبونك وأنت ساكن عندهم مبسوط، وأتذكر حصل لنا موقف جميل من حراس الفندق، أول يوم حبينا نمشي قبل النوم على رجلينا بمحيط الفندق لأن الجو يساعد وكان فيه حراس على مداخل الفندق، سألونا وين رايحين قلنا بنأخذ لفة بالمنطقة وكان الوقت ليل مو متأخر بس ليل، نصحونا بعدم المشي لأن المنطقة والمكان مو آمن في الليل، وهذا من الأشياء اللي نشوف إنها تميز الفندق، يعني مهتم بنزلائه وأمنهم، عموما بعد ما ارتحنا تشاورت مع المدام عن أول مكان ممكن نروح له ونستفيد من اليوم الأول وكان الاختيار على سوق "فكتوريا"، اللي بمنطقة "الواجهة البحرية"، توكلنا على الله وتوجهنا للواجهة البحرية نستكشف المنطقة، وقفت السيارة بالمواقف وكانت بفلوس، وطريقة الدفع ما عرفها قلت ياولد وأنا طالع تتسهل، بنشد عن طريقة الدفع، أهم شيء الحين نلف المكان، نتعرف عليه، أول ما بدينا نمشي الأجواء كانت باردة مرة بصراحة، مع إنا كنا لا بسين بس برد، ومطر، وهواء، قلت للمدام مو كن الصيف حقنا حلو وظالمينه، منظر البحر أول ما مشينا على ضفافه كان حلو كثير على الأجواء الشتوية، بس ما كان فيه ناس كثير، كنا نشوفهم داخلين بالمول، كان فيه مقابل المول "عجلة كيب تاون"، وسبق جربناها في لاس فيغاس، وسنغافورة، وما تحمسنا نجربها، بس الواجهة البحرية كانت منظمة ونظيفة مشينا ربع ساعة على الشاطئ وحسينا بالبرد، والجوع وكنا ندري إن فيه فعاليات كثيرة بالمنطقة، بس قررنا نتوجه لداخل المول لان المطر يزيد والبرد قارس، وقلنا حشر مع الناس عيد، نزبن داخل الموال، بس نبي نأخذ لفة في المول قبل نروح منطقة المطاعم، مشينا داخل المول وكان جميل مو كبير بس منطقته حية مرة، يعني برى تشوف كل المكاتب اللي تودي للمزارات ورحلات متنوعة، المول كان فيه عوائل خليجية كثير، خاصة من حبايبنا أهل الإمارات الكرام، كان فيه مطعم برجر زحمة، قالت المدام نجربه قلت يالله ليش لا، بس كان انتظار وإنا جوعانين ما كلينا من ساعات طويلة بس قلنا ما يخالف ننتظر، قلنا نبي نسأل أول عن اللحم حلال أو لا، فقال بالمنيو موجود لحم حلال، توكلنا على الله انتظرنا تقريبا خمس دقائق لحد ما فضت طاولة ونادوا علينا، وللأمانة المطعم جودته عالية، أسعاره متوسطة وكان من أول الأشياء اللي لاحظتها في كيب تاون أسعار المطاعم، والكافيات كانت متوسطة، ومعقولة جدا بالنسبة لنا، وبعد ما تعشينا جلسنا بكافي داخل المول، وقهوتهم مميزة لدرجة إنا كل يوم نشرب من كوبين لثلاثة أكواب قهوة من جودتها اللي أغنتنا وقتها عن القهوة العربية اللي تلازمنا بكل سفرة، بعد كذا ألحين نبي نرجع السيارة، وبجيب العيد ما عرف طريقة الدفع، والمدام توترت من بعد "الكتف القانوني"، يوم جيت بطلع أدور على مكان البطاقة أدفع مو موجود وفيه سيارة وراي، المشكلة المواقف ما فيها موظف، أو حارس أمن أنشده، قلت بسأل الأشقر اللي جنبي بالمسار الثاني، فقال الدفع داخل المول في الماشين، دخل التذكرة وأدفع بالبطاقة المبلغ، فرجعت وقفت السيارة ورحت داخل المول، وكانت الطريقة سهلة دفعت وبعد كذا اتفقنا نرجع الفندق، كان مبين علينا تعب الرحلة والإرهاق، قررنا نرجع الفندق ننوم، ونستعد لليوم الثاني وفعالياته.

ما شاء الله
حلو الانطباع الاول عن الديره .. والجو خيال صراحه
احب الفنادق اللي تهتهم في التفاصيل 👏🏽👏🏽
السياقه على اليمين بس اول شي متعبه بعدين اتسهل
حلو اليوم الاول وزيارة المول 👍🏽👌🏽

هذا الموضوع يفيدك ان شاء الله في رفع الصور

https://www.arabtrvl.com/vb/t50538.html

حجمهم وايد صغير اللي انت حاطهم