تكلفة أماكن الإقامة في airbnb أصبحت قريبة واذا ماكانت بنفس أسعار الفنادق. أفضل اختار فندق بنجمة واحدة عن Airbnb لكثرة مشاكله إما بسبب الموقع أو آلية الدخول او تعامل المالك وشروطه ... الخ ربما خيار جيد لمن يسكن بالبلد لفترة طويلة ولديه الفرصة لمعاينة الموقع وتجربة التعامل مع المالك فترة .

نصائح مهمة بصراحة نستفيد منها
انا اضيف من عندي نصيحتين عن تجربة
اذا كنت ناوي تسافر مع شباب اختار الشباب بدقة وانت في مكانك لأن الشخص اللي تعرفه هنا بيظهر في السفر مختلف اقصد في السفر التصرفات والصفات وطريقة التفكير تختلف عن وانت هنا
النصيحة الثانية والاهم
لاتمون على احد ماتعرفه في اي بلد القصد الناس فيهم الطيب والخبيث والابتسامة والمعاملة الحلوة ربما تخفي خلفها شيطان

اختار وقت الوصول للبلد المسافر له بالنهار ووقت الخروج منه بالنهار . وكل مايكون قرب وقت الدخول للفندق أفضل . ليه بالنهار ؟ أمان أكثر وتوفر كل أنواع المواصلات وإذا صارت معك مشكله مع الفندق عندك خيار تبدل بسهولة وماتتبهدل بالليل خصوصاً إذا معك عائلة .

من اكثر المداخلات اللي اطبقها نصيحة اخونا اخر فرصة
بخصوص البطاقات الائتمانية
بطاقة سفر بعملة البلد ( سفر بلس او سفر بنك الاستثمار )
بطاقة ائتمانية لحجز السيارة ودفع مبلغ التامين للفندق : عادة اطلب منهم خصم المبلغ من بطاقة السفر وعمل حجز على البطاقة الائتمانية واذا سويت تشك اوت اطلب خصم اي مبلغ من بطاقة السفر وفك الوديعة كاملة حتى اكون على اطلاع بكامل مصروفاتي
عني دايم اخذ اكثر من بطاقة صراف واحط بعضها معي وبعضها بالشنطة وصندوق الامانات




هناك بعض القواعد اللي احاول اطبقها :
1- في حال توفر خيارات للطيران احاول يكون موعد وصول الرحلة من 8-12 بحيث يكون يوم الوصول يحتوي على انشطة خفيفة وتكون رحلة المغادرة وهي الاهم انها تكون بالليل بحيث يكون يوم المغادرة يحتوي على جدول سياحي كامل واذا وصلت بالليل لوجهتك القادمة تنام وتبدا ثاني يوم يوم سياحي كامل : الخلاصة تجنب الرحلات بين المدن اللي بنص النهار

2- لاتحاول تشوف صور وفيديوهات كثيرة للبلد عادة , حاول تاخذ فكرة عامة عن المكان وصور خاطفة لترتيب الجدول بس لاتطالع صور وفيديوهات تلغي جمالية انبهارك اثناء الزيارة

3- لاتكرر الدول والمدن , العالم يحتوي على مايقارب 200 دولة حاول تجرب وجهه جديدة كل عام

4- تجنب التعامل مع العرب والصينيين قدر المستطاع

للأسف موضوع التعامل مع العرب حقيقة بالرغم أنه المفترض يكون تعامل ايجابي ولكن ماحصلت الأذية الا منهم عندما سافرت لكوالالمبور . لذلك اتجنب الحوار معهم وامشي في طريقي . مامريت بتجربة سيئة مع الصينيين بشكل عام الآسيوين تعاملهم كويس وماعندهم أذية لأحد .