السلام عليكم ورحمة الله

حبيت اشارك تجربتي لعلها تفيد الإخوة والاخوات المقيمين في السعودية بالذات حاملين جوازات السفر لدول غير مستقرة حالياً ..

في تاريخ 18/03 كان موعدي في الVFS اوراقي كاملة مكملة من خطاب العمل لكشف الحساب ، صور من هويات أفراد العائلة ، دعوة حضور مناسبة عائلية ، حجوزات الطيران والفندق ( من موقع أجودا ) كان مؤكد ومسترد ، وصور من تأشيرات سابقة لدول اسيوية وافريقية + الامارت وتركيا وأمريكا ,,
بعد 10 ايام جاني الجواز مع ورقة الرفض والسبب كان رقم 10 .. The condition of the intended stay is not reliable
قلت لعله خير و كمحاولة لفهم سبب الرفض أرسلت ايميل دايركت للقنصلية لفهم سبب الرفض لأنه من وجهة نظري مافي سبب وبصراحة ماكنت متوقعة منهم يردوا بس ردوا وطلبوا رقم اجواز والإسم كامل ،، ارسلتهم هم و خلال 24 ساعة تواصل معاي موظف من السفارة وقالي إنه الخلل في حجز الفندق وإنه مو مؤكد ،، مع إنه كان مؤكد 100%، سألته اذا ممكن اعدل الحجز وإذا في طريقة للتعديل قالي لازم أقدم مرة تانية للأسف و سألته وقتها إذا هو متأكد إن حجز الفندق فقط الي يحتاج له تعديل وقال ايوة ,,

رجعت والمعين الله طبعت كشف الحساب وباقي الاوراق مع حجز طيران مدفوع وحجزت المرة هذه الفندق من موقع الفندق نفسه لا بوكنق ولا غيره عشان أنفي التهمة
وأرفقت cover letter شرحت فيه الي صار انهم رفضوني واتواصلوا وبلغوني بسبب الرفض وانه تم تعديله وارفقت صور من الايميلات ووقت امكالمة بالزبط ،،

الي صار انهم بعد 15 يوم اتواصلوا معاي وقالت لي الموظفة ان القنصل حابب يقابلني وجها لوجه فقلتلها انه مستحيل انزل الرياض فأعطتني موعد بعدها بأسبوع عالvfs للمقابلة اونلاين فديو كول ،،،،،،
رحت عالموعد وأنا عند الباب رجعت كلمتني واعتذرت بأنه عندهم مشاكل تقنية ، بصراحة وقتها حسيت ان الموضوع تطفيش ولو جوازي ماهو معاهم م كان كملت باقي المرمطة هذه .......

اعطتني موعد بعد 3 ايام وحضرت كان الانترفيو عالزوم صوت وصورة مع القنصل وموظف تاني معاه سألني اول شي إذا احتاج مترجم قلت له لا وبعدها سألني ليش رايحة وايش علاقتي بأصحاب المناسبة وايش جنسياتهم وأديانهم ، وعن سفرياتي السابقة وعن عملي وعمل زوجي وعن مكان إقامة أهلي ( الوالدين والاخوة) وفين رح أخلي اطفالي عند السفر ,,,,, كانت المقابلة 10-15 دقيقة وقالي حيوصلك القرار خلال أسبوع ....
كان يوم الأحد ويوم الإثنين الاسبوع الي بعده استلمت الجواز مع الفيزا.