النمسا العشق الذي لن ينتهي 2012 - الصفحة 7

فيصل · 07-05-2015, 01:49 AM

يا زين الأرياف في الصباح والجو غيم

هاوية الاسفار · 07-05-2015, 02:08 AM

وقفنا عند بيت و شفنا هالاسطبل الخاص و الخيول الجميلة

وصلنا سالزبورغ و قعدنا ندور على فندق سألنا في رامادا و ما حصلنا و قلنا مالنا غير راديسون بلو

دخلنا و اكيد عندهم غرف فاضيه بس ما كانت جاهزه قلنا خلاص بنتوجه للاوت لت و نرجع بعدين نريح

ما خذنا وقت يمكن 5 دقايق وصلنا ديزاينر اوت لت

المواقف غير مجانيه و اعتقد دفعنا 11 يورو دخلنا السوق و يالله بسم الله

المركز يضم ماركات عالمية معروفه و غير معروفه

و بعدها عصافير بطنا بدت تصوصو و اخترنا هالمطعم الايطالي اللذيذ

طلبنا بيتزا جبن و ناجتس لليهال و بطاطا محشية مثل اللي يسوونها في القرية التركية
و الحين هابين هبه فيها عندنا في الامارات اغلب المطاعم يسوونها

و هاذي البطاطا فيها جبن و خضار و فاصوليا و صلصة و كانت لذيذه

خلصنا الغدا و كملنا تسوق

و هذا المحل اشتريت منه حق اليهال وايد شغلات و لين الحين ما شاء الله يلبسونهم

السيارة قعدنا فيها اليهال و فوقها الاغراض لانه تعبنا من كثر الاكياس 2 في واحد

و يوم يينا بنطلع حصلنا المصلى بس للاسف ما دخلناه كنا طالعين و قلنا بنصلي في الفندق

خلصنا تسوق و انصح كل حد يزور سالزبورغ انه ما يفوت هالاوت ليت لانه بضايعهم بصراحة تكد و ما تخترب

حتى لو كانت شوي غاليه بس تستاهل رجعنا الفندق و هذه صور من الطريق

الجسر اللي فوق نهر السالزاك

شارلوك هولمز و أبن السلطنة معجبون بهذا.

هاوية الاسفار · 07-05-2015, 03:00 AM

وصلنا الفندق و على طول اتجهنا للغرفة و هذا الممر بين الغرف

غرفتنا و رقمها مميز

اول شيء على اليمين الكبت و فيه الكواية

طاولة الكوي

الغرفه فيها سريرين كينج

التلفزيون و التسريحه مقابلين السرير

الغلاية و للاسف ما عندهم المكينه اللي احبها

تكرمون الحمام

و هاي اغراضنا من الاوت لت

ما كان عندنا شنط غير وحده حطيت فيها اغراضنا لليوم و السياره وقفناها في مواقف الفندق و كانت غير مجانيه

اعتقد لليوم 21 يورو صلينا و ريحنا و بعدها طلعنا و توجهنا للمنطقة القديمة مشيا على الاقدام و المظلة لم تفارقنا

و هذا ولدي زعلان مب راضي يلبس الجاكيت

المحطة الرئيسية في سالزبورغ و اعتقد كان عندهم احتفال و يجهزون الخيمة

و هذا الشيبه مستغل الوقت و قاعد يحلق الكلب عزكم الله

وايد احب هالمحل و بضايعهم حلوة

وصلنا النهر

شارلوك هولمز و أبن السلطنة معجبون بهذا.

هاوية الاسفار · 07-05-2015, 03:29 AM

و هاي القلعه اللي باجر بتكون عندنا مغامرة عجيبه وياها

و هاي اقفال الحب

وصلنا القرية القديمة

فندق ساخير

للاسف المحل كان مسكر و الا كنت بشتري غوري القهوة

تمشينا لين تعبنا و المحلات كلها سكرت و رجعنا بالباص و هذا باصنا رقمه 1

وصلنا المحطة و اتجهنا لمركز التسوق فوروم 1 و السنه فتحوا فروع يديدة

كنا ندور مطعم غابيريلا الايطالي بس للاسف سكروا المطعم و حصلنا واحد صاحبه مصري

كنا شبعانين طلبنا سندويش تركي لليهال و 2 كابتشينو

تتبيلة السلطة كانت رهيبه

و رجعنا الغرفة و انتهى يومنا في سالزبورغ و نلتقي بكم غدا

دمتم بود

شارلوك هولمز و أبن السلطنة معجبون بهذا.

|القحطاني| · 07-05-2015, 07:47 AM

ما شاء الله المناظر جميلة وكمان وقت مطر اكتمل الزين

المناطق الريفية اجمل من المدن بكثييير

وانبسطت اول ما شفت لوحة "مصلى" وبالعربي .. شيء جمييييل اللهم له الحمد والشكر

الله يعطيك العافية

♡ Sent from Samsung Galaxy Note 3 ♡

محترف أوروبا · 07-05-2015, 08:35 AM

تقرير ولا أروع اختي الكريمة .... فندق مارتيني معروف رخيص وحلو ..... بس الأفضل للعوائل في اوروبا حجز شقة بمطبخ أفضل والشراء من السوبر ماركت والفطور والعشاء بعد العودة من اليوم السياحي يكون في الشقة ...الشقة فيها خصوصية جميلة ..... هالشتات من القرى التي لاتمل من مشاهدتها مهما زرتها جميلة جدا ....يعطيك العافية متابعين معاك.

أرسلت بواسطة iPhone بإستخدام Tapatalk

هاوية الاسفار · 07-05-2015, 01:46 PM

اقتباس : المشاركة الأصلية كتبت بواسطة |القحطاني|

ما شاء الله المناظر جميلة وكمان وقت مطر اكتمل الزين

المناطق الريفية اجمل من المدن بكثييير

وانبسطت اول ما شفت لوحة "مصلى" وبالعربي .. شيء جمييييل اللهم له الحمد والشكر

الله يعطيك العافية

♡ Sent from Samsung Galaxy Note 3 ♡

لو شفتنا في 2010 كانت موجة الحر مجتاحه أوروبا و تخيل اخذنا مروحة في كابرون ما تحملنا شدة الحرارة
و يوم رجعنا في المطار شافنا موظف و قال راجعين من ألمانيا و مأخذين مروحة
قاله زوجي الجو كان وأيد حار ما تحملنا بس اخر أسبوع كان ممطر و ما وقف المطر لين رجعنا
الله يعافيك

هاوية الاسفار · 07-05-2015, 01:53 PM

اقتباس : المشاركة الأصلية كتبت بواسطة محترف أوروبا

تقرير ولا أروع اختي الكريمة .... فندق مارتيني معروف رخيص وحلو ..... بس الأفضل للعوائل في اوروبا حجز شقة بمطبخ أفضل والشراء من السوبر ماركت والفطور والعشاء بعد العودة من اليوم السياحي يكون في الشقة ...الشقة فيها خصوصية جميلة ..... هالشتات من القرى التي لاتمل من مشاهدتها مهما زرتها جميلة جدا ....يعطيك العافية متابعين معاك.

أرسلت بواسطة iPhone بإستخدام Tapatalk

و الله يا خوي أنا حتى لو عندي مطبخ ما استخدمه مستحيل ارجع من الحواطة و أكون تعبانه و اطبخ
و احنا أساسا نحب نأكل في المطاعم تخيل مسافرين و نطبخ لا ما اقدر الا اذا انجبرت يمكن
هالشات حلوه تزورها اما انك نبات يومين او ثلاث ملل
الله يعافيك و تسلم عل المرور

|القحطاني| · 07-05-2015, 02:21 PM

اقتباس : المشاركة الأصلية كتبت بواسطة هاوية الاسفار

لو شفتنا في 2010 كانت موجة الحر مجتاحه أوروبا و تخيل اخذنا مروحة في كابرون ما تحملنا شدة الحرارة
و يوم رجعنا في المطار شافنا موظف و قال راجعين من ألمانيا و مأخذين مروحة
قاله زوجي الجو كان وأيد حار ما تحملنا بس اخر أسبوع كان ممطر و ما وقف المطر لين رجعنا
الله يعافيك

غريبة .. سبحانه مغير الأحوال

نبهتيني على شغلة .. متابعة الأحوال الجوية على النت قبل حجز رحلة

http://www.weather.com

علشان الواحد يعرف يختار شهر يكون الجو فيه مناسب لأن 90% من الرحلة معتمدة على الجو

الله يعطيك العافية

فيصل · 07-05-2015, 05:55 PM

اي والله شيء يفرح ويوسع الصدر شوفة مصلي
فيه ناس بعد تقدر المتسوق العربي

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
العشق الروحي	توبليرون	بوابة الحرمين الشريفين	48	29-06-2015 12:14 AM
العرب المسافرون .. بيتي الذي احب..	طارق عنايات	أخبار واعلانات الأعضاء	23	04-06-2015 10:30 PM
تجديد فيزا شنغن من سفارة غير السفارة الاولى ممكن ؟ وجواز ينتهي بعد السفر بثلاث شهور !	Tharmadawe	فيزا	3	10-05-2015 08:37 AM
اجب عن السؤال الذي يوافق شهر ميلادك	شارلوك هولمز	عام	21	01-05-2015 12:44 PM