رحلتي شهر 7 الى اليابان

KHALED91 · 30-05-2024, 08:49 PM

السلام عليكم شلونكم انا خالد من الكويت ناوين بإذن الله نسافر شهر 7 وقريت اكثر المواضيع اللي تخص اليابان هني بس تواريخها شوي قديمه سؤالي الى اهل الخبره مانستغني من شوركم ورايكم

انا مسافر 23 يوم هناك هل الخطة تكون بين طوكيو واوساكا وفي غيرها ولا بس المدينتين كافيه

كم ليله تكون مناسبه في كل مدينه

واذا في نصايح عن اماكن نتجنبها او اماكن تنصحون فيها ما استغني من شوركم

والاكل شلون عليه من ناحيه الحلال او المطاعم الثقه
هل نجيب معانا من هني عزبه واكل ولا ما يحتاج

المواصلات ما فهمتها عدل في قطارات وفي باصات وفي تكاسي ادري التاكسي سعرها غالي بس هل سعرها معقول وامن من غيرها او تنصحون بالقطارات والمترو فقط

Prince Kytu, آخـــرفـــرصـــة, توبليرون و 1 آخرون معجبون بهذا.

Prince Kytu · 11-09-2024, 09:49 PM

وعليكم السلام ورحمة الله وبركاته
مناطق اليابان كثيرة والحمد لله قدرت ازور جميع محافظاتها أو مقاطعاتها

تقدر تزور
هيروشيما - هوكايدو - ناغويا - أوكاياما - فوكوكا - أويتا

ولكن بما ان سفرتك بالصيف فالافضل تروح مناطق الشمال
سابورو - اوموري - ايواتي - سينداي

توزيع الايام دايما تحددها حسب الاماكن الي بتروح لها

الافضل تسكن بمنطقة قريبة من محطات القطار وبطوكيو تكون ساكن قريب من محطات القطار الرئيسية على خط yamanote

الاكل في مطاعم حلال وايد منها التركية والهندية واليابانية وفي مطاعم اكل بحري وفي تطبيقات حلال وتقدر تكتب بقوقل ماب halal

التنقلات اعتمد على القطارات والمترو
التاكسي للضرورة فقط او للمطار علشان الحقائب

آخـــرفـــرصـــة و Boarding Pass معجبون بهذا.

Boarding Pass · 12-09-2024, 07:00 PM

رحلة ماتعة مقدماً

كزيارة للمرة الأولى أنصحك بـ ( أوساكا [ بدون يونيفيرسال ستوديوز ، ثلاثة أيام ] - كيوتو [ بقولك من يومين إلى ثلاثة أيام ، و لكنها من وجهة نظري أجمل و أحلى و أروق مكان في العالم ] - نارا [ زيارة يوم واحد و تقدر تآخذها من KLOOK ] - طوكيو [ 7 أيام أقل شيء ] - فوجي [ زيارة يوم واحد و تقدر تآخذها من KLOOK ، أو حسب الأماكن اللي تبي تزورها ممكن تزيد أيام ] ) ، الجو بشهر سبعة حر ، بس ترى مو سيء ، بشكل عام اليابان حلوة و من حلاوتها ماراح يفرق معك الجو صدقني حنّا نضطر نسافر بشهر 8 عشان الإجازات و مع ذلك عادي ، نروح لها لو الجو أحر
و بعدها راح يصير سهل تزور أماكن جديدة و دواعيس الدواعيس و إذا عندك وقت سيّر على هيروشيما ، و توتوري إذا كنت متابع لأنمي كونان !

نجي للأكل ، المطاعم الحلال منتشرة جداً جداً جداً بكل مكااااااااان ، حتى بالمدن الصغيرة ، و لكن لا مانع تآخذ معك أشياء بسيطة لمّا تضبط وضعك بالمكان
حتى أوبـر إيتس فيه قسم للأكل الحلال و التوصيل رخيص جداً

بالنسبة للمواصلات ، المترو يجنن و يغطي كل مكان ، استعمل قوقل ماب ، و ركّز في اللون و الأرقام ، إذا جوالك آيفون حمّل أبلكيشن Suica و اشتري البطاقة و أضفها على الأبل والت و عبّها عادي [ تقدر تستعملها في شراء أي شيء من أي مكان ، مو فقط للمحطة ] ، و إذا مو آيفون تقدر تشتريها من الأجهزة الموجودة في المحطات ، و هذا فيديو لليوتيوب شرحـه سهل مـــرة ، و ترى الموظفين لمّا تسألهم ماراح يخلّونك لمّا يفهمونك ، فريّح من هالناحية

و لكن لمّا تجي من المطار أنصحك تآخذ سيارة خاصة ، عادة آخذها من موقع KLOOK بالنسبة لي الأرخص و الأفضل
و إذا احتجت تاكسي ، استعمل GO TAXI
و بالإنتقال بين المدن خذ القطار أكيد

طيب أنا جرّبت فنادق كثير ، بعطيك أفضل شيء بالنسبة لي للحين
أوساكا ، Mercure Tokyu Stay Osaka Namba ، أفضل لوكيشن بلا منازع .
كيوتو ، Mercure Kyoto Station ، فيه أماكن أفضل و لكن ارتحنا بهالمنطقة هاديـة جداً جداً و صايرة بين الحواري
طوكيو ، سكنّا في شيبويا حلوة للسكن للزيارة أول مرة و لكن مو طول المدة و الفندق كان مكانه جيّد بس موظفينه مو تمام ! ، و شينجكو سكنّا فيها و كان الفندق يجنن و لكن السكن فيها كان أكبر خطأ ! منطقة مُش آوكّي ! ، و غينزا كانت و مازالت الأفضل بلا منازع ، الفندق بين المنطقة الهادية و السياحية Mercure tokyo ginza ، و أي استفسار حنّا بالخدمة

AL Tunaiji, آخـــرفـــرصـــة و Prince Kytu معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رحلتي الى اليابان مع العائلة ✌	Traveltape	بوابة اليابان	5	27-05-2020 02:00 AM
رحلتي الاولى الى اليابان 08/ 2018	AbdulazizMohammed	بوابة اليابان	60	04-05-2019 02:03 AM
رحلتي إلى اليابان (استفسار )	msk1993	بوابة اليابان	2	27-02-2018 12:36 AM
رحلتي إلى اليابان	Nora khalid	بوابة اليابان	3	15-10-2017 10:02 PM
رحلتي إلى اليابان .. بقلم .. امل عيسى	silent_dove	بوابة اليابان	18	28-12-2015 04:14 PM