تِقشبِيلة تِوليولا.. ما قتلوني ما حياوني.. غير ذاك الكاس اللي عطاوني.. الحرامي ما يموتشي.. جات خبارو في الكوتشي..

تذكرونها ؟؟

تحير عندها النظر اشمس تلك ام قمر
وراح القلب يسألني اسحر تلك ام سحر
أراها (المغرب) الفاتن فيه الحب و الخطر
أراها المغرب الساحر فيه الليل والوتر

هنــــــــا الـمغــــــرب الحضارة العراقة التاريخ



تم الحمدلله تحقيق الحلم في زيارة المغرب
الأغلب عارف اني من فترة بخاطري زيارة المغرب وكنت حاطتها في بالي قبل زيارة تونس لكن سبحان الله تسهلت رحت تونس وتأجلت المغرب..

كنت ابي ازورها مع قروب لسبب مهم وهو البخشيش ما احب سالفة البخشيش في التعامل فقلت اروح مع قروب واهم يخلصون كل شي.. و سبب ثاني زيارة المدن وتنقلاتها حسيتها صعبة علي .. والسبب الثالث التعامل مع الناس..

قلت اتوكل على الله واشوف لي قروب لقيت جم قروب بس اسعارهم غالية صراحه قلت اهي مو ذاك الغلا فيها ليش هالاسعار وعندي رفيجتي بحرينية تدرس دكتواره قالت أبرار الديرة رخيصة بس الأفضل تروحين مع قروب ..
قلت ليش بالضبط اذكرت لي الاسباب اللي ذكرتها فوق ..

واهني قررت اشوف لي قروب .. وانا في الزوارة وحدة من معارفنا قالت أبرار ما ودج اتسافرين .. قلت أكيد بس وين ؟؟
قالت انا حجزت مع فلانه اتسوي قروبات وبتروح المغرب ..

أنا ما صدقت على الله قلت هذا المطلوب بس عسى سعرها زين ؟؟
قالت ممتاز وأنا رايحه معاها جنوب أفريقيا .. وقعدت تمدحها لي ..

عقب كلمتها واهي رحالة بحرينية اتسوي رحلات مختلفة و اسعارها وايد معقولة ..
قلت حق اختي ها تروحين ؟؟
قالت اوك نروح المغرب ..

وتم التسجيل مع القروب ..



بسم الله الرحمن الرحيم
السلام عليكم ورحمه الله وبركاته
وعيدكم مبارك وتقبل الله طاعتكم

رجعت لكم بتقرير يديد و دولة يديده علي بعد رحلة البرتغال واسبانيا نتجة الى اقصى غرب القارة الافريقية و تحديدا الى:

( المملكــــــــــة المغـــــربيـــــة )..





من قبل كورونا وانا افكر فيها و اضبط امورها وكل مره ما تضبط الرحلة .. هالمره الحمدلله ضبطت

هنــــــــا المغــــــــرب



بديت بالاستعدادت اللازمة قبل السفر

الرحلة مستواها : متــوسط ( اللياقة البدنية ) لكن المغرب بحاجه الى عصي الهايك .. لان بعض المناطق فيها مرتفعات ..



اولا : الفــــــــــيزا



ما نحتاج فيزا

ثـانيـا : العمــــلات

عملة المغرب (درهم مغربي)





1 دينار كويتي = 32 درهم = 3.25 دولار

ثـالثـا : الطـيــــــــران



تم الحجز عن طريق الموقع الالكتروني للخطوط الجوية الكويتية في شهر أكتوبر 2023



الموقع الالكتروني
https://www.kuwaitairways.com/ar

طيران دولي : كويت - كازابلانكا - كويت بسعر 130 د.ك للشخص ..

رابــعــــــا : الفنــــادق



حجزت ليلة في كازابلانكا قبل موعد انطلاق القروب

فندق كازابلانكا ماريوت
casablanca marriott hotel

سعر الليلة غرفة لشخصين 69 د.ك = 225 دولار

خـامســا : الصحـــــــة و التطعيمـــــــات



قبل السفر بفترة كافية عليكم التأكد من الوجهة اللي رايحين لها اذا تحتاج الى اي تطعيمات ..

- لازم مراجعة عيادة المسافرين في دولتكم او الصحه الوقائية .
- تلقي التطعيمات اللازمة قبل شهر من السفر على الاقل ليتمكن الجسم من تكوين المناعة .
-اصحاب الامراض المزمنة مراجعة دكتورهم عشان يعرفون لو في تطعيمات تتعارض مع ادويتهم ..

والحمدلله المغرب ما نحتاج اي تطعيم.

و طبعا احتياط معاكم كمام ومعقم



ســادســاً : الطقـــس



في وقتنا كان الجو وايد حلو ومعتدل مو برد وايد ولا حاار وكان فيه اشويه امطار خفيفه في بعض المناطق واشوية برد ..

ســابعــاً : القـــــروب



مكون من : قايد بحرينية "صاحبة الشركة" - قايد مغربية محلية
عدد المسافرين : صدمة صراحه ما كنت متوقعة هالعدد
تقريبا كنا 43 شخص ومقسمين على قروبين كل قروب في باص احنا كنا من الكويت والسعودية 9 كويتيات و 11 سعودية و 1 عمانية ضايعة بينا ..
الباص الثاني 10 من البحرين 5 من الكويت 6 من السعودية..

ثـامنــاً : الأمـــان



في وايد من المناطق كانوا يحذرونا منها و الاسواق .. بس بالعموم الامان موجود في الاماكن الحيوية..

تـــاسعــــاً : التأمين



التأمين صار من الضروريات من عقب كورونا للسفر لاتهملونه قبل كورونا ما كنا نهتم له وايد لكن الحين لا يفضل يكون معاكم لاسمح الله لاي طارئ..

والحين عقب ما خلصنا الاشياء المهمة نبدي العد التنازلي للاستعدادت

تم دفع رسوم الرحلة

650 دينار كويتي ( شاملة : السكن في 4 مناطق - التنقلات - دخول المرافق والانشطة - وجبات يومية وسناكات - الاكراميات)
يتبع

تاريخ الرحلة : 20 نوفمبر إلى 2 ديسمبر 2023 - 13 يوم ب 12 ليلة ..

التاريخ الاساسي مع القروب
اما تاريخ حجزي كان من 19 نوفمبر إلى 3 ديسمبر



تاريخ 19/11/2023 تم التوجه الى مطار الكويت الدولي استعداد للسفر والاقلاع الساعه 4 الفير لان طيارتنا الساعه 6 ص

وصلنا المطار ووقت سفرتنا فاااضي لان مو موسم سفر احب هالمواسم للسفر



الكاونترات فاضية على كيف كيفكم



رحنا سوينا ابقريد على البزنس لقينا السعر فرصة
السعر للشخص 80 دينار



عقب الابقريد خذينا البوردنغ وودعنا ابوي الله يحفظة مع التوصيات المعهودة
ودخلنا على سوق الحرة ..



شاشة البوابات



وهذي بوابتنا





توكلنا على الله



بدا يشق النور



كراسي البزنس















فيديو من الاقلاع

لله أكبر الله أكبر الله أكبر، 〈سُبْحَانَ الَّذِي سَخَّرَ لَنَا هَذَا وَمَا كُنَّا لَهُ مُقْرِنِينَ وَإِنَّا إِلَى رَبِّنَا لَمُنقَلِبُونَ 〉 ".
اللّهمّ إنّا نسألُكَ في سَفَرِنَا هذَا البِرّ والتّقْوَى، ومِن العَمَلِ مَاتَرْضَى، اللّهمّ هَوِّنْ عَلَيْنَا سَفَرِنَا هذَا وَاطْوِ عَنَّا بُعْدَه، اللَّهُمَّ أَنْتَ الصَّاحِبُ فِي السَّفَرِ، وَالْخَلِيفَةُ فِي الأَهْلِ، اللَّهُمَّ إِنِّي أَعُوذُ بِكَ مِنْ وَعَثَاءِ السَّفَرِ وَكَآبَةِ الْمَنْظَر وَسُوءِ الْمُنْقَلَبِ فِي الْمَالِ وَالأَهْلِ"








وصلنا للريوق

المنيو


رفيق السفر



وصل الريوق







جنطة النظافة







سناك قبل وصولنا لكازا





وبعد مدة 6 ساعات
بينت ارض الحضارة والتاريخ المغرب







فيديو من فوق كازا



وصلنا بالسلامة مطار محمد الخامس الدولي
اليوم الاحد
اليوم الاول 2023/11/19





و اول موقف اصادفه في المغرب
على كثر ما كنت اسمع ان موظفين المطار يطلبون هدايا وبخشيش خفت وقلت حق اختي احتمال يأخرونا على هالموضوع سكتي وسوي روحج مو فاهمة ..
للأسف كانوا رياييل قبلنا راحوا للموظف و طولوا معاه وما ختم جوازهم الا لما طلعوا له مبلغ عقب ختم على الجوزات و طوفهم .. مع انهم كبار في العمر..
اهني قلت الله يستر لا يطلب منا .. طبعا وصل دورنا بدا الموظف يتغشمر معانا واختي ساكته مو منتبه وانا ناطرته يختم الجوازات طول معانا ويسألني انتي من وين ؟؟ يعني هذا سؤال ينسأل شنو الجواز اللي في ايدك ؟؟ قلت من الكويت ..
جان يقول والله شكلج مغربية ؟
قلت لي الشرف أكون مغربية ..
يشوف اختي ويقول هذي اختك ؟؟
قلت أي نعم أختي .. وانا في قلبي اقول اللهم طولج يا روح .. و ادري اختي ما فيها صبر وتعصب بسرعه فقلت ان شاء الله اتطول بالها ..
واخر سؤال قال ليش زايرين المغرب ؟؟ قلت سياحة ..
قال أهلا بيكم ..
واخيرا طفنا وارتحنا عقب لطافة دمك يا بو دم خفيف ..



ورحنا ناخذ جناطنا وشفت مكاتب تأجير السيارات







خذينا الجناط ورحنا نحط خطوط تلفونات



من شركة اورنج نسيت جم سعره بس اعتقد 150 درهم

طلعنا من المطار ناطرين السايق ياخذنا احنا اللي واصلين من الكويت عددنا 8 نفس الرحلة ..





وركبنا باصنا الى فندق الاقامة



صور من الطريج











وصلنا سنتر الدار البيضاء كازابلانكا





المدينة العتيجة

من ورا السور والبوابة



هذا البرج واحد من مداخلها





وصلنا فندقنا ماريوت







وندخل الغرفة

الحمام عزكم الله















نستكشف الفندق

















عقب ما ريحنا اشوي وعندنا وقت طويل قلت حق نطلع نتمشى..
لان احنا واصلين قبل موعد القروب استغلينا الوقت قلنا نتعرف على كازا..
امون ما قصرت عطتني رقم سواق في المغرب متعاملين معاه بنات اتعرفهم ..
اسمة نعيم .. كلمته واتفقت معاه على نص يوم بسعر تقريبا 500 درهم ..

وصلني عمر من شركة نعيم وايد محترم وخلوق وخدوم ..

وطلعنا معاه





ورحنا اول مكان ناكل فيه beach mama











قلنا بنقعد برا المكان وااايد حلو على المحيط

المنيوو





المكان والجو كل شي حلوو









قعدات فوق



الضيافة
احلى زيتون مغربي
صراحة زيتونهم خيال طول السفرة وأنا اكل زيتون



كلاماري وكبة سمج













ربيان









حسابنا
الحمدلله على النعمة



كل شي كان ممتاز في المطعم
الخدمة - الاكل - الجو العام

وعقب طلعنا ورحنا البلاج صوب مسيد الحسن الثاني





أكبر مسيد في المغرب



نزلنا كنا بندخل بس قاالو الزيارة الظهر والحين بس نقدر ندخل وقت الصلاة

تحفه معمارية



زحممممة ما شاء الله لان يوم اجازتهم



الساعة الذهبية









وبعدين رحنا المارينا



المكان وايد حلوو على البحر و فيه مول







الاجواء خيال















هذا مارينا مول















هذا الليزر اللي طالع من المئذنة بإتجاه مكه شرفها الله









انتهى يومنا الأول على خير ورجعنا الفندق ليوم يديد ان شاء الله في ربوع المغرب العزيز

يا سلام تقرير جديد من الرحالة أبرار
عن المغرب الحبيب

فكرة جمبلة السفر مع قروب
السعوديات والكويتيات مسيطرين بقوة


أعجبتني المارينا وأجوائها الجميلة
كذلك اختيار موفق للسكن

يبدو أنا مع تقرير رائع
من الطراز الأول

ذكرتني البداية بـ العربي الصديق من المغرب
ونهاش فتى الجبل وأبو عدنان
الله يرحم ميتهم وحيهم