بسم الله والصلاة والسلام على رسول الله :‏
بحمد الله انهيت السفرة الى الشمال الايطالي وكانت موفقه بحمد الله ، وهذي بعض النقاط ورد الجميل لهذا المنتدى الرائع .‏
كانت الرحلة عائلية انا وام العيال واربعة ابناء الله يحفظهم ويصلحهم . والرحلة من الرياض الى ميلان عبر طيران ويز بتاريخ ‏‏1/7/2024 ولمدة 12 يوم .‏
أهم نقطة في السفر التجهيز المبكر جدا للسفر حجز الطيران والفنادق وموعد للشنقن مبكر جدا ليش تحجر على نفسك وتضغط عمرك ‏، واقصد بالمبكر يعني ممكن تحجز رحلتك قبل اربعة اشهر او خمسة اشهر من الرحلة وكذلك الفنادق وبتشوف السعة والخيارات ‏الكثير وكل ما تأخرت قلت الخيارات ودفعت اكثر في الغالب .‏

سمعت كثير من ينتقد طيران ويز وتخوفت حقيقه احجز او لا ولكن كانت الاسعار جدا مغريه وفارقه عن غيرها خاصة اذا كان العدد ‏لستة ركاب غير لما تكون لراكب او راكبين لذلك توكلت على الله وحجزت ذهاب وعودة تقريبا كان السعر ما يقار ثمانية آلاف ريال ‏رحلة مباشرة الى ميلان . علما انه لكل راكب حقيبة 20 كيلو .‏
وبحمد الله ما واجهت أي مشكلة فيها ولابد من متابعة البريد الالكتروني لأنهم يرسلون لك رساله لو فيه تقديم او تأخير فطياراتنا ‏تأخرت في الذهاب نصف ساعه وارسلو قبل الرحلة بكم يوم بوجود تأخير نصف ساعه فقط .‏
المقاعد مقبوله ومريحه ليست ضيقه مثل بعض الخطوط وايضا ليست واسعة مثل السعودية او الاماراتية ولكنها مقبوله خاصة اذا ‏علمت ان الرحلة مباشرة . ولا يوجد فيها شاشات ولا شحن للجوال ولكن مع الجوالات والايبادات ما عاد تحتاج كثير لشاشات الطيارة ‏‏.‏
موقعهم فيه مميزات كثيره والي تحتاجه خذه والي ما تحتاجه اتركه مثل تسجيل الدخول بالموقع زين واختيار المقاعد وبعض ‏الحاجات ما اشوف لها حاجه مثل الطابور السريع ما راح تحتاجه اطلاقا .‏
ملاحظة بالنسبة للشواحن المتنقلة (باور بانك) تقدر تاخذه معك بالطياره لكن ما يسمح انك تركبه مع العفش .‏

حجوزات الفنادق عن طريق بوكنق .‏
الشنقن انا عملته بنفسي بدون مكتب ومثل ما ذكرت سابقا لابد من حجز مبكر خاصة الايطالية ومتطلباتهم سهله ويبي لك وقت ‏تجهزها وكل متطلباتهم موجوده في الموقع والي يميزهم ان موقعهم في مول لوكلايزر وليس في ام الحمام مع بقية السفارات .وكذلك ‏يمكنك تعبئة الابلكيشن عن طريق الموقع ثم طباعته وهذي الميزة ما تكرر نفس المعلومات للاسرة فقط تغير الاسم وبعض المعلومات ‏مثل رقم الجواز وغيره اما بقية المعلومات مثل السكن وتاريخ السفر والميلاد وغيرها كلها نفس الشي فيختصر عليك وقت . وموقعهم ‏فيه كل الشروط وواضحه . ويعيب كل السفارات انه مازال التقديم يدوي كل شي تصوره وترفقه لهم مافيه الكتروني ابد .‏

وطلعت الفيزا خلال اسبوع او اقل لمدة خمس سنوات ، علما انه اذا انتم عائلة فالموقع ما يقبل الموعد الا لخمسة فقط فليزمك موعدين ‏‏.‏
‏ ‏

شرائح الاتصال اخذت ثلاثة انواع :‏
ياقوت من زين نت مفتوح واستقبال مكالمات مفتوح لكن الاتصال استقبال فقط بدون اتصال ب 300 ريال لمدة 14 يوم .‏
Stc ‎‏ ‏ انترنت لا محدود (يخضع للاستخدام العادل 5 جيجا في اليوم وتصبح السرعة بعد تجاوز الحد اليومي 512 كيلوبت في ‏الثانية) ‏‎ ‎‏250‏‎ ‎دقيقة اتصال واستقبال لا محدود ولمدة 10 ايام بسعر 460 ريال .‏
شريحة الكترونية ‏esim ‎‏ من تطبيق ‏airalo ‎‏ اسعارهم زينه وجودتهم زينه لكن ماشفت عندهم نت مفتوح لكن سعرهم زين ولازم ‏يكون جوالك يدعم هذا النوع من الشرائح .‏

افضلهم بلا منازع ‏stc ‎‏ لكن غاليه ومدتها قصيره وياقوت ممتازه وان كان بعض الاحيان تضعف او تنقطع لكن مدتها زينه ونت ‏مفتوح وairalo ‎‏ ممتازه لكن لازم تشيك على كمية البيانات الباقية واذا احتجت تشحنها زيادة .‏

البطاقة المستعملة سفر بلس من الراجحي ممتازه وفيها عملات تشحنها باليورو وريح راس وتقدر تدخل اللاونج بالمطار فيها ممتازه ‏خاصة اذا انت اخذتها بالعرض المجاني .‏

بالنسبة لموضوع ايجار السياره فهو موضوع طويل راح اختصره لكم بما يفيد :‏
اهم نقطه احجز من المكاتب المعتمده المعروفه وابعد عن الوسيط يعني بحثت مثلا في سكاي سكنر او بوكنق او رنال كار او غيرهم ‏ولقيت سعر سياره مناسب شف اسم الشركه وادخل موقعهم واحجز منهم مباشره ولو زاد السعر . ليش هذا الكلام ؟!!‏

انا حجزت سياره من كاي سكنر عن طريق موقع ‏Carla ‎‏ وهذا الموقع هو وسيط لمكت آخر وبما ان عددنا 6 افراد فلابد من سياره 7 ‏مقاعد فحجزت ومكتوب في العقد سيارة بسبعة مقاعد مثل الصورة او شبيهه لها . ولما وصلت للمكتب قالو هذا السعر لسياره 5 مقاعد ‏وليت لبسعه قلت العقد مكتوب سبعه قالو خطأ من الوسيط راجع الوسيط .وممكن تاخذ سيارة من عندنا لكن كان السعر جدا مرتفع ‏اعطوني سعر سياره 7 مقاعد لستعة ايام ما يقارب العشرة آلاف ريال طبعا رفضت والمشكلة لو تاخذ سيارة 5 مقاعد وانتم 6 اشخاص ‏مخالفتها كبيرة فأخذت جولة بين المكاتب وفعلا الاسعار مرتفعه جدا ، لقيت شخص مغربي قال انا اوفر لك سياره بسعر مناسب وفعلا ‏سعره كان جيد لكن ما احب التعامل مع الافراد ولكن مضطر واشترط عليه ان يكون العقد عن طريق مكتب رسمي مثل يورب كار ‏فوافق وان يكون اغلب الدفع كاش وادفع ببطاقة شحن فوافق وذهبت ليورب كار وفعلا لقيت سياره جيب بيجو سبع مقاعد مع تأمين ‏شامل وكيلوات مفتوحه وديزل ومقعد اطفال كل هذا بسعر ما يقارب 5800 فتوكلت على الله واستلمتها وخلصت الرحلة ورجعتها ‏ولا حصل أي مشكلة . طيب كيف يقدر هو يجيب هذا السعر لانه له خصم تقريبا 30% وهو يستفيد من المكتب عمولة فربي ارزقني ‏وارزق مني والحمد لله حلينا المشكلة . ولو كان مسموح بالموقع كان كتبت رقمه .‏

صراحة تغيرت نظرتي للبيجو سيارة حلوه .‏
طبعا من الأشياء المهمة اذا طلع لك في الشاشة تعبئة السائل ‏ad blue ‎فلابد من تعبئة السائل في المكان المخصص حتى لا تقف عليك ‏السيارة قيمته 40 يورو وتسترجع قيمته من المطار .‏
احتياطا لابد من اخذ الرخصة السعوديه وهي اهم من الدولية ولكن خذ الثنتين معاك راس مالها الدولية 70 ريال لمدة سنه .‏

القيادة عندهم خاصة خارج ميلان متعه وسهله جدا ومتقيدين بالنظام جدا صراحه تستمتع وانت تسوق السيارة ولابد من معرفة كيف ‏توقف بالشوارع وكيف تلف سيار احيانا لها علامات تلقاها في اليوتيوب بكثره وهي سهله جدا وبما انك سقت هنا تبي تسوق بأي ‏مكان في العالم .‏

راح اتكلم عن الرحلة باختصار :‏
وصلنا الساعه وحده ليلا طبعا مافيه مكاتب تأجير فاتحه الآن فحجزت في النوفوتيل يبعد عن المطار 7 دقائق ولما وصلت كلمتهم ‏وارسلو لنا باص وشالنا بقيمة 25 يويور .‏
جلست اول يومين فيه اول يوم استلمت السياره ثم رحت لبحيرة كومو جميلة وتستحق الزيارة اذا قريبه منك وتغني عنها جاردا . ‏
ثاني يوم رحت ملاهي جاردا حجزت تذاكر من موقعهم وكانت جميلة جدا وانصح من معه اطفال بزيارتها ولا يحتاج تذاكر دخول ‏سريع ما كان فيه زحمة وكل شي تمام العاب متنوعه للكبار والصغار وتصميم جميل يفتح النفس .‏

ثالث يوم طلعت من ميلان متوجه الى البندقية وكنت متردد في زيارتها لما سمعت من الناس انها حر ولا تستاهل وروائح كريهه ‏ولكن بما اني وصلت ايطاليا قلت نشوفه وهي تجربه مره في العمر والحمد لله اني زرتها كان الجو لطيف مافيه حر وكانت تجربه ‏ممتازه والعائلة تشوف حياة جديدة مدينه قايمة على القوارب شي حلو وتجربه لا تنسى سكنت فيها يوم في شقه حلوه وموقعها زين ‏واغلب فنادق البندقية غاليه فكان سعر الشقه 1600 في اليوم لكنها كبيره وشرحه وفيها مطبخ صغير ومتكاملة ليست فخمه لكن ‏نظيفه وزينه .اسمها ‏‎(ca` d`oro suite)‎‏ .‏





رابع يوم توجهت للشمال الايطالي وتحيرت كثيرا في السكن اكثر الناس يمدح اورتاسي او بولزانو وفعلا كلها زينه لكن الاسعار ‏مرتفعه فبحثت بينهن وحجزت في هذا الفندق ‏‎(huberhof app golden delicious)‎في منطقة بريكسن يبعد عن اورتاسي نصف ‏ساعه وعن بولزانو نصف ساعه وهذا كوخ مقسم اربع شقق داخل مزرعه تديره امراة كبيرة سن خلوقه جدا جدا جدا وتعاملها جدا ‏ممتاز اخذت اربعة ايام بسعر 4700 ريال يحتوي على غرفتين نوم وصاله جميلة ومطبخ صغير وبلكونه تفتح النفس وحديقه خلفيه ‏فيها العاب للاطفال وتوفر لكم العاب خشبية للاطفال وسياكل وكل ما تريد .‏
وراح اذكر مميزات وعيوب السكن فيه وهذي صور له :‏
مميزاته سعره مناسب ‏
نظيف جدا ‏
اطلاله خيالية
مرفقاته متكاملة ومناسبه للعائلة والاطفال ‏
قريب من البقالات لكن لازم سياره ‏
عيوبه :‏
اذا وصلت لمنطقته لازم تمشي بالسياره للجبل 6 دقائق تقريبا طبعا مافيها أي مشكلة لكن اول مره تحس انه بعيد لكن اذا تعودت ‏عادي جدا ، اول يوم قد ما يرتاحون الاهل لانه داخل مزرعه لكن ثاني وثالث يوم قالو نبي نمدد فيه لانه ممتع جدا واحيان ما تبغى ‏تطلع منه لان الاولاد انبسطوا فيها حديقة والعاب وممكن تتمشى على رجولك قريب منه فيه مزرعة بقر و ارض خضراء طبيعية .‏











هل انصح بالسكن فيه ؟ نعم انصح
اول يوم وصلت للسكن نزلت اغراضي ورحت الى اورتاسي حلوه وجميله قرية صغيره جدا ‏
ثاني يوم توجهت لسان كاندينيو تلفريك وزحليقه صيفية وقبل وقريب منها مصنع لواكر وهو في النمسا وما كان معاي ستكر النمسا ‏لكن دخلت لان المسافة قريبه زرنا المصنع طبعا المتجر فقط ولا دخلت المعمل لاني سبق دخلت في سفرات سابقه مصنع ثاني ‏فأكتفيت بالمتجر تبعهم والكفي والايسكريم ، تجربه حلوه خاصة انه قريب من الزحليقة فرق ممكن عشر دقائق وبعد المصنع رحت ‏للتلفريك وكان من اجمل التجارب وانصح الجميع بتجربته والنزول بالزحليقه .‏
المنطقه جميله وفوق الجبل مناظر ما تمل منها والعاب للاطفال وجلسة تأمل راح تقضي فيها وقت طويل وومتع جدا .‏





وبعد ما خلصلنا وفي طريق العوده مريت على بحيرة برايس جلسنا فيها ساعه وكان الجو فيها بارد وهواء لطيف بحيره جميله ‏وانصح بزيارتها خاصة اذا فيه وقت وهي على دربك .‏




ومن الاماكن الي زرتها في الشمال بولزانو ‏
ويوم رحت الى ريفا ديل قاردا وكانت مميزة جدا جدا وكنت اتمنى اني سكنت فيها بحيرة جاردا مميزة جدا في ايطاليا.‏
وبعد ما خلصنا من الشمال الايطالي رجعت الى ميلان وفي طريق العوده مرينا على حديقة حيوانات سفاري (‏parco natura viva‏) ‏ولا انصح ابدا بزيارتها ولو كانت بطريقك بسبب سعرها المرتفع وايضا مافيه حيوانات تسوى يعني ما راح تشوف الا كم غزال ‏يمشي وممنوع انك تطعمها وتنبسط معها فقط تناظرها واما الاسد والنمر يمكن تشوفه من بعيد وبينك وبينه حواجز يعني مافيها فكرة ‏سفاري مثل بعض الحدائق ان الحيوانات تمر عندك بالسياره مثل الي في المانيا فلا احد يزورها نصيحة وانت حر .‏

ولما وصلت ميلان اخذت من شقق ‏b b hotel‏ شقق سلسلة شقق فندقية في ميلان في اكثر من موقع شقق نظيفة وتبعد عن الدومو ‏تقريبا 13 دقيقة بالسيارة انصح فيها سعرها مناسب ونظيفه وفيها مطبخ صغير ومناسبة للعائلة .‏

من بكرا ذهبت الى مول قريب من الفندق وهو ‏merlata bloom ‎‏ وتغدينا فيه ثم ذهبت الى اوت لت سيرفالي .‏
واخر يوم ذهبت الى الدومو بالسيارة وكنت متخوف هل اذهب بالسيارة او ارجع السياره واخذ تكسي ولكن الحمد لله اني اخذت ‏السيارة السواقه سهله والمواقف متوفره تقريبا 7 ساعات للمواقف ب 160 ريال صح غالي لكن لو بتحسبها ارخص من التكسي واريح ‏وتروح لأي مكان تبيه لذلك السياره زينه للعائلة الكبيرة والعفش الكثير .‏

من الصباح ذهبت للمطار رجعت السيارة لدى يورب كار دخلت المكتب وقلت برجع السياره ، قال لي حط المفتاح بالصندوق هنا ومع ‏السلامه فقط ، اسهل ارجاع سياره مر علي .‏
ركبنا الطيار والى الرياض والحمد لله . ‏

تقرير مختصر للرحلة ارجو انه ينفع لو بالقليل .‏