‏السلام عليكم ورحمة الله وبركاته
اليوم راح أحكي لكم تجربتي لعل وعسى اللي ناوي يقدم يستفيد.

موعدي في القنصلية الأمريكية في الظهران طبعا من الرياض ولكن ما وجدت موعد في الرياض وسفرتي لأمريكا قريبة فريت إني أسوي المقابلة في الظهران لان المواعيد كانت متاحة على عكس الرياض مافي ولا موعد متاح الأسبوع هذا.


موعدي كان ‏9:15 صباحا توجهت إلى القنصلية في الظهران وصلت 8:50 بعدين توجهت إلى شبابيك اللي موجودة على مدخل بوابة القنصلية استقبلني رجل امن يبدولي من الجنسية الهندية طلب مني نموذج ds و جواز السفر وورقة الموعد للأسف نسيت إني اطبع ورقة الموعد فأعطيته الجواز السفر مع نموذج ds160 واخبرته ان ورقة الموعد نسيتها(كنت خايف يرجعوني) … من حسن حظي كان مطبوع عنده المواعيد بأسماء وأرقام الجوازات لكن نصيحة حاول إنك تطبع ورقة الموعد حتى لاسمح الله لا يطلب منك اعادة جدوله الموعد مرة ثانية …
له بعدين عطاني زي الكرت توجت فيها إلى بوابه التفتيش تضع أجهزتك واوراقك تمر على الجهاز بعدين تأخذ الأوراق وياخذون منك مفتاح السيارة يحطوه في مغلف بلاستيكي ممنوع إنك تدخل القتصلية أي أجهزة إلكترونية جوالات حتى ساعات الذكية ممنوع الدخول فيها في الأفضل إنك تتركها في السيارة زي ما سويت مفتاح السيارة فقط اللي أخذوها وأعطوني عليه Tag دخلت إلى الصاله أول ما دخلت للصالة يتأكد من من النموذج مرة ثانية DS معاك وجواز السفر يلصق على جواز السفر زي الورقة البيضاء من ورا فيها معلومات النموذج بعدين تتوجه إلى الشبابيك اللي 11 او 12او 13 للتدقيق بعدين خلاص يعطيك رقم تنتظر دورك طبعا أنا ‏أنا كنت عند شباك رقم 11 طلب مني الجواز السفر وطلب مني نموذج DS سألني هل سبق إنك رحت أمريكا قلت نعم وسألني الصوره الشخصية اللي في النموذج هل هي جديده ومتى مصورها بعدها عطاني ورقة موعد للأرقام لللي تظهر على الشاشه طبعا الاجراء المفروض حاليا تبصيم بعدين تنتظر المقابله الشخصيه… جاء الرقم اللي قبلي بعدين فجاة بدون مقدمات تجاوز رقمي وأخذ الرقم اللي بعدي !!!!! استغربت قمت رحت للقنصل الأمريكي قلته يابو الشباب تجاوزتو رقمي. قالي راح ينادون عليك اجلس لا تشيل هم.

بعدها طلع رقمي بشباك ثاني ورحت وكانت شابه أمريكية طلبت جواز السفر والنموذج فقط

كانت تطالع الشاشه وتقول شكلك تروح امريكا كثير
بعدين سألتني وين بتروح في امريكا
كم المدة اللي بتجلسها

بعدين قالت تم الموافقة على الفيزا
سالتها ليش مابصمتوني قالت خلاص أخذناها من الفيزا القديمه.

وطلعت من السفاره ومسكت خط الرياض وتوني واصل بالسلامه