وعليكم السلام ورحمة الله وبركاته,
ماشاء الله عليك مخطط للاجازة من قبل 6 شهور, هذا الشغل الصح, مو مثلنا نرتب قبلها بكم اسبوع, خبط لزق!! 
سوالك جميل و سهل, لكن الاجابة طويلة جداً. ماشاء الله الاعضاء ذكروا شغلات كثيرة مهمة لازم تنتبهلها, انا بذكر لك تجاربي للسفر.
نبدأ بالاساسيات - البنية التحتية للسفر:
التاشيرة:
تاكد من تاريخ بداية وانتهاء التاشيرة الامريكية, ليس الكل ياخذو نفس المدة.
البطاقات الائتمانية:
التنويع مطلوب بين بطاقات الائتمان (الكريديت) و بطاقات الشحن (الديبيت).
يفضل البطاقة المطبوعة (البلاستيك) ولا تعتمد كثير على وسائل الدفع الالكترونية (ابل باي, سامسونج باي, ولا حتى المحافظ الالكترونية).
حاول تنوع (حسب الامكان) بين بطاقة فيزا, وبطاقة ماستركارد, وبطاقة اميريكان اكسبرس.
بعض البنوك عندها منتج بطاقة السفر فيها اكثر من عملة (ريال سعودي, دولار امريكي, جنيه استرليني, درهم اماراتي, وغيرها) تحول من حسابك الجاري الى حساب العملة اللي تبي وتستخدمها.
لاني لقيت اماكن ماتقبل بطاقات الشحن (الديبيت) مثل شركات ايجار السيارات, تامين الفنادق, اماكن المواقف العامة, حتى بعض السوبرماركة الكبيرة, ماقبلوها حتى ولو كانت البطاقة مليانة فلوس.
بعض البنوك عندها منتج بطاقة استرداد نقدي (كاش باك) بنسب مئوية مختلفة, مثال اذا استخدمتها بالمطاعم و الكافيهات يجيك استرداد نقدي 10%. والسوبرماركة من 5 الى 6 % حتى بالمشتريات الدولية.
ايضا بعض البنوك عندها منتج بطاقة اميال سفر (بطاقة الفرسان التابع للخطوط السعودية, وبطاقة طيران الامارات) بعدد اميال مختلفة ومقدار صرفك بالمشتريات المحلية والدولية.
انت مسافر لامريكا بعدد 4 اشخاص يمكن توصل للمستوى الفضي, وطيرات القطرية ممكن يرقيك الى المستوى الذهبي.
صالات الانتظار بالمطار (اللاونجات):
فعل البطاقات الائتمانية مع صالات الانتظار بدل ماتقعد بالزحمة وكراسي غير مريحة (خصوصا معك عائلة) يمكن توصل المطار بدري وتدخل مرتاح كراسي وسيعة افضل من المتعبة.
مبلغ التامين:
تقريبا معظم الفنادق اللي تعاملة معاهم, وشركات ايجار السيارات تطلب تامين (مسترجع) فقط من بطاقة ائتمانية, وترفض العملية اذا استخدمت بطاقات الشحن (الديبيت), مثل ماذكرت, حتى ولو كانت البطاقة مليانة فلوس.
لان مبلغ التامين محجوز من رصيد البطاقة الائتمانية اللي انت معتمد عليها بمصروفك اليومي.
وللامانة الفنادق اللي تعاملة معاهم ذكرو ان المبلغ بيرجع من يومين الى اسبوع, ولكن جاتني رسالة البنك (عملية مسترجعة) بمبلغ التامين وانا واقف عند الاستفبال اسوي خروح من القندق.
حجز الفنادق والسيارات:
مواقع حجز الفنادق والسيارات كثير, يفضل استخدام مواقع معروفة تعطيك كاش باك, او بونص, او نقاط, او ترفيع لفئة العميل, تجمعها وتستفيد منها بحجز اخر.
عضوية المولات و الاوتليت:
كثير من المولات والاوتليت خصوصا بامريكا تعطيك تخفيض زيادة لانك عضو او مسجل بموقعهم الالكتروني. فقط تعطيهم الايميل اللي مسجل بيه وبيطلع عند الكاشير نسبة الخصم.
الحين ندخل بالموضوع:
انت بتقلع من الرياض (اذا كانت رحلتك مباشرة على الخطوط السعودية), مدة الرحلة من مطارات السعودية (الرياض او جدة) الى نيويورك او واشنطن تقريبا 14 ساعة. و مدة الرحلة الى لوس انجليس تقريبا 16 ساعة. اضف عليها يومين (الجيت لاق) حتى مخك يركد ويعرف مكانه. 
ومثل ماذكرو الاخوان والاخوات ان امريكا قارة من الصعب تجمع بين الشرق والغرب في رحلة واحدة. انا سافرت من واشنطن (الغرب) الى لوس انجليس (بالشرق) 6 ساعات, لذلك يجب عليك تحديد الوجهه المناسبة بما يناسب عدد الايام.
انا افضل رحلة تكون بين المدن في الشمال الغربي الى المدن في الجنوب الغربي.
ورحلة اخرى منفصلة تكون بين المدن في الوسط الى المدن في الجنوب الشرقي.
انا افضل يكون اخر يوم (يوم المغادرة - العودة) يكون من مدينة فيها رحلة مباشرة (ليست ترانزيت من مطارات امريكا) والمدينة يكون فيها مولات, واوتليت علشان تاخذ راحتك بالتسوق, وماتتعب بالترانزيت بين رحلات داخل امريكا.
الجو بنيويورك و لوس انجليس حار مثل صيف الرياض و رطب مثل صيف الدمام. اعمل حسابك لوقت الخروج بالنهار علشان ماتنسلخ من الحرارة.
الجو في اورلاندو اوقات يكون امطار شديدة و تتوقف المدن الترفيهية.
بالنسبة لسوالك عن ميامي تستحق الزياره للعايلة فهي 50/50, انا اقول اذا كنت في اورلاندو ورحلتك العودة من اولااندو او ميامي مايمنع تروح لها, ولكن احرص على اختيار الاماكن المناسبة للعايلة.
مدينة نيويورك حلوة وفيها اماكن تمشية ,وسياحة, واماكن تسوق.
مدينة اورلاندو, الوجهة الجميلة للعايلة, فيها مدن العاب كثيرة وكبيرة جدا مثل:
شركة ديزني فيها مدن العاب (ماجيك كينقدوم) الاساسي والاكبر, و (ايبكوت) فيها العاب الكترونية كثير, و (مملكة الحيوانات) نسخة من حدايق السفاري, و (هوليوود ستوديو) اكثرها عن تصوير الافلام, 
و(ديزني سبلاش) العاب مائية. 
شركة يونيفيرسال فيها مدن العاب (يونيفيرسال ستوديو) اكثرها عن تصوير الافلام, و (يونيفيرسال ادفينشر) مغامرات واكشن.
شركة دولفين مدينة العاب مائية. 
وفي اورلاندو اماكن العاب كثيرة, ولكن الكبيرة فقط اللي ذكرتها.
اعمل حسابك لعدد الايام اللي بتقضيها في اورلاندو بين مدن العاب ديزني و يونيفيرسال. الافضل تنوع بين مدن العاب الاستوديو والالعاب المائية والسفاري اذا تحب, شكل شوية من هنا وشوية من هنا. مايحتاج تروح لها كلها, لان فيها متشابهات كثيرة.
مركز كينيدي للفضاء يبعد عن اورلاندو تقريبا ساعتين مع الزحمة.
ايضا اورلاندو فيها 3 اوتليت كبيرة (يمكن تغنيك عن التسوق من نيويورك) مثل انتيرناشيونال بريمير, و فنلاند.
ابضا مراكز تسوق مثل وول مارت, بيست باي, لكن مانصح بمركز كوستكو (بيع بالجملة) لان نظامهم لازم تكون عندك عضوية علشان تدخل ولازم تكون مقيم بامريكا وليس سائح.
تقدر تخصص يوم بالبارك, واليوم اللي بعده بالمول او الاوتليت, لان البارك جدا كبير ومتعب.
السكن باورلاندو يفضل شقة عائلية, او فيلا, او غرفتين مفتوحه على بعض.
الصيف موسم الاجازات في امريكا و دول كثيرة والتذاكر غالية.
اذا سكنت بمنطقة والت دزني, فيها فنادق كثيرة, الكثير من الفنادق عندها باصات ترددية من الفندق الى مدن العاب (دزني فقط), والى (دزني سبرينق) مثل الرياض بوليفارد وورلد. وتقدر تروح يونيفيرسال سيتي ووك (تابع لشركة يونيفيرسال موقعه في مدينة العاب يونيفيرسال ادفينشر تقدر تجمعهم بنفس اليوم).
الافضل تحجز تذاكر المدن الترقيهية اذا وصلت, تحسبا للاحوال الجوية, (حجز أونلاين بعض المرات مفيد) حسب العروض الموجودة بموقعهم. اذكر كانة مسووين عرض 50% بمناسبة 4 جولاي فقط اون لاين.
ايضا مسوين عرض تاخذ تذكرتين حق مكانين بسعر مخفض (هووبر تيكت).
انا سكنت بمنطقة كيسيمي, منطقة واسعة وفيها منتجعات و فنادق و اماكن تسوق ومطاعم عربية كثيرة ومتنوعة, ومكاتب ايجار السيارات داخل الفندق.
مدينة ميامي, اذا كانت رحلة العودة من ميامي (الخطوط القطرية او الاماراتية) احرص على اختيار الاماكن المناسبة للعايلة, فيها مثل الشاطي الجنوبي و الشاطي الشمالي.
انا سكنت بمنطقة دورال مقابل دولفين مول كبير ويستاهل, وقريب من المطار وبعيد عن صخب شواطي ميامي.
مدينة لوس انجلوس, كثير من الشباب يمدحها, بالنسبة لي لم تعد كسابق عهدها, لكن ممكن تروح وتستكشف خصوصا اماكن التسوق مثل شارع المشاهير (ستريت اوف فايم), والشارع الثالث (ثيرد ستريت). والاماكن السياحية مثل شاطي فينيس, وشاطي سانتامونيكا, وايضا مدينة العاب يونيفرسال, ومدينة العاب ديزني (في منطقة انهايم) شوي بعيدة.
المعذرة اذا نسيت شي
على فكرة انا كتبت موضوع عن زيارتي الاخيرة لامريكا (الرابط بالتوقيع) ولا زال باقي اجزاء بتعرض ان شاء الله
37الاعجاب
21-12-2024, 06:08 PM
العرض العادي
المواضيع المتشابهه 
