باليوم الاول شفنا سيدات كبار يسوون اطواق ورد باشكال جدا جميلة والوان حلوة اشترينا منهم


اليوم الثاني 21 مايو
صحيت بدري كالعادة ونزلت افطر بالبيسمنت ماكان في احد غيري الفندق هادئ وصغير تحس انك ببيتك
بعدها تجهزنا ونزلنا الجو كان بارد ذاك اليوم



واحنا ماشيين حجزنا مع مكتب سياحي رحلة الى كازبجي فيها كدا محطة السعر مااذكر صراحة بس ماتوقع اكثر من 300 ل3 اشخاص


بعد ماحجزنا طلعنا التلفريك يعني تقريبا مشينا ربع ساعة ووصلنا التلفريك الاوتيل مرة كان قريب من دي المنطقة
3 اشخاص ب17 لاري
روحة ورجعة



محسوبتكم تخاف من الاماكن العالية بس لازم الواحد يجرب بالسفر
ووصلنا للجهة الثانية اللي فيها تمثال ام الجورجيين كان في اكشاك تبيع اكسسوارات ستيكرات تذكارات اشياء مطبوع عليها معالم جورجيا بس اسعارها شفتها غالية بالنسبة لاشياء من دا النوع
وطبعا في ناس تعزف بالمكان









ووصلنا للتمثال نصوره هنا احب اشكر اعضاء المنتدى اللي سبقوني لجورجيا استفدت من كل معلومة منكم انا وصديقتي اللي تعرفت عليها بالطيارة
كنت امشي وكأني جيت الاماكن دي قبل واقول للبنات دحين بنشوف كدا ونلقى كدا





والاطلالة كانت جدا جميلة جلسنا نمشي شوية ونصور شوية
وبعدها طلعنا التلفريك عشان نرجع وطبعا كنت قارية التحذيرات من بعض الاعضاء انه في ناس تعرض حيوانات وبيطلبوك فلوس ( مذاكرة كويس ) طبعا نبهت البنات ومشينا رحنا للملاهي نسيت اسمه بس كان بعيد ومادفعنا كثير بتطبيق بولت






لمن وصلنا الجو صار حار بس لعبنا والملاهي كبير بس حسيت العاب الاطفال كانت فيه اكثر من الكبار
بس عموما مرتب وكل جهة تلقى كشك فيه مالذ وطاب
بعد ماخلصنا لعب رحنا لمول برضو نسيت اسمه مدري على ايش منزلة تقرير

البنات اشترو لبس ثقيل لانه ناويين رحلة لجبل كازبجي
واحنا خارجين مطرررر وياسلام اعشق اجواء المطر

طبعا جعنا بعد اللي سويناه اليوم وقتها رسلت لي صحبتي انه جربت مطعم البغدادي وطلع لذيذ ونروح انا والبنات ناكل عندهم يالله على طعامة الاكل ولذاذته ولا الموظفين هناك ايش ذوق ماشاءالله عليهم
وحطو لنا صنف ضيافة ماقصرو فعلا
طبعا اكلنا عندهم مرتين والثالثة طلبنا منهم دليفيري

بعدين رجعنا عالاوتيل وريحنا شوية

من عوايدي ماخرج بالليل بس الجو مغري والجسر 10 دقايق مشي اقول لهم نمشي مو راضيين بالنهاية صحبة اختي نزلت معايا وكان حلو الاجواء عالجسر وحول المنطقة جلسنا نكتشف كانت حلوة بالليل



وكدا انتهت فعاليات اليوم الثاني


( اكتشفت انه ماعندي غير فديوهات فلقطت كم صورة من فديو يعني الجودة مو قد كدا سامحونا )

فعاليات جميلة وترتيب حلو لليوم
توقيت رحلتكم جدا جميل
جاء وسط أجواء رائعة

برافو عليك مذاكرة كويس
عشان ما يستغلون السائح بحركات قديمة
ومشكورين اللي نزلوا تقارير سابقة هذي فايدتها

اليوم الثالث 22 مايو

صحينا بدري بس مالحقنا نفطر لان لازم نتجمع عند المكتب بدري مرة
وبعدها طلعنا باص مع قروبات واحنا جلسنا ورا

اول شي نزلونا هنا نتفرج عالمنظر دا سبحان الله جدا جميل الواقع طبعا غير






تقريبا نص ساعة ورحنا لمكان اثري لكنائس قديمة وقلاع دخلنا حق ابو 5 دقايق وطلعنا مارتحت بالمكان وانتظرنا برى نتجول بالمكان واشترينا عصيرات









تقريبا جلسنا ساعة وبعدها نزلونا بمطعم فيه دور لتذوق النبيذ
مالناش بالتذوق بس لينا بالمطعم
انا وصحبة اختي دخلنا ناكل واختي كسولة شوية جلست بالباص




طلبنا فطيرة سبانخ بالجبنة وقهوة حذرين جدا باختياراتنا بالاكل






القهوة كانت مرة لذيذة طلبت 2
مانلام اول مرة اذوق قهوة حلوة عندهم

بعد ماخلصنا قال تعالو جربو الواين قلت له مسلمين ياخي توكل بس





بعدين نزلونا عند نهر جاري وحذرونا من الاقتراب لانه خطير بس كنا نصور من بعيد

بعدها ودونا لمزرعة خيول تملكها امراة بمنتصف العمر الصراحة عجبتني ماشاءالله فارسة وغير الخيول عندها عسل تبيعه وذقنا الانواع كانت نكهات قوية وغريبة مو من النوع اللي ممكن استسيغه

وفي طريقنا للجبل كان غريب صراحة ومخيف سيارات كثيرة رايح جاي وتحس الطريق تحتك خشب ماعرف كيف اوصف بس هم طبعا متعودين والحمدلله وصلنا بالسلامة

طبعا دي فترة ذوبان الثلوج اكيد بالشتا بيكون شي خيالي





الجو كان جدا بارد بس جمييييل






جلسنا تقريبا ساعة وبعدها كان اخر محطة فيها كنيسة راهب قديم عندهم على قمة بس طبعا احنا وناس كثير ماحبو يطلعو

انا والبنات تركناهم ورحنا نلعب عند جداول صغيرة تجنن اول مرة اشوف زي كدا وكان في مطر جلسنا نستهبل ونلعب لين جا المرشد نادانا وقال يلا بنمشي


وبعدين رجعنا على طول على تبليسي

صح مو من طبعي اقارن بس هنا حابة اقارن

انا رحت تركيا مرة كثير ولمن كنا نطلع لرحلات خارج اسطنبول كان يودونا محطات مرة كثيرة وننزل محلات كثير عشان نشتري منها وكنت اشوفها مضيعة وقت وتقلل من الوقت اللي احتاجه في محطات انا حابة ازورها عكس الرحلة هنا بتبليسي الشي الوحيد اللي كان ممكن نشتري منه هو مزرعة الخيول


طبعا رجعنا من الرحلة تعبانين عالاخر وصلنا يمكن 7 المغرب وكان الجو ماطر وقتها طلبنا عشا من البغدادي دليفيري وكدا خلصنا ثالث يوم بتبليسي الجميلة

المنظر خيالي
الشركة مختارة المزارات بعناية
قمة الجبل باين باردة جدا
يا سلام على الفارسة بتاعة كله خيل وعسل
برافو عليها

باين المطعم أعجبكم كثير
من الاسم باين أنه مأكولات عراقية