السلام عليكم ورحمة الله وبركاته

مساكم الله بالخير ومبارك عليكم الشهر وكل عام وانتم بالف خير يارب .



حياكم الله بتقرير سريع وجديد ومغامرة جديدة لبلد جديد بالنسبة لي الا وهو فنلندا .. بلد الساونا والسلمون



اختيار هالبلد كان مبني على اساس عدة اعتبارات مهمة بالنسبة لي ..

الشفق القطبي
التزلج
زيارة بلد جديد

وكنت محتار جدا بين فنلندا والنرويج وبعد مقارنة سريعة من ناحية الفعاليات والاسعار بين البلدين اتضح ان فنلندا تحتوي على كثير من الفعاليات الموجودة بالنرويج اضافة لاسعار معقولة ..

كنت ما زلت محتار الصراحة .. وبالصدفة مريت على مقطع على الانستجرام لاحد الاخوات تصور مطعم يقدم السلمون بروفانيمي وكان جدا شكله شهي .. وقلت بس .. فنلندا

.........



بداية تحديد مسار الرحلة ,,

تم تحديد مسار الرحلة كالتالي ..

3 ايام في هلسنكي .

5 ايام في روفانيمي ( لانه مافي احتمالية اكيدة انك تشوف الشفق القطبي )

3 ايام في امستردام , هولندا .

كان مهم بالنسبة لي ان ما تكون اجازتي بمكان واحد وازور بلد ثاني , وكنت محتار بين اوسلو في النرويج او امستردام في هولندا .. ولان النرويج وفنلندا تقريبا نفس الطبيعة والجو فقررت اروح امستردام ..
( مارح اذكر امستردام في التقرير لان انطباعي عنها سيئ للامانة )

...

الطيران ..



تم حجز رحلة الطيران على الطيران القطري وكان مسار الرحلة كالتالي ..

الدمام - الدوحة - هلسنكي

امستردام - الدوحة - الدمام

كان سعر التذكرة كامل على الدرجة السياحية 2305 ريال ..
__

الفنادق ,,

تم حجز كامل السكن في فنلندا عن طريق AIRBNB , لان خيارات الشقق كانت جدا ممتازة هناك .. ورح اذكر تفاصيلها ضمن التقرير باذن الله

___

طرق الدفع ..

كانت اغلبها عن طريق بطاقة الفيزا العملات من بنك ساب اضافة خليت معي مبلغ كاش للطوارئ



___
الملابس والجو ..

بعد المقلب الي اكلته في امريكا كان في مراقبة مكثفة لدرجات الجرارة هناك .. وجهزت عدة ملابس محترمة من ثيرمال وغيره .. طبعا لا غنى عن المفاجات وبتكون ضمن التقرير



يتبع ..

يوم السفر وترتيبات الوصول ..




تم الوصول للمطار وكان اقلاعي من الدمام الساعة 4 الفجر .. وترانزيت في الدوحة ساعتين وشوي تقريبا ..

كان في تدقيق كثير على بوابة الطيارة على الفيزا والجواز .. مع العلم ان فيزتي فرنسية ومستعملة من قبل كم شهر في فرنسا ..




.
.
.





ممرات السعادة



من مطار الدمام وكانت مدة الرحلة من الدوحة لهلسنكي ما يقارب 7 ساعات و 40 دقيقة .


وفي حاجة ما انتبهت لها ان الطيارة من الدوحة الى هلسنكي كانت عن طريق الطيران الفنلندي وليس القطري . وكل توقعي ان الطيارة بتكون فاضية بما ان مو موسم بس سبحان الله كان فل وللاسف كان مقعدي على الممر ما قدرت اصور .. والي جنبي واضح ان كان معه صك ملكية للنافذة وضل مسكرها طول الرحلة ,,

بالنسبة للطيران الفنلندي كان جدا جيدا .. وانا اعتبره شبه اقتصادي . يعني بالنسبة لرحلة الدوحة كان في وجبات وسناكس وغيره .. اما بالنسبة للطيران الداخلي سواء في فنلندا او بين اوروبا يقلب اقتصادي .. وهي حسب تجربتي برحلة هلسنكي روفانيمي ورحلة هلسنكي امستردام



بعد الوصول بالسلامة وعند كاونتر الجوازات كان في زحمة مطولة بسبب بعض اعمال الصيانة ودار نقاش بسيط مع موظفة الجوازات الي عجزت تخفي ملامح الاستغراب لما شافت جوازي

الموظفة : ليش جاي فنلندا وليش مختار هالبلد تحديدا ؟
انا : عندي اجازة وجاي عشان اشوف الشفق القطبي .

الموظفة : ايش ناوي تساوي في هلسنكي وروفانيمي طيب ؟
انا : ذكرت عدد من الاماكن السياحية في كل منطقة .

الموظفة : معلش بس اذكرلي ليش مختار فنلندا عن غيرها من باقي الدول
انا : بكل اختصار عشان اتزلج واشوف الشفق القطبي واكل سلمون

بادرتني بابتسامة وبعد ما شافت حجوزاتي ختمت الجواز وقالت حياك بلهجتهم


اول شي حرصت عليه ان يكون معي شريحة نت واتصال وكرت مواصلات عامة .. وهذه كلها حصلتها في هالمحل داخل المطار .



واخذت هذه الباقة . ونظامها ان طالما فيها رصيد فالانترنت يكون مفتوح فيها وفيها رصيد تقريبا 7 يورو ..




وبعدها اشتريت من عندها بطاقة مواصلات عامة تشمل الترام والقطارات والباصات والعباراات داخل مدينة هلسنكي لمدة 7 ايام بقيمة 40 يورو تقريبا .





معلش انا ماسكها بالمقلوب



وهنا ننزل لمحطة القطارات ..






لفت نظري شاشة الاوبرا الي فالمطار وانت نازل للمحطة . .. من جد رواق


طبعا لما تنزلون حيكون في نقاط بيع تذاكر في حال احد ما اشتراها من مراكز البيع .



طبعا اي وسيلة مواصلات تطلع فيها بكون فيه هالجهاز .. وبتشوف نفس الاحرف الي في البطاقة والي هي المسارات .



طبعا مافي احد يراقب سواء استعملت التذكرة او لا .. وزي ما ذكر الاخ ابو غسان وكثير تذكرت هالكلمة انهم يعتمدون على امانتك على خلاف امستردام الي بكل باص او ترام في احد يراقب


الطريق من المطار للسيتي سنتر ياخذ ساعة تقريبا بالقطار ونص ساعة بالسيارة.. وخرائط جوجل ما تقصر ابدا .. توضح المحطات الي بتوقف عليها وحتى تذكر رقم المنصة الي توقف عندها عشان تركب القطار او المترو




يتبع ..

الحمد لله على السلامة
بداية جميلة وفنلندا بلد مختلف ومثير في كل شيء
الدول الاسكندنافية عموماً تشديد دايم على الفيزا
لذا لابد الواحد يتأكد أن معاه برنت لكل شيء
ويكون جاهز للاجابة على الاسئلة

الغريب أن هذا البلد ما فيه لف و دوران
مثل جميع دول اسكندنافيا
مع استثناء بعض مدن السويد

متابعين لجميع التفاصيل
و راح تكون هذي الرحلة مرجع لكثير

تم التثبيت بالمواضيع المميزة فوق