بسم الله الرحمن الرحيم
السلام عليكم ورحمه الله وبركاته

عُدنا والعودُ أحمدُ الى تقارير السفر بعد آخر سفرة لي كانت شهر 2024/7

وهذي حكايات عالمــــية أخرى تتحقق لي بزيارة الإمبراطورية اليابانية

في قصص الشعوب .. طرائف لا تنتهي
وعالم حلو بهي .. يسكن في القلوب

هُـنــــا الإمبــراطــوريـ اليــابــاني ــة







رحلة اليــابــان ..
رحلة عمل من الدوام وكملتها سياحة سهلة ما يبيلها موال الحنه على الادارة العليا والضغط عليها عشان اخذ موافقة لانها سفرة عمل.
فالحمدلله الامور سهله وماشيه مع الوالد..

بديت بالاستعدادت اللازمة قبل السفر

الرحلة مستواها : متــوسط ( اللياقة البدنية ).

اولا : الفــــــــــيزا



مواطني دول الخليج يدخلون بالفيزا ما عدا أهل الامارات معفيين..

بالنسبة لنا في الكويت تستغرق الفيزا يومين عمل بالضبط واليوم الثالث نستلمها.. ويفضل تقديمها قبل السفر بشهر..

المتطلبات للكويتيين.. للفيزا السياحية
1. تعبئة نموذج طلب التأشيرة بخط اليد أو مطبوعًا بالكمبيوتر.موقع من مقدم الطلب بخط اليد..
هذا النموذج : https://www.mofa.go.jp/files/000124525.pdf

2. صورة شخصية 1 ملتقطة خلال فترة 6 شهور لا أكثر.
خلفية بيضاء، تلصق الصورة على الزاوية اليمنى من الصفحة الأولى من نموذج طلب التأشيرة باستخدام الصمغ (وليس الدباسة).
3. شهادة الراتب أصلية، موقعة ومختومة من جهة العمل.
4. حجز الطيران رحلة الذهاب والمغادرة .
5. حجز الفندق او الفنادق في حال الإقامة بأكثر من مكان، طوال فترة التواجد باليابان بما يوافق مواعيد الطيران.
6. جواز السفرالأصلي ونسخة منه.

بعد تعبئة النموذج وتجهيز الاوراق نتصل على السفارة ناخذ موعد للتقديم على الفيزا ونروح بالوقت المحدد ونقدم الاوراق..

لحجز موعد يرجى الاتصال على الأرقام التالية:
هاتف 1 (اللغتين اليابانية والإنجليزية): <9456 2530>
هاتف 2 (اللغتين العربية والإنجليزية): <9457 2530>

دفع رسوم الفيزا بعد اصدارها واستلامها بمبلغ 6.250 د.ك كاش (نوعها اقامة قصيرة مدتها 3 أشهر دخول 1)

معلومات اكثر هذا موقع السفارة..
https://www.kw.emb-japan.go.jp/itpr_ar/00_000144.html

انا سويت كل اللي طالبينه وقدمتها يوم الثلاثاء واستلمتها الخميس.. سهالات العملية..

ثـانيـا : العمــــلات

عملة اليابان الـ ين

[/IMG]



1 دينار كويتي = 464 ين ياباني

ثـالثـا : الطـيــــــــران

[/IMG]

تم الحجز عن طريق موقع طيران الاتحاد بعد ما شيكت على الاسعار والأوقات رسيت على الاتحاد مع أني كنت محاربتها عقب سفرتي روسيا ..



https://www.etihad.com/en-kw/?utm_me...B&gclsrc=aw.ds

طيران دولي : كويت - ابوظبي - طوكيو - أوساكا - أبوظبي - كويت.

بسعر 560 د.ك للشخص ايكونومي كومفورت. تكون الكراسي اوسع عند الأرجل ..

رابــعــــــا : الفنــــادق



تم حجز كل الفنادق من موقع بوكنغ..
طوكيو 6 ايام ب 5 ليالي فندق shiba park hotel
هاكوني 3 أيام بـ ليلتين فندق suiun
كويوتو 4 أيام بــ 3 ليالي فندق rinn shiki juraku
أوساكا 5 أيام بــ 4 ليالي فندق the royal park hotel iconic osaka midosuji

نتطرق لهم تالي عند زيارة كل مدينة..

خـامســا : الصحـــــــة و التطعيمـــــــات



قبل السفر بفترة كافية عليكم التأكد من الوجهة اللي رايحين لها اذا تحتاج الى اي تطعيمات ..

- لازم مراجعة عيادة المسافرين في دولتكم او الصحه الوقائية .
- تلقي التطعيمات اللازمة قبل شهر من السفر على الاقل ليتمكن الجسم من تكوين المناعة .
-اصحاب الامراض المزمنة مراجعة دكتورهم عشان يعرفون لو في تطعيمات تتعارض مع ادويتهم ..

التطعيمات العـالميــــة :

- الحمى الصفراء ( ينصح عند السفر لهذه البلدان : وسط وغرب افريقيا - وسط و جنوب امريكا )
- الحمى الشوكية ( ينصح عند السفر لهذه البلدان : جنوب الصحراء الكبرى الافريقية )
- الالتهاب الكبدي (ب) ( ينصح عند السفر لهذه البلدان : امريكا الجنوبية و بعض الاجزاء من افريقيا و اسيا و شرق اوروبا )
- التهاب الدماغ الياباني
- التهاب الدماغ المنقولة عبر القراد
- التيفود (ينصح عند السفر لهذه البلدان : بعض جنوب شرق اسيا - امريكا الجنوبية و الوسطى - وبعض افريقيا )
- داء الكلب
- الملاريا ( ينصح عند السفر لهذه البلدان : المناطق الواسعة بأفريقيا و غرب افريقيا جنوب شرق اسيا - شرق اوروبا - الباسفيك - وسط وجنوب امريكا - الشرق الاوسط - امريكا اللاتينية )

الخط الساخن لسكان الكويت ألو صحة 151

والحمدلله اليابان ما نحتاج لها تطعيم..

احتياط معاكم المعقم والكمام لأن كثافة سكان عالية و بتشوفون الشعب يلبس الكمام في بعض الأماكن .. مو إلزامي بس يخافون على صحتهم..

[/IMG]

بما ان زيارتنا الى شرق اسيا (إمبراطورية اليابان) يعني في بعض الاماكن بتكون بين حدايق والغابات والزرع والجبال محتاجين ندهن جسمنا بسبري وكريم الوقاية من الحشرات و اي كائنات تنقل الامراض.

[/IMG]

ســادســاً : الطقـــس

[/IMG]

في وقتنا المفروض الجو ربيع وحلو وهذا اللي ابلغونا فيه قبل السفر لكن الصدمة بعد الوصول شنو كان الجو
كان الجو وايد وايد بارد ومطر وقبل زيارتنا بأسبوع يقولون كان الجو حار ومشغلين التكييف ..

ســابعــاً : القـــــروب

[/IMG]

مكون من : محدثتكم وأختها..

ثـامنــاً : الأمـــان



أمـــان أمـــان أمــان أول مره امشي في ديرة جذي بهذا الأمان.. الله يتمم عليهم..

والحين عقب ما خلصنا الاشياء المهمة نبدي العد التنازلي للاستعدادت

تم دفع رسوم الرحلة

1,567 دينار كويتي ( شاملة : السكن في 4 مناطق - الأنشطة - - الطيران الدولي )

هذا موقع اجراءات دخول اليابان قبل الوصول والافصاح للجمارك.. افضل اتسونه بدل ما تعبون الأوراق .. احنا عبينا ما كنت ادري عن الموقع وايد منن المسافرين معانا مسجلين بالموقع ويوصلهم ال qr وبعدها امورهم تمشي بالمطار..

https://services.digital.go.jp/en/vi...pan-web/guide/

التطبيقات اللي استخدمتها

go عجيب حق التكاسي بدل أوبر و أرخص تطبيق ياباني



الترجمة ممتاز translate



لحجز الانشطة والفعاليات والمواصلات قطار او سيارة وسايق klook



suica سويكا البطل والعجييييب من احلى التطبيقات للمواصلات العامة ترام مترو اندرقراوند محلات بقالات كل مكان تقريباا يمشي ..



تنزلونه وتضيفونه في المحفظة في تلفونكم wallet وتعبونه رصيد المبلغ الي تبونه وتستخدمونه ممتاز ضروري يكون عندكم..

تطبيق مطاعم الحلال ممتاز بعد وينفع وايد



japan travel لحجز القطارات حلو بس كلوك اسهل في الحجز.. والمكاين بالمحطة بعد سهلين



البطل قوقل ماب يعطيكم بالتفصيل الممل الطريج اقرب محطة و أي قطار تاخذون و أي خط وجم محطة يوقف و أي مخرج تطلعون منه .. ماتضيعون أبد حق استخدم القطار والباصات



تاريخ الرحلة : 31 مارس الى 15 أبريل 2025 - 15 يوم ب 14 ليلة ..



تاريخ 2025/3/31 ثاني يوم من أيام عيد الفطر السعيد تم التوجه الى مطار الكويت الدولي استعداد للسفر والاقلاع
و إلى كاونتر طيران الاتحاد



موعد طيارتنا ممتاز الساعة 4:10 العصر الاقلاع من الكويت
وترانزيت في أبوطبي مدته ساعتين وثلث.



وتوكلنا على الله

وهذا أحلى انتظار



الى البوابة



ممر السعادة



نوع طيارتنا من الكويت لي ابوظبي



ثلاثه بثلاثه



وحان وقت الاقلاع



مطار الكويت اليديد ناطرينه بشوووق



سناك بسيط عبارة عن شاورما بالتورتيلا و ككاو و مكسرات وماي ..



وصلنا دار زايد



وهذا مطار ابوظبي اليديد او مطار الشيخ زايد
ما شاءالله الله يهنيكم فيه يا أهل الامارات وايد حلو عليكم بالعافيه



التفتيش كان سهل وسريع الحمدلله ..









وهذي بوابتنا إلى الأمبراطورية