العرب المسافرون

السلام عليكم ورحمة الله وبركاته

عدت من جديد وأعتذر على الإطالة بسبب كثرة انشغالي في الفترة الأخيرة ، مثل ما وعدتكم سابقا بتقرير عن رحلتي الأولى إلى ماليزيا واللي كانت من تاريخ 26 مارس إلى 9 إبريل 2015 ، راح اتكلم بتفاصيل الرحلة على أجزاء وإن شاء الله راح يعجبكم التقرير وأكون عند حسن ظنكم .





انقول بسم الله نبدأ


سبب اختيار ماليزيا دون غيرها ؟

بين فترة واخرى اسمع حد سافر ماليزيا وكالعادة في حد يعجبه المكان وفي حد ما يعجبه لنكون واقعيين قليلا
المهم قعدت ابحث في الانترنت واجوف بعض التقارير والصور عن ماليزيا فزاد شوقي اكثر وجذبتني الصور إلى زيارتها .


بما إنه هناك عطلة المدارس فقلت ليش ما انسافر فيها و نستانس هناك ، وبعد مشاورة الجماعة اللي عندي سألوني عن الدولة فقلت : ماليزيا ، الكل مستغرب لأن معروف عندنا في الإمارات إن معظم اللي يسافرون ماليزيا حق شهر عسل ، فقلت اللي بيسافر وياي حياه واللي ما يبغي كيفه


بعد هالنقطة قعدت أجوف أسعار التذاكر بشكل شبه يومي تقريبا هذا 4 أشهر قبل السفر تقريبا من الحماس اللي فيني

وفجأة وبعد بحث استمر شهر تقريبا حصلت عرض حلو على الطيران الماليزي يا سلااااام غااايته نحجز


يلا يا جماعة أنا بحجز تذكرة ماليزيا حق شهر مارس شو رايكم حد بيسافر وياي ، في 2 من المسافرين وافقوا على الحجز ولكن البقيه في منهم قال شي وقت لين مارس يصير خير وفي منهم قال بنسافر دولة غير ماليزيا


بنزل الصور وبحاول اكمل التقرير بأسرع وقت

تحيااااااتي للجميع