الياخور او الاستراحة

q8ya metnaqla · 09-05-2015, 04:35 PM

مسائكم / صباحكم خير
منتدى العرب المسافرون - الكويت
اليوم بحط لكم عن الياخور او الاستراحة مثل ماتسمونها انا اسمية ياخور
الياخور عباره عن مكان منعزل وبعيد عن الديره غالبا ما يربى فيه الحيوانات عزكم الله وبعضهم يزرع بعض الزروعات والياخور كون في بر عكس الشالية يكون جهه بحر وجهة بر ، قبل الياخور مافي تجهيز واغلبهم يروحون لهم الرياييل اما الحين الناس بدت تهتم واتعدل فيهم وايد وفي وايد يواخير مشاءالله حلووين ومرتبين ( الحين فيهم غرف نوم وحمامات عزكم الله وصالات ) يعني العايلة ممكن انها تقضي ويك اند كامل فيه ..
وطبعا في يواخير مجهزه للتأجير

اليوم احنا رايحين ياخور عمي مسوين عشا ولده معرس ونون حفيدته لان طلع لها ضرس

واول شي ببتدي في الياخور والعشا

وسامحوني على ردائة التصوير

المطبخ الغرف

الصالة والدوانية

حياكم عالليقمات

والشاي

وننتقل لقسم العشا

الشاورما حاضره

والمشاوي

والصاج

السلطات والمقبلات

والحين قسم اختي الباستا

كل واحد/ه فيكم يختار باستته

والحين نبتدي في النون

النون عاده كويتية من تراثنا يمكن البعض من شباب هالجيل ما يعرفونها لأنه مو الكل ليلحين يسويها
هالعادة ظريفة وخفيفه والكل يحبها
شنو النون
اول شي سبب عمل النون هو تعبير عن الفرحه لمناسبة معينه مثل تسنين الطفل او مشي الطفل او شفاء مريض او غيره من المناسبات السعيدة
اما النون فهو سلة مليئة بالمفرحات من الككاو والحلاو والعلوج والمكسرات اضافه الى الالعاب الصغيرة والاهم قطع الخرده او الفلوس الورقيه
قبل طبعاً كان النون تقليدي حلاو وككاو ومكسرات وفلوس لكن الحين لازم التفنتق شوي
وطبعاً على حسب المناسبه يحطون الياهل او الشخص المحتفى فيه بالنص ويقطون عليه النون والناس تلقط من هالاشياء الزينه وتترس جياستهم والمحظوظ اللي يجمع اكبر مبلغ من الفلوس
المحتفى فيها ماتدري وين الله قاطها ( مناير خزنة التاير )

النون في الزبيل

وهذي بعض الفناتق

ام ضرس

يالله استعدوا

دربالكم من اللي فوق راح يحذفونكم بالحلاو والضرس راح ينبط عليكم

القصف مستمر من فووق

اخر التلقط والتعب ههههه

وبعدها احتفلنا في ميلاد عمي وولده

والحين اقولكم انتهى تقريري واشوفكم في في تقارير ياية ان شاءالله
واتمنى يعجبكم التقرير المتواضع