رحلتي الجميله لطوكيو 2015 - الصفحة 14

هداوه · 11-06-2015, 02:38 AM

نتابع جولتنا في الاوت ليت

اضافه مهمه

اليوم خبرتني سايا انها لما حجزت الباص من موقعهم اللي خبريتكم عنه

استملت التذاكر من سوبرماركت أسمه فاميلي مارت

Family Mart ファミリーマート

أكيد هالموضوع موضح في الموقع بس حبيت أخبركم مثل ماخبرتني سايا

نرجع لتفاصيل هاليوم

وصلنا الاوت ليت

نزلنا من الباص وسحبنا شنطتنا وبدأت انطلاقتنا

شكلي ودرت التسوق وانشغلت بس أصورلكم

وقفنا عند هذا والبنات اشتروا كريب منه بس ماعيبهم

مره سألت سايا عن هاذيل اللي يحطون قناع ع حلجهم ليش يحطونه ؟

قالت عشان يحمون نفسهم من التحسس ، وايد اتيهم حساسيه من الربيع

وانا منهم بس الحمدالله مايتني هاي الحساسيه هناك

واعتقد انه بعضهم يحطون هاي الاقنعه اذا كانوا مرضى عشان مايعادون حد

والعكس عشان ما أتيهم عدوى من حد

عقب عبرنا الجسر في القسم الثاني وهناك المحلات أكثر

والجو ممطر

شفت هاي اللعبه من بعيد

ما أدري شو تسوي بروحها هناك

شفنا هاي حاطينها للتصوير ونحن ماصدقنا

عاد عقب هالتعب والتلفلف يعنا ( جعنا ) وشفنا جدامنا هذا

مجمع للمطاعم

عاد يوم دخلنا شفنا زحمة الاجانب سواء يابانيين ولا غيرهم

حجزلنا طاوله وسرنا دفعات

الصراحه الاكل ماكان يشجع وما عرفت شو أطلب فشفت محل أكل ياباني

ويبيع نودل وراويتهم البطاقه ، فلما قراها اقترح عليه نودل بالخضار

كأنها ديدان

وطلبت تامبورا وهي عباره عن ربيان مقلي في خلطة شرات الكنتاكي

أكيد كثير منكم يعرفها

ومن مطعم ثاني طلبت أكله وايد قريت عنها وشفت صورها واشتهيت آكلها وأسمها

Takoyaki

وهي عباره عن كرات محشيه بالاخطبوط وتقدم مع صوص أو بدونها

البنات ماطلبوا ماعيبهم الموجود وتهبشوا ويانا

وهاي الطلبات اللي أنا طلبتها لي ولبوعيسى

رأيي في أكلهم

النودل كان أتعس من التعيس

مافيه لذه وفيه طعم غريب ولاعت جبدنا وماكملناه

والتمبورا كلها زيت وتغفي ع الجبد

وكورات الاخطبوط اللي العالم ذبحتنا عليه

مافيها لذه ولا طعم ومحد منا كملها

عاد نحن مافكرنا شوي نفتح الخريطه اللي ميودينها في ايدنا

من دخلنا ونشوف شو المطاعم المتوفره فيه

عفانا ساعات جيه يتجمد تفكيرنا عن التفكير

المهم عقب ماتذوقنا الاكل الملغ قلنا بنغير الطعم واشترينا أيس كريم

عقب ماطلعت من المطعم تنحت

البنات ساروا يتسوقون وانا وبوعيسى خذينا لفه شوي

وعقب قلت خلاص ما ابا اتسوق

من يينا ونحن نلف في المحلات ولكن ماحصلت شي عيبني

صح هو كبير وفيه ماركات معروفه بس ماعجبتني بضاعته وهذا كان راي البنات بعد

وما أبا أحكم عليه يمكن في وقتنا ماكانت البضاعه مناسبه لاذواقنا

وعموما الأذواق تختلف بس أنا ما أتذكر اني اشتريت شي

أنا وبوعيسى رجعنا من صوب محطة الباصات وكانت المفاجأه

شفنا كوفي فوشون جدامنا عدال موقف الباصات

يعني أول مادخلنا

فوشون هو اللي معلمتنه بالاخضر

يوم دخلنا شفنا أصناف من المخبوزات والساندويشات اللي تشهي

اتصلنا في البنات وخبرناهم اذا خلصوا ايونا في هالمكان وانه عقبها بنروح

عاد سامحوني نسيت أصور المحل بس صورت بعض طلباتنا

عاد شوفوا التناحه اللي فينا

نحن قررنا نرجع طوكيو ولكن موعد الباص الساعه 7 ووقتها كانت الساعه يمكن 2

بدال مانسير ونشيك ع الباص اذا بنحصل مكان فيه

يلسنا في الكوفي ورحرحنا فيه وعقب سرنا نشوف الباص اللي بيرجعنا

ما أدري منو خبرنا انه نسير مكتب المعلومات وهو اللي عليه حرف i

سرنا وكلمناهم وقالوا الباص الياي بيكون فل

ولكن فيه باص ثاني بيطلع الساعه 4 ولكن بتضطرون تدفعون مره ثانيه

واللي دفعتوه قبل بتقدرون تسترجعونه

وقالت لازم تتصلون من التيلفون العمومي وتحجزون

قلنالها وين هالتلفون ، قالت موجود هنيه

قلنالها بس نحن مانعرف انتي ساعدينا

الحرمه ماقصرت ورتبتلنا الحجز والحمدالله تمت كل الامور في صالحنا

أول شي مابندفع شي واعتبروا المبلغ اللي دفعناه قبل مقبول

ثاني شي انه بترجع بدري من الاوت ليت ومابنضطر نيلس هالساعات كلها

والشي الثالث والاحلى

انه هالباص بينزلنا في محطة طوكيو الرئيسيه

وبهاي الطريقه بتكون عندنا فرصه نشوفها ونعوض عن رحلة أمس لما كنسلناها

رجعنا الكوفي وتنحنا فيه لين يا موعد الباص

وانطلقنا ع خير

انتظروني في

محطة طوكيو الرئيسيه

الايمانمعجبون بهذا.

فيصل · 11-06-2015, 03:06 AM

ما أعجبك الأوت لوت

أم عيسي تدش سوق ولا يعجبها

زين تعاملهم يوم قبلوه

الله يتم من نعمه يوم قلتي كأنها ديدان تذكرت صور مطاعم الصين

|القحطاني| · 11-06-2015, 07:44 AM

والله شكل النودلز يخوف .. وصدقتي كأنها ديدان ههههههههههههههه

Takoyaki

وهي عباره عن كرات محشيه بالاخطبوط وتقدم مع صوص أو بدونها

وكيف كان طعم الإخطبوط!!!!!!!!!!!!!!!!!!!!!!!!!

الله يعطيك العافية

سوسو الصغيرة · 11-06-2015, 07:44 AM

الشعب الياباني انصدمت فيه ,,, كنت اتحراهم شرات يرانهم ( الكوريين ) يعني يوم تسألينهم ما يفهمون عليج ...
اظن اكلهم ماصخ ما فيه ملح ..
اسواقهم على حسب ذوق الشخص يمكن في اشياء حلوة وتنشرى بس يمكن انتي كنتي تعبانة لانه المدة اللى سرتوها وااايد قصيرة و الزحمة في بعض الاماكن تعكر المزاج لانه نحن مب متعودين عليها ...
و ماشي اي مقارنة بين اسواقهم و اسواق تايلاند حتى ...
ع العموم نتريا التكملة عشان انشوف محطة القطار الرئيسية ...

هداوه · 12-06-2015, 01:18 AM

اقتباس : المشاركة الأصلية كتبت بواسطة فيصل

ما أعجبك الأوت لوت

أم عيسي تدش سوق ولا يعجبها

زين تعاملهم يوم قبلوه

الله يتم من نعمه يوم قلتي كأنها ديدان تذكرت صور مطاعم الصين

انا وايد ذوقي صعب واتعب في السوق مب أي شي يعجبني

عشان جيه لاتحكمون عليه من رآيي وجربوه

اقتباس : المشاركة الأصلية كتبت بواسطة |القحطاني|

والله شكل النودلز يخوف .. وصدقتي كأنها ديدان ههههههههههههههه

Takoyaki

وهي عباره عن كرات محشيه بالاخطبوط وتقدم مع صوص أو بدونها

وكيف كان طعم الإخطبوط!!!!!!!!!!!!!!!!!!!!!!!!!

الله يعطيك العافية

الصراحه النودل كان شكلها يشهي لأني من عشاق المعكرونه لكن طلع مب حلو طعمه

الاخطبوط كان عادي بس العجينه هي اللي ماعجبتني ، ورجعت جربته مره ثانيه عقب بتعرفون ليش

الله يعافيك يارب

اقتباس : المشاركة الأصلية كتبت بواسطة سوسو الصغيرة

الشعب الياباني انصدمت فيه ,,, كنت اتحراهم شرات يرانهم ( الكوريين ) يعني يوم تسألينهم ما يفهمون عليج ...
اظن اكلهم ماصخ ما فيه ملح ..
اسواقهم على حسب ذوق الشخص يمكن في اشياء حلوة وتنشرى بس يمكن انتي كنتي تعبانة لانه المدة اللى سرتوها وااايد قصيرة و الزحمة في بعض الاماكن تعكر المزاج لانه نحن مب متعودين عليها ...
و ماشي اي مقارنة بين اسواقهم و اسواق تايلاند حتى ...
ع العموم نتريا التكملة عشان انشوف محطة القطار الرئيسية ...

بالعكس اليابانيين أخلاقهم وايد أحسن من الكوريين ووايد منهم يعرف انجليزي

هم يعتمدون في أكلهم ع الصوصات الجانبيه وعشان جيه يطلع ماصخ بس عموما أكلهم مايناسبنا

بالنسبه للتسوق

كلامج صح 100 % انه التسوق يختلف ع حسب ذوق الشخص

شوفي من زمان كانت لي تجربه في أوت ليت بيستر فليج أول مره زرته ماعجبني وماتشريت الا شي بسيط

ورديت وانا أنتقده

والمره الثانيه لما زرته مع بناتي أتشريت منه وايد لدرجة خلص الوقت ونحن ماخلصنا وسرناله مره ثانيه عقب كم يوم

هل التعب له دور ؟

هل المزاج له دور ؟

هل الاوت ليت اوقات يكون عادي واوقات يكون حلو حسب اختياراتنا وحاجتنا وذوقنا ؟

عشان جيه اقولكم أوت ليت جوتنبا اللي في اليابان كبير وفيه كثير من الماركات العالميه وممكن يناسب البعض

وحلو انكم تجربونه وانسوا رآيي فيه واذا حد جربه يعطينا رأيه فيه

كتكات783 · 12-06-2015, 03:56 AM

أهلا أم عيسى ..

جزء ( السكاي تري ) فيه معلومات رائعة .. وأيضا واضح التعب والإنهاك من كلامك ..

بالنسبة لي شخصيا ( ما أحب الزحمة نهائيا ) أستغرب من البعض الذي يربط الحياة بالمكان المزدحم

الآوت ليت .. أشوفه من خلال الصور مرتب .. بس كبضاعة أنتِ أدرى ..

الأكل في شرق آسيا متعب جدا ..

شكرا للجهد الوااااضح في ثنايا تقريرك ... ربي يعافيك ..

هداوه · 13-06-2015, 01:09 AM

اقتباس : المشاركة الأصلية كتبت بواسطة كتكات783

أهلا أم عيسى ..

جزء ( السكاي تري ) فيه معلومات رائعة .. وأيضا واضح التعب والإنهاك من كلامك ..

بالنسبة لي شخصيا ( ما أحب الزحمة نهائيا ) أستغرب من البعض الذي يربط الحياة بالمكان المزدحم

الآوت ليت .. أشوفه من خلال الصور مرتب .. بس كبضاعة أنتِ أدرى ..

الأكل في شرق آسيا متعب جدا ..

شكرا للجهد الوااااضح في ثنايا تقريرك ... ربي يعافيك ..

ياهلا ومرحبا

هيه والله كنا منهكين وبالذات أنا يايين من رحله طويله من الامارات وثاني يوم من اوله لين آخره ونحن ماريحنا

من مكان لمكان بالاضافه لاختلاف التوقيت ، بعدها ساعتنا البيلوجيه ماتضبطت ويانا

طبعا لما تكون الزحمه بهاي الطريقه فهي مقرفه ومتعبه

الاوت ليت أفضل تزورونه وتجربونه بنفسكم بس أسواقهم العاديه ماعجبتني لما أقارنها بأسواق بانكوك

بالنسبه للاكل اليابان أرحم من كوريا وبتيك العلوم عقب

الله يعافيك يارب

هداوه · 13-06-2015, 02:04 AM

نتابع الجوله الاخيره من اليوم الثاني

محطة طوكيو الرئيسيه

تعد المحطة معلم سياحي مهم عند زيارة طوكيو لمكانتها التاريخية و المعمارية

المحطة ضخمة كأنها مطار

محطة مهمة جدا وبها قطارات الشينكاسن أي يستعملها اليابانيون القادمون من أنحاء اليابان

فتتواجد بها محلات خاصة.

وخصوصا منطقة في المحطة اسمها شارع الشخصيات

بها محلات كل الشخصيات الكرتونية الشهيرة

تفاصيل هذا اليوم

وصلنا الباص لين محطة طوكيو الرئيسيه

والمحطه كبيره ما أدري اذا فيها أكثر من اللي شفناه ولا بس هذا

لانه ونحن نمشي استوت الساعه 8 او 8 ونص نسيت الوقت

بالضبط وكان هاك الوقت بيسكرون

المحطه كبيره وفيها وايد محلات وسوبرماركت ومطاعم وكوفيهات

حلو تمرون عليها وتتفرجون

تعالوا نشوف الصور

محلاتهم حلوه حق الصغار وتزغلل عيونهم

في هالممر الطويل بتشوفون المحلات ع الجانبين

كالعاده انا وبوعيسى في صوب والبنات في صوب ونتواصل بيننا في الموبايلات

ماخبرتكم

لما رجعت طلعت فاتورة مكالماتي اللي اجريتها في اليابان بـ 700 درهم

هاي بس فاتورتي وغير فواتيرهم

ما أاعرف كم بالضبط بس أكيد الاجمالي تعدى 1500 درهم يعني لو خلينا التيلفونات اللي أجرهم بوعيسى جان أحسن

نكمل جولتنا بين المحلات

عقب بوعيسى سار يلس في كوفي وانا كملت تمشي بروحي

حصلت محل يبيع فواكه بس فاكهته جوده وغاليه وايد

حصلت محل يبيع أنواع من البطاطس ، قلت بشتري وبجربها

من هالانواع أنا أخترت اللي في العلبه الخضراء ، والصراحه كان لذيذ

شليت البطاطس وسرت عند بوعيسى ، ويلست وياه

وجان اتيني الموظفه معصبه وقالت ممنوع تآكلين في الكوفي

قلتلها سوري

وعقب قالتلي لازم تطلبين أي شي بما انج يالسه في الكوفي

قلتلها أنا ما أبا شي وزوجي طالب

قالت لازم تطلبين ، قلتلها اوكي هاتيلي جرين تي

ع العموم انا ماتضايقت منها يمكن هذا قانونهم ولازم نحترمه

بس انا من تحت لتحت أخش ايديه في العلبه واسحب بطاط

واخشه في حلجي

وايد أحترم القوانين

عقب قلت لبوعيسى بسير أسأل اذا عندهم سوبرماركت كنت

أبا أشتري خضرا مثل بطاط وطماط وغيره لزوم الطبخ

مخي في الطبخ

سالت وحصلت سوبرماركت كبير

أول مادخلت شفت يبيعون ثوم مدخن غريب

تم الموظف يشرحلي كيف يتم عمل هالثوم وعقب تذوقت وحده

هاي السودا اللي كليتها

يوم تشيلون القشره تشوفون الثوم لونه أسود

شفت الفواكه مغريه واشتريت شويه

الغريبه اني ماحصلت خضار ولما سالته قاللي مخلص

ماشي طماط ولا بطاط ولاجزر ولا أي نوع من الخضار

عجيب والله هالسوبرماركت

وسبق دورت في البقلات اللي عدال فندقنا مثل فملي مارت وسفن الفن وبعد ماعندهم

ليش هاذيل ماياكلون خضار ولا الشو

عقب رجعت عند بوعيسى ولقيت البنات يالسين يتشرون

من محل معروف في اليابان وله فروع عندنا في الامارات ،

أسمه

محل يوكو موكو

للأسف ماصورت المحل بس يبت صور لمنتجاته من النت

منتجاته لذيذه لكن الغريبه انه أرخص عنا بوايد يعني عندنا الدبل

الموقف اللي صارلي

البنات اشتروا منه وانا أشتريت من العلب الكبيره المشكله علبتين واشتريت أشياء صغيره

وكانوا بيسكرون والمحلات كلها بدأت تسكر

طلعنا وشليت الاشياء الصغيره ونسيت العلب الكبيره بعد مادفعت قيمتهم

وتخيلوا ماعرفت اني نسيتهم الا عقب كم يوم وطبعا الفتوره عقيتها

خبرت سايا وطلبت منها تمر عليهم وتسالهم عن العلب

وانا تقريبا فاقده الأمل اني أحصلهم

وهذا الكلام يمكن عقب 5 أيام

وفعلا سارت سايا وسالتهم عن العلب والمفاجأه انهم ميودينهم لنا

وقالوا انه نحن روحنا بسرعه وما انتبهوا انه نسيناهم الا بعد ماروحنا

ورجعلولي العلبتين

بخبركم الحين عن أهم موضوع في هاي السفره

انتوا تعرفون اني ماخذه درس من سفرة كوريا

يوم سافرت وماشليت جدري الكهربائي

ولما سرت اليابان شليت جدري وشليت كل المؤونه اللازمه

ولما رجعنا من هاي الرحله بدري شوي قررت أطبخلهم عشاء وأسوي معكرونه

وبدأت مرحلة العذاب

الجدر مثل ماأنتوا عارفين الفولت فيه 220 -240 واليابان 100-110

في البدايه حطيت الجدر وحطيت فيه ماي وشغلته

واترييت أكثر من ساعه ابا يغلي الماي ومب راضي

عقب جربت المحول اللي يبته ويحول لكهرباء من 220 الى 100 ولكن

ركبته بالغلط فأحترق وطلعت ريحه منه زين مانقع وسويت مصيبه في الفندق

باءت كل محاولاتي بالفشل وفي الأخير لما يأست قررت أشتري جدر كهربائي من عندهم

وأنا سويت نودل وتعشيناه

بخبركم عقب شو صارلي يوم اشتريت الجدر الكهربائي الياباني وكيف فجيت طلاسمه

وانتهى هذا اليوم

ونتلقى في مشاركاتكم وفي جولات اليوم الثالث

طوكيو دوم ، وروبنجي هيل ، ومطعم الننجا

الايمانمعجبون بهذا.

فيصل · 13-06-2015, 03:04 AM

لازم تطبخين .......
الحمدلله ما صارات مشاكل
المحطه للدرجه ذي كبيره وتأخذ وقت بالتمشي فيها

|القحطاني| · 13-06-2015, 08:45 AM

ههههه عسى بس ما أشتغل الإنذار حق الحريق في الفندق

والله التسوق جميييييييل والفواكه شكله رهيب ما شاء الله

الله يعطيك العافية

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رحلتي الى جورجيا يونيو 2015	Fahad Mandi	بوابة جورجيا و اذربيجان	115	11-07-2018 12:02 PM
الطيور الجميله	أبوهمس	بوابة اثيوبيا	8	16-07-2015 11:11 PM
رحلتي إلى تركيا 2015 ( #اليوم_الثاني )	المصور أحمد المعراج	تركيا	12	08-06-2015 10:49 AM
مقتطفات من رحلتي قطر يناير 2015	Fahad Mandi	بوابة قطر	31	28-05-2015 10:14 AM