رحلتي الجميله لطوكيو 2015 - الصفحة 15

ام ميلاد · 13-06-2015, 01:49 PM

ماشاء الله الصور موضحه كل شي

اللي بيسافر ماراح يحتاج مرشده

من زمان حابه اسافر لليابان وحبيتها اكثر من صورك

الله يعطيك العافيه.. وبانتظار احداث الاكشن مع القدر الكهربائي

حول العالم · 13-06-2015, 02:14 PM

يلا اخرتينا يم عيسى

albarood · 13-06-2015, 10:21 PM

متابع وبانتظار تكملة التقرير الرائع

حول العالم · 14-06-2015, 04:39 PM

ونسيت اسالك بعد يوم عيسى من افضل ديزني باريس او طوكيو بالحجم والالعاب .......... علما انه باريس ديزني رحت لها مرتين

سوسو الصغيرة · 14-06-2015, 06:52 PM

ههههههههههههههههه
بعده بوكيمون عندهم ما انقرض خخخخخخخخ
اما المحطة واايد حلوة يبالها يوم كامل و اكيد فيها اجزاء و اماكن ما شفتيها ....
اكلهم عجيب غريب تخافين تاكلين اي شي ... الله يدوم النعمة ....
الاوت لت شو بلاه فاضي و لا فيه ناس ...

هداوه · 15-06-2015, 02:47 AM

اقتباس : المشاركة الأصلية كتبت بواسطة فيصل

لازم تطبخين .......
الحمدلله ما صارات مشاكل
المحطه للدرجه ذي كبيره وتأخذ وقت بالتمشي فيها

لين لحين ماعرفتني يافيصل

انا لازم أطبخ الغريبه انه هنيه في البلاد ما أطبخ الا في ارمضان ههههههههههه

شوف شرات كوريا واليابان واوروبا ومثل هاي البلدان لازم أطبخ

بس شرات بانكوك وماليزيا مايحتاي الاكل موجود وماتحاتي

أحسها تحتاج وقتأطول من اللي قضيناه فيها ونحن كنا بنطول لو ماسكروا المحلات

اقتباس : المشاركة الأصلية كتبت بواسطة |القحطاني|

ههههه عسى بس ما أشتغل الإنذار حق الحريق في الفندق

والله التسوق جميييييييل والفواكه شكله رهيب ما شاء الله

الله يعطيك العافية

ههههههههههههههههه

لاما اشتغل الانذار لأنه ماطلع دخان بس ريحه عطبه يعني ريحة شي محترق

اقتباس : المشاركة الأصلية كتبت بواسطة ام ميلاد

ماشاء الله الصور موضحه كل شي

اللي بيسافر ماراح يحتاج مرشده

من زمان حابه اسافر لليابان وحبيتها اكثر من صورك

الله يعطيك العافيه.. وبانتظار احداث الاكشن مع القدر الكهربائي

الله يعافيج

اليابان تستحق الزياره

المره اليايه ما أحتاج مرشد بس بناخذ ويانا سايا كصديقه

اقتباس : المشاركة الأصلية كتبت بواسطة حول العالم

يلا اخرتينا يم عيسى

اقتباس : المشاركة الأصلية كتبت بواسطة albarood

متابع وبانتظار تكملة التقرير الرائع

اليوم ان شاءالله بينزل اليديد

لاتزعلون من تأخيري والله وايد مضغوطه في حياتي

وعشانكم أسهر الليل عشان أنزل جزء

اقتباس : المشاركة الأصلية كتبت بواسطة حول العالم

ونسيت اسالك بعد يوم عيسى من افضل ديزني باريس او طوكيو بالحجم والالعاب .......... علما انه باريس ديزني رحت لها مرتين

اعتقد دزني اليابان أحلى

الصراحه عجبتني وايد رغم اني دخلت في جزء صغير منا وعقب بتعرفون سالفتي

اقتباس : المشاركة الأصلية كتبت بواسطة سوسو الصغيرة

ههههههههههههههههه
بعده بوكيمون عندهم ما انقرض خخخخخخخخ
اما المحطة واايد حلوة يبالها يوم كامل و اكيد فيها اجزاء و اماكن ما شفتيها ....
اكلهم عجيب غريب تخافين تاكلين اي شي ... الله يدوم النعمة ....
الاوت لت شو بلاه فاضي و لا فيه ناس ...

ههههههههههههههههههههههه

اول ماشفته ، قلت

بوكيموووون

يابوج أنا تخبلت ع سوالف اليهال

يوم كامل وايد عليها بس يبالها كم ساعه ع الراحات تاحذين وقتج فيها

أتوقع شراتج فيها أجزاء ماشفتها

فيه ناس بس لاهو زحمه ولافاضي

أصلا منو مخلص بضاعة أوتليتات اوروبا غيرهم هم والصينيين زاده أوتليتاتهم مب هاك الزود

هداوه · 15-06-2015, 02:48 AM

جولات اليوم الثالث

طوكيو دوم وروبنجي هيل ومطعم نينجا

صحينا الصبح وانا مافي شي بالي الا الجدر الكهربائي ، واليوم بتطلع ويانا سايا

أول ماوصلت سايا سارت ويابوعيسى في الاسواق اللي عدالنا

في شيبويا عشان يشترولي جدركهربائي

واشترالي بوعيسى الجدر الكهربائي بـ 300 درهم تقريبا أغلى عنا والتعليمات بالياباني

شرحتلي سايا كيف أشغله وكيف أسكره

طلعنا مشينا في شيبويا شوي

هنيه أول ماطلعنا من الفندق قبل لانركب الجسر

ركبنا الجسر

هذا المبنى اللي فيه ستاربكس

مول أسمه لوفت

ندمانه اني ما أشتريت عنهم سوشي

شفت هذا يسوي فطيره ووقتها ماكنت مشتهيه تفرجت عليه وروحنا

وهاي الانواع اللي عندهم

ماطولنا وايد وقررنا نسير وطوكيو دوم

Tokyo Dome

هي مدينة ترفيهية متكاملة ، تحتوي على استاديوم ضخم لمباريات البيسبول

لكن في الكثير من الأحيان تقام الحفلات الموسيقية به

و توجد مدينة ملاهي صغيرة وبعض المحلات بالإضافة إلى فندق طوكيو دوم.

المنطقة قريبة من أكيهابارا حيث أنها على نفس الخط.

أقرب محطة هي

Suidobashi Station

موقعهم ع النت

Tokyo Dome City Attractions | Tokyo Dome City

بس بعطيكم خط سيرنا مثل ماعطتني سايا

والرحله من منطقتنا لين طوكيو دوم تاخذ 19 دقيقه

من فندقنا نطلع ع محطة شيبويا

Cerulean Tower Tokyu Hotel Shibuya Metro

Station ：地下鉄渋谷駅

ومن شيبويا ناخذ حط جي آر يامانوتي

Shibuya Station 渋谷駅

to Yoyogi Station

代々木駅

- JR Yamanote Line bound for Shinjuku：ＪＲ

山手線新宿方面行き

بعد مانوصل محطة يايوجي

نبدل وناخذ خط سوبو جي آر ونسير محطة ساودوباشي

Yoyogi Station 代々木駅

to Suidobashi Station

(水道橋駅)

- JR Sobu Lin bound for Chiba：ＪＲ

総武線千葉行き

وآخيرا وصلنا

عاد أنا نسيت أخبركم شو الهدف من سيرتنا لهاي المنطقه

الله يسلمكم سايرين نتغدى في مطعم أمريكي متخصص في السي فود

لما وصلنا سرنا نسأل عنه

من طلعنا من المحطه ومشينا ندور المطعم وانا أشوف المكان شرح وجميل

ونشوف الالعاب من بعيد ونحن نتقرب منها

طبعا بناتي تجننوا الله يحفظهم وقالوا لازم نركب هالقطار

ومهما حاولت ما أقدر عليهم في هالموضوع

بعد ماسألنا وصلنا للمطعم ، واسمه ...

موقعهم ع النت

http://www.bubbagump.com/locations/tokyo/

هذا المطعم خبرتني عنه الغاليه ريم من الانستغرام

جزاها الله خير وايد ساعدتني

أول مادخلنا تحسون الديكورات أمريكيه

هاي طاولتنا

وهذا المنظر المجابلنا

خلف هاي النافوره مبنى المول وفيه محلات وكوفيهات

عقب بآخذكم في لفه هاك الصوب الحين خلوني أراويكم اطباقنا اللذيذه

شوربة سي فود

الصراحه أكلهم كان لذيذ ويستحق الزياره ولكن للاسف نسيت كم دفعنا

عقب ماتغدينا قرروا البنات يسيرون وياسايا يركبون قطار الموت

وانا قررت أسير أسوي مساج عرفت انه عندهم اسبا

وبوعيسى حب ايلس في ستاربكس يروق نفسه

هدف البنات

هدف بوعيسى

وهذا هدفي

الاسبا وايد راقي وله باب خاص

ولكن صارتلي سالفه ماتوقعتها

قائمة الأسعار

أول مادخلت ويلست في الانتظار يابولي قايمة الاسعار واخترت اللي أباه

وعقب عطوني شوز البسه وقالولي أفصخ بوتي

وسرت عند الاستقبال عشان أدفع واسير أسوي مساج

وتفاجأت

انه اللي مسوين تاتو يعني وشم في جسمهم مايسوولهم مساج

ولما شافوا ايدي وريولي فيهم حنا اعتذروا انهم مايقدرون يسوون لي

قلتلهم ليــــش

قالوا عشان هذا اللي في ايدج وريولج

قلتلهم هذا حنا مب تاتو

قالوا ولو سوري ممنوع من الاداره

المهم حاولت وياهم وابدا مصرين

يلست برع ألبس بوتي وانا ماغطه بوزي شبرين

ياني الموظف والظاهر كسرت خاطره وعطاني خريطة المول وقاللي

سيري هالمكان بيسوولج مساج اهنيه مايرضون قانون الشركه جيه

فرحت شوي وسرت وين مادلاني

سألتهم اذا أقدر أسوي فوت مساج ، الحمدالله مامانعوا

السعر ماكان رخيص شرات بانكوك

ياسلام عليج يابانكوك بـ 25 درهم ويسولنا فوت مساج مدة ساعه أحلى مساج

الصراحه ماعجبني مساجها شو أسوي هذا حظي

عقب ماخلصت أجتمعت بأسرتي

لقطات متنوعه من المكان

البنات حصلوا باسكن روبنز

وخلصت جولتنا الاولى في هاليوم ونلتقى معاكم في

الردود والجولات الثانيه

روبنجي هيل ومطعم نينجا

الايمانمعجبون بهذا.

فيصل · 15-06-2015, 02:26 PM

مساء الخير
المطعم له عدة فروع وقرأت تجربه كويتيه متنقله في بوابه مطاعم لندن

زين شنو الحكمه من اللي مسوي تاتو ما يعمل مساج هل هو مثلا يضر

الايمانمعجبون بهذا.

Prince Kytu · 15-06-2015, 07:00 PM

LaQua Dome City من الأماكن الجميلة ودايما أزورها في اليابان
وبهذي المنطقة موجود كافيه وادي الأمان حلوياتهم روعة
وبالنسبة لمطعم Bubba Gump اكتشفت انهم يستخدمون الكحول في الطبخ في بعض أنواع الأطباق مو كلهم
فأنصحكم تطلبون منهم المنيو الخاص إلي بدون كحول ><"
والله يسامح مدير مطعم هذا الفرع يقولي أنا مسلم ووايد مسلمين ياكلون عندي بس مشكلة المطعم مو مطعم حلال فطريقة الطبخ نستخدم كحول شويه وهو يتبخر
ويعطيج العافية أختـي على الجزء الجميل من التقرير

ام ميلاد · 16-06-2015, 02:09 PM

حلوه منطقه المطعم .. مول وكوفيات.. ومساج..حبيتها

الاكل شكله لذيذ .. بالعافيه عليكم

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رحلتي الى جورجيا يونيو 2015	Fahad Mandi	بوابة جورجيا و اذربيجان	115	11-07-2018 12:02 PM
الطيور الجميله	أبوهمس	بوابة اثيوبيا	8	16-07-2015 11:11 PM
رحلتي إلى تركيا 2015 ( #اليوم_الثاني )	المصور أحمد المعراج	تركيا	12	08-06-2015 10:49 AM
مقتطفات من رحلتي قطر يناير 2015	Fahad Mandi	بوابة قطر	31	28-05-2015 10:14 AM