رحلتي الجميله لطوكيو 2015 - الصفحة 22

اوروبا عشقي · 07-08-2015, 04:05 AM

شكرا

albarood · 07-08-2015, 01:38 PM

روعة هذا الجزء. الابناء لما يحنوا على شئ صعب الواحد يوقفهم خصوصا لما يجتمعون...
المطعم الهندي ليش يمشي الحال. ايش ناقص في الاكل؟ وايش يفرق عن المطاعم الهندية الي في عندنا في الخليج؟
اممم ما رحتوا قمة جبل فوجي؟ وهل توجد رحلات الى هناك ام انه فقط للمغامرين؟

Prince Kytu · 07-08-2015, 03:27 PM

الرحلة من أودايبا إلى فوجي أكيد بتكون شاقة
كان من الأسهل الذهاب إلى فوجي قبل الانتقال إلى أودايبا
والسالمون في الكافيه شكله حلو لازم أجربه
وبالعافية عليكم
وبالنسبة بحيرة كاواغوتشيكو كنت أروح لها مشي لأنها قريبة وأيضا في باصات فالاحتمالين واردين بالنسبة لكم بما انكم ما تتذكرون
وغابة الموسيقى شنو فيها ؟
وشكراً أختـي

حول العالم · 07-08-2015, 05:54 PM

ماشالله اشووفك راااضية عن هالرحلة بشكل كبير

ونا صراحه استمعت في المتابعه من اول الموضوع الى اللحضة هذي

هداوه · 07-08-2015, 10:05 PM

اقتباس : المشاركة الأصلية كتبت بواسطة FuNnY GIRL

روعه روعه الاجزاء ياام عيسى واشلون سويت يطلع دخان احسه شي غريب بس حلووووو مادري شسالفه اللي فيه كحول بحيج طعمه حلو خخخخ تو طحت في البلسمك ماله حل في اوروبا يجنن عقب ماشبعنا قرينا انه بخل الواين خلاص راح شنسوي بعد الله يغفر لنا ومالومج قلبج يعورج على بناتج وهم يلعبون احس انا مثلج حبايبي الله يحفظهم
جزء يجنن وحبيت اغراض ميكي ماوس والوافل روعه واسلوبج دايم روعه ياام عيسى منتظرين باقي الاجزاء الشيقه

حبيبتي وحشتيني واتحملي ع عمرج واستانسي

فعلا غريب كان يطلع منه دخان

هههههههههههههههههههه كلنا في الهوا سواء ، الحمدالله مب في نيتنا نجربه

مره حضرت معاهم لعبه وحده خطره وهم يلعبونها وكنا في المانيا وكانت تجلبهم قسم بالله لو حد صورني جان قلبه عوره عليه

بغيت أموت وأنا أشوفهم طلعت روحي وبعد ماخلصت اللعبه وتطمنت انهم بخير ركضت بعيد وقلت مابشوفهم

ومره في جنوب أفريقيا كانوا يتسلقون بين الجبال وخليت عبادي ويا المدرب يتسلق وهم بروحهم

يالله ما اتمنى حد مكاني ، عبادي ماخليته يكمل باقي المراحل وتم يصيح وقلتله لو الشو ماخليتك

أما هم ماقدرت عليهم هالتسلق أخطر من اي لعبه في مدن الالعاب

أغراض الميكي والميني ماوس اتشريت منهم حقي من شنط صغيره ونوت وسوالف

ياختي بعدني أحس في داخلي طفله

وانتي اللي روعه يالغاليه ، رغم وجودج في السفر بس مامنعج انج تتابعيني وتشاركين ويايي

فديت قلبج

اقتباس : المشاركة الأصلية كتبت بواسطة albarood

روعة هذا الجزء. الابناء لما يحنوا على شئ صعب الواحد يوقفهم خصوصا لما يجتمعون...
المطعم الهندي ليش يمشي الحال. ايش ناقص في الاكل؟ وايش يفرق عن المطاعم الهندية الي في عندنا في الخليج؟
اممم ما رحتوا قمة جبل فوجي؟ وهل توجد رحلات الى هناك ام انه فقط للمغامرين؟

ياهلا ومرحبا

الصراحه أنا شديده في بعض المواقف ولكن أوقات أحن وأضعف ويغلبوني

لأنه أكله مب لذيذ لدرجة السمبوسه كانت من داخل مثلجه

مب كل المطاعم واحد وهذا أقل جوده

في رحلات صوب جبل فوجي واظن ممكن تتسلقون لين فوق ومثل هاي الرحلات ماتناسبنا

ومن خلال بحثي شفت انه صوب هالبحيره هو أفضل مكان للسياحه

لكثرة الانشطه السياحيه

اقتباس : المشاركة الأصلية كتبت بواسطة Prince Kytu

الرحلة من أودايبا إلى فوجي أكيد بتكون شاقة
كان من الأسهل الذهاب إلى فوجي قبل الانتقال إلى أودايبا
والسالمون في الكافيه شكله حلو لازم أجربه
وبالعافية عليكم
وبالنسبة بحيرة كاواغوتشيكو كنت أروح لها مشي لأنها قريبة وأيضا في باصات فالاحتمالين واردين بالنسبة لكم بما انكم ما تتذكرون
وغابة الموسيقى شنو فيها ؟
وشكراً أختـي

ياهلا والله بمشرفنا

كنت مضطره وقتنا ضيق والبرامج مزحوم وخليت الاماكن اللي في سنتر طوكيو نطلعلها من هاك الفندق

الله يعافيك

لازم تجربه وأنا أحب السلمون الني بهاي الطريقه وهو كان عباره عن خبزه باجيت وعليه كريمة الجبن والسلمون

طلبنا صحنين من لذته

مازرت غابة الموسيقى اختي فراشه زارتها ومن تقريرها حسيتها حلوه بس ماحبيت ازورها بدون بناتي

العفو أخويي

اقتباس : المشاركة الأصلية كتبت بواسطة حول العالم

ماشالله اشووفك راااضية عن هالرحلة بشكل كبير

ونا صراحه استمعت في المتابعه من اول الموضوع الى اللحضة هذي

الا راضيه كل الرضى

بلد جميله وحبيتها وايد وأبا أزورها مره ثانيه وثالثه ونفسي أشوف وايد أماكن فيها

شكرا ويسعدني انكم حبيتوها من خلالي

هداوه · 07-08-2015, 11:20 PM

جولاتنا في اليوم التاسع
( قبل اليوم الأخير )

في هاليوم وحسب مخططنا انه نسير يوكوهاما

ولكن بعد مايينا وسكنا في أودايبا غيرنا رآينا وشفنا مافي داعي نسير بعيد ونترك القريب اللي عدالنا واللي بعدنا ماشفناه

وتصدقون رغم هذا بعد ما استكشفنا المكان كله وفيه أشياء كثيره ماشفناها يعني يبالنا زياره ثانيه

بالاضافه انه كنا منهكين من الرحلات ونبا نريح شوي

مرشدتنا سايا

سايا كانت مسويه حجوزات حق رحلة يوكوهاما وأعتقد في شي كنسلته وشي اتغرمناه

واتفقنا وياها انه اتينا في هاليوم الساعه 12 ، بس قبلها تمر محطة طوكيو وتسأل محل الحلويات اللي نسيت عندهم علبنا

ع الفكره نحن ممحتاجين سايا في هاليوم بس انا عزمتها ع الغدا ووعدتها اني بغديها من ايدي

وبعد بغينا نقضي وياه آخر يوم ، يعني الوداعيه

تفاصيل هاليوم

في هاليوم رقدنا ونشينا عدل لين يتنا سايا وكانت المفاجأه

انها يابت العلب اللي نسيناهم مع انه مر اسبوع تقريبا ع هالموضوع

بس صدق عندهم أمانه وصدق في التعامل

لما وصلت سايا خليتها تطلع ويالبنات يستكشفون المكان وخبرتهم يسيرون بعض الاماكن اللي أنا وابوهم سرناها أمس

وأنا تميت أطبخ الغداء وبوعيسى تم ويايي يريح ، وعقب ماطبخت وجهزت كل شي لبسنا وطلعنا عند البنات

الجو اليوم يخبل يجنن يشرح القلب

بروده حلوه وغيوم ورذاذ خفيف

ونحن طالعين شفنا هالعروس ، ياكثر العرسان في هالمنطقه

وأول ماطلعنا من فندقنا في اتجاه المول شفت انه المنطقه فيها مهرجان

والمكان صاير روعه وقلنا الحمدالله انه ماسرنا بعيد

والظاهر في كل ويك اند يسوون أنشطه

صورت وياهاي الاموره ، وسوينا انا وهي نفس الحركه

وشفت هالدونر التركي وحلال ووقتها ماكنت يوعانه للاسف

وقررت ننتعشى منه ولكن للاسف لما يينا ندوره فليل كان مسكرين وراحوا

وشلوا كل عرباناتهم وأغراضهم

دخلت المول واتشريت من جوديفا ، عندهم حلويات يابانيه مغريه ، وكوكيز لذيذ

تشريت منه أنواع لي وصوغه

طبعا أسألوا عن الانواع اللي مافيها كحول

وعقب اتلاقينا ويالبنات وسرنا متحف كرات الاخطبوط

وهو ممتحف انما مخصصين له في المول مكان يبيعون منتجاتهم بالاضافه الى مطاعم تقدم هاي الاكله

وفيه منه نكهات مختلفه

وقلنا بنجرب منه

ولهم طريقه في الطلب نسيتها بصراحه

وهذا طلبنا وكان أفضل من اللي كلناه في الاوت ليت

عقب طلعنا منه وكان قريب منه بيت الرعب

بغيت ندخل كلنا بس بوعيسى مارضى وسايا بعد مابغت وانا يلست أفكر وعقب كنسلت

لما شفت الورقه اللي اللي نوقع عليها بس نسيت شو القوانين اللي فيها ، بس بصراحه يخوف قبل لاندخل

محد الا البنات أصروا يدخلون ، حجزنا التذاكر ودخلوا البنات وتمت سايا تنتظرهم وانا وبوعيسى رجعنا الفندق عشان نجهز الغدا

كنا يوعانين والوقت أصلا صار العصر قلنا بناكل وعقب بنطلع

بعد مدة بسيطه الا أشوف البنات رادين وهم يخبروني أنه وايد يخوف وانه هم ماقدروا يكملون ودخلوا مرحله وحده وعقب طلبوا يطلعون

قلت الحمدالله مادخلت

غدينا ضيفتنا اللي وايد وايد عجبها ، وعاد وحليلها مسويتلها برياني تونه

هاي الفراوله من عند سايا وحليلها يايبتلنا كرتون فراوله

تغدينا وبعد الغدا طلعوا البنات ، ونحن عقبهم وانا سرت ويابوعيسى عند محل المساج وسويت مساج لريولي نص ساعه

وكان مساجهم رهيب ومن كثر ماعجبني حجزت حق باجر مدة ساعه وطلبت مساج لريولي وظهري بس

وعقب تمشينا والاجواء الليليه رهيبه

الله يسعدهم وعقبال اللي ماتزوجوا

وبعد ماخلصنا تمشي كنا لازم نرجع غرفنا ونرتب شنطنا ، وهنيه كان الوداع

وقفنا في الممر نحضن سايا ونبوسها ونصيح

وهي مسكينه صاحت بحرقه لدرجة فاجاتني

حسيتها حزينه أكثر ع فراقنا ، صدق فراق الناس اللي تحبهم ويحبونك صعب

وتخيلوا رفضت تاخذ عن فلوس عن هاليوم وقالتلي أنا اليوم معاكم كصديقه

حبيبتي ياسايا ما أجمل أخلاقج

بس أنا أصريت اني أعطيها ، وبعد هي كانت كريمه وقدمتلي هديه ماقصرت

هديتها عباره عن برواز للصوره ، وقررنا انه هالبرواز بنحط فيها صورتنا وياها وبنحطها في البيت

وراحت سايا واتفقت أتي بعد مانسافر بتركلها الاغراض اللي باقيه عندنا ومن بينهم الجدر الكهربائي

قلتلها خذيه حقج واذا يينا اليابان هاتيه نطبخ فيه في المده اللي بنكون فيها

كان وداع صعب بس كان لابد منه

عاشر من تعاشر فلابد من الفراق

تابعوني في اليوم الأخير

وأخيرا

الايمانمعجبون بهذا.

فيصل · 08-08-2015, 03:43 AM

يعني ممكن نروح لفوجي بسهوله
والتذاكر مو غاليه

الالعاب مو خطره مره بس شكلك ما تحبينها

الا القرود يا أنا أكرهها كره

الكحول مشكله أنهم مندمجين معاهم

ما أعتقد اليابات فيها غزو خليجي توها

عودتوها تأكل معكم وهي جالسه علي الأرض

ليش ما يعجبها طباخك ما شاء الله عليك

ام ميلاد · 11-08-2015, 08:00 AM

اهلييين

معليش طولت الغيبه.. بس كنت اتابع التقرير من بعيد لبعيد.. ولاقدرت ارد

كثير حبيت صور دزني

وماشاء الله عليك ماقصرتي باي معلومه وكل شي موضح بالصور

الله يعطيك العافيه على هالاطباق السنعه

وحزنت على فراق ساياودخلت جو معكم

هداوه · 12-08-2015, 12:11 AM

اقتباس : المشاركة الأصلية كتبت بواسطة فيصل

يعني ممكن نروح لفوجي بسهوله
والتذاكر مو غاليه

الالعاب مو خطره مره بس شكلك ما تحبينها

الا القرود يا أنا أكرهها كره

الكحول مشكله أنهم مندمجين معاهم

ما أعتقد اليابات فيها غزو خليجي توها

عودتوها تأكل معكم وهي جالسه علي الأرض

ليش ما يعجبها طباخك ما شاء الله عليك

بكل سهوله وتذاكرها عاديه لاتحاتون

لا والله الالعاب خطره وهذا كلام بناتي

ليش تكرهم وايد حلوين وسبحان الله تصرفاتهم مثل البني آدمين

ونحن بعد اندمجنا في دمجهم ههههههههههههههههه

بعدها بكر توا الاستطلاعات تبدأ من الخليجيين وأكثرهم اماراتيين ع فكره ، اصبروا بنضبطلكم المكان وعقب تعالوا ههههه

هي وحليلها أظن عورتها ركبتها ، بس تمت ساعه وهي تأكل صحنها

نحن خلصنا صحونا وغرفنا مره ثانيه وغسلناه وهي بعدها تتلقم الأكل وعقب قمت أنظف المكان وهي تأكل عيزتني وانا أترياها هههههههههههه

يسلموووو والله من ذوقك

اقتباس : المشاركة الأصلية كتبت بواسطة ام ميلاد

اهلييين

معليش طولت الغيبه.. بس كنت اتابع التقرير من بعيد لبعيد.. ولاقدرت ارد

كثير حبيت صور دزني

وماشاء الله عليك ماقصرتي باي معلومه وكل شي موضح بالصور

الله يعطيك العافيه على هالاطباق السنعه

وحزنت على فراق ساياودخلت جو معكم

لا منو قال معليش

مب ع كيفج تطولين الغيبات

ياختي انتوا وجودكم فرض واجب عليكم ، كيف تخلون هداوه بروحها

وجودكم يعني دعم وتشجيع وبعدين أحس انه نحن مع بعض في بيت الواحد

آخر مره تتأخرين ولا ترا

هيه والله حتى نحن زعلنا ع فراقها ، وبين فتره وفتره أرمسها ع الواتس بالفويز نوت وتستانس يوم تسمع صوتي

الله يعافيج حبيبتي وفرحت بشوفتج

هداوه · 12-08-2015, 12:19 AM

اليوم الأخير

تاريخ 13 / 4 / 2015

لأنه طيارتنا بتكون بالليل ، حبينا نستغل الوقت ونستكشف المنطقه اكثر

وبالنسبه للغرف سلمنا غرفه وحده الساعه 12 وهي غرفة البنات ويابوا شنطهم عندنا

واحسبوا علينا غرفتنا يوم أضافي ، كنا مضطرين عشان مانظل طول الوقت برع

نحتاج نرتاح شوي ونضبط امورنا قبل لانسير المطار

تفاصيل هاليوم

انا وبنتي توتو صحينا بدري وطلعنا

بوعيسى قرر مايطلع

وبنتي الثانيه قالت خلوني نايمه

الصراحه غلطانين ينامون

اليوم هو اليوم الأخير لاحقين بنرجع البلاد وبنرتاح فليش نضيع الوقت بالنوم ونحرم نفسنا المتعه

الحمدالله انه بنتي الصغيره كانت معايي وياهو سوينا فلم هندي وبتيكم السوالف

اول شي قرننا أنا وبنتي ندلع نفسنا ونسير نتريق

في البدايه فكرنا نجرب بوفيه الفندق بس لما شفناه ماعجبنا

وطلعنا سرنا المول كانت بنتي شايفه مطعم وخاطرها نجربه والحمدالله ماكلينا في الفندق

ونحن سايرين المطعم شوفوا الجو كيف يجنن

وصلنا المطعم وهذا أسمه

طلباتنا

عقب ماتريقنا ريوقنا اللذيذ ن تمشينا في المول ونحن طالعين من المخرج الثاني

وشفنا محل اسمه

كوكاكولا ، وكل منتجاته بهالاسم

لو نلبس شي من منتجاتهم في البلاد بيتحسبونه دعايه من الشركه يعني محصلينه مجاني هههههههههههه

وبربري عندهم غير

بعد ماتريقنا قررنا نسير مول ماسبق زرناه ، وكنت أقول لبنتي اسمه ديسكفري

من وين يبت الأسم ن ما أدري هههههههههههههههههه

أنا شفت أسمه من بعيد وقريته في مخي ديسكفري وهو ماله علاقه بهالاسم

ويوم عرفت بنتي شو سوت فيني

تفاصيل مغامراتنا ويالمول اليديد

طلعنا من المول وسرنا محطة المونوريل ( القطار المعلق ) اللي عدال فندقنا

المحطه فيها قطارات تمشي في اتجاهين متعاكسين وانته تختار القطار المناسب لوجهتك

أول ماصعدنا في المحطه شفت قطار واقف والباب مفتوح ع طول ركبنا قبل ما أعرف وين اتجاهنا الصحيح

بنتي سألتني

ماما انتي تعرفين أي اتجاه نباه

قلتلها لأ

قالت كيف تركبين القطار قبل مانتأكد من وجهتنا

ضحكت وقلتلها ما أدري شفته وركبت هههههههههههههه

الحين نحن نرمس ونتناقش والقطار يمشي

ووقف المحطه الاولى ومانزلنا وبعدنا متنحين مب عارفين المول في أي اتجاه

هنيه سالنا واحد عن المول بدون ما أذكر أسمه ، مجرد قلتله شوبنج مول

فقال انتوا في الاتجاه الغلط انزلوا وخذوا الاتجاه الثاني وعند المحطه رقم 16 انزلوا

القطار مشى مسافه طويله لين وقف مره ثانيه ، نزلنا وغيرنا الاتجاه ومشينا

لو كنت مآخذه ويايي خريطة المنطقه جان ماتلعوزنا بهالصوره

كل مالقطار يمشي اشوف نبتعد عن المولات ، والمول أشوفه من بعيد واحس انه نحن غلط

لما وصلنا المحطه رقم 13 قررنا ننزل ونغير المحطه وسالنا وحده كانت ويانا وقالت في الاتجاه الثاني عند المحطه رقم 9

وصلنا المحطه رقم 9 ونزلنا وشفنا المكان غلط وحسينا انه المحطه رقم 8 هي الصح

رجعنا وركبنا القطار وسرنا في نفس الاتجاه ونزلنا المحطه رقم 8 وكانت

المفاجأه

طلعت هاي المحطه هي نفسها المحطه اللي عدال فندقنا واللي ركبنا فيها من أول مره

هههههههههههههههههههههههههههههههه

ضحكنا ع عمارنا يمكن طافت ساعه ونحن سايرين ورادين في هالقطار

والمفاجأه الأكبر

هاي المره أحس انتوا بتكفخوني
طلع المول عدال فندقنا

بس نعبر مشي ع الجسر من خلف المحطه وندخل المول

عاد يوم شفنا المول قالت بنتي :

ماما هذا شو أسمه

من وين يبتي أسم ديسكفري

ضحكت ومالي ويه أقول شي وهي معصبه عليه

ولاتنسونه اني لفتيها بالقطار لين لف راسها ههههههه

هذا اسم المول

بالنسبه لجولتنا في القطار للاسف ماصورت وايد كنا مشغولين ندور المول وهاي الصورتين بس صورتهم

شفنا هاي الحديقه لما وقف في محطه من المحطات

بعد مانزلنا من القطار عند محطتنا ، طلعنا من الصوب الثاني وعبرنا الجسر

دخلنا المول وتفرقنا أنا وبنتي كل وحده منا سارت تتمشى في صوب تتفرج ع المحلات

شفت هالمحل وهو معروف في اليابان وله فروع وبعد عندهم فرع في بانكوك

أذكر لما دخلته في بانكوك ماتتصورون كيف عجيب ، لبسه وايد حلو وعملي

وبناطليهم روعه وماخليت لون ماشريت من عندهم لما كنت في بانكوك ، وبعد عندهم

تي شيرتات وبديهات اشكال وانواع وأحجام ، هالمحل لاتفوتونه وايد اشياء فيه

محل الكابات عجيب

شوفوا يمكن السوق حلو بس أنا مالي مزاج اتسوق فلا تحكمون من ذوقي

شوفوا الذوق

منتشره عندهم هالثلاجات وايد

تذكرت سايا والجرين تي مالها وقلت بشتري وبجربه

ع فكره وهي تتغدى برياني تونه كانت تشربه كأنه مرضعتها دوم في شنطتها من جيه هي سلق ماتمتن

بس نحن لو نشرب درام منه كل يوم ماسوا شي ويا الأكل اللي ناكله هههههههههههههه

اشتريته وجربته وكان مقبول وهو بارد من فتر ماعيبني ، تعرفون مايعيبنا الملغ يعني اللي طعمه مب حلو

محلااااات هالكوفي كيوووووت

كوفي هالو كيتي

حلو للام وعيالها الكتاكيت

الصراحه مادخلته كنت مسطله وأبا أرقد الفندق

بعدها نشت بنتي كوكي واتصلت فينا ويتنا بعد ماشبعت نوم

يتنا بدون ماتتعذب في القطار مثل ماتعذبنا

يتنا ع البراد طلعت من الفندق ووصلتنا في دقايق

خليت البنات في المول وقررت أرجع عند بوعيسى خصوصا انه ماعجبتني بضاعتهم بس القهر اني نسيت

انه من المخرج الثاني في مجسم كبير ومكان سياحي الواحد ممكن يتفرج فيه ويتمشى

رجعت بروحي وهم ماطولوا رجعوا ورايي خصوصا الجو تغير ونزلت أمطار وهواء والجو صار بارد

ريحت شوي وعقب طلعت بروحي عندي موعد في محل المساج

ولازال بوعيسى مريح ومايبا يظهر

المول االلي في محل المساج بتحصلون فيه متحف مدام توسو

ومحل الالعاب ليجو لاند

بعد ماخلصت جلسة المساج الرهيبه شفت انه فيه وقت شوي فقررت أدخل

متحف TOKYO TRICK ART MUSEUM

وهو عباره عن رسومات بشكل 3D والرسومات متقنه بصوره عجيبه

وكل صوره توقفون عدالها فيها حركه معينه تسوونها

وعقب تطلع صورتكم اللي صورتوها كأنها هاي الحركه فعليه

بشرحلكم من خلال الصور

مثلا هاي الساحره لو حطيتوا كتفكم عند ايده وتمثلون كأنها ماسكتنكم من ورا

لما تتصورون تطلع فعل كأنها ماسكتنكم

عاد بعطيكم الصور وتخيلوا نفسكم كيف بتتصورون معاهم ، بس عموما في توضيح عند كل صوره

كيف تتصورون معاهم

الصور كثيره واخترت بعضها لكم

لما ييت بقطع التذكره شافوني بروحي فساعدوني في كل شي

ودخلت ويايي وحده تعلمني في كل صوره كيف لازم أتصور

وتصورني ، وانا مخبرتنها اني بسير المطار ولازم بسرعه أخلص

فكنا أنا وهي نتحرك بسرعه عند كل صوره وبعض الصوره أقولها ما أبا أتصور معاها

وخلصت ورجعت بسرعه الفندق ، والصراحه ماكان ودي أرجع البلاد بعدني ماشبعت من اليابان

بالنسبه للتوصيل للمطار

الفندق يوفر توصيل مجاني بالباص بس لازم تحجزونه من قبل

وممكن يكون بسياره خاصه وهاي تسألون الفندق عن السعر ويحجزونها لكم

بالنسبه لنا كان عندنا خيارين من المواصلات

الأول سيارة خاصه من طيران الامارات والثاني سيارة السفاره

واخترنا من السفار لانه سيارتهم كبيره وارتحنا فيها ، وكنسلنا سيارة طيران الامارات

وصلنا المطار ويبعد المطار عن فندقنا 20 دقيقه

وصلنا بدري 9 وكان بدري حتى الكاونتر مافتح

( ع فكره كاتبه اليوم الخير في النوته ولاماكنتوا عرفتوا التفاصيل

هاي كانت راحت في الذاكره المنتهيه صلاحيتها ههههههههههههه)

انتظرنا لين مافتح الكاونتر ، وخلصنا اجراءاتنا بكل سهوله وخلصنا التاكس فري

تذكرون كيف كنا ناخذ التاكس فري من المحلات

لازم يكون معاكم الجواز الاصلي ولازم يدبسون الفاتوره فيه

نظامهم غير عن أوروبا

بعد مانختم الجوازات ونسوي شيك ان وبعد ماتمرون من بوابة

المراقبه بتحصلون مكتب مجابلنكم وللاسف ماصورته

تسيرون وتختمون الاوراق واظن يعطونكم الفلوس وخلاص

عقب تمشينا في السوق الحره

وعقبها رجعنا أرض الوطن بعد ماعشنا أيام جميله في طوكيو الجميله

معلومات اضافيه وملاحظات بسيطه

وانا في اليابان لاحظت بعض الامور اللي لفتت نظري وحبيت انقلها لكم

مثلا ...

كنت اللاحظ لما كنا نركب القطار بعض من الناس تكون نايمه والغريبه انهم ينشون عند محطتهم

الصراحه هاي الظاهره اثارت في نفسي تساؤلات

خذيتلكم بعض الصور

الصور الثانيه

لاحظت انه عند المولات وبعض المحلات قبل لاندخل نشوف

جدامنا هذا الجهاز وهو خاص للمظلات

يعني قبل لاندخل المول ندخل مظلتنا في الفتحه وهي اوتوماتيك تتلبس بكيس بلاستيك

الصوره الثالثه

تكلم عنها احمد الشقيري في خواطر ومنه عرفتها

وهي الخطوط الصفراء للعميان وهاي بتشوفونها في كل مكان تمشون فيه

الصوره الرابعه

كرسي الاطفال في الحمام عزكم الله

هاي الفكره وايد عجبتني

لاحظت كثير من الحمامات العامه مثبتين كرسي أطفال قريب من المرحاض عشان الام

تحط طفلها ويكون جدامها وماتحاتيه ، ياسلام ع تفكيرهم

والتعليمات موجوده

الصوره الخامسه ...

لاحظت اغلب مراحيظهم اذا مب كلهم تكون الكترونيه

الصوره السادسه ...

لاحظت انه المحلات اللي تبيع خضار وفواكه قليله ، وهذا شي استغربته

ماكنت أحصلهم بسهوله

وهذا الوحيد اللي في شيبويا وحصلت عنده فواكهه وخضار وهو مقابل المحطه ياي ع زاويه

اليوم الحمدالله كملت الجزء الأخير واتمنى يعجبكم

وقريبا بسويلكم الفهرس عشان يسهل عليكم في البحث

واتمنى التقي معاكم في الردود وفي تقارير يديده ان شاءالله

والسموحه اني طولت وايد في التقرير

وشكرا لكم

الايمانمعجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رحلتي الى جورجيا يونيو 2015	Fahad Mandi	بوابة جورجيا و اذربيجان	115	11-07-2018 12:02 PM
الطيور الجميله	أبوهمس	بوابة اثيوبيا	8	16-07-2015 11:11 PM
رحلتي إلى تركيا 2015 ( #اليوم_الثاني )	المصور أحمد المعراج	تركيا	12	08-06-2015 10:49 AM
مقتطفات من رحلتي قطر يناير 2015	Fahad Mandi	بوابة قطر	31	28-05-2015 10:14 AM