رحلتي الجميله لطوكيو 2015 - الصفحة 19

الخالدي · 02-07-2015, 12:08 PM

ماشاء الله اختنا هداوه تقرير جميل ومفصل

بس اليوم بديت اتابع كالعادة اكون آخر الواصلين

والله ضحكني موقف مطعم النينجاء ( حركات سخيفة وغبية ) ههههه
وانتو تقولون يلة خلص واجلب ويهك خخخخخ

متابعين وياج التقرير الجميل

هداوه · 02-07-2015, 05:06 PM

اقتباس : المشاركة الأصلية كتبت بواسطة الخالدي

ماشاء الله اختنا هداوه تقرير جميل ومفصل

بس اليوم بديت اتابع كالعادة اكون آخر الواصلين

والله ضحكني موقف مطعم النينجاء ( حركات سخيفة وغبية ) ههههه
وانتو تقولون يلة خلص واجلب ويهك خخخخخ

متابعين وياج التقرير الجميل

ياهلا وسهلا فيك

ولاتتأخر مره ثانيه

هههههههههههههههههههه

هيه والله صدقت كنا نقول يلا فكنا وخلصنا

الصراحه هذا المكان الوحيد الي دخلناه كلنا وتمنينا نلع منه بسرعه

وبعدين حركاتهم ماكانت فن كانت كأنه صغاريه جدامهم

الا اذا عندهم حركات ثانيه ويوم شافونا ماعيبناهم وقالوا خلينا نسويلهم أي شي

جان قدرت بنزللكم يديد اليوم

بحاول

سعودي84 · 06-07-2015, 05:20 AM

f

هداوه · 07-07-2015, 01:04 AM

اليوم الخامس من جولاتنا

اليوم صحينا بدري ع أساس بنسير اليوم دزني سي حسب ماحجزنا

نشينا وجهزت ريوقنا

أسوي رجيم قاسي

لبسنا وكشخنا وانطلقنا باتجاه المحطه

وكانت المفاجأه

الجو

البنات يقولولي من كم يوم انه هاليوم بيكون أبرد يوم في رحلتنا

بس أنا ماكنت مركزه في كلامهم

ويوم طلعنا انصدمت بالجو

الجو كان باااااارد وكان فيه هواء لدرجة كنا نمشي ونتضارب ويامظلاتنا

اليوم برنامجنا انه نسير دزني سي

ونحن مخلصين وقاطعين التذاكر

لكن الاحوال الجويه ماكانت متوقعه تكون جيه

الوضع جدا صعب انه نسير مدينة الالعاب في هاي البروده وهالهواء وأمطار

ونحن نمشي فوق الجسر اتفقنا انه نلغي رحلتنا لمدينة الالعاب ونخليها باجر

واليوم ناخذ راحه ونتمشى في شيبويا لأنه ماتمشينا فيها لين الحين

بس قلنا لازم نسير دزني ستور اللي حجزنا من عنده التذاكر ونغير موعد التذاكر

وصلنا دزني ستور ولكن لقيناه بعده مافتح لأنه طالعين بدري حق الالعاب

طبعا الجو بااااارد ولايمكن نوقف ننتظر

فقررنا ندخل الكوفي اللي مجابلنه نشرب شي دافي

وتفاجأنا بالكوفي

وايد عنده تشكيله حلوه من المعجنات والساندويشات

وكانوا يجهزون المكان في الطابق اللي فوق عشان بيصورون فيه مسلسل أو فيلم

دخلنا وطلبنا ريوق مره ثانيه الصراحه أغرانا نجرب منتجاتهم وسرنا يلسنا

في الطابق اللي فوق وفي ويهنا دزني ستور

شكله من برع راقي

الصراحه اليابان وايد فيها أشياء تستاهل نستكشفه فيها

محل دزني مجابلنا

وهنيه يلسنا في الطابق الثاني

لما فتح محل دزني خلينا البنات يسيرون يغيرون التذاكر وأنا وبوعيسى يلسنا

عايبتني اليلسه ما أبا أنش

وهاي بعض من منتجاتهم اللذيذه

ساندويش أسود كان خاطري أجربه بس ماكنت قادره آكل زياده

ان شاءالله في زيارتي الثانيه بنعيد هالكوفي

كرواسونات محشيه بحشوات مختلفه

البنات خلصوا ورجعولنا ودفعوهم رسوم بسيطه ع التغيير

المشكله انه باجر بنسير دزني سي واليوم اللي عقبه بنسير دزني لاند

بالاضافه انه باجر اصلا بننتقل من فندقنا وبنسير فندق ثاني

ع العموم بتعرفون كيف كان برنامحنا في هاليوم

تابعوني في برنامحنا في هاليوم ...

الايمانمعجبون بهذا.

هداوه · 07-07-2015, 01:14 AM

نتابع جولات اليوم الخامس

نسيت أخبركم عن شي مهم بالنسبه لي

تذكرون يوم قلتلكم اني ماحصلت فواكه وخضروات

حصلنا في شيبويا محل متخصص بس في الخضار والفواكهه

ماتتخيلون كيف كانت فرحتي يوم حصلته كأني حصلت الكنز

عقب ماخلصنا يلستنا في الكوفي قرر بوعيسى ويابنتي كوكي يرجعون الفندق

وأنا قررت الف المولات مع بنتي توتو

وهذا واحد من المولات ، الصراحه الجو ماكان يساعد أصورلكم وايد

لفينا كم مول واشتريت أشياء بسيطه وماعجبتني بضاعتهم أو ماحصلت الاشياء اللي تناسبني

وبنتي نفس الرأي

جوله ع بعض المحلات

هاي ماركه يابانيه حبينا شنطهم وخذينا منهم وحده وأسعارهم مثل مايكل كورس

عقب مالفيت شوي حسيت بالملل وقررت أرجع وبنتي حبت تكمل تسوقها

الحمدالله البلد آمان جدا والمنطقه حيه والفندق قريب

تركت بنتي ورجعت الفندق وهي فديتها ماطولت وايد ورجعت

واعتبرنا هاليوم يوم راحه واسترخاء

من وصلنا ونحن كل يوم ركيض من مكان لمكان ومحتاجين استراحه

بس عاد اليوم صح بالنسبه لنا استراحه بس بالنسبه لهداوه شي غير

استراحه واستمتاع

خلاص عقب مافجيت الرموز اليابانيه أصبح الطبخ سهل بالنسبه لي

منو بيودني

شكله يشهي

مول ماظهرنا هاليوم ريحنا ورتبنا شنطنا وأغراضنا عشان بننتقل باجر

وفليل قلت لبوعيسى أذكر سايا خبرتني انه في مطعم تركي قريب من فندقنا

قلتله أسأل الفندق عنه وأشتريلنا عشاء

ياليتني سرت وياه بس للاسف كنت مشغوله بتوضيب شنطنا

وكانت المفاجأه

انه المطعم ورا الفندق ونسيرله أعتقد من الدور الاول

بوعيسى يقول في الفندق جسر يودينا ع الجهه الخلفيه ، ويقوللي

المنطقه حيويه وفيها مطاعم وحياه والقهر انه الليله آخر يوم لنا في هالمكان

وباجر الصبح بدري بنطلع فمافي فرصه أشوف المنطقه

وهذا طلبنا والصراحه أكلهم حلو وحلال ولكن للاسف ما أدري وين حطيت كارت البزنس مالهم

بس أسألوا الفندق عنه وبيخبرونكم عن مكانه

يعني اللي بيسكن في هالفندق ان شاءالله مابيعاني وعنده المطعم التركي يتغدى ويتعشى من عنده

ويمكن فيه مطاعم غير بالاضافه انه منطقة شيبويا في كوفيهات ومطاعم ممكن الواحد يحصل شي يناسبه

والصراحه لو ماكنت مآخذه الجدر ويايي عادي ماكنا بنعاني مثل كوريا ولكن أنا أحب طبخ أيدي

بشتألوا

انتظروني في اليوم 6 وجولاته

الايمانمعجبون بهذا.

هداوه · 15-07-2015, 04:34 PM

اليوم السادس من رحلتنا

اليوم يوم الحوله من فندقنا

لما حجزت لطوكيو حجزت في مكانين للسكن جزء من الرحله

في شيبويا وجزء في منطقة أودايبا

بس ليش أخترت هاي المنطقه وشو فيها هاي المنطقه

Odaiba

تحتوي أودايبا على نماذج لأثار موجودة حول العالم

يمكنك في منطقة التسوق والترفيه الساحرة هذه مشاهدة تمثال الحرية

أو اختبر قيادة سيارة في تويوتا ميغا ويب أو تخيل محاربي

الساموراي في أويدو أونسن مونوغاتاري

منتجع ينابيع ساخنة من حقبة إيدو التاريخية.

المنطقه فيها الكثير من الاماكن والانشطه السياحيه

وبخبركم عن بعض منها

1- الباص المائي:

و لمن يحب المغامرة يستطيع الذهاب إلى محطة

Hinode Station

و ركوب الباص المائي إلى منطقة

Odaiba Seaside Park

مدة الرحلة بالباص المائي 20 دقيقة و تكلف 460 ين اي درهم

2- مبنى قناة فوجي تي في

الجزء الكروي من المبنى هو منصة للمشاهدة واستديو في نفس الوقت

يمكنكم زيارة المنصة ب 500 ين ومن ثم التجول في بعض الطوابق لتشاهدوا

معروضات عن مسلسلات القناة ومشاهدة استديوهات التسجيل عن بعد.

3- مركز ديكس التجاري

من مميزات المول الحديقة المطلة على خليج طوكيو

واللي فيه تمثال الحريه

هذا المركز به العديد من الوجهات السياحية و المتاحف الترفيهيةمنها :

1- متحف مدام توسو فرع طوكيو

2- عالم ليجو للاستكشافات

3- متحف التاكوياكي

4- بيت رعب مصغر

5- متحف الخدع البصرية

Tokyo Trick Art Museum

4- دايفر سيتي طوكيو بلازا

وهو مركز تسوق فيه مجسم لغاندام مثل قوم غراندايزر

و لمحبي جاندام يوجد مدينة ترفيهية مصغرة مستوحاة من جاندام

GUNDAM FRONT TOKYO

Palette Town -5

الذي يشمل مول كبير مستوحى من ايطاليا

في الطابق الارضي عبارة عن سوق ومطاعم بشكل ايطالي

وفي الطابق الثاني عبارة عن اوت لت

Tokyo Leisureland-6

مركز ترفيهي مفتوح حتى منتصف الليل

و توجد أيضا مناطق لاستئجار الدراجات ويمكنكم التجول في أودايبا باستخدامها

و استكشاف العديد من الوجهات الرائعة الاخرى

7- متحف العلوم

National Museum of Emerging Scienc

هاي بعض الاماكن السياحيه اللي في هالمنطقه بالاضافه للاسواق والمولات

والالعاب والمنطقه قريبه من مدن الالعاب دزني سي ودزني لاند

وبعض الفنادق توفر مواصلات مجانيه لمدن الالعاب

بصوره عامه المنطقه تجنن ومن خلال جولاتنا بتتعرفون عليها أكثر

تفاصيل هذا اليوم

نشينا بدري يمكن ع الساعه 7 او قبل ، واليوم قررنا انه نجرب نتريق في بوفيه فندقنا

والصراحه كان بوفيهم وايد حلو ماتوقعناه جيه ، ونسيت كم سعر الشخص

وهاي أطباقي

لذيذ هالبطاط

وأنا نازله البوفيه شلت قوطي جبن كرافت مالنا

ماقدرت أصور البوفيه لأنه زحمه ولأنه مستعيلين

لأنه أمس حاجزين سياره من الفندق

وحجزنا سياره فان كبيره تاخذنا لين فندقنا الثاني

والمفروض ايينا الساعه 9 ونسيت كم كان سعر السياره

ودعنا فندقنا الجميل وسرنا لفندقنا الثاني الأجمل والاروع وهو فندق

نيكو

وهو مصنف 5 نجوم

أنطلقنا من مكان جميل الى مكان أجمل

وصلنا فندقنا الجميل

عرس في قاعة الفندق والظاهر دوم يسوون أعراس

مره شفت عروس تتصور هي وريلها في لوبي الفندق

سرت وباركيتلهم وسلمت عليها وصورت وياها وريليها رز ويهه وصور ويانا ههههههه

هاي الحديقه الصغيره عند مدخل الفندق

دخلنا شنطنا وسرنا سوينا شيك ان

طبعا نحن يايين بدري ومابيسلمونا الغرفه من الحين

قلنالهم يوصلون شنطنا ونحن بنسير مدينة الالعاب ، ومن حظنا

انه طلع عندهم باص يوصل لمدن الالعاب مجانا

وكان الباص بينطلق بعد نص ساعه

الحين بعطيكم صور الفندق وغرفتنا وعقب بخبركم عن رحلتنا لدزني سي

للاسف لضيق الوقت ما أستكشفت لا هالفندق ولا اللي قبله

كله مستعيلين بنطلع ويوم نرجع نكون منهكين

موجود هالبوستر في اللوبي اللي يبا يحجز

هذا المخبز في الفندق وقمنا ناخذ عنه خبز فرش كل يوم

واذا مالحقنا عليه فليل اشترينا منه الصبح

الحين بدخلكم غرفنا

الفندق راقي وأحلى بوايد من الاولى وغرفه أكبر

هذا الفيو من بلكوتنا

الحين براويكم أجمل ركن في الغرفه

ركن المطبخ

احم احم

انتظروني في الجزء الياي في

دزني سي

الايمانمعجبون بهذا.

فيصل · 15-07-2015, 06:38 PM

الشارع مبين فخم

لكن كل مره توقيتكم للأماكن الزينه يكون متأخر

غريبه توقعت أن اسعار الماركات عنده أغلي

خساره المنطقه اللي وراكم ما زرتوها

شكلها يبيلها رجعه لليابان

اودايبا حلو تقسيمكم للسكن أحسها أكثر فعاليات

حظكم زين مع الباص اللي يوصل اختصر عليكم الوقت

سلسله الفندق جربتها في ماليزيا عام 2004 كان رائع حقيقه

ومنتظرين معاااااااااااااك

albarood · 15-07-2015, 09:57 PM

اهم شي في الفندق.... المطبخ

كتكات783 · 25-07-2015, 01:17 PM

أهلا أم عيسى ..

الفندق الثاني فعلا الأناقة وااااضحة من خلال تصويرك ..

فقط المنطقة اللي هو فيها .. إذا جميلة وحيوية معناها إن الفندق يعتبر خياراً ممتازاً ..

وبالنسبة للمطعم التركي اللي اكتشفتوها آخر ليلة ..

وأنتِ خبيرة سفر .. دائما أقول استكشاف منطقة الفندق من أول يوم يعطيك انطباع متكامل عن الخدمات وماتحتاج ..

أذكر في مدينة شينزن الصينية وهي ليست ببعيدة عن طوكيو بخصوص توفر الأكل الحلال المناسب

وجدت خلف الفندق مطعم تركي جميل ولذيذ جداً .. كان هو الوحيد الذي نعتمد عليه في وجباتنا ..

بانتظار ديزني متشوقين للبارت حقها وكذلك منطقتكم الجديدة والآثار التي تتميز بها ..

دمتِ وأنت بألف خير ..

Prince Kytu · 25-07-2015, 09:37 PM

ايييه على أيام أودايبا
لما أكون في أودايبا أحس إني بشاليه أو منتجع
الجو يكون فيها رائع
وفكرة السكن هنالك جميلة وإن شاء الله راح أجربها المرة القادمة
يعطيج العافية أختــي
وبإنتظار البقية

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رحلتي الى جورجيا يونيو 2015	Fahad Mandi	بوابة جورجيا و اذربيجان	115	11-07-2018 12:02 PM
الطيور الجميله	أبوهمس	بوابة اثيوبيا	8	16-07-2015 11:11 PM
رحلتي إلى تركيا 2015 ( #اليوم_الثاني )	المصور أحمد المعراج	تركيا	12	08-06-2015 10:49 AM
مقتطفات من رحلتي قطر يناير 2015	Fahad Mandi	بوابة قطر	31	28-05-2015 10:14 AM