تجربتي مع استخراج فيزا فرنسية مركز الرياض (طالب/غير موظف) + تجربة سابقة مع المانية

Tharmadawe · 12-05-2015, 01:31 AM

السلام عليكم ورحمة الله وبركاته

كيف حالكم جميعا ؟

في البداية من لا يشكر الناس لا يشكر الله ومن هالمنبر حاب أشكر جميع الأخوان في هالصرح لمساعدتهم لبعض وأخص بالشكر أخوي آخـــرفـــرصـــة وأخوي tab_el اللي ساعدني كثير في تجربتي الأولى السنة اللي راحت مع إستخراج فيزا ألمانية

وحبيت زي ما أنا جالس أستفيد من هالمنتدى أني أفيد ولو بجزء بسيط ولو يستفيد شخص واحد من موضوعي أنا راح أكون مبسوط جدا

في البداية هذي التجربة نفس تجربتي السنة الماضية راح تكون مفيدة أكثر شيء للأشخاص الغير موظفين والطلاب اللي راح يسافرون من دون ولي أمر أو مع الأهل نفس حالتي

( راح احط تجربتي السنة الماضية مع الالمانية في الرد الجاي باذن الله لزيادة الفائدة ولو انها قديمه رابط الرد هنا )

حنا أربعة شباب حجزنا موعدنا وكان اليوم 11 مايو الساعه 11:30 صباحا واحد من الشباب أجلنا موعده إلى يوم الثلاثاء ما بعد القادم 19 مايو عشان يجدد جوازه ويقدم بجواز مجدد وراح أحدث الموضوع وش يصير معه بإذن الله

طبعا وصلنا المركز على الوقت الا شوي طبعا المواقف عند المركز تجيب الهم فنصيحه لا تحاول تدخل لا في زحمة المواقف الاماميه ولا الخلفية على طول وقف في الشارع اللي على الحارة من الخلف وريح نفسك

طبعا شفت تجربة أخوي MOHANAD في موضوعه هنا وشفت إنه أغلب الأخوان أول مره يشوفون صور للمركز فقلت نجيب كم صوره زياده عالطريق أجل

صورة للمدخل الخلفي

طبعا دخلنا وخذنا رقم موعدنا الساعه 11:30 يوم أخذ رقم لنا كانت الساعه 11:39 شكرا للربع ساعه اللي ضاعت وانا ادور موقف غير تقفيل الشوارع والزحمه فنصيحه اطلع بدري خصوصا انهم مايعتمدون على الموعد قد ماهو ارقام وعشان تجي قبل الزحمه

طبعا كان رقم واحد لنا كلنا لاننا في موعد واحد ازين من السنة اللي راحت كان لازم ادخل بياناتنا واحد واحد واسدد الرسوم لكل واحد بلحاله

طبعا اتذكر اني مصور منطقة اللي اول ماتدخل والكاونتر حق الارقام بس مدري وين راحت الصوره

( صورتين خذتها لمنطقة الإنتظار الخارجية عند توزيع الأرقام يوم رجعت أستلم الجوازات )

طبعا بعد مادخلنا منطقة فيز الشنغن صورتين للمنطقه وفيه منطقه اتذكر عاليسار لها باب للعوائل شايفها السنه اللي راحت لكن مارحت جهتها هالمره

وهذي كاونترات الفرنسية تختلف عن الألمانية والايطالية اللي في الجهه الثانيه انها رفيعه ولازم توقف مهب زي الجهه الثانيه حاطين كراسي وتجلس

طبعا الشاشات حقت الارقام موحده على المركز كامل يعني جلسنا يمكن عشر دقائق لما طلع رقم تبع الفرنسية وكان الرقم عند 53 ورقمنا 73

طبعا تكون جالس والله يهديهم عوائل كثيرة جايبين بزارينهم صغار وانواع الصياح والازعاج المشكلة صياح بزارين اقل من سنتين ليش جايبينهم ودي اعرف

وفوق هذا حقين المكاتب اللي ممكن يوم من الايام اسوي فيهم شيء

جالسين والاخ في الله موقف عند الكاونتر ويعبي الاوراق وويعدل فيها يا ابن اللذينا ماخذ مبلغ وقدره عشان تجي تعدل وتعبي أوراق عندنا ليش

وفوق هذا تشوفه كل شوي منادي هالحريم تعالوا وش تبون وكلموه بيسالكم عن شيء ووقعوا هنا ثم يرجعون وشوي يأشر لعائله ثانيه يعدلون

ثم يرجع للعائله الاولى ثم شوي عائله ثالثه شوي عائله رابعه وكل شوي منادي وحده من هالعوائل

ثم في الاخير صوركم مهب مقبولة لازم ترفعون الحجاب شوي انزلوا صوروا تحت او مدري وين وارجعوا ,, شوي نفس الكلام للعائلة الثانيه والكونتر موقف شغله على هالهندي بلحاله

طبعا الكاونترات الثانيه حدث ولا حرج خصوصا كونتر اذا ماخاب ظني رقمه 13 اخر واحد عاليمين فيه موظف من جنسية عربية ومافيه الا معقبين يجون سيده يوقفون عنده ثلاثه ولا اربعه يقدمون اوراقهم وحنا جالسين ننتظر

وبعض الكاونترات يجيك يمر المعقب كانه يستفسر ويعطيه جواز مع النموذج ويروح كانه ماسوا شيء شوي يناديه الموظف كانه يبي منه شيء وياخذ ورقه ثانيه ويروح وعلى هالحاله

طبعا من رقم 53 الى رقمنا 73 جلسنا انتظار من الساعه 11:40 الى الساعه 1:40 ساعتين كامله انتظار

والمشكله كل هالساعتين مافيه الا بالكثير 10 ارقام اللي كانوا موجودين وباقي الارقام ينادون محد موجود يعني ساعتين عشان 10 اشخاص تقديم

طبعا الارقام ياخذونها المعقبين حسبي الله عليهم ومع ذلك ليتهم ينتظرون لا يخلصون بدون ارقام وبدون ما ينتظرون ,, قدامي معقب مخلص له فوق نص ساعه اللي معه جالسين ينتظرون التبصيم

يدور على الصف اللي قدام يقول احد يبي الرقم وكان الرقم 70 والشاشه توها على 67 طيب يالحبيب كيف خلصت العائلتين اللي معك

واللي قهرني اكثر واحد توه داخل وجلس في الصف اللي قدام خذ الرقم واقل من دقيقتين الا طامرين 68 و69 والدور عنده وانا جالس انتظر لي حوالي ساعتين

طبعا ما عليكم من الكلام اللي فوق بس فيني قهر وحبيت افضفض شوي نرجع للأساس بعد ماوصلنا الدور قمت انا قلت للشباب بخلص اول ثم تعالوا

صوره لبعض الاوراق اللي قدمتها ( ماصورت كشف الحساب ولا التأمين الطبي مدري ليش )

قدمت كل هالاوراق وكل ورقه رجعها بكتب قدامها اذا رجعها :
اول شيء خذ ورقة الموعد وبعدها عطيته :
1/ النموذج الخاص بالتقديم + ورقة المتطلبات Checklist تحميلهن النموذج هنا وورقة Checklist هنا
2/ صوره من جوازي + فيزا شنغن سابقة من جوازي القديم
3/ تأمين طبي من التعاونية مدته شهر بـ 140 ريال
طبعا بعد ماشاف النموذج اني حاط الوالد متكفل قال عطني تعريف ابوك
4/ تعريف الراتب للوالد ,, وبرفق تحت نموذج تعريف للمعلم للي يبي يستفيد منه
5/ صورة من جواز الوالد
6/ تعهد التكفل بالمصاريف من الوالد ورجعه لي
7/ كشف الحساب للوالد وقال ما نحتاجه ورجعه لي
8/ حجوزات الفنادق رجعها لي بس بعدين اخذها وباكتب ليش
9/ حجوزات الطيران ورجعها يقول مكتوب متى وقت السفر في النموذج نكتفي به
10/ وخذ صوره شخصية وحده بس

طبعا الشباب اللي معي نفس الأوراق ما عدا الفرق واحد المتكفل بالمصاريف أخوه والثاني خاله
الاول ماعنده شنغن قبل بس عنده بريطانيه وخذ منها صوره ورجع صور لشنغن سابقه من جواز اخوه
والثاني ما عنده اي فيزا من قبل بس خاله معه ورجع له صور الفيزا من خاله قال يكفي صورة الجواز

طبعا ولا جواز من الجوازات اخذ صوره لصفحة التوقيع

ونجي لموضوع حجوزات السكن في البداية قال لا ما يحتاج
قلت له اكيد ؟ قال ايه وهو يرتب اوراق اخر واحد من الشباب في نقطة الوجهه الأساسية كاتبين فرنسا , لكن في بلد الوصول كاتبين ألمانيا طبعا كلنا لكن أخر واحد مننا كان غلطان في الكتابه وشطب وكتب مره ثانيه وانتبه لها الموظف
قال بتروحون في البداية لألمانيا قلت ايه ثلاث ايام وبعدها فرنسا واكثر الايام في فرنسا تبي الحجوزات الفنادق قال لحظه وراح يسال واحد يقول انهم كاتبين كذا قال ايه خذ حجوزاتهم وتاكد اذا المدة اطول في فرنسا
رجع وقال عطني الحجوزات قلت في نفسي قايل لك من اول بس انت ما تبي عطيته وقعد يتاكد ثم قلت تبي نسخ ثانيه قال لا اسمائكم كلكم موجوده في كل الحجوزات مع بعض قلت ايه قال خلاص نسخه وحده تكفي

قام رقم اوراقنا 1 من 3 و 2 من 3 و 3 من 3 وحطها مع بعض وحط حجوزات السكن في اول واحد ودفعنا الرسوم 741 ريال لنا ثلاثتنا الفيزا 242 للشخص و 5 ريال رسوم رسائل الجوال

وعطانا ايصال واحد لنا كلنا وقال اي واحد يجيب الايصال ويستلم

قال انتظروا عند غرف التبصيم رحنا ننتظر جلسنا يمكن 35 دقيقه لما وصل الدور اول واحد فينا ثم الثاني ثم الثالث

طبعا حتى انا بصمت مع اني مبصم السنة اللي راحت

طبعا كالمعتاد التبصيم اربع اصابع يمين ثم اربعه يسار ثم ابهامين بس قبلهن تجلس ياخذون لك صورة هي اللي يحطونها في الفيزا

ثم يعطونك هالورقة فيها صورتك

وخلاص تكون خلصت طبعا طلعنا من المركز بالضبط 2:40 واصلين للمركز 11:40 ثلاث ساعات تماما

فرق عن تجربتي العام اقل من نص ساعه انا وولد خالتي

راح احدث الموضوع ان شاء الله بعد ما تخلص جوازاتنا واحدثه اذا راح ولد خالتي لموعده

ودعواتكم انها 4 سنوات لي بما ان جوازي جديد

ياخوفتي يوم قدم اوراقنا مع بعض يعطونا على مدة اقل واحد فينا واللي جوازه بينتهي في شهر 11 سنة 2017

طبعا هذا نموذج تعريف للمدرس سويته طبعا في البداية طلبت من الوالد يجيب لي تعريف وجاب لي عربي

ثم ترجمته وشلت بعض البيانات وكتبت الكلام ثم طبعته وقلت للوالد اختمه على طريقك الختم طبعا في درجه بما انه مدير المدرسه

رابط للتعريف هنا وكاتب كل شيء بالعربي في اماكنها ومحدده بالاحمر اللي تحتاج تبديل

واعتذر منكم اذا الموضوع طويل بس مشكلتي لا كتبت كتبت

طبعا ما يستفاد من هالتجربة ونقلا من موضوع تجربتي اللي قبل

1/ لا تعتمد على مكاتب السالفه ما تستاهل
2/ لا تعتمد على مكاتب السالفه ما تستاهل
3/ لا تعتمد على مكاتب السالفة ما تستاهل
4/ وفر فلوسك ولا تروح مكاتب

طبعا التكلفة بالتفصيل للشخص الواحد :
119 ريال حجز موعد اونلاين
140 ريال تامين لمدة شهر من التعاونية
247 ريال الفيزا مع رسوم رسائل الجوال
المجموع : 506 ريال فقط لاغير

رح للمكاتب وشف لي اقل مكتب كم بيقول لك الجواز الواحد واحسب الفرق وترى كل اللي بيسويه المكتب يعبي اوراق ويجلس عند الكونتر وانت تجلس في الكراسي تنتظره يناديك توقع ولا تبصم

يعني فيك فيك اخي العزيز انك تروح تجلس في الزحمه والحر يعني مش حيفيدك راعي المكتب

اخوكم / سعود

آخر مواضيع Tharmadawe

- تعبئة جدول باماكن للزياره في المانيا وسويسرا والنمسا
- [تجربه] اصدار فيزا المانيه لعائلة المكتب الموحد بالرياض 7/6/2016 (الالمانيه تطورت ؟ )
- مساعده في اعداد جدول لعائله الانطلاقه فرانكفورت والختام ميونخ
- تجربتي مع استخراج فيزا فرنسية مركز الرياض (طالب/غير موظف) + تجربة سابقة مع المانية
- تجديد فيزا شنغن من سفارة غير السفارة الاولى ممكن ؟ وجواز ينتهي بعد السفر بثلاث شهور !

التعديل الأخير تم بواسطة Tharmadawe ; 15-05-2015 الساعة 12:22 AM

oceanus · 12-05-2015, 01:38 AM

بالفعل .. مش حيفيدك صاحب المكتب

والي الان ما ضبطوا التنظيم و المحسوبيه في التقديم

الله يعين

شكرا لك ..

الغردقاوي · 12-05-2015, 01:43 AM

ما شاء الله عليك شرح وسرد رائع ووافي
يعطيك العافيه
وبإذن الله قريبا تتحصل على تأشيرتك وتسافر بالسلامه وتعود بالسلامه

Tharmadawe · 12-05-2015, 01:45 AM

تجربة السنة الماضية مع استخراج فيزا المانية للفائدة

السلام عليكم ورحمة الله وبركاته

طبعا في البدايه من لا يشكر الناس لا يشكر الله

فاشكر جميع الاعضاء والمشرفين على تعاونهم ومواضيعهم وتجاربهم اللي فادتني بشكل خاص واكيد افادت الكثير بشكل عام

طبعا اليوم ولله الحمد الساعه 11 الصباح استلمت انا وولد خالتي جوازاتنا من المكتب الموحد والحمدلله جتنا الفيزا 3 شهور للالمانيه

فقلت زي ما استفدت من الشباب هنا لازم افيد الناس بعد

( دوام المكتب الموحد في الرياض في رمضان من 9 الى 3 العصر لتسليم الجوازات,
التقديم ما انتبهت هل هو الى 2 او 1 الصراحه )

طبعا في البداية انا حاجز طيران وفنادق من اكثر من شهرين وبعضها من ثلاث شهور وحتى القطارات حاجزها ومخلص ولله الحمد
كل شيء كان غير مسترد ولو ما جت الفيزا كنت زي ما يقولون " بقشر بصل "

لكن الحمدلله تسهلت بفضل من الله ثم مساعدة الاخوان هنا خصوصا الاخ tab_el ما قصر معي ابدا في جميع استفساراتي وما يهونون باقي الشباب

طبعا بعد ما اخذت كل المعلومات اللي احتاجها من الشباب هنا توكلت على الله وحجزت موعد لثلاث اشخاص يوم 10-6-2014
انا وولد خالتي وواحد من الشباب طبعا كل شخص موعد بلحاله والدفع بالفيزا وصادفتني مشكله في الحجز لي
الصفحه تقفلت بالغلط وسط اجراءات الحجز قبل الدفع رجعت ابغى احجز من جديد يقول عندك موعد
فاضطريت احط رقم 1 قبل رقم الجواز وحجزت الموعد ودفعت ولله الحمد ماقالوا شيء ابدا

طبعا جهزت كل الاوراق اللي احتاجها وكانت :
1/ نموذج التقديم

2/ التعهدين 54 و 55

3 / تعهد التأمين الطبي طبعت نسختين كان فيه نسخه مدري كيف جايه مصوره ونسخه لجدة وكانت مترجمه

4 / حجوزات الفنادق لكل المدن وكانت ( 3 ايام فرانكفورت 5 ايام كولن ) وبعدها 5 ايام في باريس
طبعا في بوكنق الحجوزات باسمي وصعبه احجز للشباب حجوزات وهميه خصوصا في مدينة كولن لانها في الفتره هذي تصادف ثاني اكبر معرض العاب عالمي في السنه في هذيك الفتره وهو سبب تواجدي فيها فاغلب الحجوزات دفع عند الحجز

لكن موجود خاصية في بوكنق تقدر تكتب اكثر من اسم في الحجز اذا الغرفه او السويت لاكثر من شخص فاضفت اسمائهم مع اسمي وطبعت ثلاث نسخ من كل حجز فيكون الحجز فيه اسمائنا الثلاثه بما ان الحجز اصلا لسويتات وغرف تاخذ 3 اشخاص

5 / وطبعا صورتين شخصية صورتها قبل الموعد بساعه تقريبا من استيديو مقابل المركز مدري كيف نسيتها لاخر لحظه

6 / وطبعا تامين شينغن من التعاونيه حجزته بالنت ونصيحتي لكم لا تامنون بالنت , لاني رحت لهم بعد ماسويت التامين بيوم ابغى نسخه اصل عشان اقدمها قال لي ما وصلنا في النظام التامين تعال بكره او بعده فتركته عاد

رجعت له قبل الموعد بنص ساعه بما انه موجود في نفس منطقة المركز ابغاه يطبع لي اصل قال ما اقدر اطبع لك الا فاتورة اصل ما اطبع التامين الاصل النظام ما يسمح ,, رح اطبع اللي جاك في الايميل قلت بس فيه ناس صارت لهم مشاكل معه ابي اصل مختومه قال ما اقدر افيدك , قلت امري لله بطبع اللي في الايميل الرجال تعاون معي ماقصر وقال ارسل لي الملف على ايميلي الخاص اطبعه لك وللاسف صار فيه مشكله في نظامهم الغبي وما فتحت معه ايميلات ولا شيء واضطريت ادور احد من المكاتب يطبع وكلهم يرفضون لما واحد صاحب استيديو تصوير وافق مقابل 10 ريال للورقه الوحده والمشكله التامين انطبع ورقتين الورقه الثانيه فيها سطر واحد ومامنه فايده ويبغاني ادفع له 20 انا وياه وافق على 15 ريال خذت الورقه وانا اقول الله يستر لا يردونها بس
ولد خالتي كان مأمن من الفرع ومعطينه نسختين للتامين وحده مختومه ومكتوب موجهه للسفاره

7 / وصورة للهوية الوطنية او الاثبات

8/ وصوره من جوازي لصفحة البيانات وصفحة التوقيع

طبعا هنا نجي للنقطه اللي للاشخاص اللي مثلي طلاب او غير موظفين

انا طالب في جامعة الملك سعود وموظف في شركة خاصه للشباب بيننا
فاحترت كيف اقدم اكتب تعريف وخطاب تعريف راتب من عندنا الشركة واختمه واقدم به
لكن المشكله الرصيد في الحساب في هالفتره ما يضبط بعد ما دفعت كل التكاليف حقت السفره معد فيه مبلغ يمشي للتقديم

فبعد ماسالت هنا قالوا لي الشباب قدم وحط ابوك متكفل

9/ فجبت من الوالد تعريف من العمل موجه للسفاره الالمانيه مختوم وترجمته عند مكتب بـ 30 ريال
كان المفروض انا اترجمه واعطيه الوالد من الاساس يطبعه على ورق المدرسه الرسمي ويختمه بس ما امداني
10/ كشف حساب ثلاث شهور مختوم من البنك
11/ ورقة التعهد بالتكفل بالمصاريف وموجوده هنا جاهزه من الشباب ما قصروا بس عدلتها وحطيتها الى السفاره الالمانيه وبياناتي وخليت الوالد يوقع
12/ وصورة من جوازه صفحة البيانات وصفحة التوقيع

فتوكلت على الله بهالاوراق يوم الموعد واللي كان 10-6-2014 انا وولد خالتي طبعا خوينا كان موجود في البرازيل وتاخرت رحلتهم 4 ايام او مدري 5 ايام وفاته الموعد وضيع علي فلوس الحجز

طبعا ولد خالتي نفس اوراقي بالضبط والده متكفل ونفس كل شيء الزياده عنده صورة لصفحه فيها فيزا شنغن المانيه في جواز ابوه

كان موعدنا الساعه 11:15 الصباح

دخلنا بعد التفتيش رقينا فوق اخذنا رقم من الكاونتر دخلنا منطقة الالمانيه وجلسنا ننتظر اتوقع جلست 10 دقائق او حولها ووصلني الدور ولد خالتي بعدي تقريبا بثلاث دقائق وصل دوره

طبعا الموظف اخذ مني الاوراق وجلس يفرزها رجع لي
1/ صورة الاثبات او الهوية الوطنيه
2/ صفحة التوقيع من جوازي ومن جواز الوالد
3/ التعهد الطبي اللي كان نسخة جده

وباقي الاوراق اخذها وخلص الاجرائات ودفعت المبلغ وما كان معي صرف بس الحمدلله ولد خالتي انقذني بصرف ريالات معه

فنصيحه خل معك المبلغ مصروف وجاهز لانهم ما يصرفون او حسب تجربتي انا وولد خالتي ما صرفوا لنا المبلغ

طبعا عطاني ايصال قال ما تستلم الجواز الا بالايصال هذا

ولد خالتي الموظف ما رجع له الا ورقة التعهد الطبي حقت جده وباقي الاوراق اخذها
فخل معك كل الاوراق اللي ممكن تحتاجها وخل الموظف يختار براحته لاني اشوف فرق من موظف لموظف

طبعا قال اجلس لما نناديك ,, جلسنا يمكن عشر دقائق ثانيه ونادانا الموظف الثاني بصمنا وقال سلام عليكم الوعد عالاقل بعد 3 اسابيع من اليوم

والحمدلله امس الساعه 4 العصر جتني رساله وايميل ان جوازي جاهز عندهم

رحنا لهم انا وولد خالتي اليوم الصباح دخلنا خذنا رقم رحنا لموظف التسليم ما كان قدامنا الا واحد اخذ جوازه وبعدها انا وولد خالتي اخذناها في اقل من دقائق

طبعا ملخص السالفه الطويله اللي فوق

1/ لا تعتمد على مكاتب السالفه ما تستاهل
2/ لا تعتمد على مكاتب السالفه ما تستاهل
3/ لا تعتمد على مكاتب السالفة ما تستاهل
4/ وفر فلوسك ولا تروح مكاتب

طبعا اقل مكتب سالته بيخلص لي الاجرائات كان بـ 800 ريال والتامين الطبي علي

تكاليف الاستخراج من نفسي وما كان فيها اي تعقيد ولا اي شيء
125 ريال حجز موعد
310 ريال رسوم الفيزا
110 تامين طبي شنغن من التعاونية
المجموع 545 ريال فقط لاغير

وفرت على الاقل 350 ريال وما كان فيها اي تعقيد او تعب يخليني اقول ادفع زياده 350 ريال واشتري راحتي

الا اشتري راحتي واوفر فلوسي وافتك من المكاتب ونفسيات بعض الموظفين اللي فيها واللي يحسسك انها سالفة تصنيع صاروخ عشان يخليك تحس انها معقده وصدق تستاهل تدفع

كلمت واحد من المكاتب اعرفه قلت ابي فيزا قال ابشر وش قلت المانيه قال اوه المانيه معقدين ونظامهم صعب ومدري ايش تكلفك 1200 ريال بدون التامين ,, يا ظالم يا حراامي انا طلعتها بنفسي الحين وودي ارجع له اقول وين التعقيد في الموضوع وليش بتزرفني دبل التكلفه اوك اعطيك 100 ريال الى 150 ريال تعقيب لكن 700 ريال تعقيب غير التامين بعد

وبس اعتذر اذا طولت في الموضوع وهو ما يحتاج الحوسه هذي كلها بس انا اذا جلست عالكيبورد الله يهديني مسترسل وما يردني شيء في الكتابه وترا هذا وانا ماسك نفسي ومختصر ما خذت راحتي
واعتذر بعد ان الموضوع بدون تنسيق ومسرود كذا سرد

ورمضان مبارك عليكم جميعا وكل عام وانتم بخير

واتمنى يستفيد من موضيعي احد من الاخوان زي ما انا استفدت من مواضيع الشباب هنا

اخوكم سعود

آخـــرفـــرصـــة · 12-05-2015, 05:27 AM

الله يحفظك يا سعود

تجربة خمس نجوم نشكرك على طرحها

أكيد كثير يستفيد لأنك ذاكر كل شي بالتفصيل

كنا و لازلنا نطالب بعمل كاونتر منفصل للمعقبين لأنهم هم اللي حايسين المكتب

سحب أرقام و عدم علم بالطلبات و يشغل الموظف باسئلته مما يأخر الكثير في التقديم

ما نقول الا الله يهديهم

شكراً لذوقك ما قمنا الا بالواجب

Tharmadawe · 12-05-2015, 07:19 AM

اقتباس : المشاركة الأصلية كتبت بواسطة oceanus

بالفعل .. مش حيفيدك صاحب المكتب

والي الان ما ضبطوا التنظيم و المحسوبيه في التقديم

الله يعين

شكرا لك ..

العفو

وشفت ناس تشتكي كثير من سوء التنظيم بس تجربتي السنة الماضية كانت زي الفل

لكن هالمره حسيت بالكلام اللي يقولونه الناس والمركز يحتاج ترتيب وتنظيم

اقتباس : المشاركة الأصلية كتبت بواسطة الغردقاوي

ما شاء الله عليك شرح وسرد رائع ووافي
يعطيك العافيه
وبإذن الله قريبا تتحصل على تأشيرتك وتسافر بالسلامه وتعود بالسلامه

الله يعافيك يالغالي والله يسلمك

والله يسمع منك وان شاء الله تجي تأشيره بنفس مدة الجواز

اقتباس : المشاركة الأصلية كتبت بواسطة آخـــرفـــرصـــة

الله يحفظك يا سعود

تجربة خمس نجوم نشكرك على طرحها

أكيد كثير يستفيد لأنك ذاكر كل شي بالتفصيل

كنا و لازلنا نطالب بعمل كاونتر منفصل للمعقبين لأنهم هم اللي حايسين المكتب

سحب أرقام و عدم علم بالطلبات و يشغل الموظف باسئلته مما يأخر الكثير في التقديم

ما نقول الا الله يهديهم

شكراً لذوقك ما قمنا الا بالواجب

الله يخليك ولولا الله ثم انتم كان ما قدرنا نسوي مثل هالتجارب وننشرها ونشاركها معكم

اتمنى صراحة زي مافيه قسم عوائل + قسم افراد + قسم vip

انه يكون فيه قسم مخصص لاصحاب المكاتب والمعقبين ياخي حط لهم لكل دولة كاونتر واحد وخله يجي على راحته لو يبي بعشرين جواز

والا امنع الرقم ما يكون الا بالكثير 3 او 4 جوازات او لكل عائلة رقم

يجيك المعقب برقم واحد معه اربع عوائل ورجالين وتلقى معه 20 جواز ويجلس لك عالكونتر ساعه كامله ويعبي الاوراق لانه ما يعرف المتطلبات وكل شوي يسال ويعدل ويحوسنا باوراقه على الكراسي

طيب وش ذنبي انا اللي جاي مرتب وضعي وجايب لكم اوراق زياده بعد فوق البيعه لو تبون

MOBARKI · 12-05-2015, 08:15 AM

شكرا ابوسعود على ذكر تجربتك بالتفاصيل

يسعدك ربي

أبوعبدالله · 12-05-2015, 08:41 AM

شكراً سعود على ذكر تجربتك وافادتك لنا ...

يعطيك العافية على الجهد الجميل ...

وان شاء الله تطلع لكم الفيزا اربع سنوات

tab_el · 12-05-2015, 08:54 AM

ماشاء الله عليك شرح وافي

وحياك الله بين اخوانك وعقبال الفيزا يارب

مكتب الخدمات ممكن الواحد يروح له لو كان المكتب الموحد بعيد عنه وفيه صعوبة يروح له وهو مبصم أساساً فــ يوفر العنا

يعطيك العافية على طرح تجربتك وحنا هنا لخدمتكم

فيصل · 12-05-2015, 12:37 PM

الف شكر لذكر تجربتك
ما قصرت يا غالي حفيقه
استغرب تبصيمك مره ثانيه

تكفي تكفي تكفي اذا أخذت التأشيره وانتهيت أكتب شكوي عليهم خلهم يتأدبون ووصلها للقنصل

والله نبي نأدب هالشركه اللي تقدم المعقبين

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
تجربتي في استخراج فيزا شنغن "سويسرا" .. بالتفصيل	عليـ الحربيـ	فيزا	25	30-07-2015 10:13 AM
اليوم 15/6/2015 تجربتي في التقديم على شنقن فرنسية من الخبر !!	مسافرة مسافرة	فيزا	14	23-07-2015 06:52 PM
تم بحمد الله فيزا فرنسية بدون تعقيدات	مسافر بلا زاد	فيزا	36	16-07-2015 11:28 AM
تجربتي في استخراج فيزا شنغن من السفارة الفرنسية	نجود	فيزا	12	02-07-2015 05:12 PM