ياعيون الكون غضي بالنظر ،، (تقرير تايلند) - الصفحة 7

فيصل · 26-05-2015, 05:35 AM

اقتباس : المشاركة الأصلية كتبت بواسطة ليمونه حزينه

تايلاند وما ادراك ماتايلاند ويلومني بعشقي لها

مشكلتنا يدققون علي جوازك أذا رحت تايلندا واذا حاب تجدد الجواز اذا انتهي تطيح بعسكري بيعقدك وفيها مسائله
ومو فاضي والله أكلم الشباب مع أن الجوازات والله فيها معارف كثيره بس ما أحب أكلم أحد
ويمكن هالشيء زين لكم لأن ربعنا أذا غزو تايلندا بتشوفون أسعارهم غير ولا وش رأيك يا فهد

منصور و HUNTER معجبون بهذا.

كون تيب · 26-05-2015, 10:39 AM

رووووعة اخوي فهد

فهد المنيع · 26-05-2015, 03:32 PM

اقتباس : المشاركة الأصلية كتبت بواسطة تاي بن تاي

جولة موفقة

هذة اسماء المناطق يلي زرتها

قمة دوي انثانون doi Inthanon

شلال ماي كلانج Mae Klang Waterfall

شلال ماي يا MAE YA WATERFALL

ماشاء الله عليك جبتها بالخريطة

يعطيك العافية حبيبي

اقتباس : المشاركة الأصلية كتبت بواسطة Haksa77

جزء رائع
متااابع
يعطيك العافية فهد

تشرفنا متابعتك .. وحياك ربي

اقتباس : المشاركة الأصلية كتبت بواسطة ليمونه حزينه

احسنت ع هالتفاصيل الي تشوق وتخلي نار الشوق تستعجل في الحجز
اشكرك واشكر ابداعك في تنظيم سفرتك قبل موعدها هذا سر نجاح اي مشروع تتمنى نجاحه
بوركت ع هالمعلومات التي تفيد السائح المتوجهه لبلاد السحر والعشق بجمال طبيعتها وناسها البشوشين عكس بعض الناس اعوذ بالله
صور ولا اروع

سجلني من متابعينك

الله يحييك اختي ومثل ما تفضلتي الحجز المبكر والترتيب قبل السفر من اهم عوامل نجاح الرحلة بعد توفيق الله ..

شاكر لك وتشرفنا متابعتك .

اقتباس : المشاركة الأصلية كتبت بواسطة فيصل

مشكلتنا يدققون علي جوازك أذا رحت تايلندا واذا حاب تجدد الجواز اذا انتهي تطيح بعسكري بيعقدك وفيها مسائله
ومو فاضي والله أكلم الشباب مع أن الجوازات والله فيها معارف كثيره بس ما أحب أكلم أحد
ويمكن هالشيء زين لكم لأن ربعنا أذا غزو تايلندا بتشوفون أسعارهم غير ولا وش رأيك يا فهد

هههه صدقت ... والله ما اذكر اني شفت الا سعودي وزوجته واثنين شباب بس والغالب اماراتيين وعمانيين وكويتيين .

حياك فيصل منور التقرير

اقتباس : المشاركة الأصلية كتبت بواسطة كون تيب

رووووعة اخوي فهد

مشكووورة

HUNTERمعجبون بهذا.

فهد المنيع · 26-05-2015, 04:23 PM

عدنا من جديد

اليوم الرابع من تواجدنا في شانقماي قررنا ما نروح رحلات لاننا مجهدين وحبينا نريح وناخذ لفة في المدينة .. قلنا نغير من التكاسي وناخذ جولة في المدينة على التوك توك وهو عبارة عن دباب ووراه زي العربه تاخذ شخصين .. قلنا تجربة جديدة خاصة ان الجو في شنقماي روعة وغيم ومطر

جولة في المدينة على التوك توك
في الصباح الباكر وبعد ما انتهينا من الافطار في الفندق نزلنا للشارع لقيت لي واحد معه توك توك وقلت له ابي آخذ لفه على المدينة قالي تدفع 200 بات الف بك و اوديك لمصنع الحرير ومصنع الجلديات والتحف والعسل والذهب وشغلات واجد وقال بتقعد ساعه او ساعتين او عشر بنفس السعر.. قلت له 100 بات ركبنا معك والا مشكور ... قال بـ 200 بات ... شوي الا عجوزما ادري وين طلعت لنا منه .. وتكلمه وتهوش عليه هع هع سلامات

طلعت امه ناطله اذنها عندنا وجت تهوش عليه وتقول خذ 100 بات لا اتوطى في بطنك خخخخ المهم وافق على 100 بات (ما يعادل 11 ريال) وركبنا

وهذي صورة التوك توك مع الاجودي اللي ودانا

يا حليله مغمض من زود الادب

شغل الدباب ودعس بنا والهواء يهفهف وبراد على كيف كيفك ...

قعد يتمشى بنا في شوارع شانقماي وبصراحة متعة ذا التوك توك خاصة اذا كان الجو حلو وانصح زوار تايلند بتجربته وبالتحديد في شنقماي لان الجو يساعد ..

وصلنا لمعرض الحرير وهو عبارة عن معرض كبير للحرير من ملابس ومفارش واقمشة والعاب وهدايا وبراويز واشياء كثيرة مصنوعة من الحرير ..مسوين هم حركة حلوة تفيدهم وتجذب السواح ... اول ما توصل يستقبلونك استقبال حلو ويدخلونك ويمرون بك على كل مراحل صناعة الحرير من شكل الدود في البداية الى كيفية تكوين الحرير ويورونك الآلات والناس وهي تغزل الحرير ويشرحون لك كل المعلومات من إلى ...

وفي الاخير تدخل المعرض اللي فيه منتوجاتهم وشي طبيعي بتشتري لانك بتستحي عقب هالشروحات تطلع ما شريت هع هع

المهم تفرجنا على منتوجاتهم وشرينا بعض الاغراض وهذي صور للمكان

وهذي صور المعرض او الحرير في شكله النهائي

بعدها رحنا لمعرض الذهب وهو عبارة عن صالة كبيرة فيها اشكال وانواع الذهب والفضة والألماس ونفس الطريقة يستقبلونك ويمرون بك على الذهب ويحاولون يقلبون راسك بس المشكله هنا اذا بغيت تشتري بتدفع مبلغ وقدره يعني ماهي فوطة مصنوعه من الحرير تشتريها تسكيت هع هع والا فيل صغير مصنوع من القطن هع هع ... المهم قلت للمدام ابشري بالخير ... واخذنا فيه لفة وصراحة اسعارهم مناسبة وجيدة مقارنة بالاسعار عندنا في السعودية ...

هذي صور لمعرض الذهب

طلعنا من الذهب ورحنا لمحل يبيع العسل واستقبلونا استقبال مميز كعادتهم وجاء واحد يتكلم لغة عربية وقال تفضلوا ودخلنا في غرفه مكيفة وفيها طاوله وكراسي وقعد يشرح عن العسل وانواعه وقعد يذوقنا .. طبعاً انا اقدر اقوله شكراً وامسك الباب ولا يقدر يقول شي لان المسألة حرية شخصية .. لكن ماخذينها على سعة الصدر ونحاول قدر المستطاع ما نأثر على الميزانية ... المهم الرجال ذوقنا من العسل وقال انه يجي من الجبال وطبيعي جداً وبدون سكر وشريت منهم كيلو بـ 160 ريال تقريباً وبصراحه بعد ما رجعت تحسفت اني ما اخذت اكثر لجودة العسل ولرخص سعره مقارنة بالاسعار عندنا .. وهذي صور للمكان

بعدها رحنا لمعرض الجلود وهو عبارة عن منتجات كلها مصنوعة من الجلد مثل الشنط والجزم (اعزكم الله) والاحزمة والمحافظ واشياء كثيرة

اول ما دخلنا لقينا هالمملوح عند الباب ... شكلهم مخططين على الفرو حقه

بس ما اعجبنا المعرض والاسعار شوي غاليه فطلعنا من المكان ..

طبعاً في هالفترة قعدت افكر في راعي التوك توك شلون ياخذ 100 بات وهو مضيع كل هالوقت واللي زاد استغرابي انه اعجبته السالفه وناوي يمر بنا على كل معارض شنقماي هع هع !!

اثاري المملوح ياخذ عمولة من كل معرض يمره هههههههههه

المهم ملينا وقلنا يكفي رجعنا للفندق...

ريحنا في الفندق والعصر طلعنا لمجمع Pantip Plaza القريب من الفندق وهو خاص بالاجهزة الالكترونية والكميرات والجوالات والكمبيوترات والاجهزة الكهربائية .. بس ممنوع دخول الكميرا .. تسوقنا وشريت شنطة للكاميرات الاحترافية فيها اماكن للعدسات وجميع مستلزمات الكميرا .. وبعدها رجعنا الفندق ..

طبعاً اليوم التالي بتكون رحلتنا لجزيرة بوكيت فقلنا نستغل باقي هاليوم وسمعنا عن شي اسمه نايت سفاري وهو عبارة عن سفاري ليلية فقلنا نحلل الليلة الاخيرة في شنقماي..

النايت سفاري

دقيت على الاخ حمزة (مكتب مهاجرين) وقلت له ابي اطلع سفاري الليلة وحجزت من عنده بـ 500 بات للشخص يعني ما يعادل 56 ريال وتبدأ الساعة 8.45 مساءً

النايت سفاري عبارة عن عربات تمشي في وسط غابة فيها حيوانات كثيرة منها الاليف ومنها المتوحش ويوجهونك ما ترفع صوتك في الكلام ولا تستخدم الفلاش في الكميرات عشان ما تنزعج الحيوانات لانها مطلوقه بدون شبك او شي ... المهم ركبنا وصاروا يمرون بنا على كل نوع ويولعون بالانوار عليها ويشرحون عنها ويروحون للي بعدها وجلسنا على هالحالة لمدة ساعة او اقل شوي .. وبصراحة البرنامج اعتبره عادي جداً مقارنة بتجهيزات المكان والتنظيم الرائع .. والسبب اننا ما نشوف الحيوانات زين ولا نقدر نصور بسبب ضعف الاضاءة ومنع الفلاش يعني مكان عادي من وجهة نظري .. وهذي بعض الصور واعتذر لقلة الدقة بسبب ضعف الاضاءة في المكان ..

بعدها قدموا لنا عروض للنوافير (ضمن التذكرة) وهي عبارة عن نوافير معها اضواء مصاحبة وتسوي اشكال والوان جميلة

بعد انتهاء عرض النوافير مرينا معرض فيه اشياء تذكارية عن المكان وصور للحيوانات ..

وانتهت رحلة النايت سفاري ورجعنا للفندق لتجهيز الشنط والاستعداد للسفر لجزيرة بوكت ..

قبل ما انتقل لبوكيت حبيت اذكر بعض الاماكن اللي سمعنا عنها في شانق ماي ولا زرناها ، اما بسبب ضيق الوقت او لعدم رغبتنا الشخصية فيها لكني بذكرها عشان الجميع يستفيد من المعلومات ويبحث عنها بشكل اكبر اذا هي تستحق الزيارة او لا ..

- قبيلة الاعناق الطويلة – شانق راي – المثلث الذهبي – المدينة العتيقة – عروض القردة والافاعي – العين الحارة

وبكذا انتهت مدة اقامتنا في شانقماي (4 ليالي) وكانت ولله الحمد جميلة ومميزة والجو فيها رائع ومعها راح انهي هذا الجزء اللي اتمنى يكون مميز وجميل وان شاء الله نكمل رحلتنا الى جزيرة بوكيت ومافيها من رحلات بحرية وتغطيات كثيرة ان شاء الله ...

وصلى الله وسلم على نبينا محمد

أبن السلطنة, منصور, alnamela و 1 آخرون معجبون بهذا.

حبيبي الله · 26-05-2015, 04:58 PM

ما شاء الله عليك ما خليت شئ ما ذكرته في شيانغ ماي شكرًا لك ولا تنسانا بأسعار الرحلات ببوكيت وبانكوك

فارس من خيال · 26-05-2015, 09:24 PM

ماشاء الله تقرير من العيار الثقيل
تايلند بلد جميل ويستحق الزياره التقرير مميز بكل تفاصيله وصوره الجميله
بدأت اغير فكرة السفر لكوريا شكلي بستقر ع تايلند واكنسل كوريا ايش رايك
تايلند - اليابان - هونغ كونغ
اخوي فهد انا مستغرب طلعت التاشيره من الرياض ليش مو ممنوع
انا اذكر واحد من الزملاء مدمن تايلند بس يقول انه يفيز دائما من المطار
متابعين معاك بقية التقرير الجميل

فيصل · 27-05-2015, 06:47 AM

اثاري المملوح ياخذ عمولة من كل معرض يمره هههههههههه ايا السرسري

خخخخخخخخخخ
فكر ما فيه معلوم
هذي طريقتهم في ماليزيا وسريلانيكا وبكل مكان يا أخي حتي الباص اللي يأخذ ناس من الرياض عمره اا وقف في حلبان او اي ديره يدفع له راعي المحطه
ناس تجيب زبون فيه تسويق
شكرا لك علي تقرير المدينه الجميله

كون تيب · 27-05-2015, 08:26 AM

ياسلام عليك اخوي فهد ننتظرك في تقرير بوكيت اخوك كون تيب[you]

قصة حب · 27-05-2015, 01:42 PM

خووووووووووش رحلات حلوة

والصور رائعه جدا

تسلم يمناك

وصحيح مثل ما قال بو خالد

هم ياخذون عمولات

في ماليزيا شفتهم يختمون على ورق عندهم لما وصلنا لمصنع القهوة

وبتايلند نفس الشي

ذكرتني في بوكيت وايامها الحلوة

وبخاطري الكازو الحين والمصنع مالهم يونس لازم اشتري كل ما اروح

منتظرين حكايات بوكيت الجميله

متابعه وبقوة ،،،،،،،،

فهد المنيع · 27-05-2015, 07:58 PM

اقتباس : المشاركة الأصلية كتبت بواسطة حبيبي الله

ما شاء الله عليك ما خليت شئ ما ذكرته في شيانغ ماي شكرًا لك ولا تنسانا بأسعار الرحلات ببوكيت وبانكوك

ابشري اختي .. تابعي معنا وما يصير خاطرك الا طيب

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
المطارات في تايلند	BKK	بوابة تايلند	14	12-01-2018 10:56 PM
تاي في تايلند....... مباشر	تاي بن تاي	بوابة تايلند	255	25-01-2016 10:43 AM
بتايا تايلند	شارلوك هولمز	بوابة تايلند	28	17-04-2015 08:07 AM
تايلند في شهر ابريل ..	r.f	بوابة تايلند	3	26-02-2015 07:38 PM
رحلتي الى تركيا هل من معين	دروب	تركيا	5	10-02-2015 03:20 AM