نكمل معكم تقريرنا عن جزيرة بوكيت الرائعة
الرافتنق (Whitewater Rafting)
الرافتنق عبارة عن ركوب الزوارق المطاطية داخل النهر وبصراحة مغامرة ممتعة جداً وراح اتكلم عنها ان شاء الله بتفصيل اكبر في هذه الرحلة
سعر الرحلة للشخص : 1900 بات = 211 ريال تقريباً شاملة ركوب الفيلة والجواميس والدراجات النارية وركوب الرافتنق (5كيلو) مع المواصلات من والى الفندق
انطلقنا في الصباح الباكر وبالتحديد عند الساعة 8 صباحاً .. اخذنا الميني باص الى مكان التجمع وطلعنا في باص كبير مع مجموعة من السياح الى الرافتنق وبصراحه موقعه بعيد جداً لانه يقع في شمال جزيرة بوكيت وبالتحديد في منطقة الجبال ..
توكلنا على الله وقطعنا الطريق في اكثر من ساعة وفي هالوقت المرشدة السياحية تعطينا معلومات عن الرحلة والاماكن اللي راح نجيها ,,
وصلنا لاول محطة وهي عبارة عن منتجع فيه بعض الفعاليات البسيطة .. بدينا بركوب الفيلة .. تاخذك في جولة بين الاشجار
بعد جولة الفيلة رحنا لمضمار الدبابات .. تاخذ لفتين بالدباب
بعدها ركوب عربة خشبية تجرها الجواميس
بعدها رحنا لمكان عروض الفيلة .. يعني تسوي حركات استعراضية ومساج لبعض الجمهور
هذا شاب كويتي خربها وتطوع ياخذ مساج من بين الجمهور هههه يا رب يشوف صورته في هالتقرير
وبعد عروض الفيلة طلعنا من المكان ورجعنا للباص عشان ياخذنا للمحطة التالية .. لكن قبل الانتقال حبيت اوضع ان الفقرة الاولى من الرحلة عادية جداً ووقتها قصير فاذا بالامكان الغاءها من البرنامج والابقاء على الرافتنق فقط يكون افضل واوفر من وجهة نظري ..
انتقلنا للمحطة الثانية وهي الرافتنق ..
توقف بنا الباص ووزعونا على سيارات عشان ننتقل لمكان الرافتنق لانه في مكان مرتفع وصعب الباص يوصل له ..
وركبنا في صندوق السيارة والسواق حاط رجله ويمشي بسرعة بس الطريق حلو وبين الغابات
وصلنا لمكان الرافتنق وهو عبارة عن نهر مليان احجار كبيرة مسوين فيه سد يحبسون المويه ويجهزون الزوارق المطاطية وكل زورق يركب فيه 4 اشخاص بالاضافه لشخصين يقودونه ويوجهون الركاب للتجديف بعد ما تجهز الزوارق يفتحون السد وتدفعك المويه في النهر وتواجه احجار تسوي لك مطبات وطوله 5 كيلو صراحة تروح في غمضة عين من متعة التجربة
طبعاً يعطونك وسائل سلامه مثل الخوذة وسترة النجاة ويوفرون لك صناديق تحط فيها اغراضك وتاخذ المفتاح معك
اول ما وصلنا للمكان شربنا بعض الشاي والقهوة والمرطبات في الاستراحة وعطونا بعض التعليمات عن الركوب وطريقة التجديف وشرحوا لنا الوضع بشكل عام ..
بدوا العمال ينزلون الزوارق على جال النهر ويتأكدون من سلامتها بعدين وزعونا كل 4 في زورق وركبنا وعطونا مجاديف وتجلس على طرف الزورق وتدخل رجلك في الحبال الموجودة اسفل الزورق عشان تثبت ..
ويفتحون السد وتنطلق الزوارق .. يمكن في حدود الثلاثين زورق او اكثر وهذا اللي عطى التجربة متعة وحماس ونمشي بسرعة وكل حجر يصادفنا او نزله يكون فيها اهتزاز وقفز للزورق لكن الحمد لله بدون ما نطيح لان الوضع جيد والمكان ماهو بذيك الوعوره والطريق كله متعه وضحك وصراخ .... وفي نص النهر فيه استراحه مائية وسيعه ننتظر في القوارب لمدة 5 دقايق وبعدها نكمل الانطلاق وكل ناس يرشون المويه على الزورق اللي جنبهم بالمجاديف ههههه والكل يضحك ويمزح مع الثاني والطريق كله مطبات ومطافش الى ان وصلنا للنهاية وهذااجمل مافي الرحلة لان فيه متعة وتجربة جديدة ...
ومن الاستحاله التصوير في هالمكان لانك تنزل رابص مويه وكل اهتزازات فما قدرت اصور التجربة في وقتها ..
تمنيت معي كاميرا قو برو كان قدرت اوثق المغامرة لكن خيره ان شاء الله
بعد ما انتهينا من الرافتنق اخذونا بالسيارات لنفس المحطة اللي حطينا فيها اغراضنا ولما وصلنا لقينا وجبة الغداء مجهزه عباره عن بوفيه مفتوح
تغدينا وشربنا الشاي وريحنا وبعدها خذونا لشلال داخل الغابة للسباحة
وبعد السباحه رجعونا بالسيارات للمحطة اللي فيها الباص وبكذا انتهت رحلة الرافتنق الممتعة ورجعنا للفندق قبل المغرب بقليل منهكين من الرحلة ..
لذلك انصح اللي يروح فوكيت ومعه عدد ايام كثيرة يخلي يوم رحلة ويوم راحة لان الرحلات فيها ارهاق ..
حتى اذا رجعت اخر النهار تصير تعبان ولا تقدر تلف بالليل وتتمشى من التعب ..
199الاعجاب
02-06-2015, 12:44 AM
رد: ياعيون الكون غضي بالنظر ،، اتركينا اثنين عين تحكي لعين (تقرير تايلند) 
العرض الشجري
المواضيع المتشابهه 
