ومشى الباص وبدينا نطلع من حدود المطار وشدني هالمجسم ..










قمت ادقق فيه واتسائل ايش هاي ؟؟



قنبله ... لا مااعتقد في حد يسوي مجسم لقنبله جدام المطار ..


زيتونه ... يمكن بس اش دخل الزيتون بايسلاند ..


باذنجانه ... لا اش دخل الباذنجان في المطار ..


وبعد التعمق بالشكل اكتشفت انه بيضة ديناصور وذيل الدايناصور طالع من البيضه .. يعني البيضه قريب تفقس










وطلعنا من حدود المطار ... ومشينا في طريق طووويل مافي شي حولنا لايمين ولا يسار اللهم بين فتره وفتره تمر سياره جنبنا










ساد الصمت المكان عيونا على الشبابيك نشوف وندور ... المكان كما قلت لكم سابقا .. كانه ملعب كورة قدم كبيييييييييييييييييييييييييييييير مافيه الا حشيش وغيوم ..








بين فتره وفتره نلمح بنايات بعيده وبسيطه .. المكان خالي من معالم الحضارة ...







حسيت الكل ساكت ومنصدم ... حاولت اكسر الصمت الرهيب و اجس النبض ، قلت لهم جنه مافي شي حولنا ... الا ترد علي خالتي وتحاول تلطف الجو .. عادي الزين في سفرنا ان احنا مانطول في المكان سواء كان حلو المكان ولا مب حلو بنقعد كم يوم وبنروح مابتضيع السفره كامله .. قلت لها ان شاء الله المكان بيكون حلو وبتستانسون ... اضحكت ضحكت مجامله ههه ان شاء الله وعينها على الشباك








رجعت تسندت وكملت تأملي بالشارع والمكان حولي



من بعييييد كنا نمر على كم بيت بس مانشوف حركة ملحوظه












شفت بعيد مجسمات كبيره من الصخور في مكان مافي شي غير هالمجسمات







تدرون شنو هاي ... هاي لافته عليها اسم قريه او مدينة ... نعم هذه مدينة .. لكنها خاليه تماماً مافيها الا حشيش ولافته













وانا قاعده اشوف واحاول ادور شي من الاشياء الي تعودت عليها في كل المدن الي زرتها ... مثل الاشجار ، البيوت ، الجسور ، ليتات الشوارع .. السيارات أي شي ... مالقيت شي يشبه أي دوله اخرى ...












وتذكرت كلام صديقتي ... لما قلت لها اني بروح ايسلاند ... قالت لي بتروحين ايسلاند ...؟؟؟ عاد تعرفين اش بتسوين وين بتروحين هناك ولا بتوقفين في الشارع تتلفتين تدورين شي تسوينه ...



حسيت هاي الي قالته واقع ... يحكي لسان حالي













وشوي قمنا نشوف المسطاحات المائية مخلوطه ببحيرات صغيره .. كان شي مختلف







ومن بعييييد بدت معالم الحضارة تبين لنا .. بيوت وبنايات واحنا نتجه لها قلت اكيد قربنا من العاصمة










لما قربنا من المدينة .. نطقت خالتي وقالت .. باين ان البلد كلش مب متطورة






قلت لها .. لا هي مب متطوره من حيث البنيان .. هم ناس بسيطين وحياتهم بسيطه العاصمه مافيها عمارات و فن عمارة و هالسوالف .. عايشين بإسلوب بسيط وعادي










مرينا ببحيره جدا جميله ... ورايقه










وقربنا من سكنا الكائن في وسط العاصمة ..












العاصمة هي ريكافيك ... ماكنت اعرف انطق الاسم الى ان وصلت ايسلاند وسمعت الناس شلون ينطقونها .. لانها تكتب بهالطريقة ..



reykjavik



جزء قصير ... تقبلوه مني لهذا اليوم ..



وللحديث بقيه

البيوت والبنايات كلها شبه بعض تقريبا بس الوانها تختلف المكان كأنه لعبه







وواضح جدا ان الجو بارد وجميل كما نحبه










ووصلنا لين الفندق ..



في ريكافيك اغلب الفنادق على هيئة شقق فندقية ... مستواها جيد والفنادق قليله ...


كنت باحجز غرف في فندق .. بس فكرت ان الاكل لو ماكان كما يجب في المدينة ... افضل ان يكون عندنا شقة فندقيه فيها مطبخ صغير نقدر نجهز لنا اكلات بسيطه وايضاً عشان الوسع ...



الشقق اسمها ..


home luxury apartment


موقعها بالضبط في نص السنتر وشارع التسوق والي هو افضل شارع في ريكافيك العاصمه بجانبنا على طول ...







شكل ماتشوفون ان حجزنا 3 غرف بسعر 2355 يورو لمدة 5 ليالي يعني سعر الليله للغرفة 157 يورو لليله يعني مايعادل تقريبا 780 ريال قطري لليله للغرفة الواحدة ...



الشيك ان كان في مدخل شقق فندقيه اخرى واعتقد انهم كلهم واحد بس باختلاف الاسماء اسم الشقق الاخرى K apartment لما دخلت اسوي شيك ان عندهم لقيت طابور طووووووووووووووووويل



كلهم صينيين ومسوين ازعاج ويسولفون بصوت عالي



ولين شفت الموظف على طول جاني وقالي نعم راويته حجزنا وقال جدامك كل هالصينيين وكانو فوق ال 40 واحد .. وبعدين اقترح انه يجدمني عليهم بما اني اقل منهم



سألهم بصوت عالي ممكن اخلصهم قبلكم وقام المترجم ترجم للصينيين السالفه



الا كلهم قالو اووكي اوووكي اووووكي



وخلصنا وعطونا المفاتيح ورحنا لين غرفنا ...



صار موقف طريف



الصينيين صار بينهم لخبطه في موضوع الحجوزات وفي ناس تلخبطو وصارت مشكله بسيطه لاتذكر ..



لكن بالنسبه للايسلنديين ان هاي مشكله غريبه



تخيلو ثاني يوم لين جانا امير ياخذنا يسيحنا ..



قال لنا بستغراب



يقولون ان امس صارت مشكله مع قروب الصينيين صج ولا لا ..







ضحكني حسيتهم يحليلهم متخرعين ماتصير عندهم مشاكل ترا الي صار شي لايذكر ابدا خخخخخخ



المهم ...



لين رحنا نستلم غرفنا خالتي كانت بالدور ال2 ومافي اسنسير فضطرو بمساعدة بعض العمال حمل حقائبهم الى الاعلى وهاي اسوء شي



اما احنا غرفتنا كانت في الدور الاول ونصعد سلالم بس قليله ..



خلوني ارويكم غرفنا



هاي سريري انا واختي







وهاي طاولة الاكل و السوفا بد وفوقهم تلفزيون بالنسبه لنا ماحتجنا السوفا بد ولا التلفزيون








وهاي المطبخ .. فيه فرن ومايكروويف و ثلاجه و غلاية ماء و توستر وكلشي ممكن تحتاجونه








اما الحمام فقصته قصة ... اتذكر اول مادخلت غرفة خالتي شفتها متضايقه وتقولي سكري باب الحمام فييه ريحه مب نظيف .. رحت طليت فيه شكله نظيف لكن ريحته خايسه وشغلنا المروحه الشفاطه عشان الريحه تخف وعقب طلعت رحت غرفتنا ولين رحت اشيك الحمام .. شميت نفس الريحه ونفس الشي فتحت المروحه الشفاطه و انا من طبعي لازم اودي معاي لين اسافر مبخره الكترونيه وعود او شمعة بريحة وكنت موديه معاي مبخره الكترونيه رحت فتحتها وحطيتها في الحمام ... ولما رحت اشيك حمام امي نفس الشي الريحه نفسها موجوده وهم ايضا فاتحين الشفاطه .. ففسرت الموضوع ان المجاري عندهم ريحتها فايحه و من خبرتي في الحمامات خخخ ان الحمام اذا كان نظيف والريحه من المجاري فان الشفاطه تزيد الطين بله وتطلع ريحة المجاري اكثر فنصحت الكل انهم يسكرون الشفاطات ... وفعلا لما سكرنا الشفاطات الريحه خفت بس مازالت موجوده ... و اليوم الثاني لين طلعنا مع امير اخبرنا ان مياه الصنبور هي مياه معدنية طبيعيه وان مياه الصنبور الساخنه تجي مباشرة من تحت الارض الى الحمام وهذا يعني ان المياه كبريتيه مسخنه عن طريق البراكين الموجوده تحت الارض ... وهذا الي يفسر ريحة الحمام ... ريحة الحمام هي ريحة المياه الكبريتيه .... لما عرفنا السبب تقبلنا الموضوع و توقفنا عن التذمر ... بالذات ا المياه الكبريتيه مفيده جدا للبشره وللاستشفاء من الام المفاصل ...








الدوش ماعجبني بس كان ممشي حاله








انا عادتا احب البانيو بالذات في البرد احب اخذ حمام ساخن في البانيو بس يالله شنسوي بعد ..



وهاي السوفا بد والقعده ..








المطبخ







طاولة الكي والمكواه والمكنسه الكهربائية









وغرفتنا لين نفتح الباب نشوف حوش صغير والشارع الي جدامنا هاي هو








كل الغرف بنفس الموديل مع اختلافات بسيطه مثلا هاي سرير امي






تصنيفي للشقق انها جيده .. مساحتها جدا معقوله .. نظيفه .. وممكن ان احنا نطلب خدمة الغرف كل يومين مره وهاي عيب طبعا مب ميزه ان غرفنا مب كل يوم تتنظف بس واحنا هناك ماخليناهم ينظفونها لان ماتصلنا لهم ماكنا فاضيين .. الانترنت في الغرف مجاني .. وحولنا كلشي تتخيلونه مطاعم وكوفي شوبات ، سوبرمركتات مغسلة ملابس موقف للتكاسي .. يعني الموقع سوبر .. بس مستوى الشقق جيد



ايضا يوجد في الغرف تقريبا 4 مدفئات وواحده في الحمام المجموع 5 دفايات في كل غرفه ومافي مكيف هواء لان اصلا مافي داعي للمكيف كنا احيانا نفتح الدفايه وننام



في هذه الاثناء بعثت رسالة بالجوال لامير اخبره ان احنا وصلنا الفندق فرد علي خلاص نص ساعة وبكون عندكم ...



والسبب هو الله يسلمكم ... من كثر ماهو متحمس للقائنا عرض علي انه ياخذنا لجولة بالاقدام في العاصمة ريكفيك يعرفنا على اهم معالمها و يحكيلنا بعض قصص الشعب الايسلاندي وهذا الشي ببلاش وراح يكون هديه منه لنا ... تخيلو جولة سياحية بالاقدام مع مرشد محترف ببلاش وبدون أي مقابل ... وقالي بالايميل ان احنا نختار الوقت الي يناسبنا واذا كان العرض عاجبنا .. فطبعاً رديت عليه بايميل ان هاي كرم منه واكيد بنقبل هديته ... وعلى قولت القايل انا غنيه واحب الهديه خخخ


.....



في موضوع حابه اذكره



بينما انا وامير كنا نتفق على الرحلات بالايميل .. تذكرت طبع الاجانب ... ان هم لما يقابلون أي حد عادي يسلمون عليه باليد ويحتضنونه عند الوداع .. وطبعا لاني مابي انحط في هالموقف المحرج قررت اخبره مسبقاً بهالشي



وارسلت له بالايميل اني حابه اقوله معلومه تخص ثقافتنا وعاداتنا واتمنى انه يتقبلها بصدر رحب وهي ان الحريم عندنا والرياييل مايتصافحون باليد ... وان أي نوع من التلامس الجسدي بين الحريم والرياييل غير الاهل يعتبر غير مقبول ابدا ابدا ... وايضاً اخبرته اننا لانشرب أي نوع من الكحوليات ولا ناكل أي شي فيه نسبه من الكحول او لحم الخنزير او أي منتج من منتجات الخنزير


رد علي بصدر رحب انه سعيد باني اخبرته بهالمعلومه وانه يحترم عاداتنا و بيحط هالنقطه في باله وشكرني لاني خبرته هالمعلومه ....



وفعلا طول الفتره الي كنا فيها مع بعض ابدا ما تعدى هالخط الاحمر الي رسمته له بالعكس تقبل من امي تصرفات تجيب العيد هههههههه



وللحديث بقيه

وفعلا ماصارت 10 دقائق الا وامير اسفل البيت انا كنت كل شوي اطل من باب البيت اجيك اذا وصل ولا لا .. وطبعا لما وصل اتصلي وانا رديت وطلعت له ... ويحليله كان في قمة الاحترام والتواضع والسعادة برؤية سياح من بلد بالنسبه له لم تكن من ظمن خارطة البلدان الي يعرفها ...



ناديت امي واخواني وخالتي وبناتها وتجمعنا كلنا عند الباب نعرف امير علينا ...



قبل مانجي لايسلند كنت افكر اجيب لامير هديه معاي من قطر وكنت حابه اجيب له شي يرمز لطبيعة حياتنا ... فقلت اكيد في فالمطار شي عليه كلمة قطر ..



وفعلا لما رحت المطار قلت لخالتي الفكره وقالت خلاص انا بعد بشتري له هديه .. فقلت لها اوكي ..



اختارت هي تشترله تمر بالسمسم ..



وانا شريت له جمل مكتوب عليه قطر .. و مثل الصحن الصغير الي يحطون عليه الكوب على شكل رجل لابس غتره وعقال وثوب ..



----



بعد ماعرفنا امير علينا ... عطيته الجمل و الصحن الصغير وقلت له هاي هديه بسيطه منا لك ... وخالتي عطته التمر ... مبدأيا ماعرف التمر قام يشوفه ويقلب العلبه .. قمنا شرحنا له ان الي داخل تمر بالسمسم والعسل وانه حلو ..


شكرنا وكانت تعابير وجهه كانه فرحان ومنحرج وحسينا انه طيب مسكين وخجول ههههه



واستانس وايد على الجمل وقال انه بيعتبره جمل الحظ وبياخذه معاه في كل رحلاته ...








وبدأنا الجولة التعريفيه في العاصمة مشياً على الاقدام .. طلعنا للشارع الرأيسي ونزلنا للجنوب








ولو ملاحظين لوحة مكتب السياح .. وهو قريب جدا جدا من بيتنا






لو اتجهنا شمال نروح للسوق و شارع المشاه واذا رحنا للجنوب نروح جهة المطاعم والكافيهات



واحنا رحنا جنوب













عدد سكان ايسلند تقريبا 310 الف نسمة .. لذالك مانشوفها مزدحمه والكل عايش بسلام ووئام ... تدرون تذكرت قطر قبل ... كنا 300 نسمه الشوارع فاضيه ومافي زحمه ننام واحنا مطمئنين وكل واحد يعرف الثاني .. ننام وبيبانا مفتوحه لا عمرنا سمعنا عن سرقة ولا جريمه ولا أي شي من هالسوالف ... وكانت اكبر حادثه نسمع عنها ان فلان دعم بسيارته و تعور ...



بالضبط هم نفس الشي ويمكن احسن



آمنين في بلدهم .. سماههم على وجوههم طيبين وخلوقين جدا جدا .. على فطرتهم وعفويتهم ... مايأذون بعض و لايقلون ادبهم على بعض .. المهم



وصلنا لين منتصف المدينة بالضبط وفي حديقة صغيره فيها كراسي للاطفال









وبعض النصب التذكاريه الي نسيت هي تذكار لايش















وهاي هو امير وشايل الجميل بايده ويشرح لنا الاماكن










ومازلنا نمشي وراه























وهاي امي و بنت اخوي الصغيره في اخر الركب .. اهني توقفنا مع امير وقام يكلمنا عن البلدية والحكومه الايسلندية .. وامي ماكانت فاهمه لانها ماتتحجى انجليزي فتركتنا وقعدت على احد الكراسي هي وبنت اخوي اشوي الا اشوف شايب ايسلندي راح لهم وقام يلعب بنت اخوي ويبتسم لها ... عادتا الاجانب مايسوون هالشي لكن الايسلنديين غير بسيطين










وهاي هو مبنى البلدية او الحكومة ..






يقول امير .. ان الدولة تحكمها الكنيسة والكثير من القرارت تخرج من الكنيسة .. وانه بعد ازمة البنوك في الفتره بين 2008 و 2010 وعند خسارة 3 بنوك ايسلندية كانت مملوكه للحكومه صارت الدولة في ازمة اقتصاديه لحد الحين يعانون من هالازمه .. واصبحت الديون على ايسلندا اكثر من السيوله الي عندهم ... و يقول ان بريطانيا احد الدول الي تطالب ايسلندا فلوس .. وقال لنا بكل زعل واسف واحراج ... ان الشعب الايسلندي لن ينسى الاهانه الي جاتهم من رءيس الوزراء البريطاني (( اعتقد مااذكر بالضبط من )) يوم طلع في التلفزيون وقال


Iceland we want cash not ash



يعني ايسلاند نبي فلوس مب رماد ... قصده ردولنا فلوسنا الي نطالبكم اياها بدال ماتعطونا رماد البركان ...



ويعتقد الايسلنديون ان هالشي غير لائق وانه جرحهم ...



الشعب الايسلندي ايضاً تعب من سالفة الديون .. ويطالب الحكومه توقف الضغط عليهم في سالفة الضرائب وهالاشياء عشان تسدد الديون بالمقابل ...








ويقول امير .. ان مره من المرات الشعب ثار على الحكومه وسوو مضاهرات .. وبدال مايرمون بعض بالقنابل قامو يرمون مبنى الحكومه بالعصي والفؤوس (( حمع فأس )) كما كانو يعملون الفايكنج اجدادهم






وهاي مبنى البلدية من الخلف .. وتوجد في الخلف حديقة على شكل الشمس








يقول امير ان الديانة الرسمية للبلد هي المسيحيه ولكن هناك قله وهو واحد منهم وقع في الكنيسه انه ليس مسيحياً و اتبع دين اجداده الفايكنج وصار يعبد اله قوى الطبيعه الي هو في اعتقادهم يسمونه ثور THOR ,, وفي افلام وايد نازله باسم ثور الي هو اله الطبيعه ..


والشمس هي رمزهم ويقول رغم ان البلديه لاتعترف الا بالمسيحيه كدين رسمي لكن رمز اله الطبيعه الي هو الشمس مرسوم في حديقتهم ..








و كملنا طريقنا لزيارة مكان اخر






والجدير بالذكر انه راح يتزوج وحده مسيحيه وهاي اول مره تصير عندهم ان مسيحيه تتزوج واحد من دين الفايكنج فهو اقترح يجيبون مطوع مال دين الفايكنج ومطوع مسيحي ويتزوجون بالطريقتين المسيحيه والفايكنجيه






الجو صار بارد وصوت النورس والبط حولنا و بحيرة جميله بجانبا














توقفنا عند البحيره .. وقال لنا امير انه يجيب بنته (( هو مب متزوج بس عنده بنت من صديقته القديمه خخ )) تاكل البط والعصافير دائما ..



ويقول لو عندنا خبز جان اكلناهم ... ولما شاف بنت اخوي .. قال تدرون بنعطيهم من الاكل الي جبتوه ... عاد انا استغربت ماخبرت البط ياكلون تمر .. فتح العلبه و اكل حبه و انبهر بالطعم وقال وااااااو هاي لذيذ جدا واخذ التمره الثانيه واكلها وتم يطالع التمره ومستغرب وقال شنو هاي تين ..خخخ الله يهديك يا امير من الصبح نقولك تمر مع سمسم وعسل ومكسرات واخر شي تقول تين .. قلنا له لا هاي الي ينبت من شجرة النخيل واعتقد فهم لكنه الظاهر اول مره يشوف وياكل تمر لانه جدا انبهر بالطعم وقال بعطي البط بس حبه وحده اخاف يخلص .. و فعلا تجمعو الطيور ونتف لهم التمره و عطاهم وكانت لحظات بارده وحلوه ..








هاي ماري اش سالفته































هاي البطه مصره على انها تاخذ تمره زياده ..














وبعد البحيره .. دخلنا امير الى احد المباني وقال لنا ان مكتب الرئيس يقع في هالمبنى في الطابق الثاني واذا كان موجود بنشوفه ... يعني الموضوع بسيط عندهم ولا في حراسه ولا غيره وهاي خريطة ايسلاند في النص وراونا مكانا في الخريطه ووين بكره بيودينا







وقال انه من المتوقع غداً يثور بركان ... وان شاء الله اذا ثار البركان بياخذنا عنده عشان نشوف ثورة البركان ... كنت بتشقق من الوناسه بشوف بركان ثائر يا حلاوة يا بقلاوه .. واستأذنا انه يجيب بنته اذا ثار البركان في الايام الجايه لانه حاب يراويها ثورة البركان وبيمر علينا وبيودينا معاه .. قلنا له أي عادي جيبها تشوف ... مسكين بيودينا على حسابه وبعد يستأذن انه يجيب بنته .. بس للاسف ماثار البركان خيب ضننا فلاتستانسون مابتشوفون بركان ثاير










واتجهنا مشي باتجاه المدينة القديمة


















شوفو هاي البيت الاصفر هو بيت امير و الحديقه هي حديقة الفريج .. وهم كلهم يهتمون بالحديقة







وقفنا عند الحديقة و قال لنا ان الناس في ايسلند يؤمنون بوجود الإلف (( الاقزام )) والعمالقة وهاي شكل الالف



وللتوضيح الالف ELF هو عقلة الاصبع او الاقزام الي قد عقلة الاصبع والجاينت هم العمالقة



















ولان الايسلنديين يؤمنون بوجود الالف والجاينت فهم يحترمونهم جدا ويعتقدون ان الاقزام والعمالقه هم اصحاب ايسلاند الاصليين و ان الفايكنج لما جو ايسلند وسكنو فيها مامانعو الاقزام والعمالقه واسمحو لهم بالسكن في ايسلند معاهم لهالسبب هم يحترمونهم ومستحيل يشيلون أي حجر في حفر من مكانه لانهم يؤمنون ان هالحفر هي بيوت الالف او الاقزام ولازم مايخربونها وان انوجد الحجر في نص الارض يبنون البيت حوله بطريقه ان الحجره او الصخره ماتخترب ولاتنشال احتراما للالفس






وهاي البيت الاصفر بيت امير






وقال انه ساكن في جزء والباقي مسويه مثل شقق مفروشه يسكن فيهم السياح وكان بيسكنا في بيته لو كنا ما حاجزين فندق .. طبعا بيسكنا بفلوس مب ببلاش خخخخ لاتفكرون انه بيسكنا ببلاش خخخ







و انتهت جولتنا التعريفيه في ريكافيك ودلانا على مقهى غسيل الملابس كما يسميه .. وعلى السوبرماركتات والمطاعم الي يحبها وعرفنا على المدينة .. و قبل مايودعنا قلنا له احنا ميتين من الجوع وخاطرنا ناكل شي من المطبخ الايسلندي ... قال انصحكم بالسمك فايسلند مشهوره جدا باسماك بحر الشمال ... مع ان اغلبنا مايحب السمك قلنا نجرب وين ممكن ناكل سمك ؟ وبنفس الوقت الي حاب شي غير السمك يطلب له يعني مانبي مطعم بس للاسماك .. قال لنا انه يعرف مطعم طبخه يذكره بطبخ جدته خخ واتصل يسأل اذا في حجز لان عادتا يكون المطعم مليان .. ومالقى حجز ل8 اشخاص .. فقال بدخلكم مطعم ثاني واخذنا لهالمطعم








ولما وقفنا عند الباب كان ريحته سمج ماحبينا الريحه بس ايضا كان المطعم مليان وقال لنا انتظرو دقايق نجهز لكم طاوله .. وبهالوقت جى اتصال لامير من المطعم الي يطبخ اكل نفس اكل جدة امير خخ وقال جهزنا لهم مكان اذا حابين .. وقال لنا امير جهزولكم مكان و اتحمسو بالذات لين عرفو انكم جايين من مكان بعيد



ورحنا مشي للمطعم الثاني



وبينما احنا نمشي للمطعم الثاني مرينا على هالصخره المقسومه بالنص .. ومحطوطه امام دار البلدية






وقال لنا امير ان هو يفتخر انه من الناس الي شالو هالصخره وحطوها جدام دار البلديه عشان يذكرون الحكومه ان مهما ادعت الحكومه انها زينه وديمقراطيه تضل هناك فجوه بين الحكومه والشعب

يتبع