رحلة فردية للأراضي الامريكية ... - الصفحة 4

Tamem · 11-06-2015, 12:23 AM

اليوم السادس :

قمت الصبح ورحت بعبي بنزين طبعا ما عرفت وسألت وحدة جنبي عن الطريقة خذت بطاقة الفيزا ودخلتها في مكينة البنزين وسألتني عن الرمز البريدي للي مسجل في البطاقة ولا ذكرته فدخلنا البقالة وسألتنا الموظفة عن رقم مكينة البنزين اللي موقف عندها وكم المبلغ اللي نبي نعبيه وسحبت المبلغ من الفيزا وقالت عب سيارتك وصارت لي حالات في أمور البنزين الأول اذا عطيت الكاشير مبلغ مثلا 50 دولار وعبيت بنزين وصار الحساب 45 دولار اذا رجعت لي البنزين للمكينة ممكن يطلع لك إيصال تاخذه وتعطيه الكاشير أو تتجه للكاشير مباشرة عشان الباقي اللي هو 5 دولار مرة حصلتي لي رجع لي الباقي كاش والمرات الباقية يقولون لي بيرجع لك المبلغ على الفيزا الامر الثاني غالبا اذا صار المبلغ فوق 50 دولار يطلبون هويتك فلو بغيت تعبي وما كانت معك الهوية حاول أنك ما تعبي أكثر من 40 دولار احتياطا وبعد ما عبيت توجهت إلى هوليود وقفت في أحد المواقف العامة وكانت ساعتين ب ٧ دولار دخلت الشارع على الساعة 11 ص وكان ساكن ما فيه سياح كثير قلت ابفطر ألين يرجع للشارع حيويته افطرت وطلعت اتمشى في الشارع وازعجوني حقين التور وقابلت واحد من حقين التور قالي وين انت رايح ما فيه شي ويأشر على الاتجاه اللي انا رايح له رحت وخليته وتفاجأت بالعالم كلهم هنا عند المسرح الصيني وكوداك ومدام توسان

هنا شارع النجوم والكافية اللي أفطرت فيه

هذا شكله توه ميت

هنا بدت الزحمة والسياح

هذا المحل اللذيذ بتصير له زيارة في سان فرانسيسكو

هنا مدام توسان وكانت التذكرة بـ 30 دولار

ذا شكله نفسية

في النهاية تشوف المواد اللي مسوين بها المجسمات

بعدها طلعت وبحثت في قوقل ماب عن علامة هوليود وتوجهت وكان الطريق في الجبل جميل والبيوت أجمل وقبل لا أوصل للموقع كان فيه منتزه بتشوفونه حلو الواحد يجلس فيه مع العائلة ويتغدون فيه وصلت للقمة وحاولت ألقى موقف بس زحمة عشان الويكند وبعد محاولات فاشلة عن البحث لموقف قررت اني أترك المكان ورحت أصلي في مسجد الملك فهد بعدها توجهت لمارينا Marina Del Rey
وقفت في المواقف العامة المكان هادي وجميل ويصلح للاستجمام والسكن هناك جميل بس أتوقع الاجارات غالية قعدت فيه ساعة

وبعدها توجهت لشاطئ فينكس وكان مليان محلات وكشكات وساحة تزلح وبيير وفي عروض فردية واغلبه شباب من اشكال الهيب هوب وهالطقة على الساعة ٨ بدوا للناس يقفلون محلاتهم والمفروض أني جيت مبكر قبل ساعة يعني عشان أتمشى فيه

بعدها رحت لمطعم اسمه APPLE PAN ممدوح لي وكان عادي ولا يسوى العنوة خصوصاً أنه كان في الداون تاون وليل مع هالمجرمين :

ورجعت بعدها للفندق

وكما وعدتكم من قبل مرفق أهم الاماكن اللي جمعتها من النت اللي زرتها واللي ما زرتها واللي راحت تفيدكم في اختيار الاماكن اللي بتزورونها في لاس فيقاس ولوس انجلوس وسان فرانسيسكو وسان دييقو ومعها لستة مطاعم خذتها من ترب ادفايزر سوو أنفسكم ما شفتوها

الملفات المرفقة

خطة أمريكا 2015.docx‏ (29.8 كيلوبايت, المشاهدات 115)

فيصل · 11-06-2015, 02:37 AM

شكرا علي الملف
تك الحفظ
زين انت ما كانت معاك بطاقتك او خايف يسألون وشوله رايح وتصير تحت العين علشان الجنسيه

|القحطاني| · 11-06-2015, 06:11 AM

والله موضوع رهيب ما شاء الله

أغلب الأماكن صرت أعرفها من كثر الدعايات

أما اليوم الخامس كل صورة فيه تذكرني بلعبة قراند ثيفت أوتو هههههه

واليوم السادس هالصورة جمييييييييلة

الله يعطيك العافية

hearty · 11-06-2015, 11:22 AM

روعه يا خوي هههههههههههههههههه انا كنت مسافر امريكا نفس الشهر معاك وكنت مع العايله من 6 مايو 2015 الي 27 مايو 2015 ليش ما سكنت في ايفراين مدينه جدا جميله انا سكنت في منطقة اورانج كاونتي قريبه من ايفراين الله يوفقك فعلا اميركا جميله جدا وكبيره جدا وتنوعه جدا انصح بزيارتها

مقدام · 11-06-2015, 02:46 PM

مسكين كيف نفسيه وحافي ههههههه

واصل اخوي تقريرك الرائع

آخر مواضيع مقدام

- الشمال الايطالي ثم الى بورتفينو وجنوه 2019
- رحلة شتوية الى جورجيا (تبليسي وثلوج غودوري)
- رحلتي العائلية الى الأراضي النرويجية
- كرواتيا ... زغرب وروعة بحيرات وشلالات بلتيفيتش
- جولة في ارض الطبيعه (البوسنة) .. مايو .. 2018

توقيع : مقدام

(كن _سفيرا_ لدينك_ ووطنك )
احداثيات وخرائط للاماكن سياحية شمال ايطاليا
موسوعة مقدام الامريكية ..اماكن سياحية.احداثيات.خرائط
احداثيات ومواقع الاماكن السياحية في سويسرا وما حولها
جنيف اين تذهب فيها واين تذهب منها ..
خريطة سويسرا السياحية

Tamem · 12-06-2015, 05:50 AM

اخوي وليد عنبه

حياك الله وشرفتني في الموضوع

شاكر لك إطرائك والحمد لله أنه الموضوع نال استحسانك

اختي قطرية كول

حياكِ الله وشرفتيني في الموضوع

استحسان واشادة من خبيرة في أمريكا عبارة عن وسام ذهبي لهذا الموضوع

ولو عندكِ ملاحظات أين كانت ياليت تطرحينها في الموضوع

شكراً لكِ

اخوي فيصل

لا شكر على واجب وأي شي بينفع الاعضاء والزوار سيتم طرحه إن شاء الله

وبالنسبة للبطاقة الصراحة ما فهمت وش تقصد

اخوي القحطاني

طبيعي بتشوف الاماكن متكررة خصوصا انها اول مرة زيارة وهذي الاماكن ابرز وأهم الاماكن

فهي بتكون من أولويات السائح لكن لو حصل وزرت كاليفورنيا مرة ثانية تتوقع أني بمر هذي الاماكن مرة ثانية

ما اتوقع لان الواحد في المرة الثانية يبدا يتجرأ ويستكشف مناطق ووجهات جديدة

ولا تكلمني عن قراند أيام سودا معه

شاكر لك متابعتك المستمرة

hearty

حياك الله أخوي وشرفتني في الموضوع

يا سلام عليك كل هالمدة ولا عزمتني على الغداء على الاقل

المرة الجاية قبل لا تسافر تعطيني تاريخ السفر

وان شاء الله نشوفك في الجانب الشرقي لأمريكا

شكراً لك

اخوي مقدام

والله خفت انه يطلع سكين يذبحني

بس ياليت اللي يعرف الممثل هذا أو الفلم يعلمنا عنه حبيته

قطرية كول · 12-06-2015, 04:53 PM

[QUOTE=Tamem;120962]

اختي قطرية كول

حياكِ الله وشرفتيني في الموضوع

استحسان واشادة من خبيرة في أمريكا عبارة عن وسام ذهبي لهذا الموضوع

ولو عندكِ ملاحظات أين كانت ياليت تطرحينها في الموضوع

شكراً لكِ

الله يحببك ويبقييك أخي الكريم

صدقا موضوعك يستحق الوسام الماسي وليس الذهبي فقط

أعدت لي الذكريات للحبيبة أمريكا

شاطئ del ray من أحب الأماكن لي

زيارات موفقة ومناطق نعرفها ومناطق جديدة علينا
فعلا تقرير مفيد ويثري البوابة الأمريكية وخاصة للسياح الجدد
ياريت بس تبين للأعضاء والزوار ليستفيدوا من تجربتك في زيارة الأماكن هل كنت مخزن الأماكن بالنافيقيتر الشخصي وأنت بالبلاد أم فقط اعتمدت على النافيجيشن الموجود بالسيارة وكنت تبحث عن المكان في لحظته؟

شكرا لأضافة ملف خطة بحثك وتجهيزك لسفرتك فهو إضافة مفيدة

مستمتعين ومتابعين

فيصل · 13-06-2015, 02:21 AM

قصدي الاثبات او الجواز علشان تعبأ اكثر من 50 $

Tamem · 13-06-2015, 08:01 PM

اختي قطرية كول

شكراً لكِ على اطرائك اللي ما استحقه وان شاء الله يكون الموضوع شامل نافع للأعضاء والزوار

وبالنسبة لسؤالك ومثل ما ذكرت في بداية الموضوع انا استخدم قوقل ماب بحيث أني أخذ اسم المكان من جدولي اللي نزلته لكم

وأبحث عنه في قوقل ماب وميزة قوقل ماب أنه مو بس يوصلك للمكان اللي تبيه بس لا يعطيك معلومات شاملة وتقييم من زوار المكان ومتى يفتح ومى يسكر ولو فيه مهرجان أو فعالية يذكرها لك بالتواريخ

وأن شاء الله اذا خلصت من الموضوع باحاول افرد مشاركة مفصلة للبرنامج

شكراً لكِ مرة أخرى

أخوي فيصل

والله أنا آخذ معي الجواز في كل مكان وصراحة ما أدري شغلي كويس ولا خطر

وأخاف أحطه في الفندق وينسرق بس الحمد لله أنه صار معي دايم لاني تعرضت لموقف واحتجت الجواز مره

بذكره في حينه إن شاء الله

شكراً لك

Tamem · 13-06-2015, 08:05 PM

.
اليوم السابع :

بعد ما زرت تقريبا كل الاماكن اللي في شمال لوس انجلوس قررت اليوم اروح Universal Studios استديو طبعا التذكرة شريتها من النت ب ٨٥ دولار وتذكرة المواقف ب 20 دولار قبل السفرة ولو تاخذها من الشباك في الملاهي بتطلع ب 95 دولار التذكرة اللي شريتها نوعها عادي وفيه نوع فرونت لاين تصير لك الاولوية في الطابور بحول ١٦٠ دولار وفيه نوع VIP بحول ٣٠٠ دولار تصير لك جولة خاصة ويغدونك طبعا الخطة كانت اذا صارت زحمة أسوي ابقريد للتذكرة للفرنت لاين لكن الاوضاع كانت خفيفة واللي كان لحاله غالباً يمشونه في مسار خاص وعلى طول يوصل والتذكرة مفتوحة التاريخ من يوم الحجز الى سبتمبر تعال اي يوم تبيه لمرة وحدة فاخترت يوم وسط الأسبوع ومع المسار حق الافراد ما احتجت أبداً أسوي ترقية للتذكرة ونجحت الخطة ولله الحمد طبعا هي تفتح من ٩ ص الى ٦ م مشوارها خذ مني تقريبا ٤٠ دقيقة أول ما وصلت المواقف حفظت الدور وتوجهت كلت فطور خفيف استعداد للملاهي

أول شي استفتح به Studio Tour حسب توصية أحد الزملاء وهي عبارة عن جولة على موقع تصوير أفلام ومسلسلات معروفة ويعرضون لك بعض الحركات اللي تصير في الفيلم من فيضان أو كيف يتحرك سمك قرش ومدتها ساعة كاملة

متوجه لمسار الجولة

بدت الجولة

بعد الجولة لعبت The Simpsons وكانت جميلة

بعدها طلعت أتمشى وأدور بين الالعاب

وحتى وصلت لعبة Mummy وكانت جميلة

بعدها توجهت للعبة Transformers وكانت جميلة

بعدها ودخلت NBCUniversal وكان عبارة عن أدوات حقيقية استخدمت في الافلام

بعد ما طلعت لقيت هالاطلالة الجميلة

وحضرت عرض مباشر اسمه Special Effects Stage يوريك كيف صناعة الافلام وبعض الحيل المستخدمة فيها وكان جميل وأنصح به

بعدها طلعت وتوجهت للعبة Shrek 4D وكانت جميلة

بعدها طلعت ودخلت عرض مباشر اسمه Universal's Animal Actors كان عادي واللي يحب الحيوانات أو واحد معه أطفال يدخله بنبسطون عليه

بعدها طلعت أتمشى وشريت هالبرج اللي ما خلصته الا في مطار الرياض

وما بقي شي ما دخلته وكان متبقي ساعة وتقفل المدينة وقررت أني أطلع وأشوف بأسوي بعد الملاهي

السيتي ووك الجميل وخصوصا في الليل

طبعاً نسيت أعلمكم العروض المباشرة غالباً تخلص قبل لا تسكر المدينة وهنا فاتني عرض مهم اللي هو WaterWorld انتهى قبل لا أدري عنه وعشان تدري عن أوقات العروض المباشرة بتلقى لوحة إلكترونية فيها الأوقات للعروض وبعد ما طلعت من الملاهي شفت بقي وقت على النوم وأغلب الاماكن اللي في الشمال رحت لها فقررت أني أروح لعلامة هوليود خصوصاً أنها حولي والمرة اللي راحت مريتها ولا لقيت موقف من الزحمة

هنا أول ما وصلت قلت علامة هوليود ورى المبنى هذا لاني أشوف العالم كلها هناك

وكانت المفاجأة مالقيت العلامة بس الاطلالة علي المدينة جميلة

وأنا راجع للسيارة وألقى العلامة هذا وأنا مسوي زوم بعيييييدة وأعتقد لو تبي تروح لها لازم مشي

وبعدها قررت أمر مطعم من اللستة اللي عندي واسمه Philippe the Original عليه تقييم عالي في ترب ادفايزر كان حلو بس ما يسوى العنوة اذا كنت بعيد عنه وشغله محلي لا تتوقع شي واو

وبعدها توجهت للنوم

وبأقولكم سر أنا ما أشرب غازيات لكن إذا سافرت كل ليلة قبل النوم أخربها وأسكر على فانتا فراولة >>> مزاج

صورة المنكر والعياذ بالله

نشوفكم في الحلقة الجاية إن شاء الله

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
المطاعم المشهورة في الولايات المتحدة الامريكية	منيرة	بوابة امريكا	22	18-07-2019 07:15 AM
ملتقى المتقدمين على الفيزا الامريكية 2015	آخـــرفـــرصـــة	فيزا امريكا	19	08-03-2016 01:54 PM
.."أنانتارا" تجربة سياحية فريدة للسعوديين بجزيرة النخلة بدبي	أبوعبدالله (الاسفار )	البوابة السياحية	11	02-08-2015 07:54 AM
بالصور ... 5 أماكن فريدة ستجعلك تفكر مرتين قبل أن تحجز غرفة في فندق!	أبوعبدالله (الاسفار )	عام	19	01-04-2015 10:36 PM
معلومات عامة وتعريفية عن الولايات المتحدة الامريكية	Impact	بوابة امريكا	6	04-01-2015 06:15 AM