رحلة فردية للأراضي الامريكية ... - الصفحة 7

Tamem · 29-06-2015, 12:14 AM

هلا والله طارق

ايه والله مالنا في الطيب نصيب لكن إن شاء الله أنها خيره من رب العالمين

وفكنا الله منهم ومن جد كذا فجأة وحنا داخلين القاعدة

لكن الحمد لله على كل حال

حول العالم

حيك الله اخوي

بالنسبة للسيارة من أمتع الاشياء بالنسبة لي قيادة السيارة وأحبها لاني ما أصير بموعد ميترو ولا باصات ولا شي

متى ما بغيت مشيت ومتى ما بغيت جلست والحمد لله

بالنسبة لوالت ديزني رحت لها في بارس ولا حبيت اكررها مرة ثانية

وشكراً لك

حياك الله بلو سكاي

حياك الله اخوي شارلوك

والله يعجل بالفرج لاحونا حميدان الله آمين

شكرا لك

هلا والله اخوي البارود

اي والله وانا أكتب التقرير أقول ياليت أرجع مرة ثانية

والله هالاكسبيديا مشاكل لكن الحمد لله عدت على خير

وفعلا ما خصموا مني قيمة الاجار وخصموا مني بس قيمة التأمين وان شاء الله بجرب الموقع اللي ذكرته في السفرة الجاية

وحجز التذكر الحمد لله كان ممتاز بس الفنادق كان كيبه ما يذكر اذا فيه تأمين أو لا

والحمد لله على سلامتنا بس المفترض أن قوقل ماب يصير أكثر دقة خصوصا من هذي الناحية بس الحمد لله على كل حال

وشكراً على مداخلتك الثرية

Tamem · 29-06-2015, 01:12 AM

اليوم الحادي عشر :

التقرير خفيف أغلبه تمشي مع قريبي بس الاكل جداً موفق ولله الحمد

قمت الصبح وكان ودي أغسل ملابسي زي الامريكان وابحث في قوقل ماب عن مغاسل اللي تدفع بالعملات أبي أعيش التجربة زيهم وأول ما وصل قاعد أتفرج على اللي يغسلون وأتعلم منهم بس ماش الدعوة حسيتها صعبة الملابس الملونة غير البيضا ودرجة حرارة تختلف اذا صار قطن ولا صوف والله الدعوة حوسة ولازم اذا خلص الغسيل اطلعها وأحطها في المجفف يعني بياخذ وقت قلت أجل بغير المغسلة وأشوف وحدة ثانية يصير فيها موظف يغسلها وأبحث في قوقل ماب وتوجهت الى مغسلة ثانية ودخلتها وحسيتها نفس اللي رحت لها اول مرة وسألته قلت أبي مغاسل فيها موظف يغسل الملابس قال هنا فيه الخدمة هذي قلت طيب بكم تغسلون القطعة قال ما عندنا هالنظام بس بالوزن من 15 باوند وتحت ب 15 دولار وفوق ال 15 باوند لها حسبة ثانية نسيتها بس والله وأجيب ملابس وصارت أقل وقال بتخلص خلال 4 ساعات والله سريع وبعدها توجهت لمطعم مشهور اسمه eggslut موجود في الداون تاون وكان جداً لذيذ وبعدها توجهت الى ارفاين خذت قريبي وتوجهنا إلى محل à la minute وخذنا الايسكريم الخطير سولتد كاراميل وتوجهنا الى لونق بيتش تمشينا فيها وتمشينا في Rainbow Harbor وكان جميل ورايق بعدها توجهنا الى السباكتروم وكان ويكند فكان مليان من الخليجين وتعشينا في مطعم إيطالي جميل اسمه BRIO من وحلينا من تشيز كيك فاكتوري وبعدها حطيت قريبي في البيت وتوجهت للفندق استعداد للإثارة والرعب في Six Flgs

هذي مغسلة الملابس اللي غسلت ملابسي فيها

هذا مطعم eggslut وخذت منه نوعين الاول كان تشيز برقر والثاني زي لحم ستيك في البرقر بس الالذ كان التشيز برقر

شوفوا السرا كيف واصل وكان أطول من كذا

هذا الايسكريم اللي أسميه علاج الحزن

هنا أول ما وصلنا Rainbow Harbor في لونق بيتش

في هذي السفينة كان فيه عرس وكان ودنا ندخل بس كان فيه

وهنا بعد ما طلعنا من لونق بيتش رحنا لسباكتروم نتمشى ونتعشى

المطعم الايطالي الموجود في سباكتروم كان جميل خصوصا الطلب اللي ورى ولا كثرنا عشان يمدينا نحلي من تشيز كيك فاكتوري

وبعدما حلينا توجهت للفندق للنوم

ونشوفكم في الحلقة الجاية إن شاء الله

ali pontiac · 29-06-2015, 04:45 AM

ربي يعطيك العافيه على الوقت و المجهود بصراحه تقريرك في قمة الروعه

نظام السياقه في لوس انجلوس مثل ماقلت قوانينهم غريبه كنت بسوي بجيب العيد وادعم عجوز لاتينيه لكن ربك ستر

موقف القاعده العسكرية لا يحسد عليه

تقرير جميل وانت اجمل واختيارك وتصويرك للأكل قـــــــــــــاااااااااااااتل عليك بألف عافيه

Tamem · 29-06-2015, 08:10 PM

اقتباس : المشاركة الأصلية كتبت بواسطة ali pontiac

ربي يعطيك العافيه على الوقت و المجهود بصراحه تقريرك في قمة الروعه

نظام السياقه في لوس انجلوس مثل ماقلت قوانينهم غريبه كنت بسوي بجيب العيد وادعم عجوز لاتينيه لكن ربك ستر

موقف القاعده العسكرية لا يحسد عليه

تقرير جميل وانت اجمل واختيارك وتصويرك للأكل قـــــــــــــاااااااااااااتل عليك بألف عافيه

هلا والله اخوي علي ياللي سرقت مني الاضواء بعد موضوعك

وتراي متابع لموضوعك والله كل مرة أبي ارد ونسولف عن أمريكا بس عاد كل مرة أنشغل ولو لقيت

نزلت جزء خاص في تقريري لكن ان شاء الله جاي بالاسئلة بعدين

والحمد لله عل سلامتك وين يا رجال ادعم الاشارة ولا اي سيارة ولا تدعم ادمي

عاد ذولي كيف بتفتك منهم قشران

ali pontiac · 30-06-2015, 12:09 AM

هههههه حبيبي والله

اهم شي كثر من صور الأكل

blue@sky · 30-06-2015, 01:58 AM

ما شالله عليك اخوي تيميم
رحلة مميزة استمتعنا بها
وانا جالس اقراء صفحاتها
تذكرت ايام امريكا الجميله
بصراحة امريكا تغيرت كثير عن اول..
الله يعطيك الف عافيه ماقصرت

farouq · 01-07-2015, 04:30 PM

تقرير جميل انتظر التحديثات كل يوم .. تقريرك خلاني اغير وجهتي من فلوريدا لكالفورنيا بس عندي كم سؤال :

1- لاس فيقاس كم يوم تحتاج عشان تغطيها وشنو اجمل العروض الواحد يقدر يروحلها ؟
2- لوس انجلوس اذا ابي اقسم بين الجنوب والشمال كم يوم اقدر اقعد لكل مكان ؟ وهل في عروض جميله في لوس انجلوس الواحد يقدر يحضرها ؟
3- جربت تروح ديزني لاند كالفورنيا ؟ في ناس تقول ماتستاهل بما اني زرت ديزني لاند اورلاندو وفي ناس تقول جميل المكان

وشكراً وننتظر التحديث الجديد انتظر السكس فلاقز ..

فيصل · 04-07-2015, 03:31 AM

يا ليل القاعده
عاد ورحتا تصلون تلقاهم مراقبينكم بعد

والله موقف الحمدلله تخارجتوا منه

اما الغسيل حنا نخلط كل شي ما تفرق والامور ماشيه

مطاعم كأنها توزع بلاش

حلو اسم الايسكريم

لا ريم صارت معاكم بتسرق الأضواء منكم ومن علي

يا رجال لا يوقف

Tamem · 05-07-2015, 02:55 AM

هلا اخوي علي

أبشر بالاكل جااااايك بالطريق

هلا بلو سكاي

والحمد لله أن التقرير أعجبك

لاتقطعنا الجاي أفضل إن شاء الله

هلا حياك أخوي فاروق

وزين سويت كالفورنيا حبيتها أكثر من فلوريدا حتى وأنا ولا مرة رحت لفلوريدا

السؤال الاول فيها عروض كثيرة جداً وعلى حسب ميولك تقدر تحدد اللي تبيه وأنصحك تدخل موقع ترب أدفايزر وتبحث عن العروض الموجودة في لاس فيقاس بتلقى المئات منها

اختر اللي تبي وعليها تقدر تحدد كم تجلس من يوم

السؤال الثاني بالنسبة للوس أنجلوس اشوف لو تخلي 5 أيام الشمال و 5 أيام للجنوب منها تجلس يومين الى ثلاث أيام في ساندييقو

والعروض ما أذكر كان فيه عروض هناك بس الافضل ترجع لموقع ترب ادفايزر وتشوف وش الموجود في لوس انجلوس بيفيدك كثير

السؤال الثالث ما رحت لها لاني زرتها في باريس قبل سنتين وأشوف انك ما تزورها خلاص يكفي اللي بأورلاندو

وعفواً

هلا والله أخوي فيصل

والله الحمد لله فكنا الله منهم بس تفاجأنا بكم واحد صارت معه زي سالفتنا يعني كانوا متعودين على هذا الشي

والغسيل أول مرة فما حبيت اجيب العيد بملابسي

والله كثروا المنافسين بس والله أتمنى لهم التوفيق وكل الشكر لهم على هالتقارير المفيدة

Tamem · 05-07-2015, 03:25 AM

اليوم الثاني عشر :
التقرير اليوم ما فيه صور كثيرة بحكم أن اليوم كله ملاهي ولعب وبالمناسبة على طاري الملاهي انا ما زرت ديزني لاند لاني زرتها قبل سنتين في باريس
قمت متأخر على ١١ مريت المغاسل وخذت الملابس وبعدها على ستار بكس وعلى فلاقز المسافة حول ٥٠ دقيقة للملاهي استغليت الفرصة بأن معي قريبي ومسكت مسار كاربول اللي مخصص لأي سيارة فيها راكبين وأكثر , وأول ما وصلنا كان فيه رسوم على المواقف ٢٠ طبعا قصيتها مع تذكرة الملاهي اونلاين وتذكرة الملاهي بحول ٥٣ ولو تقصها هناك تدفع ٢٠ زيادة وكان معي قريبي ولا حجز عن طريق الاونلاين بس وأنا في الفندق كان فيه مجلة في الغرفة فيها فيوتشرات لعدة عروض ودخوليات ومن ضمنها خصم 20 دولار على تذكر الملاهي وخذنها وقدمنها لهم يوم قصينا التذكرة لقريبي , واول دخلنا كان الوضع زحمة وويكند فاضطرينا نشتري فلاش باس وكان فيه عدة خيارات وتفاصيل ياله تفهمها منهم وكان فيه ٣ انواع عادي ٤٠ وقولد ٧٠ وبلاتينيوم ١١٠ كلها يعطونك جهاز ومسجل فيه اسماء الالعاب ومتى موعد اللي تقدر تلعب فيه طبعا اذا حجزت لعبة ما تقدر تحجز لعبة ثانية الا اذا دخلت اللعبة اللي حجزتها اللي يميز القولد ان اللعبة اللي ما فيها حجز ولازم تمسك سرا ياخذ نص الوقت اللي ياخذه السرا العادي يعني لو السرا العادي ياخذ ساعة اللي معه القولد ياخذ نص ساعة وهكذا والبلاتينيوم يتميز انك تقدر تلعب اكثر من مرة في اللعبة نفسها والالعاب اللي تمسك فيها سرا ياخذ وقت الانتظار حول ١٠ دقايق طبعا في العاب ما تمشي معها كل الفلاش باس ولازم تصف مع العالم وبعضها تدفع فلوس عشان تلعبها مثل x2 ولعبناها ببلاش لأننا أول ما لعبنا لعبة وقفت فينا في البداية وقالوا اختاروا أي لعبة تبونها وبندخلك على طول واخترنا لعبة X2 لانها ب 15 دولار وغير كذا الانتظار فيها يوصل الساعة والملاهي تفتح من ص١٠ الى ٩م وحنا طلعنا على الساعة ٩ دايخين ومتكسرين من الألعاب وتعشينا من مطعم ذا هابيت

نظرة من بعيد ونبضات القلب بدأت بالإرتجاف

أول ما دخلنا الملاهي

هذي صورة الجهاز اللي يعطونه أي شخص ياخذ الفلاش باس

شوفوا كيف السرا لو ما خذنا الفلاش باس

هذي أخطر لعبة عندهم X2 وهي أول لعبة لعبناها

صور متفرقة للملاهي والالعاب

أحد العروض في الساحة

خريطة الملاهي

بعدها طلعنا وتعشينا في هالمطعم وكان الصراحة جيد

في النهاية الملاهي جميلة جداً وتجربة لن تنسى وأنصح بها اللي يحبون الإثارة بس أهم شي تعالوا لها في غير الويكند أخف للزحمة

ونشوفكم في التقرير الجاي إن شاء الله

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
المطاعم المشهورة في الولايات المتحدة الامريكية	منيرة	بوابة امريكا	22	18-07-2019 07:15 AM
ملتقى المتقدمين على الفيزا الامريكية 2015	آخـــرفـــرصـــة	فيزا امريكا	19	08-03-2016 01:54 PM
.."أنانتارا" تجربة سياحية فريدة للسعوديين بجزيرة النخلة بدبي	أبوعبدالله (الاسفار )	البوابة السياحية	11	02-08-2015 07:54 AM
بالصور ... 5 أماكن فريدة ستجعلك تفكر مرتين قبل أن تحجز غرفة في فندق!	أبوعبدالله (الاسفار )	عام	19	01-04-2015 10:36 PM
معلومات عامة وتعريفية عن الولايات المتحدة الامريكية	Impact	بوابة امريكا	6	04-01-2015 06:15 AM