رحــلــتــي شــهــر الــعــســل أمــــريــــــــــــكـــــــا - الصفحة 4

فيصل · 21-06-2015, 05:30 PM

علي شكرا
لك يعني الكورفيت متي بتجي سالفتها شوقتنا

متابع جيد للأفلام لكن اللي عكس ولا يحب الأفلام هل تتوقه بينبسط في هالرحله

وشكرا

|القحطاني| · 22-06-2015, 03:30 AM

ما شاء الله اليوم الرابع أحسه جميل .. لأني من محبي البحر فأحس العالم يحبونه ههههههههههه

الله يوفق الإيطاليين علشانهم هم اللي أكتشفوا البيتزا

شكلها يشهي مررة

واما توم هااانكس فعلا من أفضل الممثلين وأفلامه أغلبها اذا مو كلها رااااااااااائعة

الله يعطيك العافية

ali pontiac · 22-06-2015, 10:29 PM

اخوي فيصل بالنسبه حق الي مايتابع افلام احسه ما بكون مهتم بالتور، وجايتك سالفة الكورفت خخخ

القحطاني والله البحر جميل وجوه ممتع ،هذي البيتزا امريكيه وجايه من شيكاغو تختلف عن البيتزا الأيطاليه و بيتزا نيويورك

ali pontiac · 22-06-2015, 11:32 PM

اليوم الخامس و السادس في Disney

لوووس انجلوووووس اليوم الخامس

في لوس انجلوس في منتزهين ديزني مقابلين بعض الأول Disney land park والمنتزه الثاني Disney California adventure

حجزت التذكره من الموقع
V
V
https://disneyland.disney.go.com/

لما تدخلون الموقع تحتارون Parks and tickets > Tickets

وفي اختيارات يوم و يومين واكثر

انه حجزت حق يومين كل منتزه خليته ليوم بروحه

وفي تذكره اسمها Park hopper ticket للي يبي يدخل في يوم واحد المنتزهين

سعر التذكره طلعت علي 119 دينار للشخصين شامل سعر مواقف السيارات، لنه المواقف بفلووس وتقدر تدفع للموقف لي وصلت او اونلاين مع التذكره ، وانا انصح اونلاين

طلعنه من الصبح ورحنه و تعجبت على كبر المدينه الي مليانه فنادق ومنتجعات حق ديزني وغير المطاعم مثل cheesecake factory

لي توصل البوابات تعطيهم رصيد الموقف مال السيارات وتصفط السياره

رقم البارك على شخصياتهم

ونركب باص و وياخذنه للمنتزهات، شوفو الافته

طبعا احنه اول يوم دخلنه Disney California Adventure

المنتزه حلو و ممتع والعابه متنوعه حق صغار والكبار يستانسون منها بعد

طبعا انصح بأخذ خريطة المنتزه عند البوابه حق تعرفون وين انتو و وين المطاعم والألعاب وغيرها ، وتلاقون عند كل لعبه وقت انتظار بعض الألعاب يوصل وقت الإنتظار في الطابور 90 دقيقه !! وقفنه فيه الطابور في اول لعبه ، وفي بعض الألعاب المرغوبه الي يصير عليها كثير طوابير في لها تذاكر Fast pass حق تحصل بطاقة الفاست حق مثلا لعبة السيارات ، لازم تبحث في الخارطه من وين تحصل تذكرتها في المنتزه ، حركه حلوه حق تكتشف المنتزه ، وتدخل في الجهاز بطاقة دخول المنتزه ، وتطلع لك بطاقة الفاست حق لعبة السيارات ، ومع ذالك اذا عندك بطاقة الفاست حق لعبه معينه مايصير تدخل كل وقت ، في اوقات معينه فقط يضهر وقت الدخول على شاشه عند كل لعبه.

وفي الليل يصير عرض ديزني المشهور جميل بصراحه

فيديو
V
V
V

هذي كان اليوم في ديزني كالفورنيا الألعاب ماشاءالله وايد ويبغي له المكان يوم والي يبغي يشوف العرض لازم يتم هناك لي نهاية الوقت اعتقد العرض يبتدي في 9 ونص ومدته نص ساعه

يتبع ..........

قطرية كولمعجبون بهذا.

ali pontiac · 23-06-2015, 12:10 AM

لووووس انجلوووووووووس اليوم السادس

اليوم صحينه متأخرين قلنه نبغي نرتاح لنه كل يوم نقوم من الصبححح 7 تقريبا

وطلعنه وتغدينه وعلى العصر رحنه Disney land park

ديزني لاند فيها كثير العاب مادخلنها المنتزه حلو حق الأطفال 12 سنه واقل يعني حته العرض الليلي للاطفال مب مثل ديزني كاليفورنيا العرض الليلي كان مبدع وحلو

بس فيها لعبه حلوه واااااايد وتسوه ومن احلى العاب ديزني

صفطنه السياره في دايزي ، طبعا اصور مكان البارك حق ما انسه وين وقفت

Hollywood tower هذي اللعبه الي فعلا عجبتني

وفي الليل يصير عرض العاب ناريه قبل العرض الليلي

لي يبتدي العرض كل الناس تجلس في على الأرض الي هذي حاشرتنه واقفه

صور العرض الليل

وهذي كان نهاية اليووم يتبع,,,,,

قطرية كولمعجبون بهذا.

فيصل · 23-06-2015, 02:05 AM

عروضهم متعه ديزني حقيقه

لكن الفاست هل ممكن شرائها اعتقد بأمريكا ممكن تشتري البطاقه ولك أولويه بالدخول في باريس مش كل لعبها متاح لها الفاست

شكرا لك

Azzam · 23-06-2015, 03:25 AM

تقرير جميل كا صاحبة ابدعت بطرحك ومعلوماتك

طارق عنايات · 23-06-2015, 04:56 AM

تقرير مميز

جهد واضح بس سريع جداً

تسلم ايدك

ali pontiac · 23-06-2015, 11:52 PM

مشكووورين اخواني

فيصل تذاكر الفاست مو حق كل الألعاب في ديزني فقط الألعاب القويه الي تصير عليها طوابير انتظار طويله، يونفرسال تقدر تشتري تذككرة فرونت لاين وكل الألعاب لك اولويه.

ali pontiac · 24-06-2015, 12:50 AM

من لووس انجلوووس الى لاس فيغاس

طبعا هذي يوم المغادره من لوس انجلوس نزلنه العفش وخلصنه مع الفندق، وقلنه بنروح Beverly hills

BEVERLY HILLS

منطقه في لوس انجلوس يسكنها النجوم والمشاهير مرينه عليها مرور الكرام حق نشوف الشارع الي اسمه Rodeo drive شارع فيه ماركات عالميه ومطاعم (مال عيال دلع)

اللامبورجيني تقولنه انه وصلنه منطقتهم وماشاءالله الشارع مليان سيارات فخمه

فيه معارض سيارات عجيبه بس كنه مانبي نتأخر لنه ورانه درب لي لاس فيغاس

بس وقفت شفت حلاق/صالون نزلت حق اقص شعري

طبعا اغلب صالوناتهم رجاليه نسائيه ، وبحكم انه الصالون الي نزلته كان في بيفرلي هلز سعره كان 18 دينار قص شعري وحلق اللحيه (نعيما)

وكملنه الدرب واخذنا سندويشات على السريع

رنقات/جنوط ADV على فراري 599

شعر او معكرونيا ؟

وقفنه نترس بترول
طريقة المحطات توقف السياره وتشوف رقم المضخه مثلا مضخه رقم 2 ...تدخل داخل المحطه وتقول حق الموظف مضخه رقم 2 وتقول بكم تبقي على سبيل المثال 20 دولار ، تدفع كاش او بالفيزا وتستلم رصيد ، ترجع للمضخه ترفع الهوز وتختار نوعية البترول فيه اوكتين 87 و91 و95 على ماعتقد بس انه كنت اصب الأرخص 87 في الكيا ، خل نفترض انه مثلا قلت له قلت له 20 دولار ودفعت بالفيزا ، والمضخه وقفت على 16 خلاص انترس الخزان ، اوتوماتيكيا يرجع في الفيزا الباقي الي لك. ويصير تطلب رصيد من العامل الي يشتغل داخله تقوله Refund receipt

وانطلقنه طبعا الدرب كان جبلي وصحراوي لي نطلع من ولاية كاليفورنيا وندخل ولاية نيفادا وظلم الوقت في الدرب ونزل علينه مطر خفيف وهواء قوي

الدرب من لوس انجلوس الى فيغاس فيه outlet

الهاي وي مظلم

انه كنت مسرع شويه ماكنت ملتزم بالسرعه القانونيه الموتر الي كان قدامي كان مسرع لو انه مكانه كان انصدت ، فجأه تطلع له دورية منخشه خلف اعلان

في الهاي وي الخط اليسار كان خط سريع بس ماكان Express كان مكتوب carpool وصرنه نتفاكر نخاف نمشي عليه واحنه مايحق لنه ، المهم زوجتي بحثت عنه في قوقل ، طلع موضوعه انه خط سريع حق الي يسافرون في سياره شخصين واكثر، يشجعون الناس تسافر في سياره وحده مو كل واحد بروحه ، حق تقليل الأزدحام والتقليل من التلوث ، وعلى طووول مسكنه الخط

هذي صوره من قووقل

وصلنه لاس فيغاس بالسلامه يتبع .........

قطرية كولمعجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رحــلــتــي الــثــانــيــة إلــى مــالــيــزيــا (مــايــو 2015) ...	Bu Rashid	بوابة ماليزيا	199	22-10-2019 08:03 AM