رحــلــتــي شــهــر الــعــســل أمــــريــــــــــــكـــــــا - الصفحة 5

ali pontiac · 24-06-2015, 01:58 AM

لاس فيغاس يوم الوصول

وهذي فندقنه The Westin

صورة اللوبي

نزلنه اغراضنه وعلى طووول نزلنه طبعا فيغاس معروفه بشارعها The Strip طوله 6.8 كيلومتر الي فيه اكبر واضخم الفنادق وشارع حيوي وصاخب وسياح ماشاءالله وعروضات يعني تتمشه في الشارع كفايه

هذي فندق Flamingo كنه بنحجزه بس فجأة ارتفع سعره، اسعار الفنادق ترتفع وتنزل

فندق Bellagio قدامه يسير استعراض نافورات الماي ، واهوه الفندق الي مثلوه فيه في فلم HANGOVER وفي نهاية فلم Ocean's eleven يوقفون الممثلين جدام النافوره

وانه كنت اصور اسمع واحد يصوت علي اله الأخ مستانس في الليموزين ويقول صورني اكيد محشش

وتعشينه عقب من مطعم برجر Gordon Ramasy الطباخ العصبي الي كان له برنامج تلفزيوني Hell's Kitchen

البرجر كان لذيذ والملك شيك الذ

صورة من نافذة الغرفه

وهذي نهاية يوم الوصول ..... يتبع...

قطرية كولمعجبون بهذا.

ali pontiac · 24-06-2015, 05:50 AM

لااااااااس فيغاس اليوم الثاني

من احلى الأيام في حياتي

البرنامج الأول Dream racing

والبرنامج الثاني Jack of light

في هذي اليوم صحتني زوجتي تقولي قوم تره متأخرين وقمت بسرعه وتجهزت وسويت لي كووفي على السريع، الحلو في الفندق انه في ماكينة كوفي في الغرفة وانا مدمن كووفي خذت الكوفي ونزلنه وجابو السياره عند الباب وانطلقنه رايحين حلبة سباقات لاس فيغاس Las vegas motor speedway

Dream racing شركه تعطي الفرصه انك تسوق سيارات رياضيه في الحلبه السباق Las vegas motor speedway ، تختار التاريخ و الوقت ونوع السياره وكم لفه على الحلبه في 3 لفات و5 واكثررر ، وفيه الـ Drift car experience تركب مع سائق محترف وياخذك لفه كلها Drift على الحلبه

انه حجزت سيارة Ferrari 458 خمس لفات 399 دولار امريكي
مع تسجيل فيديو من داخل السيار 49 دولار
صوره فوتوغرافيه 24 دولار
وسيارة الدرفت 86 دولار

المجموع الكلي 210 دينار

حجزت من موقعهم
V
V
Dream Racing at Las Vegas Motor Speedway. Drive Racecars and Exotics- Dream Racing

وصلنه الحلبه

في عندهم سيارات عاديه مثلا فراري F430 عاديه وفي فراري F430 مجهزه للسباق سياراة حلبات يعني

داخل الأستقبال

عطيتهم حجزي ويدخلوني على محاضره سريعه ومختصره عن السيارة وعن الحلبه، وبعدها تدريب على مثل العاب الفيديو ، حق اخذ فكره عن الحلبه في اللعبه نفس الحلبه ونفس السياره لي مايشوفوني تقريبا عرفت الحلبه و اخذت فكره تالي ننزل الحلبه

الحلبه

صوره مع العروس

وانطلقت

فيديو التصوير من داخل طبعا معاي مساعد محترف
V
V
V

وخلصو الخمس لفات على الحلبه في لمح البصر من الوناسه

وبعدين ركبنا الكمارو حق الدرفت ، في الكمارو مافي تصوير داخلي مالهم ، انه صورت فيديو من تلفوني

فيديو
V
V

وخلصنا

رجعنه مكتب الأستقبال يجهزون لي الفيديو ويعطوني اياه في بطاقة ذاكره نوع SD مع الصوره ، وشهاده وشريت من عندهم جاكيت عليه اسم الحلبه

ودعت المكان

ورجعنه فندق وماكان عنده شي لي الساعه 6 المغرب تقريبا فتحت الابتوب وقلت خل ابحث عن معرض سيارات كلاسك وحصلت واحد وعلى طووول نزلنه

اسم المعرض Las vegas muscles cars

هذي موقعهم
V
V
Vegas Classic Muscle Cars

وصلنه المعرض وبعرض صور السيارات الي عجبوني ، طبعا كلهم عجبوني بس بحط البعض

الوحوش الأمريكيه لها طعم ثاني

وحشششششش

الشايب الي داخل المعرض تكلمت معاه وعن السيارات، وسالني وين رحت وكذا قالي في مكان لازم تروحه، قلت له وين ؟؟؟ قالي مصنع شلبي ... واحصل على برنامج سيارات غير قالي ادخل موقعهم في النت في تور حق المصنع وشوف الأوقات

سامحوني سويت المنتدى منتدى سيارات

المهم طلعنه من المعرض وكلينه برجر من Five guys burger من اشهر محلات البرجر في امريكا وافرع في كل انحاء امريكا، بس انه ماعرف وين صور الأكل راحو اعتقد اني جوعان دائما وما الحق اصور

رجعنه الفندق واستعدينه حق البرنامج الثاني

الي اهوه Jack of Lights

واهوه جوله على لاس فيغاس بالهيلوكبتر

حجزت التذكره من الموقع
V
V
Las Vegas Tours with Prices, Deals & Reviews | Vegas.com

سعر التذكره للشخص 40 دينار

الموقع نفسه حجزت منه عروض جايتكم في باقي التقرير ، وفيه وااااااااايد اشياء وتورز حق حجوزات

المهم احلى شي في الموضوع ياخذونك من الفندق في ليموزين وتوقيتهم صح قالو 6 المغرب وفعلا نزلنه 6 والليموزين واقف ينتظرنه

معليش بس شوي عايش جو يزعم مليونير

وصلنه

سااااحره فيغاس من فوق

فيديووو
V
V

في نهاية الفيديو الأول بتشوفون برج اسمه Stratosphere واهوه ارفع نقطة في لاس فيغاس شوفو الألعاب الي فوق البرج ، انه احب الألعاب المخيفه الي تخرع بس هذي مب مخيف هذي مميت وكنت ناوي اروحه بس يوم شفته من قريب قلت لا

ورجعو المليونير الفندق

وانتهى اليوم بقطعة بيتزا على ما اتذكر اتصدقون اكثر الأكل كان بيتزا برجر بيتزا برجر بيتزا برجر

يتبع .......

قطرية كولمعجبون بهذا.

آخـــرفـــرصـــة · 24-06-2015, 07:53 AM

جميلة جدا فيقاس من فوق

تنوع جميل في خياراتك خاصة حلبة السباق عجبتني كثير

1000 مبروك يا مليونير و رحلة فعلا تستحق تكون شهر عسل

الله يسعدك

ali pontiac · 25-06-2015, 02:51 AM

شكرا اخوي اخر فرصه ، والله يسعدك ويسعد الجميع يارب

ali pontiac · 25-06-2015, 05:16 AM

اليوم الثالث لاس فيغاس

اليوم الثالث كان عندنه برنامج افطار بوفيه في فندق Wynn

وتالي رحنه مصنع الشلبي الي قالي عنه الشايب في معرض السيارات

وفي الليل كان عندنه عرض بعد في فندق Wynn اسم العرض Le reve the Dream

صيحنه الصبح ورحنه بالسياره فندق Wynn

من فتره بسيطه قبل 3 شهو اول مارجعت من السفره نزل فلم paul blart 2 ومثلو الفلم في في الفندق نفسه

الفندق من داخل جميل ومليان زهور ، نسيت اقولكم شي عن فنادق فيغاس ، ارخص فنادق في الرحله كانت فنادق فيغاس وافخمها وارقاها ، لأنه دخل الفنادق كله من الكازينو

ودخلنه البوفيه وفطرنه وكالعاده مافي صور البوفيه كان كبيييييير وماشاءالله شي رهيب ولذيذ كان السعر 18 دينار للشخصين، في البحرين بوفيه اقل مستوه منه بسعر 18 دينار للشخص

وفي عندهم بوفيه غداء بعد، عموما كل فنادق فيغاس تقريبا فيها بوفيهات

خلصنه الفطور ، واخذنه الحجوزات مال العرض ورحنه صندوق التذاكر حق تبديل التذكره، انصح بتبديل التذكره قبل العرض بفتره طويله عن تفادي الزحمه

حجزت تذاكر العرض من نفس الموقع الي حجزت منه تور الهيلكوبتر سعر التذكره 116.5 دينار للشخصين وتختار اماكن الكراسي (ملاحظه) الموقع فيه بعض الصور الي تجرح الصيام
V
V
Las Vegas Shows with Showtimes, Deals & Reviews | Vegas.com

تمشينه في الفندق ونزلنه تحت عند مسبح وشربنه عصاير وشاي

وطلعنه من الفندق ورحنه معرض ومصنع الشلبي Shelby American Inc

كارول شيلبي صاحب الشركه ، طبعا كارول كان سايق سيارات سباق وهذي سيارته الشخصيه ، القصه بختصار انه اخذ بدي سيارات MG الأنجليزيه وركب عليها محرك فورد كبير وفاز بالسبافات على شركة فراري وجاغوار في ذاك الوقت ، وصار بين الشلبي والفورد نوع من الإندماج ، توفه كارول في سنة 2013.

في المعرض فيه تور مجاني تور يبتدي الساعه 10 ونص الصبح وتور الساعه 1 ونص الضهر ، وكان التور ممتع الموجودين كلهم يحبون السياره والفورد عموما ،كانو متعصبين للفورد ، اما انا حيادي والمرشد كان اسلوبه ممتع وفاهم تاريخ سيارات الشلبي ، يقول انه التور ياخذ ساعه ونص تقريبا واحيانا يوصل 5 ساعات اذا كانت المجموعه تسأل ومتفاعله وعاجبها الجو.

طبعا هذي اهيه الكوبرا الأصليه ، الي كأنها (بومبو) تتذكرونها ؟؟ بعض هذي السيارات يوصل سعرها في المزادات مليون دولار

وفي شركات ثانيه تصنعهم تجميع قطع مثل شركة Factory5 وشركة Kirkham ، وغيرهم ، وشرايكم تتصنع في البحرين !! تجميع في البحرين بس اغلب القطع من Factory 5 ،اسم الشركه في البحرين V motion تلاقون حسابهم في الأنستقرام.

توقيع الزوار

فيديو للتور
V
V

ورجعنه الفندق شوي نستريح ، والعصر حسينه بالجوع تحلل البوفيه وطبعا استنعت في برنامج الـ Yelp الي قلت لكم عنه، وشفت مطعم اسمه Rollin Smoke barbeque عجبني تعليق احد الزباين كاتب انه المطعم حق الي يبي ياكل شي لذيذ مب حق الي يبي ديكور ومكان جميل وعلى طول ضبطت الـ GPS ورحنه لنه ، المطعم صاير في منطقه صناعيه بعيده شوي عن Strip تقريبا 20 دقيقه بالسياره، ويوم وصلنه المكان شوي نائي كأنه منطقه مهجوره وقدام المطعم شباب اشكالهم مال عصابه الوضع كان مايطمن نوعا ما ، المهم يوم دخلت وطلبت ارتحت المطعم كله مليان ناس وعلى طول زباين داشين وطالعين فيه حركه وتشوف مختلف الزباين من الموظف والعامل والي شكله مدير و جميع الأشكال من الناس

بس هالمره عندي صوره

البرجر اكبر من تلفوني سامسونج نوت 4

وطلبت اضلع باربكيو ، الذ BBQ كلته بحياتي

خلصنه الأكل والحمدلله وتنشورنه بالسياره على Strip رايحي وراجعين ، ورجعنه الفندق تجهزنه ورحنه فندق Wynn للعرض

العروض فكرة زوجتي ، انه ماكنت مهتم قلت يالله مو مشكله بنخلي العروض في برامجنه ، واحد من شباب الأهل مدح العرض بعد

العرض كان خرافي جدا جدا ، روعه اندمجت ماكنت متوقع انه بيعجبني عرض جميل وتعجبت شلووون جهزو المسرح حق العرض ، المسرح مهيأ فقط حق ذي العرض القوي ، ماخلو شي العرب

LE REVE THE DREAM

فيديو
V
V

نهاية الوقت تعشينه عشه خفيف في مطعم ايطالي<<اخيرا غير نوع الأكل

طبعا صوره للمطعم بدون الأكل

وهذي كانت نهاية اليوم الثالث....يتبع...

قطرية كولمعجبون بهذا.

طارق عنايات · 25-06-2015, 06:24 AM

فعاليات جميلة في فيغاس

كم أقصى سرعة وصلت لها بالفيراري

هل الموضوع يعتبر أمن وهل للمساعد قدرة السيطرة على السيارة

كم زمن جولة الهيلوكوبتر

جزء مليء بالإثارة

تابع يا بطل

ali pontiac · 26-06-2015, 01:28 AM

شكرا اخوي طارق عنايات

والله ماكنت مركز على السرعه لنه الحلبه فيها منعطفات وايد وفيها خط مستقيم حق تطلع قوة السياره بس تقريبا مسافة 200 متر، كان تركيزي على كلام المحترف الي جنبي وعلى تباديل/تعاشيق القير والصوت طرب

بالنسبه للأمان اول يشوفون هل عندك خلفية في سياقة هذي النوع من السيارات والمحاضره تشرح لك المنعطفات ولي يشوفون كيف تمشي السياره في لعبة الفيديو الي نفس المحاكاة، لما يشوفونك تمام تالي ينزلونك الحلبه

وكنت اسوق السياره على نظام الـ Sport يعني نظام التماسك (التراكشن) شغال بنسبه بسيطه بالنسبه لي الموضوع آمن جدا جدا

بخصوص مدة التور بالهيلكوبتر اذكر ماكان طويل يمكن نص ساعه او 45 دقيقه فقط ليش اكثر

ali pontiac · 27-06-2015, 10:54 PM

لاس فيغاس اليوم الرابع والأخير

هذي كان اخر يوم في لاس فيغاس كان عندنه برنامج واحد في الليل واهوه عرض اسمه ka cirque du soleil في فندق MGM Grand

صورة الفندق صورته اول مانزلنه من الهيلكوبتر

حجزت التذاكر ايضا من نفس موقع الي حجزته منه العرض الي قبله وتور الهيلوكبتر سعر التذاكر 98 دينار للشخصين

اما اليوم كله كان فاضي وتمشي في الـ Strip الجو كان حار في ذي اليوم ، اول ثلاثة ايام كان الجو معتدل ، ويوم في حلبة السباق قاالو لنه انكم محظوظين انه الجو معتدل لنه طبيعته حار

في ذي اليوم في وايد اشياء ماصورتها، في احد الفنادق الي في الـ Strip فيه رولر كوستر من فوق يبين ، وانه كنت احسبه ديكور لاكن شفته وناس راكبينه المهم مافوتنه الفرصه ودخلنه وركبناه وكان عجيب ، كان في فندق New york hotel

صوره من قوقل

ودخلنه M&Ms World

ودخلنه فندق MGM حق تبديل التذاكر عن الزحمه

الجو كان حار في هذي اليوم وخذيت هذي السلاش البااارد ، صار لي ساعه امزمز فيه ومايخلص ، الكل في فيغاس يتمشه ويشربه

مدخل فندق Paris

وصار الليل ورجعنه حق الـ MGM وهذي صورة مدخل المسرح

فيديوات العرض
V
V
V

العرض جيد لكن عرض LE Reve The Dream كان بالنسبه لي افضل منه ، نقطه ثانيه وصلنه متاخرين وكان مكان الكراسي سيئ جدا ، عرض LE reve كان يصير اختار اماكن الكراسي بس هذي العرض لا.

وعقب طلعنه نتشمه نشوف عرض نافورة فندق Bellagio طبعا هذي العروض في الـ Strip مقابل الفنادق

اوقات العرض من يوم الأثنين الى يوم الجمعه من الساعه 3 العصر الى الساعة 8 الليل كل نص ساعه ، وتالي من 8 الليل الى 12 منتصف الليل كل ربع ساعه

ويوم السبت والأحد وايام الإجازات يبتدي العرض من من 12 الضهر.

فيديو للنافورة
V
V

وتالي رحنه عرض على الشارع مقابل فندق The Mirage وهوه عرض بركانهم الشهير العرض يبتدي كل نص ساعه من 8 الليل لي 11 الليل

فيديووو
V
V

وهذي كان اخر يوم في لاس فيغاس وكل الوقت قضيناه نتمشه لي تقريبا 3 الفجر ورجعنه الفندق وارتحنه ساعتين او اقل ورحنه المطار من الساعة 5 تقريبا

طبعا المطارات منظمه تشوفون لافتات حق توصلكم اماكن ومكاتب سيارات الأجار، وتدشون داخل الباركات وتشوفون لافتة شركة الأجار مالتكم

وعلى طول الموظفين موجودين وياخذون السياره ويعطونك رصيد استلام وبس بهذي البساطه !!

وهذي صورة الكيا ، السياره صار لها 10 ايام تقريبا عندي من سان فرانسيسكو الى لو س انجلوس ومن لوس انجلوس الى فيغاس مرور وسط هوا وغبار وشوي مطر والسياره مازالت نظيفه ، لو في البحرين 3 ايام وخلاص السياره لونها بني من الغبار

ودخلنا المطار تفطرنه داخل الرحله كانت من لاس فيغاس الى شيكاغو (ترانسيت) ومن شيكاغو الى Nashville على طيران الـ United ، مطار شيكاغو كبير وعجيب

يتبع....

قطرية كولمعجبون بهذا.

albarood · 28-06-2015, 12:09 AM

رائع. لم اتخيل ان لا فيجاس لديها مثل هذي العروض. حتى بخصوص الذخاب الى حلبة السباق وسياقة الفيراري

ali pontiac · 29-06-2015, 12:44 AM

صوره حق مطار شيكاغو O'hare inetrnational air port اكثر المطارات العالميه إنشغالا

ومن شيكاغو الى ناشفيل

شيكاغو من فوق ... بأذن الله بزورها السنه الجايه

Nashville ناشفيل هي عاصمة ولاية تينيسي Tennessee

وهذي موقعها في الخارطه الأمريكيه

يمكن البعض اول مره يسمع فيها هذي المدينه، طبعا ناشفيل مب مدينه سياحيه ابدا ،السبب الي خلاني ازورها هوه National Corvette Museum متحف الكورفت الدولي ، الكورفت سياره رياضيه امريكيه واعشقها من الصغر (مجنون كورفت)، قلت انه دام قاطع كل هذي المسافه ورايح امريكا ليش مازور المتحف والمصنع وكانت احد امنياتي والحمدلله رب العالمين الله يسر علينه امورنه وشفت المكان

في البدايه كنه بنروح بس يوم واحد ، يعني يوم الوصول واليوم الثاني نزور المتحف والمصنع واليوم الثالث ماشيين، بس انه مددت يوم قلنه اكيد ناشفيل فيها اشياء وخل نكتشفها

متحف ومصنع الكورفت مب في مدينة ناشفيل ولا في ولاية تينيسسي ، المتحف والمصنع في ولاية كنتاكي Kentucky في مدينة اسمها Bowling Green

بس اجرب مطار حق المتحف اهوه مطار ناشفيل ، ويبعد عن المتحف مسافة ساعه وشوي بالسياره ، تطلع من ناشفيل وداخل حدود ولاية كنتاكي لي منطقة Bowling green

في مطار قريب من المتحف بس صغير مطار خاص للطيارات (الجت)

ولاية كنتاكي فيها مطار Louisville international airport ، بس مطار ناشفيل اقرب، طبعا عرفت من موقع متحف الكورفت كاتبين افضل طريقه للوصول للمتحف عن طريق مطار ناشفيل

وكنه بنسكن في فندق اسمه Sync قريب جدا من المتحف ، واكثر الي يسكنون فيه حق زيارة المتحف والي يقون يشوفون سيارتهم واهيه تنصنع

بس كنت وايد استخدم خرائط قوقل google map قبل لا احجز وكنت اشوف انه المنطه مافيها اي شيييييي فقط هارديز ومطعم ومحطة بترول ، لنه المتحف صاير على الخط السريع،غيرت الفكره وقلنه نسكن في المدينه اقرب لنه وحق المطار وناخذ سياره اجار افضل والحمدلله انه اخذنه سياره، ماسكنه في وسط المدينه ، سكنه في منطقة الفنادق الي يم المطار ، منطقه هادئه وآمنه جدا ، لنه قريت في قوقل انه ولاية تينيسسي من اخطر الولايات في امريكا واكثر معدل جرائم ، بس ابد ماشفت شي من هالقبيل الحمدلله

حجزت السياره من نفس الشركه Dollar وكنت حاجز نفس الكيا ، كيا ريو ، بس انه ماعرف شقصة هذي الشركه صحيح رخيصه بس انصحكم تحجزون من شركه افضل مثل Budget و Thrifty لأنه كنت حاجز الكيا وعطوني شيفروليت سبارك ! المفروض يعطوني سياره بحجم الكيا ، عطوني سياره اصغر يادوب الشناط دشو فيها ، وغير آمنه وصغيره جدا جدا.

وطلعنه من المطار، شوفو في الصوره اللافته الي على اليسار مكتوب Rental cars حق ترجيع السيارات الأجار

وصلنه الفندق Radisson Airport Hotel

منطقة الفندق حلوه هادئه في يمها مطاعم فاست فود ومحطات بترول واااايد ، وكل محطه يختلف سعر بترولها عن الثانيه لنه شركات بترول متخلفه وايد

فديو تصوير عند الفندق
V

نزلنه الشنط وصلينه وظلم الوقت ،قلنه بنطلع نتعشه و نرجه انام حق بكره ، اكثر المطاعم في امريكا تسكر الساعه 10 الليل ، المهم صار خاطرنه في اكل هندي وحشتنه البهارات والرز/العيش ، وبرنامج الـ Yelp مايقصر

حصلنه مطعم هندي وكان ممدوح ضبطنه الـ GPS ورحنه ، احيانا استعين بالـ GPS قارمن الي شركة التأجير تعطينه ، بس احيانا قوقل Map يكون ادق

وهذي صوورة الأكل

طبعا حاااار وانه احب الأكل الحار

كانت الشوارع مظلمه يوم وصلنه عند المطعم ، شفت مكان مكتوب عليه مقهى عربي ، لحم كباب!!! تعجبت وانه امشي اشوف مكتوب على المحلات واهيه مسكره لحم حلال ، ماتوقعت بشوف هذي الأشياء في منطقه مثل هذي

رجعنه الفندق و ارتاحينه

ناشفيل اليوم الأول

صحينه الصبح وعلى طوووول ضبطنه الـGPS على المتحف

صور الدرب

الدرب ريفي وايد كنت اشوف نسور

في الدرب اشتغل مفعووول الأكل الهندي وانه بنص الدرب وين ارجع الحين؟؟ قلت اصبر ماقدر ... المهم شفت استراحه وفي مطعم هارديز وقفت وطلبت شبس على اساس اني ماني داخل حق الحمام ، لازم تاخذون احتياطكم اذا تاكلون اكل هندي

المهم ارتحت وكملت المشوار

اسم الشارع كورفت درايف

و وصلنه

طبعا هذي الكورفتات الي واقفين في الصاله ، حق استلام عن طريق المتحف ، في امريكا يصير تطلب السياره وتستلمها من المتحف طبعا بتكلفه زياده ، Museum delivery ويكتبون داخلها اسمك ، ويصير تروح تشوف سيارتك اذا تطلبها بمواصفاتك واهيه تتصنع من اول يوم لي يوم الإستلام وطبعا بتكلفه خاصه

صوره من قوقل حق لسيارات الي اصحابها يشوفونها تتصنع او يستلمونها من المتحف يصير تكتب الي تبغيه في قطعه معدنيه داخل السياره ، اما السيارات العاديه فقط مكتوب على القطعه Corvette
صورة توضيحيه هذي السياره صنعت حق شركة Venegeance Racing شركة محترفه في تزويد السيارات

نرجع حق صوري

طبعا رسوم الدخول 10 دولار فقط للشخص حق المتحف والمصنع

في فلم وثائقي قصير عن السياره صورت ثواني منه

فيديو
V
V

1966 الجميله

الجيل الرابع ابتدى من 1984 الى 1996 طبعا هذي السياره الوحيده لسنة 1983 ، سنة 1983 هيه السنه المفقوده للكورفت مانزلت بسبب يوم بصنعون الجيل الرابع واجهو مشاكل وايد بسبب التكنولوجيا الي اول مره يستخدمونها فاحتاجو وقت اطول حق تضبيط امورهم ونزلت في سنة 1984 ، يعني لا احد يقولكم صار عندي كورفت 1983

اسم كورفت جاي من المدمره الحربيه

الأب الروحي للكورفت اسمه زورا ، امريكي من اصل روسي

ZR1 الجباره بقوه 638 حصان

المحرك الي خلاهم يفوزون في سباقات Le Mans

محرك اخر سنة للجيل الرابع

السيارات الكونسبت (نسخ تجريبيه للمسقبل) طبعا هذي تصميمات في الثمانينات وبداية التسعينات حق الجيل الخامس من 1997 الى 2004

هذي يا جماعة الخير صورة المكان الي صارت فيه الكارثه ، صار انهيار ارضي وصارت حفره عميقه في المتحف ابتلعت اندر واثمن سيارات الكورفت ، لحسن الحظ انه هالشي صار وقت الليل وماكان فيه زوار للمتحف

طبعا تم تصوير الحدث بكيمرات المراقبه (فيديو من يوتيوب)
V
V

الي صار شي مخيف

وهذي السياره الوحيده الي نجت

اما الباقي

في احد يعشق الشفر معانه؟

ورجعنه صالة الإستلام

الأسود ملك الألوان

الأرضيه خارج المتحف

فيديو كورفت يستلمها صاحبها لو تلاحظون المتحف كله شياب ، اصحاب الكورفت في امريكا شياب وفي احصائية تقول اكثر الي يشترون الكورفت اعمارهم فوق الـ 50 سنه بس في منهم شباب ايضا
V
V

فيديو للمتحف
V

ركبنه السياره وتجهنه للمصنع ، المصنع مقابل المتحف اقطع بالسياره الشارع وندخل منطقة المصنع ، وداخل المصنع فيه توور يبتدي الساعة 8 ونص وتور يبتدي 11 ونص واخر تور الساعه 2 ، للأسف ممنوع تدخل معاك اي شي داخل المصنع لا كاميرا ولا شي مجرد بطاقة الهويه، دخلنه التور وكان شي جميل نشوف الكورفت واهيه تتصنع ، مرشدين التور طلاب جامعه هندسة قريبه من المصنع ، ويشتغلون بشكل جزئي كمرشدين للتور في المصنع ، بس الولد ماكان حماسي مثل المرشد الي كان في مصنع الشيلبي.

صورة من قرب المصنع للخزان ، كل الي عندهم الكورفت يصورون في هذي المكان اله انه للحين ماصار عندي كورفت ، الله يرزقنه

وخلاص انتهت رحلة مصنع ومتحف الكورفت والي يبغي معلومات اكثر هذي موقع المتحف

National Corvette Museum

ورجعنه الدرب نفسه وطلعنه من Bowling green - Kentuky، واحنه نمشي نشوف مناظر حلوه ، قلت حق زوجتي شوفي في قوقل اذا في منتزه في طريقنه بنوقف ونصور

وقفنه عند مكان حلو وهادئ اسمه Rockland recreation area

ركبنه السياره مشينه مسافه بسيطه وكان فيه منتزه اسمه Cedar hill park

الجو طبيعي جدا بس انه لابس شتوي خدعني الجو لنه اول ماوصلنه ناشفيل كان فيه بروده

ورحنه مطعم كنت متحمس له من البحرين اسمه Kayne prime متخصص في لحم الستيك فيه بس صورة وحده

في المطعم حسيت بشوي من العنصريه ، سالني النادل هل تبي شراب ، قصدهم شي كحولي، قلت له لا بس عصاير طبيعيه قال بس برتقال عندنه وقلت له معليش، ويوم مشه سمعته يقول حق زميله بسخريه مايشربون كحول

طبيعة شعب ناشفيل احسهم مب معتادين على السياح بس انه ماشفت منهم مضايقات

وماعندهم اله شارع واحد حيوي في downtown اسمه The district

ورحنه نشوفه

اطول مبنى في ناشفيل حق شركة اتصالات AT&T

في برنامج الـ Yelp طلع لنه محل ايسكريم اسمه Mike وكان عليه زحمه ، الصراحه عجييب ومصنوع في بيت ، مثل مانقول شغل بيت وبدون مواد حافظه والوان

اخذنه الأيسكريم ورحنه جوله على عربة الخيول

فيديو
V
V

وهذي كانت نهاية اليوم في ناشفيل يتبع....

قطرية كولمعجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رحــلــتــي الــثــانــيــة إلــى مــالــيــزيــا (مــايــو 2015) ...	Bu Rashid	بوابة ماليزيا	199	22-10-2019 08:03 AM