رحــلــتــي شــهــر الــعــســل أمــــريــــــــــــكـــــــا - الصفحة 7

|القحطاني| · 03-07-2015, 02:49 PM

ما شاء الله

موضوع جميل والتفاصيل روعة

بغض النظر عن الطبيعة وجمال المواقع

السيارات الكلاسيكية الأمريكية فخخخخمة

والله شيء رهيب

الله يعطيك العافية

فيصل · 04-07-2015, 02:34 AM

صباح الخير
تأخرت عن المتابعه

أجزاء جميله وحاصه لاس فيغاس
أول مره أِقرأ عن شخص بالمنتدي جرب الدرفت في لاس فيغاس

حلو انك تداركتك وغيرتم الغرفه ولا صار الفندق فل

المطعم له فرع في لندن واليابان حسب ما شفت تقارير الاخوات كويتيه متنقله وهداوه

شكرا لك

ali pontiac · 04-07-2015, 02:41 AM

اخوي القحطاني مشكوور يا الغالي ، السيارات الأمريكيه الكلاسيك صوتها واهيه واقفه هيبه

اخوي فيصل الدرفت والسيارات في فيغاس شي عجيب خصوصا حق واحد محنك سيارات ، وفي برنامج في فيغاس تأجر سياره وتسابق في الشارع مع باقي المستأجرين بس الموضوع حسيته مب آمن وخصوصا اذا مسكك المرور ، وغير برامج السيارات في برنامج تذكرته في وقت متأخر واهوه رماية ، ميدان رماية تختار اي سلاح او رشاش وترمي على هدف، طبعا هذي بعد تجربه فريده من نوعها بتكون.

ali pontiac · 05-07-2015, 05:26 AM

نيو يوورك اليوم الثاني

اليوم الثاني كان عندنه برنامجين ، البرنامج الأول زيارة تمثال الحرية Statue of liberty، ومبنى الأمباير ستيت Empire state building

طبعا هذي الشيئين ماحجزتهم حجز مسبق لأنه سعرهم كان بسيط ، انه كانت ناوي احجز تذكرة تمثال الحريه ، بس غيرت رايي، ويوم كنت بحجز كنت ابي احجز حق انروح فوق راس تمثال الحريه عند التاج ، بس موقع الحجز ، اذا تبغون تروحون فوق لازم حجز 6 شهور قبل !!!!

للوصول حق تمثال الحرية لازم نركب عباره ونروح جزيره اسمها Ellis island الي فيها التمثال ، وفي اوقات وفي شركات تور وايد تودي لتمثال الحرية

صحينه متأخرين وطاف علينه الوقت الي لازم نلحق فيه على العباره ورحنه مبنى الأمباير ستيت ، واحنه بالدرب نمشي بحثنه في قوقل وحصلنه حجز للعباره وحجزنه وقلنه بنخلص من مبنى الأمباير ستيت اول وتالي بنروح، طبعا في الشارع بتحصلوون وايد ناس تبيع تذاكر دخول الأمباير ستيت بس احنه خذيناها من داخل المبنى وفي ذاك اليوم كان الجو بارد و ظباب كثيف والرؤيه معدومه من فوق ، بس رحنه على كل حال دام وصلنه

مبنى الأمباير ستيت تم بنائه في سنة 1929 مكون من 102 طابق ويقع محله في الشارع الخامس كان اطول مبنى في العالم لمدة 40 سنة ولي هذي اليوم يعتبر المبنى شي رهيب، بمعدات ذاك الوقت تم بنائه في وقت قياسي جدا ، اخذ البناء سنه و 45 يوم.

طبعا في مصاعد وكل مصعد يوصلك لي طابق معين وتالي تركب مصعد غيره ، وداخل المبنى صور تاريخيه للمبنى ولكبار الشخصيات الي زاروه ،وطبعا محل هدايا واشياء تذكاريه ، وصور قديمه للمبنى مثل وقت انشائه

وانه اشوف صور البناء احس بحسره واقول في سنة 1921 عندهم هالصناعات وناطحات سحاب، واحنه الي سبقناهم بسنين وكان عندنه العلم والحضاره والخوارزمي وابن النفيس وغيره والبنيان الهندسي الأندلسي و وفن التخطيط العمراني ايام العثمانيين

ضباب والرؤية معدومه

فيديو
V

طلعنه من المبنى واخذنا تاكسي ورحنه لمكان العبارات الي تودي Ellis island

رحنه صندوق التذاكر وعطيناهم رقم الحجز

هني كان التفتيش شديد الأمن في نيويورك خصوصا في الأماكن السياحيه قوي ، متأثرين من هجمات 11 سبتمبر

وصلنه عند آنسة الحريه وصورنه معاها

صورنه وعلى طول رجعنه للعباره، العبارات يروحون ويرجعون ، اول ماوصلنه كنه نشووف طابوور طويييل على عبارات الرجوع ، احنه صورنه وعلى طوول رجعنه حق العباره الي ترجع عن الأزدحام

رجعنه الفندق ، الفندق اذكر انه كان حاااار من داخل وكتمة نفس ، وبرع المدينه الجو بااااارد

في تذكره اسمها New york pass

هذي التذكره تشترونها وتقدرون تدخلوون كل المتاحف في نيويورك وتورز وعروض واشياء غير كنت بشتريها بس حسيت اني مابدخل كل الأشياء الي تشملها
هذي موقعها والي يخطط يروح نيو يورك يلقي نظره عليها يمكن تفيده
V
V
https://www.newyorkpass.com/En/

ارتاحينه شوي وطلعنه من الفندق رحنه Central park اكبر منتزه في نيويورك

هذي الصوره عندي من احلى الصور الي صورتها في السفره
V
V
V

شفنه بقايا ثلج << اول مره يشوف ثلج

الجو بارد وذلين المجانين لابسين خفيف ويركضون

ظلم الوقت واحنه نمشي في الظلام شفت حركه كانه شي يتحرك المكان بين الشجر وشفت الأخ المتطفل وصورته

هذي الصور للمباني ايضا من الصور الي عجبتني ،كيمرتي نوعان كانون 550

صار المنتزه مظلم وتمشينه للتايم سكوير

في ذي اليوم تعشينه في مطعم تركي كان قريب من التايم سكوير، ويوم طلعنه من المطعم تفاجئنه مطر شديد وقوي ،وكنه نبي تاكسي يمر مو شايفين شوي خف المطر وعلى طووول مشي سريع لي الفندق

طبعا هذي كانت نهاية اليوم الثاني ومن هني بصيدكم احباط لنه الصور قليله جدا كم صوره

ومافي يوم ثالث على طوول بكتب اليوم الرابع ويوم المغادره

بقولكم ليش .....يتبع

ali pontiac · 05-07-2015, 05:45 AM

نيو يورك اليوم الثالث

طبعا هذي اليوم الي مافيه صور

لنه ذي اليوم قضيناه في التسوق من الأوتلت .....الأوتلت الي رحناه اسمه Woodburry Outlet على اسم المنطقه

المكان يبعد عن المدينه ساعه تقريبا الباص

في باصات متخصصه تودي الأوتلت

وسعر التذكره شي بسيط ، التذاكر اخذناهم The Port Authority Bus Terminal محطة باصات في نيويورك ، وداخل في مكتب يبيع تذاكر للأوتلت ... لي تشترون تذاكر يعطونكم دفتر كوبونات خصم حق المشتريات في الأوتلت.

نصيحه يمكن بعض الي يحبون سوالف الشوبنق يطبقونها ، وبصراحه فكره ، وكنه نشوف الآسيويين هناك مطبقينها ، ياحبهم حق الشوبنق اكثر ناس نشوفهم يشترون

اشترو شنطه كبيره فاضيه، انه شريتها يوم كنت في ناشفيل ، ودوها معاكم الأوتلت والي تشترونها حطوه بترتيب داخلها لأنه مابتقدرون تحملون اكياس كثيره

بصراحه انه ما احب الشوبنق ، يعني اذا بروح اشتري ملابس بسرعه بسرعه واخلص اموري ، لكن في الأوتلت اشتريت اكثر من زوجتي، وبصراحه الأسعار تغري وشي يسحب شي ثاني تاخذ شي وتحصل خصم على شي ثاني وخصومات اكثر واكثر

هذي صورة عن خاطركم في حديقه صغيره اسمها Bryatnt Park كنه دائما نمر عليها

يتبع .....للأسف بختصر لكم اليوم الرابع ويوم المغادره ... بسبب قلة الصور ،في هذي الأيام كنت قليل اصور ماعرف ليش ، يمكن احباط بسبب احس السفره خلصت

قطرية كولمعجبون بهذا.

albarood · 05-07-2015, 01:33 PM

متميز كعادتك
اذكر اني عندما حجزت للكراون في تمثال الحرية حجزته قبل ٣ اشهر من سفرتي. وجلست في الجزيرة حوالي ٣ ساعات متنقلا بين البيداستيل والكراون والمتحف الصغير. وبنتي الرضيعة معي وشايلها بحمالة معاي. لكن للاسف ما خلوها تطلع للكراون بسبب الدرج اللولبي.
اما الشراء مع الحريم
زوجتي ليست من النوغ التي تحب التسوق لمن اذا تم اعطائها فرصة
فمعي عربة البنوتة فكانت تسد بالاكياس خخخخخ

ali pontiac · 06-07-2015, 12:27 AM

تسلم يا الـ Barood شاكر لك مرورك

انه ماشفت المتحف بس رحنه صورنه ورجعنه يمكن اقل من 30 دقيقه

ali pontiac · 06-07-2015, 02:23 AM

نيو يورك اليوم الرابع

في هذي اليوم عندنه بس برنامج واحد واهوه Chocolate tour تور مع مرشد يتكلم عن تاريخ الكاكاو في المدينه وياخذنا على اقدم واشهر محلات صنع الكاكاو ونتذوق انواعهم

حجزت التور من هذي الموقع وسعر التور 50 دولار للشخص
V
V
Chocolate Tour of New York | New York Tours | Best Tours | BestTours.com

المرشد كان نايم وشرحه بارد مايشد ابدا

قبل لا يوصل المرشد شفنه الأخ ذي ومعاه فريق تصوير مجنون كامل

طبعا التور كانت مدته يمكن ساعه ونص نتمشه في المدينه و صلنه على حسب كلامه مدينة نيو يورك القديمه، بصراحه عجبتني اكثر من المدينه الحديثه

هذي بعض الصور القليله للتور

وهذي صورتين للمدينه القديمه ، احس فيها نوع من الحياة ، اما المدينه الحديثه كأنك في منطقه دبلوماسيه وموظفين وسيارات التاكسي وعمال وفوظة للأسف ماعرف عنوان او المنطقه كان فيها مطاعم هنديه وايطاليه ومخابز وشارع فيه ماركات

هذي صوره مب من ظمن التور هذي صورة ايسكريم اشتريه في الأوتلت بس بخليها زيادة صور بس شكله كان احلى من طعمه

انتهى التور

وهذي اليوم مشينه فيه وايد لي ماوصلنه الفندق وفي الليل رحنه التايم سكوير نتعشه و نزل ثلج خفيف

فيديو
V
V

نيويورك اليوم الأخير

طبعا هذي اليوم الأخير مجهزين الشنط وكل شي ونزلناهم تحت في الفندق ، وقلنه حق موظف الأستقبال احنه بنطلع وبنرجع العصر حق يجهز لنه تاكسي حق المطار

رحنه متحف American Museum of Natural History الي مثلو فيه فلم night at the museum

واحنه رايحين مرينه بمطعم اسمه Juniors متخصص في الجيز كيك تفطرنه عنده ، اخذت جيز كيك على جزر حجمها كبيره وتكفي شخصين

وصلنه المتحف

المتحف ماشاءالله ضخم واقسام وااايد ماتعرف وين تبتدي وين تنتهي

طلعنه من المتحف ورحنه الـ Central park شوي نتمشه

هذي متحف The Metropolitan Museum of Art

وهذي صورة اخر وجبه كلتها في المدينه سندويش (ام الربيان) اسم المحل Luke's lobster اكلت منه مرتين ، في اخر مره واليوم الي قبله ، هذي كان من المحلات الي من البحرين مخطط لها شفته في الـ Yelp

رجعنه الفندق وصلينه وانتظرنه التاكسي

هذي اخر صوره من التاكسي كنه فوق الجسر ورايحين المطار

سامحوني على اي تقصير في التقرير واشكركم على تشجيعكم لي ، واشكر كل عضو ساهم وكتب تقرير في المنتدى حق فايدة الناس ، بصراحه لأنه كتابة التقرير تاخذ الوقت كله ،وفي نفس الوقت متعه واعادة ذكريات جميله

واي سؤال انه حاضر

بالنسبه لي احلى مدينتين كانو ، سان فرانسيسكو ولاس فيغاس

نيويورك ماعجبتني وايد مثل الباقي كانت اقل مستوى ( بغض النظر عن ناشفيل لأنها مب مدينه سياحيه) يمكن الوقت الي رحت فيه نيو يورك كان غلط والجو كان له عامل كبير ، البرد كان شدبد ، بس نفس الوقت احسها مدينه خاليه من البرامج (وجهة نظري)

اول مارجعت ، حطيت لي خطه اروح في نهاية شهر مارس 2016 بأذن الله

وبتكون الرحله

ولاية فلوريدا: ميامي و اورلاندو

ولاية نيفادا : لاس فيغاس

ولاية كاليفورنيا:سان فرانسيسكو

ولاية اوريقون: ميدفورد و بورتلاند

ولاية واشنطن : سيياتل

ولاية اليونز : شيكاغو

ويعطيكم الف عافيه

قطرية كولمعجبون بهذا.

فيصل · 06-07-2015, 02:31 AM

يسعدلي صباحك
ما الومك ما دام فيه تسوق ما كو صور وين تصور وتتسوق
نيويورك باس يعني 10 ايام من غير الباص 269 دولار هل تستاهل كل المده هي ما أعتقد صح

الوصول للأعلي يحتاج حجز 6 أشهر من قبل مره وقت طويل هل مصلا بتلقي ناس تبيع تذاكر للأأعلي بالخارج

شكرا لك

فيصل · 06-07-2015, 02:35 AM

الله يعافيك ولا جاء من قصور
وان شاءالله زي ما خططت تزورها بمارس 2016
شكرا لك

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رحــلــتــي الــثــانــيــة إلــى مــالــيــزيــا (مــايــو 2015) ...	Bu Rashid	بوابة ماليزيا	199	22-10-2019 08:03 AM