رحــلــتــي شــهــر الــعــســل أمــــريــــــــــــكـــــــا

ali pontiac · 17-06-2015, 02:24 AM

العرب المسافرون

بوابة السفر الى الولايات المتحدة الأمريكية U.S.A

السلام عليكم ورحمة الله وبركاته

حبيت اعرض لكم تقرير سفرتي لأمريكا الي بدت في شهر مارس 2015 وهذي اول مشاركه لي في المنتدى الرائع واشكر جميع الي ساهمو فيه من اعضاء و مشرفين

اعرفكم على نفسي اخوكم علي من البحرين

السبب الي خلاني اختار امريكا اول شي حبي لها من الصغر ثاني شي الثقافه او تقاليدهم وخصوصا الأكل

المدن الي زرتها في امريكا كالتالي

[table=35%][tr=alt2][td]المدن[/td][td]الأيام[/td][/tr][tr=alt1][td]سان فرانسيسكو[/td][td]5[/td][/tr][tr=alt2][td]لو انجلوس[/td][td]6[/td][/tr][tr=alt1][td]لاس فيغاس[/td][td]4[/td][/tr][tr=alt2][td]ناشفيل[/td][td]2[/td][/tr][tr=alt1][td]نيو يورك[/td][td]4[/td][/tr][/table]

طبعا في البدايه امور التأشيره/ الفيزا كانت سهله وسلسه جدا لله الحمد

حجز التذاكر كان على طيران اللإتحاد سعر التذكره للشخص الواحد 508 دينار بحريني

تكلفة الطيران الداخلي جميع الرحلات 150 دينار

الفنادق

[table=50%][tr=alt2][td]المدن[/td][td]الفنادق[/td][/tr][tr=alt1][td]سان فرانسيسكوو[/td][td]Kensington park hotel[/td][/tr][tr=alt2][td]لوس انجلوس[/td][td]Miyako hotel[/td][/tr][tr=alt1][td]لاس فيغاس[/td][td]Westin[/td][/tr][tr=alt2][td]ناشفيل[/td][td]Radisson airport hotel[/td][/tr][tr=alt1][td]نيو يورك[/td][td]Seton[/td][/tr][/table]

اهم شيئين في الفنادق بالنسبه لي النظافه و الموقع الحمدلله الفنادق الي سكنتها نظيفه بغض النظر بعضها قديم ولكن نظيفه وفيه اهتمام وتجديد و مواقعهم ممتازه واسعارهم مناسبه

وانصح بحجز الأشياء حجز مسبق مثلا تذاكر الملاهي ديزني و يونفرسال وغيره ، والسياره الأجار وكللل التذاكر حجزت من قبل ، يعني مصروف اليد فقط للأكل والبترول حق السياره والأمور البسيطه.

نبتدي

الرحله ابتدت من مطار البحرين الدولي الى مطار ابو ظبي مثل ماذكرت على طيران الأتحاد والطياره كانت A320 اذا ماخاب ظني

وقت الإنتظار 3 ساعات تقريبا بين الرحلتين... مع العلم اني انه وزوجتي على طول كنا نمشي وماوقفنه نستريح او ناكل ونشرب ومع ذالك الوقت داهمنه بسبب الزحمه والتفتيش الشديد وصلنه على اخر لحظه !!!

طبعا صادني موقف لا يحسد عليه قبل لا اركب الطياره قسم الهجره والجوازات الأمريكيه موجود في المطار حق ختم الجوازات قبل ركوب الطياره ، يعني قبل لا تنزل ارضهم يختمون دخول جوازك ،وهم نفسهم الأمريكان الموظفين يوم شافو جوازي شكو فيني لنه الجواز كان مجدد وجديييد ومكتوب الوظيفه (طالب) الله يسامح موظف الجوازات... وفيه ختم الأنتخابات البلديه والنيابيه وماعرفو شنو الأختام وقالو لي انتظر ...والله اني فقدت الأمل قلت خلاص الطياره راحت علي..وكان ينادو النداء الأخير وانه خايف وبعد خمس دقايق دخلوني غرفه لحالي جاني واحد وسالني عن الختم وشرحت له وتم يناظر في الجواز ليييين مانتبه على شعار المملكة في الختم وقال اهاااا واقتنع وقالي خلاص رووح بصراحه كان اكثر موقف يخوف في الرحله كلها والحمدلله على طول ركضنه للطياره الطياره كانت boeing 777

والرحله كانت طويله جدا ومتعبه انه من النوع الي ماعرف انام لا في باص ولا في طياره

اليوم الأول ســـان فــرانــسيسكووو

وصلنه سان فرانسيسكو تقريبا الساعه 9 الصبح

اخذت كرت تلفون T mobile وانصح الجميع فيه الباقه الي اخذتها بـ 100 دولار شامله استخدام بيانات غير محدود ونسيت كم دقيقه اتصال مجانيه. اقوه شركتين في امريكا T mobile والشركة الثانية AT&T

اول ما وصلنه كنت ابي اعرف اتجاه القبله للصلاة كل برنامج في التلفون يأشر على اتجاه غير !!!. المهم صلينه وعلى طوول نزلنه نشوف السان فرانسيسكو

الجو كان معتدل وجميل مع بروده الصبح والمغرب

فندقنه كان بالضبط عند Union Square وهذي صور المكان

واهم شي الهوت دوق الأمريكي ، الحمدلله انه تقريبا كل المطاعم الي رحتها عندهم لحم بقر ، ماعدا الببروني والبيكن للأسف كله لحم خنزير كرمكم الله.

وهذي بعض الصور واحنه نمشي

قطرية كول, أسيرالغربة, tarfa و 1 آخرون معجبون بهذا.

oceanus · 17-06-2015, 02:36 AM

اهلا يا عزيزي

بداية سريعة جدا مع ذكر التفاصيل

ياليت توضح لنا سعر خط الموبايل ، ومن اي موقع حجز التذاكر ملاهي ديزني واليونيفرسال

ومعك متابعين ، وبقوة

tarfa و أسيرالغربة معجبون بهذا.

ali pontiac · 17-06-2015, 03:12 AM

بأّذن الله بذكر التفاصيل اخي العزيز

أسيرالغربةمعجبون بهذا.

ali pontiac · 17-06-2015, 04:33 AM

واحنه نتمشه دخلنه China town مرور الكرام على السريع

وكملنه مسيرنه لي ماوصلنه الى الـ Coit tower ,وهوه معلم من معالم سان فرانسيسكو السياحيه

وهذي فيديو صورته تصعد الدرج الي ياخذ للبرج

وهذي فيديو للبرج

الحلو انك لما تركب البرج تشوف الجهه الغربيه من فووق وتشوف الميناء والمرفأ منظر جميل بصراحه

وهذي درب آخر للرجوع جدا جميل وتشوفون في هذي المنطقه كثير من السياح والناس الي تلعب الرياضه... مكان يفتح النفس

واصلنه المشي ودخلنه كنيسة St.peter & paul church للتصوير والكنيسة مفتوحه للسياح

خرجنه وتوجهنه الى شارع Lombard الشهير

يوم وصلت فووق نهاية الشارع شفت الـ Coit Tower وتعجبت اني قطعت هذي المسافه !!!!

شوفو شلوون البرج بعيد

في هاللحظه حسيت بالتعب وركبنه اشهر وسيلة مواصلات في سان فرانسيسكو... سعر التذكره 6 دولار للشخص واحيانا يطنشوون وتصير التوصيله بلاااش

حسيت بالجووع وقلت خلاص وقت الأكل ونزلنه هذي الشارع ، ناسي اسمه لو تلاحظون اعلام ايطاليه في الشارع ، وهذي الشارع مليان مطاعم ايطاليه

انصح الجميع في السفر بتحميل برنامج Yelp البرنامج مفيد خصوووصا للمطاعم وتشوف المطاعم الي في منطقتك وتختار نوع الأكل وتشووف التقييمات للمطاعم وتقدر تسجل فيه وترفع صور وتقيم المطعم

ورحنه مطعم البيتزا Tony's pizza من اشهر مطاعم البيتزا في سان فرانسيسكو ومزحوووم جدا ولذيييييييييييذ

وعقب ما اكلنه وشبعنه لله الحمد الجو برد بسرعه وكنه منتهيين ونحس بالتعب على طووول رجعنه الفندق وانتهى اول يوم الي اهوه يوم الوصوول ...يتبع

قطرية كول و أسيرالغربة معجبون بهذا.

oceanus · 17-06-2015, 09:07 AM

هلا عزيزي

هل انت ماشي على برنامج معين ؟؟

هل كان عندك خلفية على المدينة .. ؟؟

في انتظار تفاصيلك

أسيرالغربةمعجبون بهذا.

ali pontiac · 17-06-2015, 04:47 PM

اقتباس : المشاركة الأصلية كتبت بواسطة oceanus

هلا عزيزي

هل انت ماشي على برنامج معين ؟؟

هل كان عندك خلفية على المدينة .. ؟؟

في انتظار تفاصيلك

اخوي الكريم اي نعم كنت ماشي على برنامج بس يوم الوصول فاضي وبدوم برامج فكنت اتجول

وكنت ماخذ البرامج من احد الأقارب الي يزور المدينه دائما فكان عندي خلفيه بسيطه كنت اقره واشوف الخرايط صارت عندي خلفيه بسيطه وساعدتني.

ali pontiac · 17-06-2015, 06:19 PM

اليوم الثاني فرانسيسكوووو

طبعا اليوم الثاني عندنه كان عندنه برنامجين البرنامج الأول جوله بالدراجات الهوائيه (سيكل) على المدينه والبرنامج الثاني جولة بالعباره في البحر تاخذك تحت الجسر العظيم Golden gate bridge

حجزت الجوله مالت الدرجات من هذي الموقع

https://sosfbiketours.com/

لما تدخلون الموقع في اكثر من خيار للتور ، انه الي اخذته الـClassic تور مدته 5 ساعات، وبصراحه التور بالدراجات شي عجييب ولازم يكون اول البرامج في المدينه حق اكتشاف المدينه واخذ فكره تاريخيه عنها وفرصه حق تشوفون اشيه حلوه او ماكنتو مدخلينها في برامجكم سعر التور الكلاسيك 33 دينار للشخص.

صحينه الصبح وعلى طول نزلنه نتمشه لي موقع اللقاء طبعا في الموقع مذكور في موقعهم وانه ضبطت Google map وتوجهنه للموقع الي ننطلق فيه ، وفي الطريق دخلنه كووفي شووب نفطر فيه وكان احلى وجبة فطور في الرحله من مطعم اسمه The grove وله 3 افرع في المدينه.

وبعد الإفطار الذييذ طلعنه و وصلنه لي نقطة التجمع ، كل واحد اخذ دراجته وخوذته ، وكان مرشد التور شخص محبوووب اسمه جوش وتعرفنه على باقي المجموعه الي معانه

وهذي فيديوات اثناء الجوله

وهذي اكبر منتزه ومن اجمل الأماكن في المدينه ، اسم المنتزه Golden gate park

واصلنه ركوب الدراجات ورحنه منتزه ثاني جميل اسمه Alamo square

كان مع المرشد جووش بعض الصور التاريخيه القديمه للمدينه ومراحل تطورها وهذي صورة للحريق الكبير الي صار مع الزلزال الي دمر المدينه في عام 1906

وهذي فيديو قصير للأخ جووش واهوه يشرح

وهذي صوره لمنتزه شهير اسمه Dolores park

رسمه فنية على احد المباني

بعدها توقفنه لوجبة الغداء في ساحه شاحنات الطعام واكلهم جدا روعه ولذيذ

وكانت وجبتي تاكوو السمك الحار طبعا اكلك وشربك غير شامل سعر التور

واصلنه المسير ورحنه لي اخر مكان في جولتنه وهي City Hall قاعة المدينه

وهذي صوره اثناء اعادة بنائه بعد الزلزال الكبير

عجبتني الساحه الي فيها قاعة المدينه وزرتها مره ثانيه وبرفق صور اكثر لاحقا لقاعة المدينه وداخلها

صوره للسيارات Hybrid/الهجينه تاخذ شحن كهرباء

انهينه جولتنه ورجعنه الدراجات وبصراحه كان احلى برنامج في السفره كلها ممتع وانصح كل الي يزور المدينه بهذي التجربه وبعدها رجعنه الفندق استعداد للبرنامج الثاني.

قطرية كول و أسيرالغربة معجبون بهذا.

فيصل · 17-06-2015, 08:00 PM

وعليكم السلام ورحمه الله وبركاته

اسعد الله مسائك

حياك الله أخي علي

وشاكرين لك علي التقرير

هل رجال الجوازات الأمريكيه في مطار أبوظبي متواجدين ....أتذكر سمعت عن كذا من قبل ومو متأكد

المشي مو مشكله بما أن الجو يساعد

بس 5 ساعات بالسيكل تعب يا غالي وش رأيك

ali pontiac · 17-06-2015, 08:04 PM

اهلا اخوي فيصل

اي نعم موظفين الجوازات الأمريكيه موجودين في مطار ابو ظبي

والله ال5 ساعات بالسيكل مرت بسرعه ماحسينه بالوقت وكنه نوقف بين فتره وفتره ونمر على مطاعم وكوفي شوبات للي يبي يدخل الحمام كرمك الله والي يبي يشرب ماي او يشتري اي شي.

كتكات783 · 17-06-2015, 09:34 PM

ماشاء الله عليك حبيبنا ( علي ) ..

بداية .. مبروك الزواج واسأل الله أن يجمعكم على المودة والخير ..

فيه أجمل من أميركا .. لتكون شهر عسل .. أحسنت الاختيار ..

بداية التقرير جدا جميل وتنقلاتكم رااااائعة وتفصيلاتك وذكرك للبرامج مفيدة لمن أراد تخطيطا إلى تلك البلاد ..

بانتظار تقييم الفنادق وأبرز المزارات الأخرى ..

قلمك ونقلك وتصويرك .. يجعل من متصفحك هذا ملييء بالاستمتاع والفائدة ..

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رحــلــتــي الــثــانــيــة إلــى مــالــيــزيــا (مــايــو 2015) ...	Bu Rashid	بوابة ماليزيا	199	22-10-2019 08:03 AM