رحلة اوربية تم الحجز لها( بريطانيا - فرنسا - سويسرا) - الصفحة 7

وجهات أوروبية · 11-09-2015, 07:36 PM

مشكورين اخواني ابومهاب ومديرنا بوخالد
على كلامكم الطيب واعتبره وسام على صدري

بوخالد انا وعدتك ان شاء الله اسوي موضوع متكامل بس لما اخلص بعض الاشياء عندي هنا
ومنها تقريري الجديد يمكن انزل جزء منه اليوم او بكره
وتكمله جزء اسكتلندا

وان شاء الله راح انزل موضوع باريس بالتفاصيل الممله

تحياتي لكم

فيصل · 11-09-2015, 07:51 PM

تسلم لي يا غالي

وجهات أوروبية · 11-09-2015, 08:16 PM

اقتباس : المشاركة الأصلية كتبت بواسطة MRK

يعطيك العافية حبيبي ابو سعد
والشاهد الله انك ماقصرت معي الله يوفقك

الله يعافيك يا الغالي بالعكس ماسوينا الا الواجب
ويوفق لكم ان شاء الله في سفرتكم وكل اموركم

وماعليه استحملني شوي بكرا ان شاء الله سفرتنا

لا افا والله عليك انا كنت ناوي اراسلك وعندي خبر ان بكره سفرتك وفي ودي اليوم ماتطلع الا مخلص امورك كلها
انا قاعد وجاهز لك ابغيك تطرح كل الاستفسارات الي في خاطرك الحين
وحتى وانت هناك اي وقت ارسل لي على الخاص لو عندك اي استفسار عاجل وانت بالسفره

يعني اللحين الي فهمته منك لما نطلع من لندن ونوصل باريس بالقطار حق يورو ستار ناخذ المترو او الرير من محطة كير دي نورد الى محطة لادفاينس ؟!

لا اخوي مانصحك تاخذ الرير او المترو لازم اتغير محطات عندكم اغراض وشنط مب عملي الرير لك في هالحاله
وانت معاك اهلك متعبه لكم اشوي
الافضل تروح بالتاكسي بتدفع اشوي زياده لكن اريح لكم بكثير وهي مره وحده بتندفع يعني ماتفرق وايد

النصيحه الثانيه لما تطلع من محطه كير دي نورد اول ماتنزل من القطار بتشوف قدام لوحات تقول لك التاكسي تروح يمين
لما تطلع من البوابه بتحصل صف تاكسي وصف طابور ناس تنتظر التكاسي في هالوقت يمكن يجونك ناس من اخونا العرب يعرض عليك التوصيل بدل انك تصف بالطابور ويقول لك اسرع بدل الوقفه لاتروح معه
لان راح يعطيك سعر تقريبا 80 يورو ويقعد ينزل لين تقريبا 65 يورو وطابور الناس لاتنزعج منه خمس دقايق ويجي دورك يمشي سريع والتاكسي تتوافد على المحطه بأعداد كبيره

طيب في شي مهم ما ادري من وين اشتري التذاكر الي تركبني المترو مع الرير وماهي النوعية الي اشتريها لاني حسب ماقريت في انواع وزون معين انا ما ادري من وين وايش المناسب لنا

بالنسبه لتذاكر المترو والرير يا انك تاخذها اون لاين من النت
او من اي محطه من محطات المترو بباريس وتشتريها من المكينه
هذا فيديو انا مسويه وان شاء الله يكون واضح لك طريقه شراء تذاكر المترو لعده ايام

واذا تبغي تشتري اون لاين من هذا الرابط

Transport Paris - RATP - Paris Tourist Office

بالنسبه لنوع التذاكر الي تنفع لك
وصولك الاول الى باريس قبل دزني بتقعد اربع ايام
ومافي تذاكر لأربع ايام قالو بسوون لكن للحين مافي شي
في حق عدد ايام 1,2,3,5
انت بأختيارك حسب السعر يا تاخذ 3 ايام او 5 ايام
اذا اخذت 3 بعدها خذ وحده منفصله لليوم الرابع
واذا خمس ايام خلاص تكفيك للمده وزياده يوم بخشيش خخخ

والزون الي يناسبك هو 1-3
وهذا الزون من غير دزني وانصحك
اذا مع دزني المفروض تاخذ زون 1-5 بس مانصحك تاخذه
لان لو نحسب مده باريس ودزني لاند 6 ايام
يعني راح تنفعك للذهاب فقط الى دزني ووقت العوده من دزني الى باريس بتكون منتهيه

يعني الخلاصه اخذ تذكرتين :
عدد 3 ايام زون 1-3
و عدد يوم واحد زون 1-3

يعني من الرابط الي فوق تختار الي سعرها 27,30 يورو
وتحط مكان 0 رقم 2 لك ولزوجتك وتحجز
وافصل توصيل هو يرسلونه لك للفندق الي انت ساكن فيه
وقيمه التوصيل 12 يورو
وتكون تذاكركم موجوده في الاستقبال لما توصلون لانهم يرسلونها الفندق قبل وصولكم بــ 24 ساعه

واذا تبغي مجاني بدون ماتدفع ولا يورو تروح مكتبهم في باريس وتاخذها من هناك

بس الافضل من هذا كله اتبع الفيديو الي انا مسويه وتحجز من هناك وقت الوصول ماياخذ منك دقيقتين

وبالنسبة للباستا من اللحين مشتاق اني اجربها هههههه حطيتها في بالي

اي هههههه اخذ الباستا تيك اوي واطلع للساحه واقعد هناك واكلها بالعافيه عليكم

هذي الباستا شريتها ورحت كلتها في الساحه وعلى الكيس مكتوب اسم المطعم ههههه

وكيف عشان برج ايفل متوفرة التذاكر لو لازم اون لاين لاني ماحجزت لها

اي اخوي متوفره هناك بس راح تحصل طابورين
طابور شراء التذاكر وطابور الدخول
حاول ترتب مع زوجتك انت في طابور التذاكر وهي في طابور الدخول

بس بالنت غير متوفره للأسف

وبكرا الليل طيارتنا ان شاءالله الساعه 12:35 بعد منتصف الليل

توصلون بالسلامه ان شاء الله

ملاحظه :

بخصوص سفرتك سويسرا رحت القسم السويسري وماحصلت لك موضوع
محتاج شي او عندك استفسارات لها خبرني

بالتوفيق

وجهات أوروبية · 11-09-2015, 08:18 PM

الاجابه فوق بالرد باللون الاحمر

وجهات أوروبية · 11-09-2015, 08:30 PM

اقتباس : المشاركة الأصلية كتبت بواسطة أبو مهاب

ما شاء الله ما قصر أبو سعد عطاك الزبدة في باريس بالتفصيل الممل

أبو سعد فضلا لا أمرا

ممكن تحط موضوع لمطاعم باريس ، كل ما سألوني قلت لهم ما اعرف الا مطعم نورا والعجمي ويتزا روما هههههه

ياهلا ومرحبا اخوي وخبيرنا ابومهاب

ههههههه حلووو بس العجمي بصراحه كلش مايعجبني
احسن مافيه ان اقرب من نورا للشانز

ان شاء الله ابشر راح انزل مواضيع متواليه عن باريس بأذن الله

MRK · 12-09-2015, 10:21 AM

تسلم حبيبي ابو سعد الله يرحم والديك ويرزقك ومن تحب من واسع فضله

وان شاء الله بعد الشرح وتعبك ويايي الامور بأذن الله سهالات

وبالنسبة لسويسرا حطيت موضوع بس مادري وينه حتى انا ماشفته

وياريت اعرف فيه الاحداثيات الي المفروض ازورها في انترلكن

وصولنا سويسرا ن شاء الله بيكون في 25 سبتمبر الظهر ع مطار جنيف الساعه 11:30 ومنها باسلتم السيارة وبنذهب بها الى انترلكن لكن ماعندي الاحداثيات ولا ادري وين اروح هناك غير الفندق وسمعت بالسويس باس يمدحوها او الشورت باس طبعاً ودنا اكيد نروح اعلى قمة في اوربا واخر يومين بنذهب الى زيورخ وبنفس اليوم الي نوصل فيه زيورخ بنطلع من الصباح الى يورب بارك باللمانيا وبس نخلص بنرجع يعني بنفس اليوم وسمعت ان في اوتلت قريب من يورب بارك اسمه متزيغن ودنا نروحة وبعدها نرجع زيورخ عشان رجعتنا بتكون من مطار زيورخ يوم 30 سبتمبر الساعه 7 الصباح وسكنا قريب من المطار تقريبا خمس دقايق

طبعاً فندقنا في انترلكن Hotel Berghof Amaranth من تاريخ 25 - 28

وفندقنا في زيورخ Apart Hotel operated by Hilton من تاريخ 28 - 30

اذا تقدر ترتب لي جدولها لاني ماسويت فيها شي غير حجز السيارة والفنادق ولا اعرف فيها شي من احداثيات واماكن قريبة مني

ولك خالص تحياتي ياغالي

MRK · 12-09-2015, 02:04 PM

تم وضع استفساراتي عن سويسرا بقسم سويسرا الاستفارات

وجهات أوروبية · 12-09-2015, 04:10 PM

اقتباس : المشاركة الأصلية كتبت بواسطة MRK

تسلم حبيبي ابو سعد الله يرحم والديك ويرزقك ومن تحب من واسع فضله

وان شاء الله بعد الشرح وتعبك ويايي الامور بأذن الله سهالات

وبالنسبة لسويسرا حطيت موضوع بس مادري وينه حتى انا ماشفته

وياريت اعرف فيه الاحداثيات الي المفروض ازورها في انترلكن

وصولنا سويسرا ن شاء الله بيكون في 25 سبتمبر الظهر ع مطار جنيف الساعه 11:30 ومنها باسلتم السيارة وبنذهب بها الى انترلكن لكن ماعندي الاحداثيات ولا ادري وين اروح هناك غير الفندق وسمعت بالسويس باس يمدحوها او الشورت باس طبعاً ودنا اكيد نروح اعلى قمة في اوربا واخر يومين بنذهب الى زيورخ وبنفس اليوم الي نوصل فيه زيورخ بنطلع من الصباح الى يورب بارك باللمانيا وبس نخلص بنرجع يعني بنفس اليوم وسمعت ان في اوتلت قريب من يورب بارك اسمه متزيغن ودنا نروحة وبعدها نرجع زيورخ عشان رجعتنا بتكون من مطار زيورخ يوم 30 سبتمبر الساعه 7 الصباح وسكنا قريب من المطار تقريبا خمس دقايق

طبعاً فندقنا في انترلكن Hotel Berghof Amaranth من تاريخ 25 - 28

وفندقنا في زيورخ Apart Hotel operated by Hilton من تاريخ 28 - 30

اذا تقدر ترتب لي جدولها لاني ماسويت فيها شي غير حجز السيارة والفنادق ولا اعرف فيها شي من احداثيات واماكن قريبة مني

ولك خالص تحياتي ياغالي

الله يسلمك يا الغالي
وولديك الجنه ولك بالمثل ان شاء الله على الدعوه الطيبه

اي ان شاء الله برتب لك الجدول وشغال عليه حاليا
بس ابغي ارتب لك الاحداثيات
وانا رديت على موضوعك في البوابه السويسريه
عشان تخبرني عن جهازك القارمن فيه عربي ام لا
على اساس اشرح لك الصيغه المناسبه
لان كثير تصادفهم مشاكل في القارمن من حيث الصيغه ان تكون عشريه او دقايق وثواني الى اخره

اذا عندك سياره وتقريبا المده كلها في انتر لاكن
السويس باس راح تنفعك في الدخول الى المتاحف مجانا وخصم على بعض الاماكن السياحيه والتلفريكات تقريبا خصم 50% ومجانا للمتاحف تقريبا 480 متحف
بس ماراح تفيدك بالنقل قطارات و باصات

سعرها للشخص لمده اربع ايام 251 فرنك سويسري يعني تقريبا 970 ريال سعودي للشخص الواحد

وتقدر تاخذها بالنت بس اخذها من اي محطه قطارات هناك

ملاحظه :
وقت شراء تذكره سويس باس خبرهم انكم عائله عشان يعطونكم بعض المميزات للطفل الي معاكم
وراح يعطونه بطاقه باس ثالثه مجانا للتنقل وخصم 50% على التلفريكات والمتاحف
في انواع كثيره جدا من البطاقات السويسريه
لكن اختار هذا النوع Swiss Travel Pass
واطلبها لمده 4 ايام
و ايضا اطلبها درجه ثانيه
لان الدرجه الاولى اغلى وتفيدك بالقطارات فقط
لان عندهم فقط لعدد ايام 3,4,8,15

بالنسبه لأستفسارك عن الشورت كارد
يمكن قصدك سويس باس هاف برايس
وهي تعطيك خصم بنص السعر عن التنقلات في القطارات والباصات
يعني مهب مجانيه نفس الاولى
يعني ماراح تنفعك ولاتاخذها

بالنسبه لأولت لت ميتزغن نعم ممكن تروح له وهو قريب منكم
اوت لت ميتزغن مافي محلات كثيره
ونظامه المحلات فيه كبيره الحجم
غير عن نظام الاوت لتات الثانيه انهم كلهم مجمعين في مكان معين
لكن هذا الاوت لت المحلات جنب بعض لكن منتشرين بنفس المنطقه وبعض المحلات بينهم شارع بس حلو ومناسب

وراجع لك اليوم ان شاء الله في البوابه السويسريه عشان ارتب الجدول
بس بغيت تفيدني عن القارمن الى راح تستخدمه هناك

السموحه من الاداره الكريمه على اجابتي السويسريه في هذه البوابه

تحياتي

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رحلة عائلية اوربية	وردة مكه	بوابة النمسا	8	25-12-2018 03:05 PM
رحلتي لـ فرنسا وَ ألمانيا وَ سويسرا مايو 2015	أبو نورة	بوابة سويسرا	73	15-12-2015 11:05 AM
رحلة اوربية تم الحجز لها( بريطانيا - فرنسا - سويسرا)	MRK	اوروبا	40	21-10-2015 01:08 PM
رحلة اوربية تم الحجز لها( بريطانيا - فرنسا - سويسرا)	MRK	بوابة سويسرا	13	07-10-2015 12:27 PM
جولة سياحة ما بين المانيا فرنسا و سويسرا	Amrn	بوابة سويسرا	5	08-01-2015 04:22 AM