السلام عليكم

حجزي ع الخطوط السعوديه الرياض-روما-فيينا
للاسف تغير حجزي من نفس الناقل وصار الترانزيت في روما 8ساعات في مطار فيوتشينو
حنا عائله تعتبر كبيره6كبار وطفلتين

نبغئ نطلع نتمشئ في روما نزور برج بيزا و شارع الفينتيو

سؤالي هو هل فيه شركه ممكن ترسل لنا سائق مع سياره تكون مضمونه نخلص جولتنا معه ويرجعنا المطار مره ثانيه او في باصات معينه انصحوني🌹

وايش افضل شيء ممكن أزوره في شارع الفينتيو؟
وسؤال للبنات🙈
الماركات العالميه موجوه فهالشارع اشتري منها او من فيينا او جنيف ؟ انا فكرت ان روما تكون ارخص شوي لانها الام للماركات العالميه شرايكم ؟

مرحبا اختي

يعني بتجلسون في روما تقريبا 5 ساعات
الترانزيت كله 8 ساعات
ولازم ترجعون قبل الطياره بساعتين
وساعه خروجكم من المطار عند الوصول

5 ساعات ماتقدرون تروحون برج بيزا مستحيله
يعني خلكم فقط في وسط روما
في ساحه الاسبان وشارع الماركات الي جنبه والمدرج الروماني فقط

بالنسبه للسياره مع سايق ممكن تكلمون شركه الليموزين الي بالمطار تاخذ جوله فيكم
والافضل ينزلونكم فقط في ساحه الاسبان وتتمشون وبعدها سياره ثانيه الى المطار


بالنسبه للماركات بعد تحصلونها غاليه مو رخيصه
ممكن لما تروحون فيينا تروحون لأقرب اوت لت هناك وتاخذون الماركات



بالتوفيق اختي

وبعد اختي نفس ماذكرت لج روحي ساحه الاسبان piazza di Spagna
وهي قريبه من شارع الفنتيو واقرب محطه مترو لها هي Spagna
ومن جنب الساحه سارع الماركات

العفووو اختي حاضرين لج

1- بالنسبه للمترو اذا ماخذين التذكره لمره واحده تنتهي بمجرد وصولكم المحطه الثانيه
واذا ماخذينها ذهاب وعوده يعني تروحون وترجعون للمحطه ذهاب وعوده
واذا ماخذينها تذكره مفتوحه ليوم كامل تكون معاكم بدون عدد معين من المحطات تستخدمونها في هذا اليوم بطوله وبجميع تنقلاتكم

2- لما توصلون محطه ترميني موجوده محطه المترو بنفس المكان بتشوفون لوحات للمترو واسم محطه المترو Termini يعني بالمحطه نفسها عند البوابه
واذا بتروحون الفانتيو ومعاكم الوالده الله يعطيها الصحه والعافيه وطفل الافضل تروحون بالمترو او التاكسي لاتروحون مشي


3- المدرج الروماني القديم اسمه الكالسيوم Colosseum
روحي له بالمترو افضل مش بعيد وايد من محطه ترميني بس بصراحه في مسافه للمشي ماينفع تروحون له يعني مب اقل من ربع ساعه او عشرين دقيقه
تروحون له لمترو في محطه اسمها Colosseo

والقريب من محطه الاسبان ( سبنجا ) هو ضريح الامبراطور الروماني اغسطس وهو اول مبراطور للدوله الرومانيه

خارطه توضيحيه للأماكن :

العاب


محطات المترو المهمه :

1- محطه قطارات ترميني ( محطه المترو Termini )
2- محطه المترو شارع الفانتيو ( محطه Barberini )
3- محطه المترو لساحه الاسبان ( محطه Spagna )
4- محطه المترو للضريح لاتوجد محطه مترو قريبه منه ممكن تروحون له مشي من الساحه
5- محطه المترو للمدرج الروماني الكالسيوم ( محطه Colosseo )


وبالتوفيق اختي