السلام عليكم ورحمة الله ويركاته
تقبل الله منا ومنكم صالح الأعمال وأسأل الله بمنّه وكرمه أن يجعلني وإياكم ممن صام رمضان وقامه إيمانا واحتسابا فغُفر له ما تقدم من ذنبه ..
أنا والأهل (6 بالغين وطفل) ناوين في الفترة من 31 يوليو إلى 8 أغسطس نزور أبو ظبي ودبي وأفكر بعدها أزيد 5 أيام إلى 13 أغسطس تكون تسوق فقط (لأن الأهل يبون يتقضون لعيد الأضحى من أسواق دبي)
طبعا لانفتاح دولة الإمارات بزيادة عن السابق (كما قرأت لأني لم يسبق لي زيارة الإمارات من قبل )احترت كثير في أماكن تناسب العائلة المحافظة (بعيدا عن لبس الخواجات على الشواطئ أيضا بعيدا عن أماكن الرقص والأغاني )
فهل يوجد أماكن سياحية تناسب العائلة المحافظة لو في إمارات أخرى غير دبي وأبو ظبي
في بالي هالأماكن بالنسبة لأبو ظبي :جامع زايد,قصر الإمارات,كورنيش أبو ظبي,عالم فيراري
وبالنسبة لدبي :دبي مول بالمرافق اللي فيه :كيدزانيا,والأكواريوم,برج خليفة,الإمارات مول,رحلة بالقوارب.

*في حال كان بنمر على أبو ظبي وش رأيكم ننزل في مطار أبو ظبي بدلا من مطار دبي ونجلس فيها يومين ننهي الأماكن اللي فيها وبعدها نروح لدبي بالسيارة ويكون الرجوع للرياض من مطار دبي ؟
*أبي منكم اقتراحات لمزيد من الأماكن تناسب العائلة المحافظة وهل الأماكن اللي ذكرتها فوق تناسبنا ؟
*بالنسبة لعالم فيراري هل يستحق الزيارة مقارنة بالمبلغ المرتفع للدخول ؟ ام هناك ملاهي تغني عنها تكون رسوم الدخول لها معقولة ؟
*هل اقتراحي في محله لزيادة عدد الأيام للأهل للتسوق أم تكفينا 8 أيام للتسوق وزيارة الأماكن السياحية ؟
*في حال كان اقتراح الزيادة في محله أبغى شركة تأجر سيارة بسائق لمدة ال 5 أيام بحيث تكون توديهم من السوق للشقة وترجعهم فقط لأني في ال 8 أيام الأولى بستأجر سيارة وبرجع في يوم 8 أغسطس لأن عندي شغلة ضرورية في الرياض وبترك الأهل مع أخوي لكنه ما يسوق للأسف
*بالنسبة للبحر هل هناك شاطئ في الإمارات سواء دبي أو غيرها ما يكون فيه خواجات؟ لأن ودنا نروح لشاطئ لكن ودنا نبعد عن التعرّي اللي يصير من الخواجات على الشواطئ
*بالنسبة للسكن أبي اقتراحكم في دبي وأبو ظبي للأحياء اللي تنفع لسكن العائلة بعيدا عن الملاهي الليلية؟ وإن كان أسعارها مرتفعة في الموسم هل تنصحون بالسكن في الإمارات القريبة من دبي ك الشارقة مثلا اللي تكون أسعار السكن أرخص من دبي ؟
*بالنسبة لشركة تأجير السيارات أبي أفضل شركة تكون سياراتها نظيفة ومبلغ التأمين ما يكون مرتفع وإجراءاتهم عند التأجير والتأمين غير معقدة؟
شاكر لكم مقدما
تحياتي