موضوع يحز بالخاطر

كل مرة اسافر احاول اني انشر ان الاسلام دين الخير و النظافة و الاخلاق و حب الجمال

والقى تفاعل كبير من اللي اتعامل معاهم لان صج اهم ما يقرون عن ديننا و لا يعرفون شي عنا الا من الافلام

و يفرحون لما يشوفون ان احنا متعلمين و مثقفين .. و كثير يستغربون حتى لما يشوفون الكتاب ما ينزل من يدي خصوصا في اوقات الانتظار


شنو المتعب او الصعب في ان الكل ينشر الثقافة الطيبة عن ديرته .. عن دينه ؟

و ما يقهرني الا اللي يقول والله بفلوسهم يسافرون يعني بيكفهم يسووون اللي يبونه
من يقول !!!!! يعني لو هم يجون ديرتكم و يعفسونها و يقولون والله كيفنا بفلوسنا ... ترضون ؟!!!


الجهل باللغة من اهم اسباب مخالفة القوانين

في كل مكان عام في الدول الاوروبية مكتوب شنو الممنوع و شنو المسموح ... بس من يتعب نفسه يقرا ؟

او اللي يسافر و اهوه ما يعرف اللغة و يمشي حاله بالاشارات ... لو يجيه شرطي يقول له ممنوع شلون بيفهم عليه



و اكبر مشكله ... اكبر مشكله

حب الاستعراض ... اللي انا اسميه الاستغباء ...
يسوي الواحد شي غبي ... شي غير قانوني ... يستهبل ... يسوي من نفسه حمار
اهم شي يصور و ينشر ... عشان يزيدون عدد متابعينه ... و عشان ينشهر ... لو بطريقة سلبية .. اهم شي يعرفونه الناس


شي مؤسف ... والله
وللاسف الشر يعم ... و صرنا مكروهين في بلاد اوروبا و احنا ما لنا ذنب


لازم في حل ... ماعرف شنو ... بس لازم نلقى حل !