تجربتي اليوم 9/9/2021 السفارة الفرنسية
 

صباح الخير / مساء الخير حسب ماتشاهدون الموضوع


اليوم كان عندي موعد الساعة 8:30 في مكتب التأشيرات بالرياض "السفارة الفرنسية"
جيتهم الساعة 8 سألني الحارس أي سفارة قلت الفرنسية
طلب توكلنا ثم قال اضغط على باركود زيارة تجمع

طبعا فيه ناس كان عندهم موعد في سفارة ثانية قال الساعة تسع

أول مادخلت صعدت فوق

بتحصل على طول مكتب الفرنسية

انتظرت تجي الموظفة تعطينا رقم ماطولت عشر دقايق وجت اخذت مني الاوراق

كان معي

النموذج
صورة الجواز مع صورة التوقيع
كشف حساب اربع شهور
تعريف راتب
حجز فنادق " إلغاء مجاني"
حجز طيران "وهمي"
تأمين صحي من التعاونية شينغن

الجواز الاصلي اكيد
صورة الهوية
صورة تأشيرات شينغن سابقا

رجعت صورة الهوية وصوره التوقيع في الجواز قالت مايحتاج

وقالت تعال وراي وردتني لموظفه داخل
الموظفه الثانية

بس قالت كشف حساب يكفي شهرين ورجعت ايضا صورة التأشيرات بس اخذت صورة تأشيرتين فقط
المهم ماطولت وخلصت قالت روح سدد بالمكتب الثانية رحت على طول سددت عن طريق الشبكة مبلغ 407 ريال شامل خدمة شحن الجواز بعدها رجعت للموظفه عطتني أوراقي قالت روح بصم قدامك شخص واحد
المهم صورت وبصمت
والساعة 9 وانا طالع منهم يعني الموضوع كله اخذ ساعة واحده ولله الحمد


الملاحظات :
1- الحارس منع شخص يدخل الدخان معه والولاعة .
2- الهوية نهائي ماطلبوها بس خلها معك احتياط أما موضوع الترجمة فقط يطلبون سجل الاسرة

3- لما طلعت حصلت فيه زحام بالخارج

4- الافصل يكون حجزك بدري 8 او 8:30


وإن شاء الله إذا طلعت التأشيرة علمتكم كم المدة وإن شاء تكون مرضية

الله يسعدك أبومعتز
الحمدالله جيت قبل الزحمة

وإن شاء الله مدة الجواز باقي فيه اربع سنوات ونصف

12/9/2021 وصلت رسالة أن التأشيرة تحت المعالجة وممكن تصل مدة المعالجة 15 يوم

وعليكم السلام ورحمة وبركاته

انا بالفعل زيك كان موعدي يوم 8 سبتمبر وجتني رساله يوم 9 تحت المعالجة ويمكن ان تصل المعالجة الى 15 يوم

مادري هذي رساله روتينية لجميع المتقدمين ؟؟ الاخوان الي صدرت لهم التاشيرة خلال 3 او 5 ايام عمل ياليت تفيدونا

اكيد الرسالة روتينية
وماتوقع تصل اكثر من اسبوع

إذا انت مقدم الاربعاء اتوقع الاثنين او الثلاثاء بتكون مخلصة بس موضوع الشحن بيأخرها من يومين الى ثلاث أيام
والله يسهل الامور ويرزقنا مدة طويلة

هلا أبومعتز
فعلا كلامك لكن اللي خارج الرياض زد عليه يوم اضافي شحن

تحديث 14/9/2021
وصلتني رسالة أن الجواز جاهز للتسليم


خمس أيام عمل واذا حذفت ايام الاجازة يطلع ثلاث أيام عمل


الله يوفقك ويعطونا اربع سنوات

الله يبارك فيك وربي يسعدك يالغالي

بالتوفيق يابو منار ...

وياك ربي يسعدك

كم سنة ابو منار عطوك وان شاء الله 5 سنوات

مابعد وصل الجواز

الجواز باقي فيه اربع سنوات ونصف
انا منيب طماع يكفيني ثلاث سنوات


إن شاء الله اذا وصل الجواز علمتكم كم سنة

ما شاء الله تبارك الله 😍😍 ، الف الف مبرووووك ابو منار ال 4 سنوات ، وعقبالنا ان شاء الله 😍❤

الف مبروك يابومنار ..
كيف عملت حجز طيران وهمي

الله يبارك فيك وان شاء فالك طيب خمس سنوات

الله يبارك فيك أبومعتز

الله يبارك فيك
فيه حجز وهي وهو تطلع تذكر غير مدفوعة وغير مسجلة بالنظام وفيه كذا خيار الاول تحجز عن طريق بعض شركات الطيران اللي تعطيك فرصة تصدر لك تذكر وتعطيك فرصة تسدد خلال 24 ساعة ولا يسجلون على التذكره انك ماسددت
كنت اخذها سابقا من النركية بس هل موجوده الان والا لا ماجرت


الطريقة الثانية واللي سويتها أنا مريت مكتب حجوزات طيران قلت ابغى تعطيني حجز فقط على الورق لكن يكون فعلا فيه جدولة للرحلة بمعنى يحجز لي بشكل طبيعي ثم يطبع التذكره وبعدها يكنسل الحجز أنا سواها لي حتى ما اخذ ريال واحد ممكن تحصل مكاتب تاخذ منك حاجه بسيطه 50 او 100 ريال


فيه طريقة ثالثة وهي انك تحجز تذكرة حقيقية مثلا من الخطوط السعودية بس تختار فئة التذكر امكانية الالغاء المجاني طبعا بيكون سعرها غالي بس مدام انه مسترد فماعندك مشكلة




ولك الخيار انت حسب اللي يناسبك

جعلك تسلم وبيض الله وجهك ..

الله يسعدك يالغالي