المقيمين الي طلعو فيزا شنغن ياليت تدخلو تفيدوني
 

السلام عليكم
انا مقررة اسافر أوربا لأول مره وماعندي سجل سفريات،
وانا مقيمة و كلمت مكتب دايركت عشان يزبط اموري قالو لي الخدمة نقدمها بس لسعودين،
قهروني بذا الكلام لأنهم عطول قررو انه فيزتي بتنرفض لاني اجنبيه
اتمنى من الناس المقيمه في سعوديه تشاركني تجاربهم بالحصول ع الفيزا شنغن (قريت في منتدى عن اجانب لكن ما ذكرو تفاصيل مهمة)

1_ ايش واجهو من مشاكل أو اسباب لرفض الفيزا ؟

2_ و ايش الأشياء الي تقوي موقفي وطلبي عشان اخذ فيزا؟ لاني بقدم بنفسي بدون مكتب،

3_ و ماهي افضل سفاره متساهله مع اجانب وتعطيهم فيزا بدن تعقيد وتدقيق؟
اسفه طولت عليكم محتاجة مساعدتكم
الله يسعد الجميع.

انا مو متزوجة و والدي مو بسعودية

وعليكم السلام ورحمة الله وبركاته ..
بخصوص اسئلتك حاوضح لك حسب تجربتي وفهمي ..
1- تقريبا اغلب الاسباب رفض الفيزا للمقيمين ( الجنسية وليست عامل اساسي - المهنة وكم سنة لك في نفس العمل - الراتب - كشف الحساب - سجل السفر )

2- مافي شي محدد يقوي موقفك ولكن ممكن في بعض الاشياء ممكن تلعب دور في حصولك عالفيزا ومنها ( سجل السفر بمعنى اختام وتاشيرات لعدة دول في جواز سفرك وكذلك كشف الحساب البنكي ويكون فيه مبلغ يكفي لمدة الرحلة ويكون منتظم ويكون نفس الراتب المذكور هذا ان كنتي موظفة اما ان كان احد يتكفل برحلتك لابد يكون قريب درجة اولى زي زوجك او والدك او اخوك )

3- كل السفارات نفس المتطلبات بحكم انها تاشيرة شنغن فكلها تخضع لنفس الاشتراطات والمتطلبات .. اهم شي انه المتطلبات كلها كاملة والباقي يرجع للسفارة في القبول او الرفض يعني مافي معيار معين نقول عليه السفارة هذي سهلة والتانية صعبة والخ .. لكن بحكم التجارب الناجحة للمقيمين ممكن نقول سفارة النمسا والبرتغال والتشيك وممكن فرنسا .. هذا حسب رأيي والله اعلم ..

نتمنى لك التوفيق ..

شكرا كثير للجميع 🖤

وعليكم السلام ورحمة الله وبركاته

بالنسبة للمقيمين يمكن من اكثر اسباب الرفض هو عدم اثبات او تقديم مستندات تثبت نية العودة ومغادرة منطقة الشنغن بعد انتهاء الزيارة زي ما صار معي اول مرة قدمت وكتبت موضوع عنها.

في عدة عوامل ممكن تقوي وتساعد ملفك منها :

- الوظيفة والدخل وكشف الحساب : ،
لو عندك وظيفة ولك فيها فترة جيدة وراتبك فوق المتوسط ورصيد يغطي مدة السفرة وزيادة. فهذا شي جيد واساسي ويقوي الملف. وطبعا ضروري تقديم اثبات من العمل انك بتروحي على سبيل المثال فرنسا لغرض السياحة وتقضية اجازتك السنوية ويذكر فيه التواريخ وانك بتباشري العمل بعد العودة مباشرة ، وهذا الاثبات يعتبر ضمان للسفارة

- الروابط العائلية :
مو شرط يكون في زوج او ولاد لاثبات الروابط العائلية، وبالامكان تقديم نسخة من اقاامات الاهل لاثبات انهم مقيمين معك اضافة لتقرير من العنوان الوطني وتكونوا كلكم مضافين عليه.


- المنطقية عند التقديم:
تكون مدة السفر والخطة والحجوزات وكشف الحساب كلها منطقية ومتناسقة مع بعض ، يعني مثلا البعض بروح فرنسا ويحجز في فندق واحد بمدينة وحدة لمدة اسبوعين ورصيد الحساب لا يكفي حتى ل اسبوع، فبكون الموضوع مو منطقي، والسفارات الاوروبية تدقق على الاوراق والمستندات وتعتمد عليهم بشكل اساسي باعطاء النتيجة.

- الحجوزات :
بالنسبة للفنادق عادي يكون حجزك من بوكنج والغاء مجاني ويكون الحجز ساري اثناء فترة التقديم، وحجز الطيران يكون حقيقي وغير وهمي ومدفوع بالكامل، وفي كثير شركات ممكن تستردي منها مبلغ الحجز مع خصم نسبة بسيطة

- خطة سفر:
تقديم خطة للسفر مع الايام والاماكن الي تنوي زيارتها سواء متاحف او مطاعم او مراكز تسوق .

كل ما ذكرتلك ياه فوق كان بناء على تجربة شخصية واتمنى اكون افدتك
والله يسر اموركم

شكرا كثير على تعليقاتكم افدتوني كثير ربي يوفق جميع ويسعدكم❤️🖤🙏

يعطيك العافية اخوي اجابات وافادات جميلة لموضوعي الي كتبته عن تقويه ملف التقديم للمقيم
استفساري عن هل يوجد نموذج عن خطة السفر الي حصلته الفندق والمدينة والتاريخ فقط ياليت اذا عند تزودني فيه

دول الشنقن بتعطي الفيزا على حسب الجنسية وعلى حسب اتفاقياتهم مع دولتك ..

من تجربتي ركزوا معاي أكثر شي على سجل السفر , الروابط الأسرية ، الحالة المادية ( الوظيفة وكشف الحساب ) ، و سبب السفر يعني لازم يكون سبب السفر متناسق مع جميع ماسبق.

في بعض الجنسيات بيرفضوها غالباً حتى لو اثبتي جميع ماسبق لتخوفهم من الهجرة الغير شرعية.

بالتوفيق يارب