|
تجربة مركز التأشيرات الموحد بالخبر 1 مرفق السلام عليكم ورحمة الله وبركاته قبل ساعات كنت فالمركز الموحد بالخبر لإستخراج فيزة النمسا وهذا ما حصل ، أولاً : تم رفض نموذج التقديم وهو نفس الموجود في موضوع الأخ أبو غسان في طريقة إستخراج فيزة النمسا وتم إرفاق النموذج الذي أروني إياه فالأسفل ، المهم قالت : إما تخرج لتطبعه وتعبئه من جديد أو إذهب للإستقبال لخدمتك مقابل 50 ريال لكل طلب ومعي 5 طلبات !! ( لحظة صمت طويلة ) ثانياً : تم إرجاع تعهد التأمين قالت لا نحتاجه . ثالثاً : قالت كشف الحساب هذا له 15 يوم والسفارة تبغى 14 يوم حد أقصى ورسمياً هالأوراق كلها صالحة لمدة شهر من طباعتها . طيب والحل ! إذهب للبنك واطبع كشف جديد أو أرفعلك هالكشف ونسبة كبيرة ترفض الفيزا. عرضت عليها بطاقة الماستر كارد لتقديمها محل الكشف ورفضتها تقول السفارة تريد كشف حساب ( صار الوضع رشوة 😂 ) بكل هدوء جمعت أوراقي وخرجت من المركز بدون أن أصحح أي من النقاط السابقة وسيتم تغيير الوجهة والخيرة فيما أختاره الله استطيع طباعة كشف ونموذج جديد والعودة لهم ولكن تملكني شعور سيء أحدثكم وأنا مرفق فالطلب 4 فيز شنغن سابقة ولدي خبرة بهالمركز نصيحتي : تأكد من نموذج التقديم فهم يغيرونه في يوم وليلة والطلبات تختلف قليلاً من مركز لأخر حسب ما قرأت وسمعت من تجارب الأخريين فالرياض وجدة كشف الحساب لا يتعدى 10 أيام هذا ما لدي ودمتم بخير وسعادة . |
حياك الله اخي العزيز ابو كيان انا دايما اتعامل في نفس المركز وتختلف من دولة لدولة اخر مرة كنت في الهولندية وكانو ممتازين في التعامل اعتقد الموظف معقد او تم تغير الاوراق لانها بعد فترة سوف تكون اون لاين كلها |
لو مريت احد المكاتب الى تحت وشرحت له الوضع يمكن يدلك على احسن واسرع فيزا مقابل ثمن تعطية |
و عليكم السلام و رحمة الله و بركاته لعلها خيرة أخوي أبو كيان … و أن شاء الله القادم أفضل مؤخراً كثير من الناس يشتكون من تعقيد الأمور في السفارة النمساوية و الرفض و التأخير أصبح سمة لديهم قدم على الفرنسية كثير يمدحونهم بأنهم أفضل منهم بالتوفيق |
اقتباس:
ولكن جاي من الجبيل الصناعية والحرارة يمكن 50 تعرف المشوار 😂 زعلت من هالتشدد الغير مبرر الله لا يحوجنا لهم وننتظر الأون لاين . أسعدني مرورك ، |
اقتباس:
حياك الله أخي المبدع أبو معتز مثل ما تفضلت خيرة والفرنسية يمدحونهم كثير وانا أولهم ولكن أدور الشقاء من يومي 😂 الحمد لله عالأقل أشغل نفسي الأن للتخطيط لرحلة جديدة 👍🏼 |
شكرا على نقل التجربة أفدتنا كثيرا موعدي يوم الأحد القادم في مركز الرياض والله يسهل الأمور |
وانا أولهم ولكن أدور الشقاء من يومي 😂 ههههههههههههههههههه الله يسعدك موت من الضحك دايما نور الاصعب |
اقتباس:
|
اقتباس:
|
غريب امرهم اذا ما خانتني الذاكرة واحد من الاععضاء افاد انه تغير النموذج وصار نفس اللي موجود في موضوع الاخ ابو غسان،والحين يقولون غيرناه؟! |
اقتباس:
وقبل يوميين رفضوه وتسألني الموظفة مستغربة من فين جبت النموذج كأنها أول مرة تشوفه !! |
اقتباس:
الله يعيننا عليهم، موعدي بعد اربع ايام فرع الخبر. على العموم الله يعطيك العافية على التنبيه. |
الظاهر الواحد يحتاط و يعبئ القديم و الجديد :14::14: لو يبون نموذج فنزويلا عبينه لهم |
خيرة يابوكيان يمكن التغيير افضل من سبحانه وتعالى |
اقتباس:
|
اقتباس:
ونعم بالله القادم أفضل |
اقتباس:
بعدين تلقى جوازك فسفارة فنزويلا ويقلك خدمناك على طلبك 😂 دائماً توقع كل شيء |
الله يعينك أبو كيان هذا نفس النموذج القديم اللي كان عندنا وتم تغييره بناء على طلب أحد الأعضاء قمت بالتغيير مجدداً لأني أعتقد أن هذا هو النموذج الأصح عموماً قريب يصير اونلاين ونرتاح من اجتهادات موظفين المركز لأن المشكلة بكل تأكيد فيهم أغلبهم مستجدين ويتعلم في المتقدمين :e306: |
اقتباس:
ياريت تنقل لنا تجربتك في يوم التقديم موعدي بعد اسبوعين |
اقتباس:
الله يعطييك العافية يا بو غسان ويجزاك خير على ما تقدمه |
يعطيكم العافية الحين ضعنا معهم كل اشوي لهم نموذج جديد , وشو النموذج الي نودي لهم :24: موعدي الاسبوع الجاي وانا معبي النموذج المرفق من ابوكيان , واليوم اشوف احد الاخوات تقول ان قالو لها ان في نموذج جديد عربي انجليزي طيب وينه في هالعربي الانجليزي وثاني شي كشف الحساب الي يبونه 6 اشهر ولا ثلاث اشهر ؟ والشي الثالث هل تعريف راتب مفصل ولا اجمالي ؟ ورابع شي تعهد التامين هل بس ارفق النموذج لطلبي ولا اعبي لزوجتي واعيالي وارفق لكل واحد؟ او اصور الرئيسي وواقع عليها وارفق بطلباتهم او مايحتاج يكفي بس طلبي ؟ا واخر شي مسوي تامين لي ولعيالي من التعاونية والوثيقه واحد صارت لي وللمرافقن , هل اطبع منها نسخ وارفق نسخه لي ونسخه لزوجتي ونسخه لعيالي واعتذر على الاطالة والله يجزاكم الخير |
1 مرفق اقتباس:
- كشف الحساب 3 أشهر - الراتب الإجمالي - تعهد التأمين : لكل شخص تعهد مستقل - التأمين لكل شخص نسخة مستقلة بإسمه - نموذج التقديم بالعربي والألماني أرفقته بالأسفل |
اقتباس:
|
اقتباس:
تأمين التعاونية قبلوه 👍. ورجعوا لي نموذج تعهد التأمين ما يحتاجونه. *النموذج نفس اللي ارفقه اخونا أبو كيان |
اقتباس:
|
اقتباس:
|
السلام عليكم انا موعدي تاريخ 27 سويت تعهد تامين وعبيت الابلكشين ابوكيان وكشف حساب 3 شهور وهل يحتاج تذاكر طياران وفنادق وترجمة كرت العايلة |
اقتباس:
وعليكم السلام ، حياك الله أخوي البو عينين - نموذج التقديم - كشف حساب 3 أشهر - تأمين طبي - إحضار الجواز وصورة من الجواز وصفحة التوقيع - صورتين شخصية خلفية بيضاء 3,5 *4,5 - خطاب من العمل بالراتب - حجز الطيران والفنادق - صورة من الهوية وكرت العائلة مترجم - و حجز السيارة إن وجد - صور من الفيز السابقة إن وجد - صورة من موعد الحضور لمركز التأشيرات الموحد جميع المستندات بالإنجليزي و تجد في بوابة فيزا الشنغن مواضيع الأخ ( أخر فرصة ) وإستفسارات الأعضاء وتجاربهم ، إطلع عليها للفائدة . |
السلام عليكم لي تجربة جديدة ماكملت 24 ساعة الاخ صاحب الموضوع جاي من الجبيل احنا واصلين بالليل من الرياض عشان حصلنا في السفارة الالمانية موعد قريب دخلنا وكم اخت من الموجودات معانا في الصالة ذكرو ان السفارة الألمانية مرررة صعبة في تيسير امور الشنقن لما جاء دورنا الموظف هندي وقف لنا على حجوزات الفنادق بالرغم من انها مؤكدة احنا حجوزاتنا عن طريق برنامج العطلات الموظف رفضها بحجة مافيها معلومات الفندق ومكانه قال اتصرفو قدامكم 20 دقيقة لو ماجبتوها بيضيع الموعد 🥲 كلمنا مسؤول الحجوزات وارسلنا بسرعة صورة فيها معلومات اكثر ونفس الشي الموظف رفضها اضطر ابني يحجز من جديد في بوكينق العادي حجز قابل للألغاء لكن مؤكد ومشوها لنا الشي الثاني طلبو توقيع ولي الأمر على جواز السفر بالرغم من عدم سفره كشف الحساب بإسمي والحجوزات بإسمي !!! لما جاء دور ابني الصغير قال الموظف لازم موافقة الأب !! طيب احنا مرفقين توقيع ولي الأمر على الجواز وهما كانو طالبين صورة فقط الحمد لله ولي الأمر طلب مننا ناخذ جواز سفره يمكن تحتاجونه عطيناهم الجواز ومشت الأوراق بعدين قال لازم الطفل له كفيل هناك !! تعقيد آخر انا والدته برفقته واخوه كبير وموظف !! النكتة في ان الموظف قال لابني لو حصل للطفل اي شي في المانيا بتدفع تاكس 30 الف يورو والبلد يعطي ولي الأمر جزء منها !! مدري يضحك ولا صادق !!! وقعنا واكتملت الأوراق وطلعنا وعدنا بسلام لديرتنا من تجربة فعلاً السفارة الألمانية بالخبر عسرة في التعامل وللمعلومية لما دخلنا اخذو مننا الهواتف والأجهزة وحتى السماعات الموظفة تقول ممنوع من السفارة فقط تستعملينها لو بترفعين صور او اوراق الشي اللي فيهم زين ومن حفظ الحقوق انهم عادي الورق اللي كان ناقصنا في الحجوزات استلمه الموظف عالى الراتس ومامانع بطباعته عندهم والشي الثاني انهم بيرسلونها لنا بالبريد الممتاز ماقصرو في هذي حتى لوهي بفلوس هذه تجربتي نقلتها لكم للفائدة |
اقتباس:
وعليكم السلام ، والحمد لله على سلامتكم - بخصوص رفضه حجز الفنادق صحيح ، لازم يكون مذكور فيه بيانات الفندق وإسم الضيف . - العادة نرفق خطاب موقع من الوالدين لسفر القاصر . - أيضاً لازم ترفقون خطاب تكفل بالمصاريف من أحد الوالديين - هالتشدد كان من موظف ال vfs وليس السفارة ( أنا معاه عشان ما تخسرون مبلغ التأشيرة وترفض السفارة وترجعون تحجزون من جديد ) أما إرسال الجوازات بأرامكس هذا بفلوسكم مو تكرماً منهم وأخيراً مبروك الفيزا مقدماً ✈ |
الله يعينكم على التعقيدات ومثل هالمواقف ممكن تحصل. انا الحمدلله السنة الماضية طلعت فيزا ألمانية ، ومشت أموري كلها تمام ما عدا الترجمة، ما كانت في بالي.. واضطريت اترجم بطاقات الاحوال و بطاقة العائلة. سؤال…. كم بالعادة النمسا يعطون مدة فيزا شنغن؟ |
اقتباس:
العام الألمانية أعطوني 4 أشهر النمساوية مرة أعطوني 4 أشهر ومرة أعطوني 6 أشهر قدم عالفرنسية وتوقع الأفضل |
تجربتي بالتقديم على التأشيرة اليونانية بالخبر يوم الأربعاء الماضي تاريخ 19 يوليو لقيت أقرب موعد كان يوم الأحد تاريخ 23 يوليو حجزته لبنتي عمرها 8 سنوات وباقي موعدي أنا و زوجي و ولدي 4 سنوات يوم الأثنين تاريخ 24 يوليو مالقينا مواعيد مع بعض رحنا موعد بنتي أخذوا النموذج كنت منزلتها من موقع vfs الخاص بقسم التأشيرات اليونانية ( ضروري تنزلونها من الموقع عشان مايقولون لكم هذا نموذج قديم أو خاص بسفارة أخرى ) وللمعلومية لو داخلين كلنا بنفس اليوم ماحد درى ولا سألونا عن ورقة الموعد :17: بس حسافة ماكنا مجهزين أوراقنا على اساس موعدنا اليوم الثاني ،، فقط جهزنا أوراق البنت اخذوا خطاب التكفل بالمصاريف و التأمين الطبي و ورقة فيها توقيعي وتوقيع أبوها و ورقة التعريف بالراتب حق أبوها مترجمة و نسخة من جواز ابوها وحجز الفندق و التذكرة و تفاصيل الحساب البنكي لمدة ثلاثة شهور لأبوها بالرغم كانو الأوراق كثيرة بس اخذوها صورتين شخصية وجواز السفر و ورقة عدم الممانعة من السفر كذلك أخذوا بطاقة العايلة مترجمة و بطاقة الأحوال لأبوها مترجمة كنا مترجمينها أحتياط وان شاء الله مانسيت شي :50: كان زحمة بس خلصنا بسرعة حوالي ساعتين ونص و ماخذوا لها بصمات ولا صوروها عندهم رسوم الموعد كانت 136 ريال وأخذوا في vfs رسوم 75 ريال والجواز توصيل أرامكس وخلصنا … اليوم الثاني موعدي أنا و زوجي و ولدي .. أخذوا تقريباً نفس الأوراق ولكن كشف الحساب فقط الورقة الأولى والأخيرة لي و لولدي لكن زوجي أخذوا منه الكشف كامل بالتفاصيل .. و اخذوا بصمات لي و لزوجي و صورونا عندهم … طلبوا مننا مبلغ 885 ريال تقريباً لنا كلنا بدون رسوم حجز الموعد وبسرعة خلصنا حوالي ساعة ونص والى الآن ننتظر الجوازات ترجع لنا ويارب يعطونا تأشيرات فيها مدة حلوة :e32c: |
اقتباس:
|
اقتباس:
الله يسمع منك 😅 |
نحتاج المزيد من تجارب التأشيرة اليونانية وخلال كم يوم أعطوكم :23: |
اقتباس:
:18:تحديث :18: جتني رسالة يوم الخميس العصر بأن الجوازات سيتم ارسالها للوجهة طبعاً جواز بنتي صغيرة وهي مقدمة قبلنا بيوم وجوازي 🫣😂 مدري ليه قبلهم حاولت أستلم الجواز يوم السبت ماقدرت لان لسا مافي تحديث في ارامكس على الشحنة وتواصلت معهم عن طريق الواتساب قالوا لسا ماوصل شي المهم اليوم الاحد جتنا رسايل بالجوازين الثانيات خلصوهم و سويت تحديث عن حالة الشحنات تخيلوا جواز بإنتظار ارساله للوجهة الثاني مرسلينه مع المندوب لمنطقة خطأ وبعيدة عني بحوالي ساعة الثالث لولدي الصغير لقيت رسالة من مكتب vfs الرابع الجواز في فرع الخالدية حوسة رحنا اول شي ارامكس فرع الخالدية قالوا ماوصل شي كلمناهم بخصوص جوازي وهو مع المندوب على اساس رايح منطقة الجبيل وقالوا اتصلوا على الرقم هذا و اضغطوا رقم 3 عدلوا مكان الشحنة دقينا وعدلنا ورحنا المكتب الموحد بالخبر نستلم جواز ولدي الصغير لقينا حتى جواز ابوه معه والحمدلله كل الجوازات استلمناها اليوم بالرغم كلهم توصيل لأرامكس ولكن ما استفدنا شي ماوصلوا لنا الا جواز واحد والباقي رحنا بأنفسنا نستلمهم الزبدة اليونانية ماشاء الله اعطونا فيها مدة أفضل من غيرنا الحمدلله :e328: بإذن الله سفرنا بعد يومين ذبحنا الحر و الرطوبة ، شدوا حيلكم وعطوني جدول :52: |
| الساعة الآن 03:41 PM |
Powered by vBulletin® Copyright ©2000 - 2025, Jelsoft Enterprises Ltd.
Search Engine Optimization by vBSEO