السلام عليكم
احبتي بالبداية اشكر الجميع بهذا المنتدى وبالاخص القائمين عليه والذين لهم الفضل بعد الله لوضوح الآليه كامله لمن اراد استخراج الشنغن .
بالبدايه سوف اتحدث لكم عن اغلب ماحدث معي وباللغه العاميه، طبعا مانويت السفر إلا قبل عشر ايام وحجزت رحلتي 28 اغسطس وتوقعت انو ماراح يمديني اخلص شي دخلت المنتدى اخذت فكره كامله عن كل شي رحت اخذت موعد بالمكتب الموحد بالرياض وللاسف ماطلع لي الا vib بالسفاره الألمانيه والمواعيد العاديه مغلقه استغربت ان ال vib ياخذون موعد اون لاين وبعد عشر ايام توقعت يراجعون على طول ويدفعون الفرق بالاجراء وهم واقفين الي صار دفعت موعد لي وزوجتي بقسم العوائل vib مكتب المانيا الساعه 0915 وكان المبلغ 250 ريال كل شخص 125
جيت من حفر الباطن قبلها بليله واخذت شقه حول المكتب.
يوم الخميس 4 اغسطس كان الموعد حضرت الساعه سبع ونص قبل لايفتحون ومعي جميع المتطلبات المتوقعه والغير متوقعه (مفطر ومروق ) وكان امامي سرا طويل لتفتيش دخلنا وطلعنا لتوزيع الارقام وهنا طبعا حدث شي مغاير لما يقال بالمنتدى.
كان التوزيع حسب الموعد فكانت الزحمه على بريطانيا عطوهم ارقامهم من ثمان لجميع الموجوديين وبقيه الدول ماعطوهم شي يقولون لنا قبل موعدك بربع ساعه تعال خذ رقم الي صار وقفت جنب الرسبشن الين الساعه 0850 وحسيت ان الموضفين يتشاورون نوزع ولالا صفيت اول واحد قال وش عندك قلت مابقى وقت عطني رقم عطيته الموعد عطاني رقم لفئه العاديه (single) يعني فردي قريتها قبل لاطلع من السرى قلت هذا موعد فردي عادي انا vib عائله قال ماعليش رجع واعطاني الصحيح طلعت رقم 5 وانا اول واحد لو مادققت كان ابتلشت ممكن يرجعوني الصاله العاديه واخذ موعد vib متاخر
عموما رحت مع الخط الموضوع على الارض لين وصلني الى صالات الشنغن العادي والvib لقيت موظف على الباب قلت وش نوع الرقم هذا وين موقعه قال يمين هنا وانا عارف بس لتاكيد دخلت 0900 تقريبا كان بالصاله ثلاث اشخاص قبلي واحد قبلي عرفت منه بعدين ان له ثلاث ايام عندهم يكمل نواقصه وكان اسلوبه معهم سيء وهم كذلك ردوه عشان الصور وقف وقال ( ياصديق الظاهر ابجيب فراشي هنا عندكم ) قال له الموظف بادب الصوره مهي مطابقه للمواصفات وكلمه منا وكلمه منا وقال ابطلب لك السكيورتي جب صورك ولاتجيني الا برقم واخذ رقم خمسين ؟؟
المشكله صوت برقمي بعده كانت الشاشه خربانه
قدمت كل شي له كامل رجع لي نص الاوراق وباسلوب مو حلو يقول شيل شيل بالظرف يعني لاتتراكم امام الكونتر الاوراق واستغرب اني موقع كل شي تعطل السيستم ربع ساعه ولاتكلمت معه هو سئلني كم جالس بالمانيا قلت 6 ليالي حسب الحجز امامك قال اوكيه ثم شاف مقاس الصوره المعروف 3.5 في 4.5 ثم قاس الصوره من الداخل بمسطره (لازم يكون طول الوجه بالصوره من منبت الشعر اعلى الجبهه الى نهايه الذقن بطول بين 32 و36 ملم لرجال والنساء وهذه اغلب مايرجعون الناس عليها ويقولون سوي زوم) والمعلومه ذي من موقعهم اخذت لان لغتي حليله عموما ناديت زوجتي توقع وانتهينا وقلت له ابيها تجيني بالحفر ارامكس قال قفلت الطلب وحسابك 1000 يجي اي واحد يستلمها مع الايصال وطلعت لتبصيم جنبه وعلى عشر وانا طالع واذكر الرقم 35 نصهم ماجو او راحوا لصاله غلط.
وكانت زحمه غريبه في جميع الصالات .
البلشه قلت كيف ابتابع اجراءات الشنغن زوجتي جتها رساله جوال المغرب ان الاوراق طلعت من المكتب للجوازين ورساله ثانيه
العشاء انها وصلت السفاره وانا جتني ايميل فقط .
الدروس المستفاده:
اذا رجعت عشان صوره اوغيره وانت طالع خذ رقم احتياط قبل لاتطلع تصور عشان تستفيد وقت.
اذا لك متطلبات توصيل ارامكس ورسائل جوال وغيرها قلها بدري قبل يقفل طلبك. لاتسوي زيي .
اسئل مره ومرتين ولف بالصالات عشان تاخذ فكره عن الوضع بشكل عام لاتنلطع وتتاخر.
قل لرسيبشن حق الارقام وشنوع موعدك لايلخبط ويحوسك والنظام زين.
صاله vib قليل تشوف مناديب.
حبيت انقل لكم تجريبتي بالتوفيق للجميع.

وعليكم السلام
الله يحييك بيننا

ما شاء الله
التفاصيل خطوة بخطوة
و هذا راح يفيد كثير من المتقدمين

المشكلة نفسيات الموظفين ماش من كثرالضغوط عليهم
والمفروض نوعية معينة من الموظفين اللي تقبل للعمل هذا

شكراً لطرح تجربتك ليستفيد غيرك
الله يحفظك

جزاك الله خير على نصايحك الثمينة وتوجيهاتك الكريمة

إن شاء الله تلقون القبول وتروحون وتردون بالسلامة

وعليكم السلام ورحمة الله وبركاته
مشكور على ذكر تجربتك الثريه المفيده والدروس المستفاده منها
ما قصرت ، يديك العافيه